JAMITA SIAN EVANGELIUM TU MINGGU EXAUDI TGL 28 MEI 2017

1.      Hamuna dongan sahaporseaon nahinaholongan di bagasan Kristus. Molo Jahowa (TUHAN) Jesus Kristus nunga marjanji sai na rade do manangihon hita, molo denggan tapasahat sipangidoonta tu Ibana. “Ai anggo pungu dua manang tolu pe marhitehite Goarhu, sai dongananku do nasida”, ninna Ibana (Mat.18:20). Jala akkup ni i didok Ibana do: “Angkup ni i hudok ma di hamu: Molo mardos ni roha manang dua sian hamu di tano on tumangiangkon manang hata dia pe, jaloonmuna do i sian Damang na di banua ginjang i” (Mat.18:19). Mansai burju do TUHAN i manangihon, aha na tapasahat tu Ibana. Alai unang ma holan TUHAN i  na burju manangihon hita, ikkon ma dohot hita nian burju manangihon Ibana. Ai molo so tatangihon soara ni TUHAN i, boha ma botoonta, aha lomo ni rohaNa. Molo so taboto lomo ni roha ni TUHAN i, boha ma bahenonta mambuat napinatuduhonna laho alus ni tangiangta? Ikkon do ganup ari ganup tikki hita  marsiajar manangihon TUHAN i, dohot hita  marsiajar asa gabe ditangihon TUHAN i hita.

2.      Pinuji ma TUHAN i ganup ari!, ninna parpsalmen on. Ndang adong alasan di ibana mandok asa unang pujion TUHAN i.Takkas do diboto ibana, na so holan na neang manang na tabo dipaporsanhon TUHAN i tu bangso na, tu ganup halak na porsea, naburju mangihuthon TUHAN i. Alai dohot do akka nadokdok tuhukon nasida. Nang ditikki mamorsan nadokdok i pe, ikkon tong do akka naporsea i mamuji TUHAN. Sarupa do mamorsan na dokdok dohot na neang. Nasumusa molo so adong be siporsanon. Mamorsan na songon dia pe i (naneang, nadokdok), ikkon tong do dihaporluhon naporsea i “pangurupion” sian Jahowa (TUHAN) Jesus Kristus. Molo neang naniporsan, ndang boi langgus, ai mago maon laos peut; molo dokdok naniporsan, ndang boi laos pahoihu, ai mago maon laos dilosathon. Jahowa (TUHAN) Jesus Kristus do mangurupi ganup naporsea siihuthon Ibana mamorsan, asa gabe siporsanon na marguna naniporsan i, unang gabe magopo, alai tung marguna situtu tu ngolu partondion, tu ngolu parsaripeon, tu ngolu pasahutaon dohot tu ngolu parhuriaon, laos umbidang tu ngolu parbangsoon/parnegaraon. Lam balga hagunaan ni naniporsan i, lam tu rikkotna do i porsanon.  Ndang adong pahlawan, ianggo so na diporsan mansai dokdok na marguna tu bangsona. Ala ni i, di ganup adong siporsanon, sai parsiajaran do mamuji Jahowa (TUHAN) Jesus Kristus. Bahkan sipata dohonon: Boasa paringanhu TUHAN siporsanon on?, ia tung dumokdok bahen, asal ma mansai godang gunana tu bangsoM dohot tu HuriaM.

