JAMITA SIAN EVANGELIUM TU MINGGU III DUNG EPIPHANIAS TGL. 22 JAN 2017
MATEUS 4:18-25
4:18
Dung i di na mardalani Jesus di topi ni tao Galilea, diida ma disi dua halak na
saama na sumampakkon jalanasida tu tao i, ai pardekke do nasida; i ma si Simon
na margoar si Petrus dohot donganna saama si Andreas.
4:19 Dung i ninna ma mandok nasida: Ihuthon hamu ma Ahu; bahenonku do
hamu gabe sijala jolma!
4:20 Dung i pintor ditadingkon nasida ma jalanasida i, laho mangihuthon
Ibana.
4:21
Dung laho Ibana sian i, diida ma muse dua halak na asing na saama, i ma si
Jakobus dohot anggina, si Johannes, anak ni si Sebedeus, akka na pauliuli
jalanasida hundul di bagasan paraunasida rap dohot si Sebedeus, amanasida i.
Jadi dijou ma nang nasida.
4:22
Dung i pintor ditadingkon nasida ma parau i dohot amanasida, laho mangihuthon
Ibana.
4:23
Dung i didalani Ibana ma sandok luat Galilea laho mangajari di akka parguruan,
mamaritahon Harajaon i huhut pamalum nasa sahit dohot na niae ni halak na
disini.
4:24
Jadi tarbarita ma Ibana ro di liat tano Siria, pola dipamboan halak tu joloNa
nasa na hansitan, akka parsahit na ragam dohot angka hasonggopan ni akka
sibolis dohot akka na solpot bulan on ro di akka na sarion, gabe dipamalum ma
nasida saluhutna.
4:25
Jadi mansai torop ma halak mangihuthon Ibana, akka na sian luat Galilea, sian
Dekapolis (Sampulu huta), sian Jerusalem, sian Judea dohot sian luat na di
bariba ni aek Jordan.
OLO GABE
SISEAN NI TUHAN JESUS KRISTUS
1.
Hamu dongan sahaporseaon di bagasan holong ni
TUHANta Jesus Kristus, Hapataran ni Jahowa Debata Sitompa langit dohot tano
dohot nasa isina. Dame ma di hamu dohot pasupasu na sian TUHANta. Dung dimulai
TUHAN Jesus ulaonNa marhite natardidi Ibana di batang aek Jordan, lao do ibana
tu halongonan marpuasa 40 ari 40 borngin. Dung male Ibana, diunjuni Sibolis i
ma Ibana. Ikkon diuji do Ibana atik na boi monang maralohon panggoda ni Sibolis
i. Molo monang do Ibana ipe asa boi Ibana manariashon naung songgop harajaon
Banuaginjang i tu tano on. Ianggo talu do di pangunjunan i, tumagon ma unang
ditorushon ulaon naung nimulaanNa i. Songon i do nang akka pangihut ni Jesus,
namamulai hangoluan naimbaru di tano on:
Ianggo talu do pangihut ni Jesus i maralohon unjununjun ni Sibolis i, tumagon
ma Ibana mulak tu bortian ni inana muse. Sian parmulaan ni ulaon i pe, nga
ikkon tahan uji akka pangihut ni Jesus, songon Jesus niihuthon nasida.
2.
Dung monang Jesus maralohon unjununjun ni Sibolis i,
diboto Ibana do situasi politik na masa tikki i di tano Israel, naung nirajaan
ni si Herodes Antipas, anak ni si Herodes nabolon i. Diboto Ibana do na lam tamba
fanatik jala tamba radikal akka Sintua
ni Malim, Parise, Saduse dohot Sibotosurat, dohot akka pangihutnasida. Nunga
dipatakkuphon nasida tu pamarenta Rom akka nadirajumi nasida manimbil sian
patik ni si Musa. Nunga ditakkup si Johannes Pandidi, jala dihurunghon. Sadar
situtu do Jesus, na so holan Sibolis i be na gabe alona, alai nunga dohot akka
jolma na mandok dirina Siramoti Paragamaon ni Jahudi siihuthon Jahowa ’Elohim (Forum Pembela Agama Jahudi/FPAJ). Asa
boi Ibana patolhas hasasahat ni Harajaon Banuaginjang i, takkas do dianalisa
Jesus didia Ibana boi manjamitai akka jolma, asa unang pintor mate boni na
sinuanNa i so jolo martumbur, songon naniae ni si Johannes Pandidi. Dapot Jesus
do kesimpulan, asa di Galilea ma jolo Ibana mangula, di akka huta na adong di
luat Zebulon, Naftali, dohot di luat Dekapolis (Sisampulu Kota) na humaliang
tao Galilea. Dipillit Ibana do markasna di Kapernaum, kota di pinggir tao
Galilea jala pelabuhan ni akka pardekke (nelayan).
