JAMITA SIAN EVANGELIUM TU MINGGU I DUNG TRINITAS TGL 18 JUNI 2018

1.    Na di ari minggu tgl 11 Juni 2017 nunga tarayahon Minggu “Trinitas”, minggu  “Hasitolusadaon”  ni Jahowa ’Elohim, TUHAN Allah, Jahowa Debata, Jahowa Zebaoth, Sitompa langit dohot tano dohot nasa isina, Sitompa nasa parangan parnabuaginjang, jala Sitompa akka ’elohim (akka debata, manang na dipardebata akka jolma na lilu haporseaonna). Tarayahon “Hasitolusadaon” ni Jahowa, ndang na ala hea adong tolu debata na gabe sada, manang tolu allah na gabe sada. Ndang! Alai tarayahon “Hasitolusadaon” ni Jahowa, ala nunga tung takkas Sasadasa do Jahowa Debata, dung hea Ibana, Nasasada i, mangula jala patudu diri dohot pambahenanNa takkas AMA tu nasa natinompaNa, tarlumobi di tongatonga ni bangso Israel, bangso napinillitNa i, jala hea Ibana, Nasasada i, mangula jala patudu diri dohot pambahenanNa takkas ANAK di adopan ni AMA i, nasinuru ni AMA i pasauthon sakkap hatuaon dohot haluaon na nitahi ni AMA i patupa hatuaon dohot haluaon di nasa natinompaNa i. ANAK i margoar JESUS (JESHUA = Jahowa Paluahon/manselamathon); jala hea Ibana, Nasasada i, patudu diri dohot pambahenanNa takkas TONDI PORBADIA na manungguli jolma asa dijakkon hangoluan, haluaon dohot hatuaon naung pinatupa ni Jahowa, Debata Nasasada i, jala laos mandongani ganup naporsea di pardalanan ni ngoluna be. Nunga tapestahon i di taon 2017 on. Dinatapestahon Hasitolusadaon ni Jahowa ’Elohim mulak rata jala paratarataonta do di haporseaonta visi (sakkap panatapan) ni Jahowa taringot tu natinompana, jolma manisia, bangso napinillitna dohot bangso naung tinobusna, i ma pajongjong manang manjadi harajaon malimmalim jala natinompa (bangso/jolma) nabadia  saluhutna i di adopanNa, tarlumobi ma bangso napinillit manang naung tinobusNa i, songon sada tiruan tu saluhut natinompa ni Jahowa ’Elohim.

2.      Molo pajongjong sada bangso/huria manang punguan di portibi on, ikkon do takkas visi (sakkap panatapan) ni bangso/huria manang punguan i. Visi ni bangso Indonesia pajongjong NKRI i ma asa adong pamarenta negara Indonesia na mangaramoti saluhut bangso Indonesia dohot sude luat “hausean ni mudar” ni Indonesia, jala laho padengganhon hasonangan ni hajolmaon, pacerdashon ngolu ni bangso, jala dohot patupahon hataraturon ni portibi on na marojakan tu hamardekaon, hadameon na manongtong dohot haadilon sosial.[1] Visi ni Huria Kristen Indonesia: menjadi huria “yang kuat iman, misioner, modern dan dedikatif sebagai hamba Kristus” (gabe huria na gogo haporseaonna, namanindangi, namoderen, jala namarpambahenan na denggan, songon naposo ni Kristus). Visi ni Jahowa tikki manompa langit dohot tano dohot nasa isina: Asa tung denggan situtu saluhutna, jala asa marpinompari ganup namangolu natinompaNa i, jala tong tung denggan situtu. Visi ni Jahowa tikki manompa jolma i takkas didok: Asa adong jolma i mangula jala mangaramoti “porlak Eden” napinukka ni Jahowa, jala marpinompari, sopar, gokanna tano on, patundukonna, rajaanna dekke na di laut dohot pidong na martonga langit, ro di sude binatang dohot akka na manjirir di atas tano on. Ikkon eakan ni jolma i non i, laos pataridahonon na, na ditompa Jahowa nasida tumiru rupa ni Jahowa jala tudos tu pangalaho ni Jahowa.  