3.      Debata ni akka hatuaon do Debata-ta i, jala guru di Tuhan Jahowa do akka haluaon sian hamatean.  Ise na mananda Debata nanisombana, i do na pasangaphon Debata i hombar tu panandaonna i. Parpsalmen on mananda Jahowa (TUHAN) Jesus Kristus Debata ni akka hatuaon, jala guru di Ibana do haluaon sian hamatean. Dao andorang so  ro dope Jesus Kristus tu portibi on, nunga ditanda bangso Israel, na Jahowa (TUHAN) Jesus Kristus do Debata ni hatuaon nasida dohot na guru di Ibana do haluaon sian hamatean. Napatakkashon na songon i do hadirion ni Jahowa, umbahen na disuru AnakNa Nasasada i, Jesus Kristus, ro tu portibi on, laho manggoki nasa bagabaga ni Jahowa naung hinatahonNa jala tarsurat di buku Padan Na Robi i, nionjar ni holong ni rohaNa di portibi on, asa unang mago (= unang hamatean) di ganup naporsea di Ibana, alai asa hangoluan saleleng ni lelengna di ganup nasida naporsea tu Jahowa (TUHAN) Jesus Kristus (ptds. Joh.3:16). Ndang na tarpajojor be godang ni hatuaon ni jolma, naung nilehon ni Jahowa (TUHAN) Jesus Kristus tu ganup na ro tu Ibana mangido hatuaon i, sian tikki ni si Adam sahat tu tikki si nuaeng on. Puncak ni pangalehonon ni hatuaon i dipatupa Jahowa (TUHAN) Jesus Kristus i ma marhite ulaon, sitaonon, hamamate, dohot haheheon ni Jesus Kristus sian namate. Marhite Ulaon, sitaonon, hamamate dohot haheheon ni Jesus, ditumpakkon Jahowa (TUHAN) Jesus Kristus tu hajolmaon: hangoluan  na sasintong na di tano on; hasesaan ni dosa, hamonangan maralohon sibolis, hangoluan na di Paradaiso, hajolmaon na masihaholongan. Silehon lehon ni Jahowa (TUHAN) Jesus Kristus na tarlumobi tu hajolmaon marhite haheheon  ni Jesus sian namate, i ma hamonangan maralohon hamatean na jorbut hinorhon ni dosa ni si Adam dohot si Hawa ( i ma hamatean dalan tu naroko),  jala ia tung pe adong hamatean, nunga dibahen i gabe dalan masuk tu Paradaiso. Molo tarenunghon i, jala taauhon tu haporseaon dohot partondionta, patut do hita angkat soara “mamuji TUHAN ganup ari”.

4.      Tongon do sai rosakan ni Debata do ulu ni akka musuna, ulu parjambulan ni akka na mandatdati marpangalaho di bagasan dosana. Molo tajahai Buku Na Badia i (Padan Na robi dohot Padan Na Imbaru) olo do adong kesan tu hita, na jotjot Jahowa (TUHAN) Jesus Kristus dilecehhon jolma, dianggap Jahowa (TUHAN) Jesus Kristus i lumea sian akka debata na asing. Si Adam dohot si Hawa sandiri nunga manganggap sepele parenta ni Jahowa (TUHAN) Jesus Kristus na mangorai nasida mangallang parbue ni hau na di parsitongaan ni porlak  na di Eden i. Ulok na robi i pe hurang pasangaphon Jahowa (TUHAN) Jesus Kristus. Di tikki bangso Israel pe di Mesir, sai songon na so diterge raja Parao do parenta ni Jahowa (TUHAN) Jesus Kristus na pinasahat ni si Musa. Raja Nebukadnezar pe merasa nunga boi manaluhon debata ni halak Israel, jala dietong   dirina jumago sian Jahowa (TUHAN) Jesus Kristus. Alai kesan do i, ndang akka sikap pelecehan na songon i ujung ni sikap ni jolma tu Jahowa (TUHAN) Jesus Kristus. Tegas do Jahowa (TUHAN) Jesus Kristus mandok nang sian mulana i, tikki mangaloalo “ulok na robi” i: “Dung i ninna Debata Jahowa ma tu ulok i: Ala dibahen ho songon i gumodang ma torungku tu ho sian tu nasa pahanpahanan dohot sian tu nasa na manggulmit di ladang. Butuham na ma jururhononmu, jala orbuk panganonmu saleleng di ngolum. Jala bahenonku ma parbadaanmu dohot boruboru i, ro di pinomparmu tu Pinomparna. Ibana mangalisathon ulum, gabe pargutonmu tambihulna” (1 Musa 3:14-15). Dirosak  Jahowa (TUHAN) Jesus Kristus ulu ni akka raja na mangalo si Abraham, dirosak Jahowa do ulu ni Sodom dohot Gomora, dirosak Jahowa do ulu ni Raja Parao, dirosak Jahowa do ulu ni bangso Israel na sai mangalo tu Jahowa (na gabe musu ni Jahowa, di bona ni dolok Sinai, na mambahen patung lombu sombaon nasida); dirosak Jahowa do raja Nebukadnezar (harajaon Babel), dirosak Jahowa do Harajaon Gorik (pinabidang ni si Alexander Nabolon), dirosak Jahowa do ulu Kesar Rom, dirosak Jahowa do akka Sintua ni Malim na mamparsilanghon Jesus Kristus. Mansai godang na boi contoh, akka na dirosak Jahowa ulu ni musuNa. Akka ulu ni i ma ulu na marjambulan na patuduhon pangalaho na anggar jago di adopan ni Jahowa, na sai mandatdati mangulahon dosa. Alai manang ise na mulak tu Jahowa, jala mananda dosana, takkas do disesai Jahowa dosana i. “Dung i sai ro ma hamu, asa mardabudabu hita, ninna Jahowa. Tung sura rara dosamuna songon abit bunga dapdap,  bontar do bahenonku songon itak; nang pe rara songon abit hasumba, gabe songon hapas do muse” (Yesaya  1:18).

