JAMITA SIAN EVANGELIUM TU MINGGU V DUNG EPIPANIAS TGL. 5 PEBRUARI 2017
1 KORINTUS 2:6-16
2:6 Alai habisuhon do huhatahon hami di angka
naung rimpas; alai nda tung habisuhon na di portibi on, manang habisuhon ni
partogi ni portibi on, angka na laho salpu.
2:7 Habisuhon ni Debata do tahe na simo jala na
buni, naung dipaojak Debata hian sian mula ni mulana bahen hasangaponta.
2:8 I ma na so ditanda agia ise sian angka
partogi ni portibi on; ai aut ditanda, ndang tagamon parsilangkononna Tuhan na
marsangap i.
2:9 Saut do na tarsurat i: "Na so dung
niida ni mata, na so dung binege ni pinggol, na so dung hehe di bagasan roha ni
jolma, i do diparade Debata di angka na mangkaholongi Ibana."
2:10 Alai dipapatar Debata do i tu hami marhite
sian Tondi i. Ai sude do didodo Tondi i, ro di angka hasimoon ni Debata.
2:11 Ai ise jolma umboto na di jolma i, ia so tondi
ni jolma na di bagasan ibana? Suang songon i: Ndang adong na tumanda na di
Debata, ia so Tondi ni Debata.
2:12 Alai ndang hujalo hami tondi portibi on; Tondi
na sian Debata do, asa dapot botoonnami na binasabasahon ni Debata tu hami.
2:13 Jala i do huhatahon hami, ndada di bagasan
hata habisuhon ni jolma na targuruhon, tung na pinodahon ni Tondi do, laho
manimbangi angka partondion mangihuthon ruhut ni tondi.
2:14 Ndang tarjalo jolma hian na sian Tondi ni
Debata, ai haotoon do i di rohana; ndang tartandasa i, ai partondion do mandodo
i.
2:15 Alai saluhutna i didodo partondi; alai ndang
tardodo manang ise anggo ibana.
2:16 Ai
ise ma naung tumanda roha ni Debata, asa ajaranna Ibana? Alai roha ni Kristus i
do anggo di hami.
PAPATARHON KRISTUS TU DIRINIBA DOHOT TU HALAK DIPAKKE MA HABISUHON NA
SIAN TONDI NI JAHOWA
JESUS KRISTUS
1.
Hamuna akka dongan sahaporseaon tu TUHAN Jesus Kristus! Molo holan sian
roha jala pikkiran do binaen laho mangantusi ise do Jesus jala aha lapatan ni
Barita na Uli (BnU) nabinoanNa, tung mansai maol do tandaon Jesus i jala maol antusan
Barita na Uli i. Sada partanda na mansai maol diantusi jolma Barita na Uli i
dohot ditanda jolma Jesus i, tarida do
sian hata ni sahalak pemimpin kelompok agama na mandok: “Molo maranak
Allah, ise ma bidanna? Maksud ni ibana mandok i, laho mangejek (palealea) halak Kristen na sai
mangaku, ia Jesus i Anak ni Allah (Debata) do. Tubu sukkun-sukkun na songon i,
ala sai poda ni agamana na ro sian portibi on do dipasang ibana laho mananda
Jesus dohot mangantusi BnU. Poda ni agamana mandok ia Allah tung so maranak do
jala tung na so jadi dohonon adong anakNa. Olat ni songon i do na tolapna
mamikkiri, ala songon i do bisuk ni portibi na disuanhon tu dirina sian mulai
metmet sahat tu na gabe sipalealea Jesus ibana. Takkas ma antong, bisuk manang
parbinotoan na songon i, na ro sian portibi on, ai akka na di portibi on do
maranak dohot adong anakkonna. Jala dietong ibana ma songon na di portibi on,
nang di par-TUHAN-on. Aut olo ibana pamasuk otik pe tu pikkiranna taringot tu
habisukon dohot haboion ni Allah (Debata/Jahowa), dohot hatarbatason ni
pikkiran ni jolma mananda ha-Allah-on ni TUHAN Jesus Kristus dohot
mangantusi BnU, pasti do ndang haruar
hata na songon i sian pamangan ni sipalea Jesus na laos palea Allah nasinombana.