Visi na dipasahat Jahowa tikki manjou si Abraham laos parmulaan ni bangso Israel: asa gabe bangso na bolon, jala goarna balga jala gabe  pasupasu ibana (nasida) tu akka mamasumasu ibana (nasida), jala gabe bura tu akka na mamburai ibana (nasida). Gabe malim do si Abraham di adopan ni Jahowa, dung bukkas ibana sian tano hatubuanna (Ur na di Kasdim), jala ditinggalhon huta Haran, dung i mian di tano Kanaan, tano silehonon ni Jahowa tu ibana dohot tu pinomparna. Ulaon panombaon tu Jahowa, jala gabe malim di adopan ni Jahowa ditorushon anak ni si Abraham do (si Ishak) dohot pahompuna (si Jakkob). Di Mesir, nang pe naung torop maribur bangso Israel, ndang boi nasida takkas manomba Jahowa jala pajongjong hamalimon nabadia di tano inganan parhatobanan namasa tu nasida. Dung ditangihon Jahowa anggukangguk ni bangso Israel di Mesir, dijou jala dipillit Jahowa do si Musa, na lari sian jabu ni Pharao Mesir tu Midian, di parhorsikan Sinai,  manguluhon bangso Israel tu dolok Sinai, laho mamele Jahowa Debata (jaha 2 Musa 3:18c).  Naeng pajongjong sada hamalimon di adopan ni Jahowa nasida di dolok Sinai.  Nunga marguru si Musa sian si Jetro, simatuana na di Midian, boha pajongjong hamalimon. Dung dipatarida Jahowa dirina tu si Musa, jala dipaboa Jahowa goarNa tu si Musa, sakkap pajongjong panombaon tu Jahowa (= hamalimon di adopan ni Jahowa) do dibahen si Musa alasan mangido tu Pharao, asa diloas ruar bangso Israel sian Mesir. Dung i ninna Jahowa ma tu si Musa: Laho ma ho tumopot raja Firaun, jala dok ma tu ibana: Boti tona ni Jahowa: Loas ma laho bangsongki, asa disomba nasida Ahu” (2 Musa 8:1; ptds: 8:20; 9:1,13; 10:3, 7, 8, 11, 24, 26; 11:8). Si Aron ma muse dibahen si Musa gabe uluan ni malim di ulaon hamalimon di adopan ni Jahowa. Dung saut bangso Israel haruar sian Mesir, dung tolubulan nasida mardalan, dipaboa Jahowa ma sakkap panatapan  (visi) ni Jahowa umbahen na diparuar nasida sian Mesir, i ma: “Manjadi harajaon malimmalim ma hamu di Ahu, jala bangso na badia” (2 Musa 19:6a).

3.      Asa boi visi ni bangso Indonesia na pajongjong NKRI, diaturhon do nang misi na ikkon siulaon ni bangso Indonesia, so mardiaimbar, jala ikkon kompak saluhutna mangulahon i. Misi ni bangso Indonesia i ma: Diaturhon ma hamardekaon ni parbangsoon Indonesia di bagasan sada Undang-Undang Dasar Negara Indonesia, na marrumang sada susunan Negara Republik Indonesia na martampuk (marhaoloon) tu rakyatna marojakan tu: Hatuhanon na tung sasadasa; Hajolmaon na adil jala maradab; Hasadaon ni Indonesia; dohot Harakyaton na niuluhon ni hikmat habisukon di bagasan parriaon/pangwakilhonon, jala takkas patupahon sada Haadilon Sosial tu suluhut rakyat Indonesia.[2] Misi on ma na dijabarhon di ganup bab, pasal dohot ayat ni Undang-Undang Dasar RI 1945 i. Molo misi ni HKI asa boi jumpangna visi ni HKI, takkas do disurathon di isi ni sude Tata Dasar, Peraturan Rumah Tangga, dohot Hukum Siasat Gereja HKI na marlakku nuaeng. Misi na ikkon ulaohonon ni bangso Israel, asa tung takkas nasida sada harajaon malimmalim jala bangso nabadia diaturhon Jahowa: (1) ikkon tangihonon ni bangso ni Jahowa i suara ni Jahowa; (2) ikkon radotan ni bangso ni Jahowa i padan na binahen ni Jahowa tu bangso i. Nadua on ma dipaboa di turpuk on, alai mansai godang dope misi na ikkon ulaon ni bangso Israel didok di bagasan Bibel i (misalna: mangulahon patik ni Jahowa, diudut ni turpuk on dijalo si Musa do Patik Na 10 i sian Jahowa).