5.      Hamuna dongan sahaporseaon nahinaholongan. Lao manggoki hasasaut ni nanidok ni parpsalmen on: Ro do sogot akka na sumangap sian Misir, Kus pe hapogan do marsomba tu Debata, ikkon tangi do hita, Huria Kristen, jala konsisten mangulahon nanisuru ni Jesus Kristus ulahononta: “Laho ma hamu tu liat portibi on; jamitahon hamu ma barita na uli i tu nasa na tinompa” (Mrk.16:15). “Laho ma hamu, podai hamu ma saluhut bangso, didi hamu ma nasida tubagasan Goar ni Ama. Anak dohot Tondi Parbadia! Laos ajari hamu ma nasida mangaradoti nasa hata naung hupatikkon tu hamu. Ai ida ma, sai na dongananku do hamu ganup ari, rasirasa ro ajal ni hasiangan on!” (Mat.28:19-20). Di tikki zaman ni Huria ni TUHAN Jesus Kristus tung mansai torop bangso Mesir na gabe porsea tu Jahowa (TUHAN) Jesus Kristus. Songon i nang sian tano Kus (Etiopia). Saonari on tung disosak Islam na radikal do akka siihuthon Jesus Kristus di luat i. Ala ni i ikkon lam takkas Huria Kriten manangianghon nasida, asa mulak jaya muse hakristenon ni Mesir dohot di Etiopia (Kus). Hata ni TUHAN napinasahat ni parpsalmen on, marlakku do sian zaman tu zaman, mandasdas akka siihuthon Jahowa (TUHAN) Jesus Kristus  mangulahon ulaon parbaritanaulion. Holan di tikki ni si Josep anak ni si Jakob dope adong nasumangap sian bangso ni Jahowa (TUHAN) Jesus Kristus marhuaso di Mesir. Ikkon ma di akka abad 21 dohoit 22 on boi muse anak ni TUHAN i mangarajai di Mesir  dohot di tano Kus.

6.      Hamu ale akka harajaon di tano on, endehon hamu ma Debata, palu hamu ma parhinaloan mamuji Tuhan i! Sela! Rap dohot parpsalmen on, Huria Kristen mangajak sude harajaon di tano on mangendehon Jahowa (TUHAN) Jesus Kristus, rap mamalu parhinaloan mamuji TUHAN i. Tutu nunga sian sude bangso adong pangihut ni Jesus Kristus, alai dang sadia dope i martimbanghon jolma na mansai godang dope na gabe anti-Kristus, na so olo dope gabe pangihut ni Jesus Kristus. Ikkon boi hita, Huria Kristen, pararat harajaon ni Jahowa (TUHAN) Jesus Kristus nang sian na pamajuhon parendeon, dohot pamajuhon musik parhinaloan moderen. Unang adong na sungkan-sungkan sian Huria i mamakke alat musik modern, termodern, tradisonal dohot na paling tradisional, laho mangiringi pamujion tu Jahowa (TUHAN) Jesus Kristus, asa sampe diihuthon akka bangso na asing na mauas maju ngolu nasida. Di parendeon pe nunga nian maju halak Kristen, alai ikkon lobi maju dope. Naeng ma nian ganup bangso boi mambege ende pujipujian tu Jahowa (TUHAN) Jesus Kristus diendehon Kristen i di parhataan nasida be, di melodi ni lagulagu na somal dibege jala diendehon nasida be. Anggiat marhite ende di parhataan dohot logu ni ende nasida i, gabe parsidohot pamangan nasida be mamuji Jahowa (TUHAN) Jesus Kristus. Asa boi kembanghonon ni huria i akka ende dohot logu ni ende na songon i, na ikkon tangi do huria i mambege tarsongon dia ganup bangso i di parendeon dohot di logu ni ende nasida. Sada hamunduron do i di Huria, molo so adong ende pujipujianna na marmelodi dangdut, marmelodi padangpasir, na marmelodi Aceh, na marmelodi (marlagu) Jawa, na boi diiringi gamelan, na boi diiringi tamburin, na boi diiringi musik ogung sabangunan. Unang holan naboi diiringi tarompet, hasapi, gitar, harfa dohot akka musik na somal adong di Amerika, Eropa, Rusia, Amerika Latin. Tujuan asa dohot bangso sipakke ende i mamuji Jahowa (TUHAN) Jesus Kristus.

