JAMITA SIAN EVANGELIUM TU MINGGU II DUNG EPIPHANIAS TGL. 15 JAN 2017 JESAYA 49:1-7
JESAYA 49:1-7
49:1
Tangihon ma ahu, hamu ale akka pulo, jala patinggil ma pinggolmu hamu ale akka
bangso di na dao! Jahowa do manjou ahu sian bortian dope, sian butuha ni
dainang, nunga ditaringoti goarhu.
49:2
Jala dibahen * pamanganku songon podang na tajom; diondingi do ahu marhite sian
* pangalinggom ni tanganna, jala dibahen ahu gabe sumbia na niugam, ditabunihon
do ahu di bagasan siorna.
49:3
Jala ninna do mandok ahu: Naposoku do ho, ale Israel marhite sian ho do ahu
marmulia.
49:4
Alai anggo ahu, ninna rohaku do: Ndang marguna na ngalutan i ahu magopo sambing
do gogoku hupasudasuda; hape Jahowa * patikkostikkos uhum tu ahu, jala upaku di
lambung ni Debataku do.
49:5
Ia nuaeng hata ni Jahowa na jumadihon ahu sian bortian dope bahen naposoNa, asa
ahu paulakkon Jakob tu ibana dohot papunguhon Israel, jadi marmulia ma ahu
diida Jahowa, jala Debataku gabe hagogoonku.
49:6
Jala ninna do: Hametmeton do i anggo tung holan naposoku ho patindang akka
marga ni Jakkob dohot manogihon mulak akka pasipasi sian Israel; nunga hulehon
ho huhut bahen * panondang di akka parbegu, gabe parhitean ni hatuaonku ho ro
di ujung ni tano on.
49:7
Songon on do hata ni Jahowa, Sipalua Israel na badiana tu ibana na hinabiashon
ni roha ni halak, tu bangso hagigian, tu naposo ni akka pangarajai: Ikkon idaon
ni akka raja do ho jala hehe, jala marsomba akka pangarajai ala ni Jahowa na
bonar, dohot ala ni na badia ni Israel, na mamillit ho.
HURIA
NI TUHAN JESUS IKKON GABE PANONDANG DI AKKA BANGSO,
GABE
PARHITEAN NI HATUAON NI JAHOWA RO DI UJUNG NI TANO ON
1.
Hamuna dongan sahaporseaon di
bagasan TUHAN Jesus Kristus, Hapataran ni Jahowa ’Elohim. Disakkapi roha ni
TUHAN-ta do ikkon lam patar Ibana tu hita akka naporsea; lam patar nang
NasinuruNa manopot hajolmaon lao pajongjong HarajaonNa di portibi on. Jala hita
pe ikkon lam patar ise hita di Ibana; lam patar nang akka ulaonta laho
pahembanghon harajaonNa di tonga ni hajolmaon on.
Jahowa’Elohim
(TUHAN Debata) do namanjadihon langit dohot tano, tarmasuk akka pulo, akka
bangso. Ibana do na mamillit Israel gabe bangsoNa. Ibana do napajongjong HURIA
na tardok AMPUNA ni TUHAN, di sandok portibi on, jala mambahen HURIA i pamatangNa,
jala Ibana gabe ULU ni HURIA i. Pamatang ni TUHAN i, hita HURIA-Na,
dipatunggung laho mangulahon nasa sakkap ni rohaNa na ikkon masa di tonga ni
hajolmaon (portibi on). Marolopolop ma tondita ganup, ala adong TUHAN-ta na
songon i: Najumadihon dohot manggomgomi langit, laut dohot nasa isina dohot
nasa na adong. Ibana do Jahowa Zebaot, Namanompa dohot na mangarajai akka
parangan na di surgo dohot na di tanoon. Ibana do Jahowa ’Elohim, na manompa
dohot mangarajai nasa nailahi dohot
na marhadebataon. Ibana do El-Elyon (Debata Nasokkal), El-Olam (Debata na Manongtong),
El-Berit (Debata Namarpadan), El-Saddai (Debata Nasunhinagogo), El-Roi (Debata
Namarpanatap), Jahowa-Jireh (TUHAN Namarpanarihon). Dihalomohon Jahowa do asa
sude pangisi ni langit dohot tano manangihon soara dohot mangoloi hataNa, asa
tung sonang jala dame saluhutna. Tatapatar ma TUHAN-ta na songon i di ngolunta,
dohot tu akka jolma na humalianghita.
