JAMITA SIAN EVANGELIUM TU MINGGU ROGATE TGL 21 MEI 2017
PSALMEN 66:8-20
|
66:8
Puji ma Debatanami, hamu ale akka bangso, jala patubegehon hamu ma soara
pujipujianna!
66:9
Ibana mambahen hosata mangolu, * jala ndang diloas totta tarsulandit.
66:10
Ai nunga diunjuni Ho hami, ale Debata, nunga tung dilala Ho hami songon na
mangalala perak.
66:11
Nunga ditogu Ho hami tu bagasan jaring, na dokdok situtu diampehon Ho tu
gontingnami.
66:12
Nunga diloas Ho jolma na gale
marhureta sian ulunami, nunga masuk hami
tubagasan api dohot aek, alai diparuar Ho do hami, gabe sabam situtu
rohanami.
66:13
Dibahen i masukanku ma jabum, mamboan akka pelean situtungon, manggarar akka
bagabagaku tu Ho.
66:14
Angka naung pinapuas ni bibirhon, jala naung pinarbagabaga ni pamangankon,
uju hagogotan ahu:
66:15
Akka pelean situtungon sian birubiru na tinaruan do pelehononku tu Ho, akkup
ni daupa sian hambing ro di lombu dohot birubiru tunggal pelehononku tu Ho.
Sela!
66:16
Ro be ma mananginangi sude hamu akka na makhabiari Debata, asa hujamitahon
naung binahen ni Debata tu tondiku.
66:17
Tu ibana do joujou pamanganku, jala pujipujian mampe tu dilaku.
66:18
Tung sura hajahaton ditahi rohaku, ndang tagamon tangihonon ni Tuhan i ahu.
66:19
Tongon do, nunga ditangihon Debata ahu, nunga diparateatehon soara ni
tangiangku.
66:20
Pinuji ma Debata, na so manulakkon tangiangku manang asi ni rohana pe sian
ahu.
|
66:8
Pujilah Allah kami, hai bangsa-bangsa, dan perdengarkanlah puji-pujian
kepada-Nya!
66:9
Ia mempertahankan jiwa kami di dalam hidup dan tidak membiarkan kaki kami
goyah.
66:10
Sebab Engkau telah menguji kami, ya Allah, telah memurnikan kami, seperti
orang memurnikan perak.
66:11
Engkau telah membawa kami ke dalam jaring, mengenakan beban pada pinggang
kami;
66:12
Engkau telah membiarkan orang-orang melintasi kepala kami, kami telah
menempuh api dan air; tetapi Engkau telah mengeluarkan kami sehingga bebas.
66:13
Aku akan masuk ke dalam rumah-Mu dengan membawa korban-korban bakaran, aku
akan membayar kepada-Mu nazarku,
66:14
yang telah diucapkan bibirku, dan dikatakan mulutku pada waktu aku susah.
66:15
Korban-korban bakaran dari binatang gemuk akan kupersembahkan kepada-Mu,
dengan asap korban dari domba-domba jantan; aku akan menyediakan lembu-lembu
dan kambing-kambing jantan. S e l a
66:16
Marilah, dengarlah, hai kamu sekalian yang takut akan Allah, aku hendak
menceritakan apa yang dilakukan-Nya terhadap diriku.
66:17
Kepada-Nya aku telah berseru dengan mulutku, kini dengan lidahku aku
menyanyikan pujian.
66:18
Seandainya ada niat jahat dalam hatiku, tentulah Tuhan tidak mau mendengar.
66:19
Sesungguhnya, Allah telah mendengar, Ia telah memperhatikan doa yang
kuucapkan.
66:20
Terpujilah Allah, yang tidak menolak doaku dan tidak menjauhkan kasih
setia-Nya dari padaku.
|
UDUT TU
TANGIANG DOHOT UDUT NI TANGIANG
1. Hamuna
dongan sahaporseaon nahinaholongan di bagasan holong na sian TUHANta Jesus
Kristus. Ala di bagasan turpuk on ditaringoti na ditangihon Jahowa Debata
tangiang ni parpsalmen i, dipillit ma turpuk on gabe turpuk sijamitahonon di
minggu Rogate (Martangiang) on. Alai natumabo do molo so holan taringot tu
tangiang dapot hita sian turpuk on.