Sian cara kerja ni Jesus on, dapot do parsiajaran, na ikkon bisuk do hita lao
pararat Harajaon Banuaginjang i, dohot lao manjamitahon Barita Nauli i tu akka
jolma. Ikkon analisaon do didia inganan
na boi mangula, boha situasi politik, boha paradaton, boha ragam ni akka jolma.
Jala dung dianalisa, buaton ma hasimpulan na tepat, na pas jala toho. Tujuanna:
Asa sanga pajongjongon Harajaon i di inganan/luat i, jala asa situasi politik na
masa di luat i tong dope mandukung tu ulaon i, huhut hajolmaon na disi boi
manjakkon Harajaon dohot Barita Nauli i. Sian i ma mangerbang ulaon i tu luat
naumbidang. Sian Galilea, Jesus mangula, asa sahat tu Jerusalem tarbarita
HarajaonNa, Harajaon Banuaginjang i.
3.
Dung ditontuhon Jesus pusat inganan sian dia Ibana
bergerak mangula ulaon i, diboto Ibana do rikkotna adong donganNa mangula ulaon
lao papatarhon Harajaon Banuaginjang i di luat i. Diusahahon Ibana do mangalului
jolma na boi gabe siseanNa sian tonga ni akka guru agama ni Jahudi, manang akka
parfisafat, manang akka namora, akka na malo (na digoari nuaeng professor). Alai
nadapotNa tikki i: pardekke, sijalobeo, pengangguran
(na so adong karejona), zelotis. Parjolo dijou jala dipillit Ibana siseanna
opat halak sian pardekke (sijala dekke) manang na karejo di tao, songon na dipaboa
di turpuk on. Si Simon Petrus dohot si Andreas, na marhaha maranggi. Si Jakobus
dohot si Johannes, na marhaha maranggi. Mansai porlu do hape di Jesus gabe
siseanNa akka jolma na marhaha-maranggi. Marhite i, naeng patar tu hajolmaon,
holong parhahamaranggion molo gabe pangihut ni Jesus. Ditambai ma muse tu holong
parhahamaranggion i holong agape, napinodahon ni Jesus. Pasti do naopat halak
on halak Jahudi, jala maragama Jahudi. Ulaonnasida mardekke (nelayan). Pasti do mahir nasida manjala dekke, mandoton dekke, marsolu dohot marlange.
Namalo marlange tong do ndang halojaan i mardalan pat. Akka naporlu pakkeonna tu
ulaon silehonon ni Jesus tu nasida dapot do di naopat halak on. Sitambaan ni
Jesus na ma hatauon (keahlian) tu
nasida, asa tung matang nasida mangula ulaon i, dohot patariashon Harajaon
Banuaginjang i. Jadi diulaon rekruting on,
diparrohahon Jesus do songon dia rumang ni jolma na boi ajaranNa jala na boi
parbagaonna muse manguduti ulaonNa. Siparrohahonon jala siihuthonon ni Huria do
nabinaen ni Jesus on, molo Huria naeng mangarekrut
pangulana, jala naeng adong di Huria i, pangula na olo “todos di ari”, jala nasatia
sampe mate.
4.