2.
Na disuriranghon si Jesaya najolo i,
nunga dipapatar Jahowa di bagasan haroro ni TUHAN Jesus Kristus tu portibi on dohot di hadirion nang di ulaon
ni Jesus Kristus. Jahowa sandiri na mambahen adong TUHAN Jesus di bortian ni si
Maria marhite Tondi Porbadia. Jahowa sandiri mangalehon Goarna. “Jesus do
Goarna, bahenonmu, ai paluaonna do bangsona sian angka dosanasida be (Mat.1:21)”,
ninna surusuruanni Jahowa tu si Josep. Nang pe tu Nazaret (ndang tu Jerusalem –
pusat ni paragamaon ni Jahudi/Israel) TUHAN Jesus Kristus diboan si Josep/Maria
dung mulak sian tano Mesir, di Nazaret do diparade Jahowa mansai takkas
pamangan Jesus, Anak Haholongan jala HalomoanNa i, gabe songon podang na tajom,
jala Ibana dibahen songon sumbia na niugam, na tung mansai rantos. Sahat tu marumur tolupulu
taon Jesus Kristus dilinggomi jala “ditabunihon” Jahowa di huta Nazaret, paima
papataronNa ulaonNa dohot harajaonNa di tonga ni mangajana (portibi) on. Di
namarumur 12 taon TUHAN Jesus Kristus,
di bagasjoro tikki maralus tu uluan dohot akka sintua ni agama Jahudi, nunga dipatuduhon Ibana na songon tajom ni
podang siduababa tajom ni hata na ruar sian pamanganNa. Hata na haruar sian
pamangan ni Jesus patupahon hamalumon ni sahit, palaohon akka sibolis sian diri
ni jolma, mangusir akka tondi nahodar, pangoluhon akka naung mate. Hata ni
Jesus sian Silang i pe, tong do songon tajom ni podang parnabung, di tikki
dipangido Ibana, asa disesa dosa ni akka jolma na marhosom, mangalatei, mangelathon,
manteal-teali, dohot na mamunu Ibana. “Ale Amang, marpamuati ma roham mida nasida,
ai ndang diantusi nasida nabinahen nasida i,” ninna Jesus sian Silang i. Alai
ndang holan i, hata ni Jesus do boi mambahen rahar “hau” na so marparbue. Tung
takkas do dipataridahon Jesus hadirionNa na songon sior na rantos situtu jala
naboi manombus diri ni akka musuNa, pola boi manusuk sahat tu ateate. Ibana do
namanontuhon mangolu manang mate jolma, masuk tu naroko jolma manang masuk tu
surgo. Toho do masa di TUHAN Jesus Kristus songon nanidok ni panurat Heber
(4:12): “Ai na marngolu do hata ni Debata jala marpangkorhon, jala tumajom sian
nasa podang siduababa, jala torus do disirang hosa dohot tondi, ringring dohot
utohutokna, laos diuhumi do na sinangkap dohot na piningkir ni roha.” Dia ma lapatan ni i di hita Huria ni TUHAN-ta?
Mansai godang situtu lapatanna. Alai na tarlumobi lapatanna di hita: Tung
tarpangasahon hita do HATA ni TUHAN Jesus Kristus lao mangalo Sibolis dohot
akka parjahat i nang di tikki sinuaeng on. Tarpangasahon hita do HATA ni TUHAN
Jesus Kristus lao patupa nadumenggan tu hajolmaon sinuaeng on. Tapakke ma Hata
ni Jahowa manang Jesus di bagasan
ngolunta; alai ikkon malo do hita mamakkesa, asa unang gabe maneat tu hita
hatajomonNa i.
3.