Dohot ma nian akka bagian ni ngolu ni naporsea na sai jotjot “udut tu tangiang”,
nang “udut ni tangiang”. Dibahen Huria i do goar ni Minggu andorang so Ari
Hananaek ni TUHAN Jesus Kristus tu banua ginjang: Minggu Rogate (Martangiang). Minggu
pangaradeon do i, lao manomunomu Ari Hananaek ni TUHAN Jesus Kristus. Ikkon
takkas sude Huria i dibagasan tangiang; sude parukkilon ni huria i dipaandar di
bagasan tangiang i, jala akka nanaeng parukkilhononna pe tong marudut tu akka
naung ditangianghon Huria i. Dung manaek TUHAN Jesus Kristus tu surgo, Ibana
ndang sai rap dohot Huria i be “di
pardagingon na somal” manang “di
pardagingon naung hehe sian namate”, alai dibagasan “pargaulan naimbaru na ma”,
i ma di bagasan Tondi Porbadia, Tondi Pangondian, songon nabinagabagahon ni
TUHAN Jesus Kristus tu akka siseanNa. Ala ni i ikkon takkas diboto Huria i aha
sihatahonon nasida di Tangiang i (na udut tu tangiang), na gabe isi ni
tangiang; jala aha sibahenon nasida dung
sidung na martangiang i (udut ni Tangiang i).
2. Puji ma Debatanami, hamu ale akka bangso,
jala patubegehon hamu ma soara pujipujianna. Debata (Allah) na patut
sipujion i ma Debata na manghaholongi jolma manisia, jala namanjujui jolma
manisia masihaholongan. Di sejarah ni paragamaon ni hajolmaon, debata na kuno
do debata na sai manjujui jolma masirasipan, masipamatean, holan lao
pabongakkon hedebataonna, jala asa dohonon ni halak, ibana do debata na sintong,
na jago, na so adong boi mangalo ibana. Akka debata na kuno i pe, sai
dibaritahon jolma pangihutna do akka debata na sai marporangi, jala akka jolma
pangihut ni akka debata i pe tong ma sai marporangi. Tung na songe do dietong
akka pangihutna be ganup debata na songon i. Hape sasintongna ganup debata na
songon i, ndang debata na dipuji i, alai na dihabiari do ala ni kejamna. Ndang
barani jolma mangalo debata na songon i, ala dilatik debata na kejam i do ganup
pangihutna gabe budak-budakna, gabe hatobanna, na so umboto nadenggan
maradophon jolma, na asing debatana. Sai adong dope tinggal-tinggal ni debata
na songon i nuaeng on diihuthon jolma manisia. I do umbahen lam susa jolma na
moderen nuaeng on, ala ni akka debata na sai anggar jago, na sai marsuru
pangihutna mambunu, pamatehon jolma na
so saagama dohot nasida. Ikkon sadar ma jolma sinuaeng, tarlumobi na moderen
on, bahaya ni debata na songon i tu hajolmaon. Dipamanat be ma ise debatana,
jala dipadao be ma dirina be sian debata na sai manjujui marbada, maneat jolma
na asing, na sai mangajarhon tu pangihutna, ia jolma na so mangihuthon ibana
kafir do na boi bebas bunuon.