4.      Songon dia ma rumang ni harajaon malimmalim i? Andorang so jongjong harajaon ni Israel (na dimulai sian Raja Saul, raja Daud dohot satorusna taon 722 asK di Utara; 586 asK di Selatan), sai diuji bangso Israel do pajongjong hamalimon di tongatonga nasida. Si Josua ma uluan ni bangso, jala pomparan ni si Aron ma na gabe malim. Nang di tikki ni akka Panguhum, sahat tu si Samuel (Panguhum na parpudi) tong do sai diuji nasida pajongjong harajaon malimmalim i. Alai ganup marga nasida, masibahen pusat ni hamalimon nasida, na digoari akka namalo zaman moderen: amphyktioni (pusat parsombaan). Diuji nasida mangolu hombar tu patik ni si Musa. Panguhum ma uluan nasida, jala malim ma uluan ni paragamaon nasida. Alai marserak do bangso Israel i. Di zaman ni si Saul, Bethel ma pusat ni hamalimon ni bangso Israel. Alai dung bangkit si Daud gabe raja, gabe Jerusalem ma dibahen ibana pusat ni harajaon Israel laos pusat ni hamalimon di bangso Israel. Dung maponsa harajaon Israel, di bahen si Jerobeam do pusat ni hamalimon na sandiri di Bethel, jala dinasti ni si Daud mambahen pusat hamalimon di Jerusalem. Gabe so takkas do harajaon malimmalim i di tikki ni akka harajaon i. Alai dung mulak bangso Israel sian habuangan, jala ndang adong be raja na mangarajai Israel, ala gabe bagian propinsi ni harajaon ni Babel dohot Persia, laos udut gabe bagian propinsi harajaon ni Gorik, dung i gabe bagian propinsi ni Harajaon Roma di zaman ni Jesus. Di akka zaman on, dipajongjong akka sintua ni malim do Harajaon malimmalim ni Israel na marpusat di Jerusalem. Mangula do si Ezra patota patik ni si Musa, dohot akka malim Lewi laho patota hamalimon di tongatonga nasida. Di tikki on ma tubu panghirimon taringot tu Mesias na mar-hamalimon (Mesias imami)  naeng ro, ndang be manghirim di Mesias – na marharajaon (Mesias-rajani) naeng ro tung tonga ni Israel. Alai digoki do panghirimon Mesias na dua massam i di haroro ni Jesus Kristus tu tongtonga ni halak Jahudi/Israel. Jesus do raja Mesias nahinirim ni bangso Israel, jala Jesus do malim Mesias na hinirim nasida. I do na pinajongjong ni Jesus laho manggoki visi ni Jahowa na nipadanhonna tu bangso Israel marhite si Musa najolo. Di bagasan Jesus Kristus jongjong do harajaon malimmalim di tongatonga ni hajolmaon, jala ikkon marsinondang harajaonna i tu sandok liat portibi on. Sude nasa pangisi (warga) ni harajaon malimmalim di bagasan Kristus ikkon manangihon suara ni TUHAN Jahowa Jesus Kristus, jala ikkon mangaradoti padan ni TUHAN Jahowa Jesus Kristus naung niihot ni Jahowa tu saluhut hajolmaon tarlumobi tu huria ni Jesus Kristus. Patik holong ni roha dilehon TUHAN Jahowa Jesus Kristus na ikkon siulahonon (misi) ni sude warga negara harajaon malimmalim i. Didok apostel Petrus do tegas jala takkas: “Alai marga na pinillit do hamu, hamalimon na raja, bangso na badia, houm na ginomgomanna, asa tung dibaritahon hamu denggan ni harohaon ni Ibana, naung manjou hamu sian na holom tu hatiuronna halongangan i” (2 Ptr.2:9).