Asa boi pangasahononta HATA ni
TUHAN Jesus Kristus patupa hangoluan, palao akka pangago, ikkon takkas jala
patar do diri dohot pangalahonta, songon Israel nabonar najolo i hita, i ma
gabe naposo ni TUHAN Jesus jala usahahononta asa marhite sian hita takkas
marmulia TUHAN i. Ndang sitiruonta pandelean ni halak Israel natarbuang najolo,
na gabe mandele ala sai dietong rohanasida ndang marguna na nihangaluton nasida
dohot na suda gogo nasida laho manghophop Harajaon ni TUHAN i. Manang aha
natabahen lao patoguhon Harajaon ni TUHAN-ta, tung marguna situtu do i di
adopan ni TUHAN Jahowa. Molo tung holan ondop martangiang tu TUHAN-ta pe naboi
ulaononta, ala ndang pola marbiaya i, tung mansai marguna do i tu Harajaon ni
TUHAN na sipapataronNa di portibi on. Martua do hita molo TUHAN Jesus Kristus
na patikkostikkos uhum tu hita, jala tung mansai balga do upanta di portibi on
nang di banuaginjang sogot. Upa hasonangan do leononNa di ganup hita, akka na
takkas jala patar mangasahon HATA ni TUHAN Jesus Kristus di nasa ulaon dohot
sinakkapan ni roha-ta.
4.
Adong dua (2) turgas na diampehon
tu naposo ni TUHAN na dijadihon marhite HATA ni Debata di bortian ni ina
namanubuhonsa, i ma (1) paulakkon pomparan ni Jakob tu ibana dohot papunguhon Israel, naung marserak di
habuangan, dung dibuang taon 722 asK sian Israel Utara (Samaria) dohot taon 587
asK sian Israel Selatan (Yerusalem); manogihon mulak akka pasipasi ni Israel;
dohot (2) mamboan sondang ni HATA ni TUHAN tu akka bangso parbegu, asa dohot
nasida masuk tu horong ni bangso ni Jahowa jala nasida marsomba tu Jahowa. Nang
pe sai di habiashon dohot dihagigihon akka bangso Naposo ni TUHAN Jahowa on,
ikkon usahonon ni Naposo ni TUHAN i do
asa sampe ro akka bangso i marsomba tu Jahowa.
Ndang cukup
holan Israel hamonanghonon ni Naposo ni TUHAN Jesus Kristus, alai tung ikkon
dohot do sude bangso, ndang mardia imbar. Ala ni i do umbahen disuru TUHAN
Jesus Kristus akka siseanNa, asa lao tu liat portibi on, lao mambaritahon
barita nauli tu nasa natinompa; asa bahenon nasida sude bangso gabe pangihut ni
TUHAN Jesus Kristus, didion nasida di bagasan Goar ni Jahowa Ama i, dohot Goar
ni AnakNa TUHAN Jesus Kristus, dohot Goar ni Tondiporbadia; ajaran nasida sude
bangso laho mangulahon naung pinodahon (pinatikkon) ni TUHAN Jesus tu akka
pangihutNa. Marpadan do TUHAN Jesus Kristus tu siseanNa, na dongananNa akka
pangihutNa lao mangulahon ulaon napinasahatNa on.
5.
Ikkon marmulia Jahowa/TUHAN Jesus
Kristus di tano on bahenon ni sude pangihutNa (HuriaNa), jala HuriaNa ikkon
gabe parhitean ni Hatuaon na sian Jahowa tu nasa natinompa ni Jahowa, sahat ro
di ujung ni tano on. Jahowa ma mampargogoihon hita mangula akka ulaon i di
bagasan sataon bolon on, asa tongtong hita marhiras ni roha jala tolap
manaluhon akka anti-Kristus naung lam manggogo nuaeng lao mamolgak Huria i. Tahaburjuhon
ma martangiang tu TUHAN-ta, mangido asa Ibana na manakkup akka anti-Kristen i
gabe SitindangiNa, songon nabinahenNa tu si Saulus na gabe Apostel Paulus,
parbarita nauli i. Tadok di tangiangta i goar ni nanaeng sitakkupon ni Jesus i,
asa diuba rohana na anti i gabe na pro-Kristus. Taingot ma, molo lam posi
pangaleleon na masa tu akka pangihut ni Jesus di negaranta on, tanda ni nanaeng
lam godang ma akka na anti-Kristen i gabe pangihut ni Jesus Kristus. Alai ikkon
lam hottot ma parsaoran ni sude pangihut ni Jesus, jala lam togu huhut
marparbue nagodang holong i di tongatonganta. Asa marhite sian i, diakui nasida:
Molo gabe pangihut ni Jesus Kristus do sintong namangolu on.