Siihuthonon ni
jolma i ma debata parholong, na sai manjujui hajolmaon mangolu di bagasan dame
dohot masihaholongan. Dipamanat be ma atik na patut do sipujion debata
naniihuthonna be. Debata sipujion i ma debata naung mambahen na denggan tu
hajolmaon (tu marsasahalak dohot tu sude), so marhite na mangarugii manang
mambahen susa akka jolma na asing. Parpsalmen on mangajak akka bangso mamuji “debatanami”
(i ma Jahowa (TUHAN) Jesus Kristus), ala diparrohahon ibana akka nadenggan
naung binahen ni Jahowa (TUHAN) Jesus Kristus tu akka bangso, tu bangso Israel
dohot tu portibi on. Tama dohot akka bangso patubegehon soara ni
pujipujiannasida mamuji Jahowa (TUHAN) Jesus Kristus naung patupa akka
nadumenggan tu ganup bangso na adong di portibi on. Sude bangso mangendehon:
“Puji Jahowa na sangap huhut marmulia....Na manogihon ho songon ni iring ni
tangan....” Alasan ni parpsalmen on mangajak sude bangso mamuji Jahowa (TUHAN)
Jesus Kristus, ala nunga patut nasida saluhutna songon raja Sirus (Kores)
mangakui “hatimbulon” ni Jahowa naung mandongani bangso Israel/Juda di
pardalanan ni sejarahna: Laos beha dibahen akka bangso lao manghapus bangso Israel/Juda,
sai tong do ndang boi dihapus nasida, ala Jahowa do na mandongani nasida, jala
na mangatur akka harajaon di portibi on.
3. Jahowa
(TUHAN) Jesus Kristus mambahen hosa ni sude jolma mangolu, tarmasuk hosa ni
bangso Israel. (Ditariashon do i nang di barita panompaon i). Nunga dibahen Jahowa (TUHAN) Jesus Kristus
sude na dihaporluhon jolma manisia di tano on asa boi sude jolma manisia i rap
mangolu, so mardiaimbar, jala ndang adong diskriminasi. Sian najolo sahat tu
nuaeng, ndang lomo roha ni Jahowa (TUHAN) Jesus Kristus adong jolma mangumpat
hosa na mangolu, nanilehon ni Jahowa (TUHAN) Jesus Kristus i, sian ganup jolma
na dia pe i. Ikkon na mago sandiri be ma hosa ni ganup jolma molo dung jumpang
be tikkina mangombushon i parpudi sahali
(= mate). Sandok ndang boi pamate hosa ni jolma atas nama TUHAN, atas nama
agama, atas nama undang-undang, atas nama dendam dohot atas nama na asingnari.
Mardomu tusi do umbahen ndang diloas
patta (pat ni ganup jolma) tarsulandit (= goyah).
Artina hasintongan ni ruhut hajolmaon (hak-hak
azasi manusia) ikkon torus didalanhon sude jolma. Unang adong na
mangalanggar, marhite alasan dia pe. Agama na so manghargai hak azasi ni jolma
paragama na asing, ndang agama na sintong i, sitinggalhonon do agama na songon
i. Ikkon malo ma Huria Kristen mamuji Jahowa (TUHAN) Jesus Kristus naung
pajongjong ruhut hajolmaon (HAM) na mansai denggan situtu, na boi mambahen hosa
ni sude jolma mangolu. Asa diihuthon akka bangso pamujion ni Kristen i.
Pamujion ndang holan marhite ende, dohot akka nasinurat; dohot do marhite
sistem parnegaraon, sistem demokrasi, hamajuon ekonomi, hadengganon marpolitik,
hadengganon ni budaya, mamelehon daging dohot tondi tu harajon ni Jahowa
(TUHAN) Jesus Kristus. Dohot godang dope ragam ni dalan laho mamuji Jahowa
(TUHAN) Jesus Kristus.
4. Adong
do namansai porlu parrohahonon, dipaboa parpsalmen on, alasanna mamuji Jahowa
(TUHAN) Jesus Kristus. Diakui ibana naung diunjuni Jahowa (TUHAN) Jesus Kristus
do ibana dohot bangsona, jala pola dilala Jahowa (TUHAN) Jesus Kristus nasida
songon na mangalala perak, asa boi dituang (dibentuk)
muse. Direnunghon ibana parsorionna dohot parsorion ni bangsona, sian najolo
(tikki ni si Musa) sahat tu tikki disurat ibana psalmen on, dung mulak bangso
Israel sian habuangan Babel. Diunjuni Jahowa (TUHAN) Jesus Kristus do bangso
Israel di pardalanan nasida haruar sian tano Mesir di tikki di parhorsikan (padang gurun) Sinai. Diunjuni Jahowa
(TUHAN) Jesus Kristus do nasida di tikki akka raja mamarenta nasida di Juda.