7.      Hamuna dongan sahaporseaon nahinaholongan. Jahowa (TUHAN) Jesus Kristus ro tu tano on boi do marhitehitehon langit ni langitan, di tikki narobi nang di tikki nuaeng. Ikkon latikon do mata ni pamatang dohot mata ni partondion, asa boi berengon haroro ni Jahowa (TUHAN) Jesus Kristus na songon i. Di buku nabadia i jotjot digombarhon Jahowa (TUHAN) Jesus Kristus  ro makendaraan ombun, manang markendaraan api, na tuat sian langit ro tu tongatonga ni bangsoNa. Haroro na tongtong manguhumi manang mamasumasu. Manguhum do Ibana tu akka parjahat, jala mamasumasu do Ibana tu akka partigor. Somalna umbahen na ro TUHAN i, na laho pasahathon lomo ni rohaNa do. Boi do Ibana nian pasahathon i marhite akka panurirangNa, alai boi do nang langsung marhite soaraNa na boi begeon ni saluhut bangsoNa. Boi do Ibana mamakke parhataan naniantusan ni jolma na dietong rikkot mambege soaraNa dohot aha nanidokNa, alai boi do Ibana tong mamakke parhataan ni Ibana sandiri. Molo bahasa/parhataan ni Jahowa (TUHAN) Jesus Kristus i sandiri dipakke tikki marsoara nagogo, olo do ndang tarantusi ni jolma i. Tabereng ma di tikki na tarsilang i Jesus, gari hata Heber do dipakke mansoarahon hataNa, gari so diantusi halak Israel na disi, baliksa do didok nasida: taida ma jo atik na ro do si Elia paluahon Ibana, ala dijouhon Jesus: Eli, eli, lama sabachtani. Asa tarantusan ni naporsea hata nadihatahaon soara ni Jahowa (TUHAN) Jesus Kristus, ikkon botulbotul do jotjot marsaor naporsea i tu Jahowa (TUHAN) Jesus Kristus, asa laos boi muse ibana gabe penterjemah ni soara ni Jahowa (TUHAN) Jesus Kristus tu akka jolma na rikkot mambege  hata ni Jahowa (TUHAN) Jesus Kristus i.       

Aha ma nanaeng soarahonon ni Jahowa (TUHAN) Jesus Kristus nuaeng on? Najolo nunga disoarahon Jahowa (TUHAN) Jesus Kristus asa tongtong  bangso Israel mangaradoti akka patik ni Jahowa (TUHAN) Jesus Kristus; asa umpos rohanasida ti Jahowa (TUHAN) Jesus Kristus sian nasa tu akka hagogoon ni Mesir manang Assyur. Naung disoarahon Jahowa (TUHAN) Jesus Kristus sian Silang Nabadia i di Golgatha: (1) Ale Amang, marpamuati ma rohaM mida nasida, ai ndang diantusi nasida nabinahen nasida i. (2) Mauas Ahu! (3) Eli, eli, lamasabachtani. (4) Sadari on do ho rap dohot au di Paradaiso. (5) Ndi ma inang mi. Ndi ma anakmi! (6) Nunga marujung! (7) Sahat tu tanganmu ma hupasahat tondiku! Molo tu bangso Indonesia saonari on, soara ni Jahowa (TUHAN) Jesus Kristus mandok: Mangolu ma hamu hombar tu ojakan ni negaramuna naung huleon i tu hamu, i ma: Pancasila, UUD 1945, Bhinneka Tunggal Ika, Negara Kesatuan Republik Indonesia. Unang ma hamu masibunuan holan ala ni na marasingasing agamamuna. Unang ma hamu masipalealeaan. Ganup ma hamu mangulahon poda ni agamamuna be jala marhite i, bahen hamu ma na denggan tu donganmu sabangso, nang pe so saagama hamu. Manang ise na mambahen hakorason (kekerasan) tu donganna jolma, dang parjambar i di harajaon ni Debata na sinombana be. Unang ma nian nengel pinggol ni sude panduduk ni NKRI, alai tinggil ma mambege soara ni Jahowa (TUHAN) Jesus Kristus i.