Dohononna do: “Ah, aha tahe na so tarpatupa Allah, haru sian tano, boi jolma
dipatubu Allah. Ummaol dope i sian nasa na mambahen diriNa sandiri gabe jolma,
jala Ibana na gabe jolma i digoari Anak ni Allah.” Boasa ndang dapot ni tokoh
sileai Jesus on roha dohot panandaon na songon i? Ala sai ditutup ibana dirina
manjakkon TONDI ni JAHOWA Allah, na boi mangalehon habisukon na sian Allah, i
ma roha panandaon na sintong taringot tu Allah nang Jesus i.
2.
Molo naeng patar antusan Jesus dohot Barita Nauli na sian Jesus, adong
do na ikkon padirion ni jolma di dirina dohot di pikkiranna. Parjolo ma i,
mangganti roha na sai mangalo manang manghasogohon Jesus marhite roha na
unduk/tunduk tu Jesus manang manghaholongi Jesus. Paduahon, mambahen adong
inganan jala siat TONDI ni Jahowa Allah/Debata di diri songon jolma na tinompa
ni TUHAN Jesus Kristus. Asa olo pasiat TONDI ni Jahowa tu bagasan diri, ikkon
olo jolma i mamboto aha jala ise do TONDI PORBADIA hombar tu Barina Nauli na di
Bibel i. Didok di Bibel i: "Tondi do anggo Debata; asa angka na
martangiang tu Ibana, patut martangiang di bagasan Tondi dohot hasintongan
(Yohanes 4:24)". “Sian on ma tanda
hamu Tondi ni Debata: Ganup tondi ma marhatopothon Jesus Kristus, naung ro di
bagasan daging, i ma sian Debata. Ganup tondi na so marhatopothon Jesus i, i ma
na so sian Debata. I ma pangalaho ni Antikristus, na naeng ro i, songon naung
binegemuna; jala nunga di portibi on ibana nuaeng (I Yohanes 4:2-3).”
“Dibahen i hupabotohon ma tu hamu: Ndang tarbahen halak, na mangkatai
marhitehite Tondi ni Debata, mamburai Jesus; jala holan marhitehite Tondi Parbadia
do targoar Jesus, Tuhan (I Korintus 12:3).”
“Laos Tondi i do mangkatindangkon di tondinta, paboa na tutu hita anak ni
Debata (Roma 8:16).” Di Buku Nabadia ni
Israel, Padan na Robi, dipaboa do manang piga na rikkot leonon ni TONDI ni
Jahowa i, asa antusan ni jolma Barita Nauli jala tandaonna Jesus: "Jadi
songgop ma tu ibana Tondi ni Jahowa,
Tondi ni habisuhon dohot hapistaran, Tondi ni panuturion dohot hagogoon, Tondi
ni parbinotoan dohot biar maradophon Jahowa (Yesaya 11:2)." Tondi habisukon
dohot hapistaran dilehon TUHAN tu si Paulus dohot akka naporsea laho mananda
Jesus Kristus dohot mangantusi Barita Nauli. Talehon ma dirinta ganup manjakkon Tondi
habisukon dohot hapistaran i.
3.