Marroan jala marganti soring akka raja na leban dohot tentarana manghubu tano
Juda jala manaluhon raja ni Juda. Ro raja Sanherib sian Syria. Ro raja
Nebukadnezar sian Babel. Ro akka Firaun si Mesir. Ro raja ni Persia mangkuasai
nasida. Di haroro ni Nebukadnezar gabe tarbuang nasida tu Babel, dilengsehon
bagasjoro ni Jahowa (TUHAN) Jesus Kristus na adong di Jerusalem. Akka i
dirajumi boi masa, ala na diloas Jahowa (TUHAN) Jesus Kristus “jolma na gale
marhureta sian ulu” ni bangso Juda. Di na tarbuang nasida tu Babel, botulbotul nunga
malala situtu nasida, songon perak na malala ditutung (digorgori) sitopa perak.
Ala ni habuangan i, bangso Juda masuk tu bagasan api na naeng mangarotonghon
nasida, dohot tu bagasan aek na nanaeng mangogaphon nasida. Ganup pangunjunan i
songon jorgong (jaring) do i na naeng manjorat nasida, asa ditadinghon nasida
Jahowa (TUHAN) Jesus Kristus. Sude pardebatasilebanon dibahen Jahowa (TUHAN)
Jesus Kristus naeng manjorgong nasida, asa tung haru maup nasida, hona uhum ni
Jahowa (TUHAN) Jesus Kristus. Dokdok situtu boban na disakkothon Jahowa (TUHAN)
Jesus Kristus tu gonting ni bangso Juda. Ai di bagasan pangunjunan na luar
biasa i, sai tong dijouhon Jahowa (TUHAN) Jesus Kristus tu nasida, asa mulak
nasida tu Jahowa (TUHAN) Jesus Kristus. Di ganup hasusaan i, tugas dohot
tanggungjawab ni bangso Juda songon bangso napinillit ni Jahowa ikkon
patuduhonon ni bangso Juda. Tutu diula nasida do i marhite panghirpasion ni si
Ezra na mamboan mulak bangso Juda mangaradoti patik ni si Musa di habuangan
Babel dohot di masa pemarentaon ni raja Kores (Sirus). Dohot marhite
panogunoguon ni panurirang Nahum, Habakuk, Zepanya, Hesekiel, Jesaya (II &
III), Sakkarias, Haggai sahat tu tikki
ni si Maleaki. Hasil ni naniula ni akka partogi ni agama nasida on tarida do. Adong
sian halak Jahudi i na gabe penasehat ni raja, na dihaposi raja na manjaja
nasida, songon jolma na denggan situtu. Jala pangontakna, na takkas mambahen
nasida patut mamuji Jahowa (TUHAN) Jesus
Kristus, i ma dekrit ni raja Sirus (Kores) na mandok mangaloas akka bangso
(tarmasuk bangso Jahudi) mulak sian habuangan tu bona ni pasogitna be. Khusus
tu halak Jahudi, diparentahon raja Sirus (Kores) asa bangunon nasida bagas joro
ni Jahowa (TUHAN) Jesus Kristus na di Jerusalem, naung niroksohon ni raja
Nebukadnezar, jala biaya pembangunanna ditanggung kas negara dohot kas propinsi
Saborang Sungai na adong di harajaon Persia tikki i. Marhite na mangarenunghon
pambahenan ni Jahowa (TUHAN) Jesus Kristus tu bangso Jahudi i, parpsalmen on
tolapna mandok tu Jahowa (TUHAN) Jesus Kristus: “alai diparuar Ho do hami”. Tutu do i, diparuar Jahowa (TUHAN) Jesus
Kristus do bangso Israel sian habuangan i, diparuar sian “golap ni paragamaon”
(mulak tu agama na mardebatahon Jahowa (TUHAN) Jesus Kristus), diparuar sian
golap ni parbangsoon (mulak gabe bangso natarpillit), diparuar sian golap ni
integritas, gabe bangso namarintegritas; diparuar sian parbolatan ni Israel
dohot Juda, gabe sada bangso nasida. Dibereng ibana nunga mulak adong muse
bagas joro ni Jahowa (TUHAN) Jesus Kristus
di Jerusalem. On ma na pasabam roha ni parpsalmen on dohot donganna
sabangso (“gabe sabam situtu rohanami”). Hasil pangarenunghonon on ma sada na
udut tu tangiang ni parpsalmen on, dohot bangso Jahudi na rap dohot ibana. Di
naung “bebas” (LAI TB) muse bangso Jahudi i, mulaan nasida ma mamuhuti ngolu na
hombar tu lomo ni roha ni Jahowa (TUHAN) Jesus Kristus. Sabam rohanasida ala
tung takkas do dibereng nasida pambahen ni Jahowa paluahon nasida sian
haporsukon godang i, jala nuaeng dapot
hangoluan natabo nasida, gabe bangso nadihaholongi bangso na asing (bangso
Persia) nasida. Halak naung sabam rohana, i ma halak na olo manghamauliatehon
pambahenan na denggan na sian Jahowa (TUHAN) Jesus Kristus tu ibana. Halak na
sabam rohana do na ringgas martangiang.