6.
Ikkon ma patar hita songon Huria
ni TUHAN Jesus Kristus, Huria na gogo haporseaonna, na manindangi, na moderen
(naboi mangihuthon dohot mengendalikan zaman),
jala na marpambahenan na denggan tu hajolmaon. Sakkap (target) sieahanta dohot
sijalakan ni akka pomparanta tu joloan on, i ma songon nidok ni panurirang i di
turpuk Jesaya on: Ingkon idaon ni angka
raja do ho jala hehe, jala marsomba angka pangarajai ala ni Jahowa na bonar,
dohot ala ni na badia ni Israel, na mamillit ho. Akka raja, panggomgomi, na
adong di negara on, tahirpas asa hehe, jala ro manopot akka parbarita nauli,
jala gabe olo nasida marsomba, ala ni hinasintong ni Barita Nauli dohot
hangoluan na pinapatar ni pangihut ni TUHAN Jesus Kristus. Barita Nauli i do
habonaron ni Jahowa. Nabadia ni Israel napatar di bagasan TUHAN Jesus Kristus
do mamillit hita huriaNa gabe bangsoNa, gabe Israel Naimbaru. Boi masa na
songon i, molo takkas do ganup hita, patuduhon dohot mambahen dirinta gabe sira
ni tano on, tarlumobi gabe panondang ni portibi on. Molo gabe sira ni tano on,
marlapatan do i: tung otik pe hita, alai mambahen mardai natabo hangoluan ni
jolma na humaliang hita. Boi marguna tu “segala” na dihaporluhon jolma. Jadi
ikkon markualitas na luarbiasa do hita di tonga ni hajolmaon on. Sai gabe
sibahen solusi ni parsoalan ni jolma
hita di hangoluan on. Molo gabe panondang hita, na mamancarhon sinondang na
patiurhon sude akka nagolap, narundut, asa tarida nauli, nadenggan dohot naroa,
asa tikkos boi mardalan uhum. Ndang cukup sondang na mamancar sian hita holan
songon sondang ni salippotpot, manang sondang ni lampu teplok manang sondang ni
senter. Ikkon songon sondang ni mataniari do, alana lobi sian i dope sondang ni
TUHAN Jesus Kristus, sipancarhononta. Jadi
ikkon godang do hita. Alai dung
godang, jala boi manghamham luatta, negaranta, ikkon lambok do hita lao
mambahen patar akka nauli, nadenggan dohot naroa. Asa boi jolma i
manirang/padao dirina sian naroa, jala marsilumba mangeahi/patupahon akka
nadenggan. Ikkon sondang na so tartulak
ni jolma sondangta i. Baliksa tahe ikkon gabe sondang na ikkon dihaporluhon
jolma sondangta i, asa boi denggan ngoluna dohot karejona be. Nunga tung godang halak Kristen na boi contohonta
gabe panondang ni portibi on. Misalna: si Ingwer Ludwyik Nommensen, si AA
Maramis, si Leimena, si Mangaraja Hesekiel Manullang, si Maraden Panggabean, si Tokkar Josia
Sitorus, si Wage Rudolf Supratman, si Liberty Manik, si Nahum Situmorang, si
Cornel Simanjuntak, si Gorga Gultom, si Ahok, dohot godang dope akka naso
hagoaran dison. Tabahen be ma karyanta, na ikkon pakkeon jala ulahonon ni jolma
asa denggan ngoluna dohot ulaonna. Ai
marhite na songon i do takkas hita gabe siboan Hatuaon na sian TUHAN Jesus
Kristus tu hajolmaon dohot tu bangsonta. Dipargogoi TUHAN-ta ma hita sude
patupahon i. Amen.
Pematangsiantar, tgl. 15 Desember 2016. Pdt. Langsung
Maruli Basa Sitorus (Pdt. LaMBaS).