5.      Bangso nabadia (bangsa yang kudus; goyi qadoš; holy nation; heiliges Volk). Ikkon badia nasida ala nabadia do Jahowa nasinomba nasida (3 Musa 19:2; 3 Musa 11:44.45; Mat.5:48; 1 Ptr.1:15. 16). Nabadia i ma na pinapulik asa marhadirion dohot marpambahenan na tandi (dengganna) sian akka na asing. Ala tung mansai tandi do TUHAN Jahowa Jesus Kristus marbandinghon akka naadong sian natinompaNa i, bangso ni Jahowa i pe tung ikkon tandi do di hadirion, di pambahenan, di kultur, dohot di akka na asing, marbandinghon akka bangso na asing. Jahowa na sinomba nasida, Sasadasa do sombaon nasida. Agama Israel takkas ma ikkon agama monoteis, alai ndang monoteis na kaku-mekanis, alai monoteis na hidup-dinamis, na haadongon ni Jahowa i marguru tu lomoNa sandiri. Budaya ni bangso ni Jahowa ikkon budaya na marroha pangoluhon, ndang marroha pamatehon. Ngolu ni bangso ni Jahowa Jesus Kristus pe ikkon ngolu na marpanghophopon, ndang ngolu na mampulaksaehon (menghancurkan). Mardomu tusi ma tung mansai rikkot manangihon suara ni TUHAN Jahowa Jesus Kristus; dohot mangaradoti padanNa tu bangsoNa.

6.      Manangihon suara ni Jahowa. Ikkon adong do hamaloon na khusus asa boi tangihonon suara ni Jahowa, songon hapandeon ni si Musa. Hapandeon ni si Musa: Adong di si Musa haporseaon na togu tu Jahowa, na so humordit ia tung pe mansai gogo suara ni akka na asing. Diantusi si Musa hata na dihatahon Jahowa tu si Musa. Boi do si Musa mamakke parhataan (bahasa) ni Jahowa dohot mangantusi parhataan (bahasa) ni Jahowa. Ala bangso Israel ndang mangantusi parhataan (bahasa) ni Jahowa, gabe si Musa ma namanterjemahon hata ni Jahowa tu bangso Israel, jala napinaboa ni si Musa i di parhataan (bahasa) na niantusan ni bangso i ikkon tangihonon ni bangso Israel. Dipaboa di 2 Musa 19:16 “Tole patoluarihon, disi torang ari, masa ma angka soara ronggur dohot hilap dohot ombun manorop di atas dolok i, jala soara ni sarune mansai gogo, gabe tarsonggot ma sandok bangso na di parsaroan i.” Alai ndang dope i “parhataan” ni Jahowa, holan boaboa haroroNa dope i. Hata ni Jahowa i ma Patik na Sampulu i (2 Musa 20), na dihatahon Jahowa tu si Musa, dung i dipasahat si Musa tu saluhut bangso i, asa gabe siulahonon (= misi) nasida, asa tung tarida jala dapot visi na ditotophon Jahowa tu nasida (manjadi harajaon malimmalim dohot bangso nabadia bangso Israel i). Mansai godang dope suara ni Jahowa na dipasahat Jahowa tu si Musa, dung i di pudian ni si Musa tu/marhite akka panurirang ni Jahowa, dung i dibukkuhon akka hata i (gabe Padan Na Robi); dung i marhite HATA ni Jahowa na gabe JOLMA, i ma marhite JESUS KRISTUS. Saonari sude hata ni Jahowa i dibukuhon gabe buku nabadia (PADAN NA IMBARU, tamba ni Padan Na Robi), na gabe “pedoman” ni haporseaon dohot pangulaon, asa botoon jala tau akka naporsea sinuaeng manangihon suara ni Jahowa, asa unang lilu ganup naporsea i, molo tung mansai godang akka suara na tabotabo marsaringar di ganu-ganup zaman tarmasuk di zaman nuaeng on. Manangihon suara ni Jahowa marhite Buku Nabadia i, tarmasuk ma i dalan (misi) laho mangeahi visi “manjadi harajaon malimmalim dohot bangso nabadia”, na ikkon sipatuduhonon ni bangso ni TUHAN Jahowa Jesus Kristus.