5. Mardomu
tu panandaonna tu akka nabinahen ni
Jahowa tu ngolu ni pribadi ni parpsalmen on dohot tu ngolu ni bangsoNa,
martekad do parpsalmen on pasahat tangiangna tu Jahowa (TUHAN) Jesus Kristus di
bagasjoro ni Jahowa (TUHAN) Jesus Kristus, na dirangkai tu haoloonna pasahathon peleanna tu Jahowa
(TUHAN) Jesus Kristus dohot manggarar bagabagana (nazar/janji imanna). Dibahen
i masuhangku ma jabuM, mamboan akka pelean situtungon, manggarar akka bagabagaku
tu Ho. Akka naung pinapuas ni
bibirhon, jala naung pinarbagabaga ni pamangankon, uju hagogotan ahu: Akka pelean situtungon sian birubiru na tinaruan
do pelehononku tu Ho, akkup ni daupa sian hambing ro di lombu dohot birubiru
tunggal pelehononku tu Ho. Sela! Tolu do ulaon molo masuk tu bagas ni
Jahowa: Mamuji Jahowa, martangiang tu Jahowa dohot pasahathon pelean tu Jahowa. Di psalmen
on ndang pola ditariashon akka dia isi ni tangiang na dihatahon parpsalmen i tu
Jahowa. Alai sian pangarenunghononna di parsorion ni ngoluna dohot ngolu ni
bangsona, boi juo do ditangianghon ibana
jala dipangido ibana asa hot pandonganion ni Jahowa (TUHAN) Jesus Kristus di
ibana dohot di bangsona, asa unang be diunjuni Jahowa bangsoNa, asa boi ma
nasida torus sonang manomba dohot mamuji Jahowa di bagasjoro naung pinauli i muse, asa bangso Israel (na sian Utara dohot
na sian Selatan, naung tarbuang tu Mesopotamia (722 asK) dohot tu Babel (587
asK) dipasada di adopan ni Jahowa (TUHAN) Jesus Kristus. Asa tongtong
dipasupasu Jahowa (TUHAN) Jesus Kristus partanian dohot pardorbiaon
(parpinahanon) ni bangsona, asa anggiat tongtong adong sipelehonon tu Jahowa
(TUHAN) Jesus Kristus. Ditangianghon parpsalmen i, asa tongtong satia bangso ni
Jahowa mangoloi Jahowa (TUHAN) Jesus Kristus, ia tung pe manang aha namasa di
bagasan ngolu nasida. Tarumushon be ma isi ni tangiangta, molo dung tarenunghon
akka pambahenan ni Jahowa (TUHAN) Jesus Kristus tu hita be dohot tu HuriaNa
nang tu bangsota.