Adong dua turgas na mansai porlu dihatahon Jesus tu
anopat halak na gabe siseanNa on, i ma: (1) mangihuthon Jesus (“Ihuthon hamu ma Ahu”); dohot (2)
manjala jolma (“bahenonku do hamu gabe sijala jolma”). Lao mandidik siseanNa i,
“sikola mardalan-dalan” do dipajongjong Jesus. Manang tudia Jesus lao, ikkon
ihuthonon ni siseanNa i. Jala nasida marsiajar sian ganup naniula dohot
nahinatahon ni Jesus. Kuliah sambil
praktek lapangan ma nuaeng on didok na songon i. Siihuthonon ni sisean ni
Jesus dohot do pangalaho nang haboion ni Jesus. Mentalitas ni Jesus ikkon gabe
mentalitas ni siseanNa i. Hatauon (keahlian) ni Jesus ikkon boi dikuasai
sisean i. (1) Parjolo ma i, hatauon taringot tu isi ni Buku Nabadia (Padan
Narobi). Ikkon ihuthonon ni sisean i Jesus mamboto takkas lapatan ni na
tarsurat di Padan narobi i dohot akka bagabaga taringot tu Mesias na
disuriranghon ni akka panurirang najolo, dohot hagogokna di hadirion dohot di
ulaon ni Jesus Kristus. Sian hatauon taringot tu isi ni Padan Narobi i, ikkon
lam takkas tandaon nasida Jesus, Guru na mamillit nasida gabe sisean. (2) Mangihut
tusi, ikkon dapot ni sisean i hatauon pamalum na marsahit, pabali sibolis /
tondi nahodar, pahehehon namate, paiashon akka nahuliton. (3) Napatoluhon:
Ikkon ihuthonon ni sisean i Jesus di hatauon manghatai, marsual-jawab taringot
tu poda sian hata ni Jahowa dohot akka patik ni si Musa. (4) Ikkon ihuthonon ni
sisean i Jesus mangulahon ruhut ni parngoluon hombar tu poda ni buku nabadia. (5)
Ikkon ihuthonon nasida gerakan
pembaharuan masyarakat (ulaon
paimbaruhon hajolmaon), pembaharuan
peradatan (ulaon paimbaruhon paradaton, dohot budaya) dohot pola hidup (rumang
ni parngoluon) napinatupa ni Jesus. (6) Ikkon ihuthonon ni sisean i Jesus, di
naporsuk manang di na sonang, jala songon Jesus nasida satia sahat tu na mate,
pola mate tarsilang. Dibahen Jesus do uji coba tu sisean i, atik naung boi
tolap nasida patuduhon pangihuthonon nasida di Jesus, i ma di tikkin na di suru
Jesus akka siseanNa i laho mambaritahon Harajaon Banuaginjang i (jaha:
Mat.10:5-15). Huria ni TUHAN na tardok pangihut ni Jesus sinuaeng on, ikkon
takkas ma pangihuthononna be tu Jesus. Jala diulahon ma lapatan ni hata ni
Jesus: “Ihuthon Ahu”, na pinatorang
nakkin. Takuasai ma isi ni Bibel i (Padan Narobi dohot Padan Naimbaru). Tahatindahon
ma takkas jala parat: Ise do Jesus i. Taulahon ma ulaon pamalum namarsahit
(halak na marsahit dohot hajolmaon/masyarakat na marsahit). Malo ma hita
manghatindanghon Barita Nauli taringot tu Jesus i, tarlumobi tu akka
namanghasogohon Jesus dohot hakristenon. Mangolu ma hita hombar tu poda ni
TUHAN Jesus Kristus. Ai ngolunta siganup ari i do jamita na tarlumobi tu akka
jolma nahumaliang. Tapaimbaru akka ruhut ni paradaton dohot bakko-bakko ni
hajolmaonta, asa lam ampit tu poda ni TUHAN Jesus jala lam boi mangalumba
hamajuon ni jaman. Jala ikkon ma satia hita tu Jesus, di naporsuk manang
dinasonang, manang sadihari pe sahat ro di na mate hita.
5.