Di Bibel i dipatorang do taringot tu habisukon (Heber: hokma; LAI: hapistaran), i ma na parjolo
sahali ditompa (LAI: ditubuhon) Jahowa, andorang so ditompa Jahowa dope langit
dohot laut dohot nasa isina (Poda 8:1-36 (22-31). Habisukon i do anak kesayangan (LAI TB) (LAI BT: pande;
Heber: ’amown) ni Jahowa manang
panuturi ni Jahowa laho manompa nasa na adong. Habisukon i ariari marmeami di jolo ni Jahowa, dohot di liat portibi on. Toho
do nidok ni Apostel Paulus: “Habisuhon ni Debata i simo jala na buni, naung
dipaojak Debata hian sian mula ni mulana....” Mansai lomo do roha ni Habisukon
i masuk tu diri ni jolma. Jala tung hasudungan ni rohana do jolma manisia. Alai
ikkon ukkapon ni jolma i do rohana manjakkon habisukon i. Ai ninna habisukon i
do: “Ai manang ise na jumpangan Ahu, jumpangan hangoluan do, jala maruli asi ni
roha sian Jahowa (Poda 8:35). Molo jumpang ni naporsea habisukon ni Jahowa,
takkas do habisukon i bahen hasangapon ni jolma naporsea i. Mansai godang
taringot tu habisukon (hikmat) ni
Jahowa on dihatai di Bibel i (tajaha ma di kamus hata hikmat). Didok do i sada sian sifat
(ampuna ni hadirion) ni Jahowa (1 Sam 2:3; Job 9:4) do habisukon i.
4.
Nang di Bibel i dipaboa do, na adong habisukon (parbinotoan/hapistaran)
na marharoroan sian na adong di portibi on. Didok di 1 Musa 3:1 : “Alai ulok do
na umbisuk sian nasa na manggulmit di ladang, angka na jinadihon ni Debata
Jahowa,....” Ulok ditompa Jahowa bahen haroroan ni habisukon, alai habisukon na
sian ulok ma i. I do umbahen molo adong na mamasang habisukon na sian portibi
on, sai jotjot didok halak habisukon na-“manguloki” do habisukon na songon i.
Molo didok Jesus tu akka siseanna songon on: "Husuru do hamu songon
birubiru tu tongatonga ni angka babiat; dibahen i pantas ma hamu marroha songon
ulok, huhut lidang ma rohamuna songon darapati! (Matius 10:16)", ndang na
marmaksud TUHAN Jesus asa pakkeon ni siseanNa bisuk na marharoroan sian ulok i,
lao mangadopi akka “babiat” i, alai strategi ni ulok i mangalo babiat i do naboi
pakkeon ni siseanNa laho patuduhon habisukon na sian Jahowa dohot laho manghamonanghon
na denggan masa di hajolmaon. Adong mandok: “Tikki tukkar sisik ulok asa lam
balga, tong do ulok ibana; alai tukkar sisik sipasing, gabe rimbur do ibana.” Boi do negatif antusan on, alai boi do
positif. Molo strategi ni ulok nipakke, marmaksud ma hata i mandok: molo lam
magodang jolma, ikkon tong ma jolma ibana, unang gabe babiat. Molo lam magodang
sahalak Kristen, manang tukkar “kulitna”/“bajubajuna”, ikkon tong ma Kristen na
botul ibana, jala ikkon mulak tu huriana hian ibana. Songon i do ulok. Asing do
sipasing. Mangolu di aek hian do sipasing, alai dung mangilulu sipasing i gabe
rimbur gabe boi ma habang jala ndang boi be mangolu di aek. Ganti “dunia”-na,
alai hot do utok-utokna. Molo songon i halak Kristen, i ma gabe marpinda
“dunia/habitat ni ngolu” ni Kristen i,
ikkon hot ma utokutokna marisi bisuk na sian Jahowa. Darapati pe, molo
dung boi habang, ndang manusai akka hauma ibana; paling mangalului/manuduki
allangonna na adong di atas tano i. Ndang manusai manang ise i, jala tudia pe
lao sai tong do darapati i. Songon i do akka sipakke habisukon na marharoroan
sian TUHAN Jesus Kristus/TONDI Porbadia.
5.