6. Natakkas
dipaboa parpsalmen on, sibahenonna di bagasjoro ni Jahowa (TUHAN) Jesus
Kristus, i ma pasahathon akka bagabaga naung nihatahonna sandiri di tikki
hagogotan ibana. Ibana songon si Hanna
(inanta ni si Elkana), na hea marnazar: “Ale Jahowa Zebaot! Molo ditatap roham
pardangolan ni naposomon, jala diingot Ho ahu, jala ndang halupahononmu
naposomon, jala dilehon Ho tu naposomon sada anak, lehononku ma ibana muse tu
Jahowa saleleng mangolu ibana, jala ndang jadi hona raut parnabung uluna” (1
Sam.1:11). Parpsalmen on marnazar tu Jahowa (TUHAN) Jesus Kristus: Molo sanga
dope masukanhu bagasMu ale Jahowa, sai na pelehononku do tu Ho: akka pelean situtungon sian birubiru na
tinaruan (binatang gemuk) dohot daupa sian hambing ro di lombu dohot birubiru tunggal. Dung
dipasanga Jahowa (TUHAN) Jesus Kristus parpsalmen on masuk tu bagasjoroNa,
ditopeti parpsalmen on do bagabaga (nazar/janji
iman)-na i. Ndang merasa rugi ibana, dinadipelehon ibana sampulu lombu
jonggi, duapulu birubiru tunggal na mansai mokmok, duapulu hambing di langgatan
ni Jahowa (TUHAN) Jesus Kristus. Jala hombar tu naniaturhon ni akka malim,
dapotan las ni roha sude donganna sabangso na ro tu bagasjoro i, marhite akka
bagian ni pelean i naboi bagihonon ni malim tu akka jolma na ro tu bagasjoro i,
jala pola sai sukkun-sukkun nasida, boasa pola dibahen parpsalmen i na songon
i. Ai somalna, sada ekor be pe sian ganup massam ni pelean i dipelehon na ro tu
bagasjoro, nunga tarmasuk sipujion ibana disi. On sampe marpulu ihur. Songon i
do pambahenan ni sahalak naporsea tu Jahowa (TUHAN) Jesus Kristus molo dirajumi
ibana tung tombus situtu tangiangna, dioloi/dialusi Jahowa (TUHAN) Jesus
Kristus tangiangna. Nang di zaman nuaeng on, porlu do tong adong alus ni
naporsea tu Jahowa (TUHAN) Jesus Kristus, ala dihilala ibana denggan basa ni
Jahowa (TUHAN) Jesus Kristus na mangiringiring ngoluna dohot pomparan ni ompuna
dohot bangsona/huriana. Tutu ndang be lombu, birubiru, hambing sipelehonon
nuaeng on, alai tuhor ni lombu, hambing dohot birubiru i na ma, na lao boi
pakkeon ni Jahowa (TUHAN) Jesus Kristus marhite huriaNa lao pararathon
HarajaonNa, dohot lao pature hajolmaon. Pasahat pelean tu Jahowa (TUHAN) Jesus
Kristus tarmasuk akka bagian ni tangiang i do i. Ai ndang adong pelean na so
mardongan isi ni tangiang. I do na dibahen sahat tu nuaeng on di huria i, molo
pasahathon “pelean hamauliateon”/”ucapan
syukur”, janji iman, manang akka pelean napinasahat di tikki marminggu
(pelean parjolo, paduahon dohot patoluhon, pelean pembangunan dohot ragam ni
pelean na asing). I do umbahen ikkon takkas dihatahon di tangiang, akka
napinangido ni na pasahat pelean i tu Jahowa (TUHAN) Jesus Kristus.
7. Udut
tu tangiang naung dipasahat tu Jahowa (TUHAN) Jesus Kristus, diajak parpsalmen
on do asa ro be ma mananginangi sude hamu akka na manghabiari Debata, ai
naeng jamitahononna naung binahen ni Jahowa (TUHAN) Jesus Kristus tu tondina. I
do na sasintongna, akka naung pasahat peleanna tu Jahowa (TUHAN) Jesus Kristus,
ikkon ma gabe saksi (sitindangi) ni Jahowa (TUHAN) Jesus Kristus di tongatonga
ni hajolmaon manang portibi on. Akka na so manghabiari Jahowa (TUHAN) Jesus
Kristus ndang porlu dohot i, alana nunga takkas jambar ni jolma na songon i, i
ma uhuman na dokdok sian Jahowa (TUHAN) Jesus Kristus. Nang ro pe halak i (na
so manghabiari Jahowa), tong do parcuma i, ai songon nanidokna di Jes.1:15:
ndang tangihonon ni Jahowa pangidoannasida. Jala songon nidok ni apostel
Jakobus: parcuma do lehonon ni Jahowa tu akka na so manghabiari Jahowa, jala
gabe hasusaan nasida do i (jaha Jak:4:3).