Diarophon
TUHAN Jesus do siseanNa i gabe “sijala jolma”, ndang holan sijala dekke manang
sijala naporlu tu ngolu siganup-ari, ndang holan gabe sijala arta portibi. Unang
adong sian pangihut ni Jesus gabe “sigadis jolma”. Sijala jolma i ma akka
sisean ni Jesus na manakkup jolma na songon dia pe i, asa dipauli hajolmaonna
gabe jolma situtu, gabe jolma na agamis, na porsea tu Jesus, na marbudaya na
denggan, gabe jolma na marpangalaho sipujion, gabe jolma na mamora di
partondion dohot di habisukon nang di parartaon, gabe jolma naboi parbagaon di
tonga ni masyarakat (hajolmaon); gabe jolma siboan dame, siulahon holong agape,
filia, storge, holong parhahamaranggion. Ndang marimbar jolma sijalaon i: Napogos,
namora, napande, naoto, namartihas, nagopas, namarsahit, nasehat (hipas), borua,
baoa, LGBT, partani, partigatiga, pardekke, pardalandalan, pengusaha, manager,
buruh, pejabat, rakyat biasa, paragama, nasomaragama, na takkang, naburju,
dohot lan na asing rumang ni jolma. Sude na i ikkon jalaon ni sisean (pangihut
ni Jesus) asa masuk tu harajaon Banuaginjang naung songgop tu tano on. Di
bagasan Harajaon i, sude jolma on ditopa jala dipauli gabe siihuthon Jesus. Tona/parenta
ni Jesus andorang so manaek Ibana tu banuaginjang mandok: “Laho ma hamu, podai
hamu ma saluhut bangso, didi hamu ma nasida tubagasan Goar ni Ama. Anak dohot
Tondi Parbadia! Laos ajari hamu ma nasida mangaradoti nasa hata naung
hupatikkon tu hamu. Ai ida ma, sai na dongananku do hamu ganup ari, rasirasa ro
ajal ni hasiangan on! (Mat.28:19-20).” Mardomu tu ulaon on, sisean ni Jesus
takkas marguru tu Jesus, saleleng ni tolu taon, jala tammat do nasida, diwisuda
tikki Haroro ni Tondi Porbadia. Pangihut ni Jesus si nuaeng on pe, ikkon takkas
marguru tu Jesus lao manjala jolma. Molo porlu onom taon manang lobi lelengna marsiajar,
asal ma gabe boi dikuasai sude ilmu ni Jesus, Rabbi/Guru Bolon i, i ma ilmu
“manjala jolma”. Sude do diboto Jesus. Marsaor do Ibana tu hatoropan, tu
pejabat, tu tokoh agama, tu rakyat, tu sibotosurat, tu sijalobeo, tu ragam
mansam ni borua, tu Jahudi, tu naso Jahudi. Dohot tu akka na asing na so
hagoaran horong na dison. Parsaoran i dibahen lao manjala jolma. Ndang
dihabiari Ibana, atik na dijalo jolma i poda dohot hangoluan nabinoanna manang na ndang. Sandok, sude
jolma diarahon, dijala. Adong do jolma i na manggarpasi laos lari muse. Adong
do i na pintor burju mangoloi. Ndang diparsoalhon Jesus i. Songon nanidokna di
umpamaNa tringot tu Panabur Boni i do. Adong boni ti na gabe boi marparbue
marratus lompit, alai adong na lapungon, manang mago ala ni pamokkik ni portibi
on. Ilmu ni Jesus “manjala jolma” ikkon dimiliki akka siihuthon Jesus sinuaeng,
jala ikkon dipraktekkon laho pahembang Harajaon Banuaginjang i.
6.
Hamu
na dongan sahaporseaon , nahinaholongan. Sitiruon do haoloon ni sisean naopat
jinou ni Jesus on. I ma haoloon manadinghon naporlu sitadinghononhon, asa
takkas mangihuthon Jesus. Ditadinghon si Simon Petrus dohot si Andreas do ulaonna
mardekke. Ditadinghon si Jakobus dohot si Johannes ulaonna mardekke nang
amanasida, si Sebedeus. Alai rikkot do botoonta. Ia “manadinghon” ndang
marlapatan i “mambolongkon”. Jadi ndang hea dibolonghon sisean naopat on
keluargana (natorasna) dohot ulaonna i. Dipargunahon nasida do i laho mandukung
ulaon nasida mangihuthon Jesus. Ditadinghon ulaon dohot natoras i, asa boi do
nasida konsentrasi mangihuthon Jesus
dohot marsiajar sian Jesus. Diulahon na songon i, asa haru sukkes do nasida.
Mansai rikkot parrohanonon ni akka calon pangula ni huria pambahenan na songon
on.