Adong do habisukon ni sian TUHAN Jesus Kristus boi pajumpang dohot habisukon
na sian portibion. Molo habisukon na denggan jala na padenggan hajolmaon di
partondion dohot di parngoluon siganup ari, na marharoroan sian portibion, pajumpang
dohot habisukon na sian TUHAN Jesus Kristus, lam denggan do jolma i pature
ngoluna. Contohna: “Somba marhulahula; manat mardongan tubu; elek marboru”,
bisuk sian portibi on do i. Alai pajumpang do i dohot bisuk na sian TUHAN Jesus
Kristus na mandok: Haholongi ma TUHAN Debatam sian nasa roham, sian nasa ateatem,
sian nasa gogom dohot sian nasa hosam; Haholongi ma donganmi doshon dirim.
Songon i do habisukon portibi na mandok: Pantun hangoluan; tois hamagoan.
Pajumpang do i tu bisuk na sian TUHAN Jesus Kristus na mandok: Sai burju ma ho
rasirasa mate. Umbahen na boi akka na songon i pajumpang, ala na mangula do
TONDI ni Jahowa di akka bangso na manguhal habisukon na denggan sian akka
agamana, jala dung sahat Barita Nauli tu nasida, lam dipauli Barita Nauli i ma
habisukon ni akka bangso i, jala dipakke laho lam mamabhen ture parngoluon ni
jolma.
6.
Diboto Apostel Paulus do, na adong do pangantusion ni akka ruas dohot
parhalado ni Huria Korintus taringot tu habisukon, na marharoroan sian
habisukon (sofia) ni halak Gorik dohot
halak Romawi nang halak Jahudi. Tarbarita do halak Gorik (Yunani) sian najolo
akka parfilsafat (=Parhabisukon),
songon si Plato, Socrates dohot akka na asing dope. Filsafat ni Gorik mandok:
Jolo dapot roha do asa boi haporseaan. Tarbarita do nang nang halak Romawi na
malo marfilsafat, ai tung tarbarita do hamaloon ni si Cicero, halak Romawi i.
Sian Romawi do botoon hamaloon na
mangajarhon trias politica. Mansai
denggan do ngolu ni bangso Junani (Gorik) dohot Romawi ala dihangoluhon nasida
akka poda habisukon (filsafat) nasida
be. Alai tarmasuk tu akka habisukon na di portibi on manang habisukon ni
partogi ni portibi on ma akka habisukon na songon i: Habisukon na olo salpu.
Tutu do nuaeng on nunga tarmasuk akka habisukon na salpu akka habisukon ni Gorik,
Romawi dohot Jahudi sinajolo i. Alai dipaboa Apostel Paulus tu huria Korintus,
na adong dope habisukon na tumimbo sian akka habisukon ni Gorik, Romawi dohot
Jahudi i, i ma habisukon na sian TUHAN Jesus Kristus (Jahowa Jeshua Hammasiah).
On ma habisukon na so ditanda agia ise sian akka partogi ni portibi on, sian
najolo sahat tu nuaeng on. Maksud ni apostel Paulus, marhite habisukon na sian
Jahowa i, boi dope bangunon hajolmaon nadumenggan sian hajolmaon ni Gorik,
hajolmaon ni Romawi jala dumenggan sian hajolmaon ni Jahudi. Tu akka naung matang (rimpas) marfilsafat do dipaboa
Apostel Paulus habisukon na sian TUHAN Jesus Kristus. Alana ianggo akka na
tangungtanggung do filsafatna (songon akka sileai Kristus sinuaeng on), ndang
tolapna mangantusi akka napinatorang ni Apostel Paulus i. Didok apostel Paulus,
ala holan bisuk na sian portibi dohot na ro sian partogi ni portibion do
dibahen akka Jahudi laho mangantusi Jesus, gabe diparsilanghon nasida ma Jesus,
jala dipakke nasida “lembaga hukum” ni Romawi mangalegitimasi (mansahhon) pambahenan
nasida i. Nang nuaeng on pe, akka sileai TUHAN Jesus Kristus, tong dope
mamparsilanghon TUHAN Jesus. Maksudna asa haru mate TUHAN Jesus i jala unang
adong be pangihutna. Akka sileai TUHAN Jesus torus marusaha mambahen christianocide (penghapusan hakristenon/manesa hakristenon) sian ganup negara na
adong di portibi on. Ikkon sialoon ni ganup Kristen do akka usaha christianocide i, marhite ngolu
partondion na luar biasa.