Alai di akka na
manghabiari Jahowa (TUHAN) Jesus Kristus, porlu lam tu tandapna di nasida be
aha sihirimon ni roha nasida, di na olo nasida burju mangoloi/mangihuthon
Jahowa (TUHAN) Jesus Kristus. Ala ni i, ikkon ma jamita ni akka na manjamitahon
naung binahen ni Jahowa (TUHAN) Jesus Kristus tu tondina, ikkon lam patandaphon
dohot pagogohon panghirimon ni akka na
mabiar mida Jahowa (TUHAN) Jesus Kristus. On mansai porlu disadari akka
parjamita. Alana, sijamitahonon i, ndang holan akka nabinahen ni Jahowa (TUHAN)
Jesus Kristus di sejarah, di pengalaman ni jolma, alai tarlumobi akka na
binahen ni Jahowa (TUHAN) Jesus Kristus tu partondion ni jolma, tarmasuk tu
partondion ni parjamita i. Jamita i ndang sukkup holan hata, alai ikkon ma
mardongan parngoluon. Parngoluon i tarida sian: (1) tu ise joujou pamangan ni
parjamita i; (2) pujipujian dia ma na mampe tu dila ni parjamita i. Parpsalmen
on jelas mandok: ia pamanganna joujou tu Jahowa (TUHAN) Jesus Kristus do, jala
pujipujian na mampe tu dilana, tung pujipujian tu Jahowa (TUHAN) Jesus Kristus.
Molo joujou ni parpsalmen i lao manjouhon hasangapon ni dirina, jala pujipujianna
gabe mamuji dirina (songon na jotjot masa di tongatonga ni jolma si ginjang
roha), taretong do na martahi hajahaton
ibana, ai naeng mangarampas hasangapon dohot bagian ni Jahowa (TUHAN)
Jesus Kristus do ibana molo songon i pambahenna. Alai ala ias jala bulus do
roha ni parpsalmen on, jala tung so adong hajahaton ditahi rohana, tung takkas
do ditangihon Jahowa (TUHAN) Jesus Kristus tangiangna. Dia ma buktina, na
ditangihon Jahowa (TUHAN) Jesus Kristus tangiang ni parpsalmen on? Bukti na
parjolo i ma, di na sanga i ibana masuk tu bagas ni Jahowa (TUHAN) Jesus Kristus,
jala sanga ibana manggoki akka bagabagana dohot pasahathon peleanna tu Jahowa
(TUHAN) Jesus Kristus. Ala na dioloi Jahowa (TUHAN) Jesus Kristus do tangiang
ni parpsalmen on umbahen boi songon i. Ala ni i, lam marposni roha do ibana, na
tung oloan ni Jahowa (TUHAN) Jesus Kristus do tangiangna, na dipasahat ibana
tikki martangiang ibana pasahathon peleanna, dohot manggoki bagabagana.