7.
Sude
analisa tempat, analisa situasi politik, analisa parngoluan ni masyarakat
nabinahen ni Jesus, dohot pamilliton di siseanNa, sudena i martujuan asa boi
ulaonNa ulaon “mangajari di angka parguruan, mamaritahon Harajaon i huhut
pamalum nasa sahit dohot na niae ni halak na disini” (“mengajar dalam rumah-rumah ibadat dan memberitakan Injil Kerajaan Allah
serta melenyapkan segala penyakit dan kelemahan di antara bangsa itu”).
Ulaon mangajari i ma ulaon na so boi gait bahenon ni akka pangihut ni Jesus.
Ikkon songon Jesus akka pangihut ni Jesus di pangajarion: patenna, ringgasna, ilmuna,
bidang ni hinakkamna, pengaruhna manguba pangalaho ni jolma asa lam denggan,
panggunahonna di akka peralatan na mandukung pangajarion i (i ma parguruan
dohot parhohas na adong disi). Maniru semangat dohot sakkap ni Jesus do umbahen
ikkon pajongjongon ni pangihut ni Jesus akka sikola na marragam jurusan ilmuna,
jala tung mansai denggan mutu dohot disiplinna. Tona ni Jesus mandok: Ajari
hamu nasida (akka bangso) i mangaradoti nasa hata naung hupatikkon tu hamu.
Mangaradoti i ma mamboto dohot mangulahon akka ilmu/poda i. Marhite pangajarion
nabinaen ni Kristen, ikkon lam patar Harajaon Banuaginjang i di sude panggulmit
ni ngolu ni hajolmaon. Baritanauli (Injil) ikkon hangoluhonon ni masyarakat. Mardomu
tu pangajarion i, ikkon pamalumon akka sahit (sahit ni daging, sahit ni tondi,
sahit ni masyarakat: korupsi, narkoba, radikalisme, hapogoson, haotoon = lima
sahit utama/panca penyakit on ikkon malum). Akka kelemahan (na niae) ni hajolmaon pe ikkon pamagoon. Misalna
(unjelas ma di hata Indonesia nidok): kelemahan
ekonomi, kelemahan sosial, kelemahan keagamaan, kelemahan ip-tek, kelemahan pelestarian
lingkungan, kelemahan ketahanan dan pertahanan. Jadi ndang
tanggung-tanggung balga ni ulaonta. Jala ikkon tolap do hita tusi. Jala ala
nihatolaponta i, ikkon gabe terkenal Jesus, jala marrongoman segala macam jolma
ro tu Jesus, lao mandapot “solusi” tu
parmasalahan naniadopanna be. “dipamboan halak tu joloNa nasa na hansitan,
angka parsahit na ragam dohot angka hasonggopan ni angka sibolis dohot angka na
solpot bulan on ro di angka na sarion, gabe dipamalum ma nasida saluhutna.” Tarbarita
Jesus ndang holan di Israel, alai sahat do tu luar negeri, tu Siria, luat na di
Utara/Timur Laut ni Galilea/ Dekapolis, tarbarita sahat tu Judea, tu Jerusalem,
bariba ni Aek Jordan (Perea, Dekapolis. Ala ni ulaon ni Jesus mansai torop
jolma mangihuthon Ibana. Ala ni ulaonta pe, ikkon ma gabe lam torop jolma
mangihuthon Jesus. Taloas ma marmasukan akka jolma i gabe ruas ni Huria
Kristen, ai tu ulaon i do hita dijou gabe ruas dohot parhaladoNa. Jadi ganup ma
Kristen mamboan nanggo sahalak gabe ruas ni Huria; sada huria mamboan sada
Huria. Sada Resort mamboan sada manang piga resort, sada daerah mamboan sada
daerah naimbaru; sada denominasi mamboan sada denominasi margabung tu Huria
Kristen. Maju terus. TUHAN Jesus Kristus mandok: Sai na dongananKu do hamu
ganup ari, rasi rasa ro ajal ni hasiangan on. Amen.
Pematangsiantar, tgl. 16 Desember
2016. Pdt. Langsung Maruli Basa Sitorus (Pdt. LaMBaS).