7.
Ikkon patuduhonon ni hita Kristen do marhite ngolu dohot pambahenanta, naung
takkas dipapatar Jahowa tu hita marhite TondiNa akka hasimoon ni (hal-hal yang tersembunyi dari diri) Jahowa Debata. Patar tabahen akka nabuni dope
najolo sian hadirion ni Jahowa. Puncak ni hapataron i, i ma sampe: "Na so
dung niida ni mata, na so dung binege ni pinggol, na so dung hehe di bagasan
roha ni jolma, i do diparade Debata di angka na mangkaholongi Ibana." Maksudna,
akka tanda halongangan ikkon masa marhite ngolu dohot pangalaho nang pambahenan
ni Huria Kristen, na takkas mananda haholongon ni Jahowa. Ikkon longang jolma
portibi on marnida ngolu dohot pangalaho nang pambahenan ni Kristen i, ala ni
dengganna na luar biasa. Asa boi songon i, ikkon jaloon ni pangihut ni Jesus
TONDI ni TUHAN Jesus Kristus. Unang sai
holan marguru tu tondi ni portibion ngolu ni akka Kristen i, alai ikkon gumogo
marguru tu TONDI PORBADIA ni sian JAHOWA. Tanda ni naung marguru tu TONDI ni
TUHAN Jesus ngolu ni Kristen i, tarida do i:
(a) Sian na takkas ganup Kristen mamboto dohot manghatindanghon
akka na binasabasahon ni Jahowa Debata (TUHAN Jesus Kristus) tu ganup dirina be
songon halak Kristen dohot tu jolma naasing di portibi on.
(b) Sian na tolap ni ganup
Kristen i (mampu) manghatahon akka silehonlehon ni TONDI i laho manimbangi
akka partondion mangihuthon ruhut ni tondi.
(c) Sian na tolap ni ganup
Kristen i patandahon Jahowa Debata di bagasan Jesus Kristus. Sude rahasia ni
hadirion ni Jahowa ikkon tarpatorang ni Kristen i naung tarida di bagasan diri
ni TUHAN Jesus Kristus. Mardomu tusi, dipakke Kristen i ma habisukon najinalona
sian TONDI PORBADIA i.
(d) Sian na tolap ni ganup
Kristen i mambahen akka jolma na so manjalo Jesus Kristus i gabe manjalo Jesus
i jala gabe sintindangi ni Jesus.
(e) Sian na tolap ni Kristen i
mambahen Barita taringot tu silang i, na dietong portibi on haotoon ala so
tartandanasida, gabe hapistaran dohot hamaloon na luar biasa di tonga ni hajolmaon. Mardomu tusi do, asa ikkon gabe
jolma akka naumbisuk, naumpistar, naummalo, nauntrampil, naundenggan, naummora
ganup Kristen i dibandinghon tu akka jolma na so Kristen na di portibi on.
(f) Sian na tolap ni ganup
Kristen i mambahen asa marhite akka halobian-halobian ni Kristen patar TUHAN Jesus
Kristus, Anak ni Debata, di hadirion ni Kristen i sandiri dohot tu akka jolma
na so Kristen dope. Jala marhite i ma patar situtu, na tung roha ni Kristus do roha
ni ganup Kristen i. I ma roha na
mangalobiani hadengganon ni parrrohaon ni akka jolma portibi on. Hinorhin ni i,
dohonon ni akka na so Kristen i ma tu halak Kristen: “Hamu Kristen i do bah na
botul. Ai tung mansai denggan parrohaonmuna.”
Dipargogoi TUHAN
i ma ganup Kristen / HURIA i laho patandahon naung marguru tu TONDI PORBADIA
parrohaonna dohot panggulmit ni ngoluna. Amen.
Pematangsiantar,
tgl. 18 Jannuari 2017. Pdt. Langsung Maruli Sitorus (Pdt. LaMBaS).