8. Ala
ni i do umbahen tardok ni parpsalmen on:
Tung sura hajahaton ditahi rohaku, ndang
tagamon tangihonon ni Tuhan i ahu. Tongon
do, nunga ditangihon Debata ahu, nunga diparateatehon soara ni tangiangku. Pinuji ma Debata, na so manulakkon
tangiangku manang asi ni rohana pe sian ahu. Di poda ni Jahowa (TUHAN) Jesus
Kristus tikki mangajari akka siseanna martangiang, takkas do didok tu siseanNa
i: “Dung i, jumpa martangiang hamu, unang songon halak pangansi hamu, angka na
mangkalomohon jongjong martangiang di angka parguruan dohot di dalan balobung,
asa diida jolma i nasida. Na tutu do na hudok on tu hamuna: Nunga sahat dijalo
nasida upanasida! Alai ia martangiang ho, tu bilut ma ho laho; sordak ma pintu
i! Dung i martangiang ma ho tu Amangmu na di na buni, gabe baloson ni Amangmu,
na marnida di na buni, ma i tu ho! Asa uju martangiang hamu, unang marnoninoni
bahen hamu songon binahen ni sipelebegu; i dirimpu, tangihonon ni Debata nasida
ala ni deak ni hatahatanasida. Ipe, unang ma doshon nasida hamu! Ai diboto
Amamuna do na ringkot di hamuna, andorang so mangido dope hamu” (Mat.6:5-8). “Pangido
hamu ma, sai na lehononna do tu hamu; lului hamu ma, sai na jumpangan do hamu;
tuktuhi hamu ma, sai na ungkaponna do di hamu! Ai sai na manjalo do nasa na
mangido, sai na jumpangan do na mangalului; sai na ungkapon do di na manuktuhi!”
(Mat.7:7-8). Songon i do akka na
martangiang sian tulus/burju ni roha, jala ndang adong tahi na jahat dibagasan
rohana. Dijamin Jahowa (TUHAN) Jesus
Kristus do alusanNa tangiang ni si partangiang i asal ma sian bulus dohot burju
ni rohana. Huria na ringgas martangiang,
i ma huria na manghirim godang lehonon ni Jahowa (TUHAN) Jesus Kristus tu huria
i. Huria na ringgas martangiang, i ma huria na mangolu haporseaonna, jala
masihol masa mansai godang nauli bahenon ni Jahowa (TUHAN) Jesus Kristus di
tongatonga ni hajolmaon. Huria naung manghilala godang ni pambahenan ni Jahowa
(TUHAN) Jesus Kristus na denggan tu ngolu ni huria, i ma huria na mansai
ringgas mamuji Jahowa (TUHAN) Jesus Kristus jala manurathon mansai godang akka
ende pujipujian, huhut mambahen ngolu ni huria i gabe pujipujian tu Jahowa
(TUHAN) Jesus Kristus.
9. Huria
ni TUHANta, dongan sahaporseaon na hinaholongan. Tapamanat ma di ngolunta, di ngolu ni
huriata, dohot di ngolu ni bangsota, akka dia ma na denggan dipatupa Jahowa
(TUHAN) Jesus Kristus laho pangoluhon hita. Sian akka i, borhat ma hita
martangiang tu bagasjoro ni Jahowa (TUHAN) Jesus Kristus laho pasahathon
bagabagata dohot akka sipelehononta tu Jahowa (TUHAN) Jesus Kristus, huhut
mardongan panghirimon, na tung mansai godang dope tugasta laho pasauthon sakkap
hatuaon na binahen ni Jahowa (TUHAN) Jesus Kristus tu hita HuriaNa saluhutna. Didok
TUHAN Jesus tu akka pangihutNa: “Ndada hamu mamillit Ahu; Ahu do mamillit hamu
jala hupadiri hamu, asa laho hamu marparbue, jala asa mian parbuemuna i; asa
dilehon tu hamu nasa sipangidoonmuna sian Ama i marhitehite Goarhu” (Joh.15:16).
“Ai jaloonmuna do saluhut nasa na pinangidomuna di tangiangmuna, anggo na
porsea hamu!” (Mat.21:22). Hombar tusi didok apostel Paulus: “Unang holsohon
hamu agia aha; alai sandok pabotohon hamu ma tu Debata pangidoanmuna
marhitehite tangiang dohot elehelek mardongan mauliate!” (Pil.4:6). Jala dipaingothon
apostel Jakobus tu Huria i: “Antong, masitopotan dosa ma hamu dohot
masitangiangan, asa malum hamu. Na margogo situtu do tangiang ni partigor, molo
dihaburjuhon” (Jak. 5:16). Tahangoluhon
ma i, ai tung mansai godang do laba di hita sian i. Amen
Pematangsiantar, tgl. 9 Mei
2017. Pdt. Langsung Maruli Basa Sitorus (Pdt. LaMBaS).