8.      Sai  lehon hamu ma hahormaton tu Debata!  Hamuliaonna i do gumomgom Israel, jala di akka banua ginjang sahali do hagogoonna! Di patik patoluhon i didok do: “Ndang jadi dohonon goar ni Debata ianggo so ture dalanna. Ai hona uhumna do sogot akka na marsineang di goarna.” Sai parmeammeamhon goar ni Debata tarmasuk do na paleahon manang na so mangalehon hormat tu Debata. Ndang sitiruon i, halak na sai mandok goar ni Debatana, manang aha pe sitahion ni rohana. Na mangaleai Debata do molo sai pinandok goar  ni Debata, hape lao mambunu jolma na so marpipot do (Songon video na maredar nuaeng on). Jolma na mansalahgunahon goar ni Debata do molo  adong na mandok: “Dibagasan goar ni Jesus  nibunu ma ho, ale si Anu”, hape si Anu i ndang adong salana. Tung haru adong sala ni i, ndang jadi bunuon i atas goar ni Jesus, baliksa ampunan do salana i, jala loason ibana mangolu denggan jala ndang mangulahon dosa. Lehon hamu hahormaton tu Debata, ninna di psalmen on. Lapatanna, dalanhon hita parenta holong ni roha na pinasahat ni Jahowa (TUHAN) Jesus Kristus tu hita. Tapasangap Ibana di ngolunta, jala hamuliaonNa i taloas manggomgom ngolunta, asa tuat hagogoonNa  na sian banuaginjang i tu hita akka naporsea tu Ibana. Molo hamuliaon ni Jahowa (TUHAN) Jesus Kristus manggomgom hita (bangsoNa), disi ma jumpang dame nasumurung sian saluhut roha, jumpang harukunon ni akka bangso na marasing agama, kulit, parhataan dohot asal usul, jumpang haadilon sosial, na so diskriminatif, jumpang musayawarah (marria) laho mufakat (marsatahi) mambahen na denggan. Alai molo hamuliaon ni sada agama do manggoki sada bangso, ba songon akka namasa nuaeng ma masa tu bangso i: masiseatan, masirasipan, jala sude akka senjata na paling mutakhir dipakke laho masibunuan. Jadi ikkon hamuliaon ni Jahowa (TUHAN) Jesus Kristus do manggomgom hita, baru pe asa denggan situtu. Hamuliaon ni Jahowa (TUHAN) Jesus Kristus ndang hamuliaon ni sada agama i, ndang hamuliaon ni agama Kristen i, alai hamuliaon ni Debata Sitompa langit dohot tano dohot nasa isina.

9.      Sokkal do Debata, ro sian ingananNa akka na badia i! Debata ni Israel do Ibana,  silehon hagogoon dohot hamuliaon tu bangso i. Pinuji ma Debata! Ndang adong na songon Debata ni bangso Israel, i ma Jahowa (TUHAN) Jesus Kristus. Holan Ibana do Debata na songon Ibana, i do umbahen tardok nabadia situtu do Ibana. HabadiaonNa i mambahen Ibana sada Debata na sokkal situtu, na so hajonokan ni manang ise, ianggo so olo Ibana jonokan. Nang pe dipillit Ibana bangso Israel gabe bangsoNa na khusus, tong do Debata ni sude bangso na di liat portibi on Ibana, diakui manang so diakui ganup bangso i Ibana Debata nasida.  Ala ni i do, molo ro sada bangso na so mananda Jahowa (TUHAN) Jesus Kristus mangido gogo sian Jahowa (TUHAN) Jesus Kristus, ndang ditulak i, alai dilehon do gogo tusi. Songon i do nang tu namangido hamuliaon sian Ibana, tong do dilehon Jahowa (TUHAN) Jesus Kristus i, asa tung haru boi dumenggan hajolmaon on mangolu, songon na nisakkapan ni Jahowa (TUHAN) Jesus Kristus. Takkas do dipatuduhon Ibana diriNa, na so holan TUHAN ni Israel Ibana, alai TUHAN ni sude bangso dohot nasa natinompa do. Ndang holan TUHAN ni akka naburju Ibana alai dohot TUHAN ni akka najukkat, akka parjahat. Ditanganna do panguhumon, jala Ibana do manguhum akka na mangolu dohot na mate. Tama do pujion Debata na songon i. Tapangiar ma soaranta mamuji pasangaphon Jahowa (TUHAN) Jesus Kristus, Taendehon ma pujipujian tu Ibana, jala tangi ma hita di soaraNa. Asa tung takkas hita dohot tarpasupasu. Amen.

Pematangsiantar, 20 Mei 2017. Pdt. Langsung Maruli Sitorus (Pdt. LaMBaS).