7.      Mangaradoti Padan na binahen ni Jahowa tu bangsoNa. (Berpegang pada (memeliharakan) PerjanjianKu) (ušemartem et-berîtî) (keep my covenant) (meinen Bund halten). Nunga tung mansai godang padan ni Jahowa tu hajolmaon, tarlumobi tu bangso Israel dung i tu Huria Kristen. Diihot Jahowa do Padan tu si Adam, mandok: na so jadi panganon manang jamaon ni si Adam parbue ni hau parbinotoan ni na denggan dohot naroa na di parsitongaan ni porlak na di Eden i. Nunga taboto aha akibatna, dung dilaosi si Adam padan binahen ni Jahowa i. Diihot Jahowa do Padan tu si Noak, na dipaboa di 1 Musa 9:8-17. Mago do ganup bangso na mangose padan na binahen ni Jahowa i (tukkup Babel; Sodom dohot Gomora). Diihot Jahowa do Padan tu si Abraham (1 Musa 12:1-5). Tarpasupasu do Israel molo diradoti nasida Padan ni Jahowa na tu si Abraham, ompu nasida i. Diihot Jahowa do Padan dohot bangso Israel na haruar sian tano parhatobanan nasida tano Mesir. “Hupahot do huhut padanHu tu nasida, mangalehon tu nasida tano Kanaan, tano paisolatannasida” (2 Musa 6:4).  Diingot Jahowa do padanNa on (2 Musa 6:5). I ma tano bahen inganan ni Israel pajongjonghon harajaon malimmalim dohot bangso nabadia di adopan ni Jahowa. Bangso Israel pe ikkon mangaradoti Padan nabinahen ni Jahowa tu nasida, asa dohot nasida taruli ala Padan i. Aha ma siradotan ni bangso Israel taringot tu padan ni Jahowa i? Dung dibege nasida suara ni Jahowa, ikkon ma bahenon nasida parenta ni Jahowa i gabe amudi ni ngolu nasida. Ikkon radotan nasida patik ni Jahowa i di bagasan ngolu nasida siganup ari. Molo naeng nasida masuk tu tano nanibagabagahon ni Jahowa, ikkon holan sasada Jahowa ma ’Elohim di nasida, ndang boi adong ’elohim na asing sombaon nasida, ai molo tung adong pe na dietong jolma ’elohim (akka ilah, dewa-dewi; sombaon), akka natinompa ni Jahowa do i, jala ndang pantas ’elohim dia pe i na gabe sisombaon nasida. Ai dao tumoru i sian Jahowa na manompa langit dohot tano dohot parangan parbanuaginjang dohot parbanuatonga nang parbanuatoru pe. Ruhut-ruhut ni hajolmaon pe ikkon radotan ni bangso Israel di harajaon malimmalim i. Asa botoon ni bangso i sude na i, disurathon do i di 5 buku ni si Musa i. Ikkon gabe pasupasu bangso Israel i tu saluhut bangso, tu saluhut nasa natinompa. Hata ni halak an mandok: Ikkon gabe rahmat nasida tu nasa pangisi ni alam semesta on. Ndang boi asa mambunu jolma. Ndang boi mambunu jolma mangasahon goar ni Jahowa ’Elohim, laos boha pe jahat ni jolma i. Ikkon sejahtera do bahenon nasida akka anakkon na sopot so marama so marina; ikkon ondihonon nasida do akka jolma na ro (orang asing) na adong di tongatonga nasida. Lan dope, sipatupaon ni bangso Israel dalan nasida laho mangaradoti padan ni Jahowa. Dibereng ma i sian buku nabadia i.

8.      Sada tumpal silehonon ni TUHAN Jahowa Jesus Kristus tu bangsoNa, na olo manangihon suaraNa dohot mangaradoti padanNa, i ma bahenon ni Jahowa nasida gabe hasianNa. Hasian i ma harta kesayangan; milik; s^egullah; peculiar treasure; Eigentum). Hasian i ma anak mata, na niramotan songon pangaramotion di anak ni mata; arta na tung mansai arga situtu; jala molo mago arta on, nunga doshon na mago sude harajaon ni raja na manghasiani i. Somalna, hasian ni raja do pangeran na naeng jala dipersiaphon manggantihon raja molo dung dapot tikkina. Ndang hasian didok TUHAN  Jesus Jesus Kristus akka nahinasiananNa, alai “aleale” do (Joh.15:14), i ma akka na mangulahon patik ni TUHAN Jahowa Jesus Kristus. “Aleale” ni TUHAN Jahiwa Jesus Kristus do saluhut siihuthon Jesus ala naung dipabotohon do tu nasida saluhutna naung binege ni Jesus sian AMA i (ptds. Joh.15:15b).  Tung hasian situtu do aleale. Ai songon nidok ni Batak Toba: Sirang maraleale lobian na matean ina. Jadi tung hasian situtu do alelae ni TUHAN Jahowa Jesus Kristus.

9.      Sada na tung mansai sitiruon dipaboa di turpuk jamita on, tanda ni na olo bangso Israel gabe harajaon malimmalim, i ma pangundukon nasida tu hata ni Jahowa. “Jadi sahata ma sandok bangso i mangalusi, akka didok nasida ma: “Saluhut na pinaboa ni Jahowa, bahenonnami ma!” Ndang adong di tongatonga nasida na tampaktampak hundul pulikpulik pandohan, alai tung rim do tahi dohot hata nasida mangoloi Jahowa; jala tung tampakna do tajomna di pangoloion nasida i. Sude bangso i masibahen gogona, tikkina, pikkiranna, sinadonganna lao mangoloi Jahowa dohot mangulahon aha na diparentahon Jahowa. Porlu do tiruon ni punguan ni Huria Kristen haoloon na songon on. Ndang ala napinaksa nasida mambahen lomo ni roha ni Jahowa. Diboto bangso i do, tung mamora, gabe, sangap jala tung sonang situtu do nasida molo satahi saoloan nasida patupahon lomo ni roha ni Jahowa. Hatop do tareakan visi ni bangso ni Jahowa Jesus Kristus molo satahi saoloan bangso ni Jahowa Jesus Kristus mangulahon dohot mambahen lomo ni roha ni Jahowa. Songon i do nang di huria Kristen na adong sinuaeng. Molo ndang adong “penghianat” ni Huria, ndang adong pandita na manggugai huria i, pasti dapot tarida do naung dieaki visi ni huria i. Nunga Sahata huria Kristen mandok: Ahu porsea... dst; sahata mandok: Ahu ‘anak TUHAN’, tontu mansai doras ma mardalan ulaon pararat Harajaon Banuaginjang i naung binoan ni Jesus Kristus tu hasiangan on. I do hataridaan ni Harajaon malimmalim i, jala akka pangisina tung takkas bangso nabadia. TUHANta ma mamasumasu bangsoNa, Huria Kristen na adong di tongatongata.