JAMITA SIAN EPISTEL TU MINGGU III DUNG TRINITAS TGL 2 JULI 2017

1.      Hamuna dongan sahaporseaon nahinaholongan di bagasan holong agape na sian TUHANta Jesus Kristus.  Di turpuk on si Mateus mamakke hata “manjakkon” (BI: menyambut; Gorik: dexomenos < dexemai; Heber: maqbal; Inggris: receive; Latin: recipit; Jerman: aufnehmen), na umbagas lapatanna sian hata “manangihon” (hata napinakke ni si Lukas di Luk.10:16) (BI: mendengar; Gorik: akuo; Heber: sama‘; Inggris: hear; Latin: audio; Jerman: hören). Manangihon (= manjalo barita i huhut dipamasuk tu ateate) ndang dope tardok manjakkon, alai molo manjakkon (= manjalo barita i, dipamasuk tu ateate, jala mardongan/maraleale tu napasahat barita i) pasti do nunga dohot manangihon. Apostel Jakobus mandok: Unang ma holan na manangihon, alai dohot ma namangulahon hata i. Mangulahon hata i tarmasuk do naung manjakkon na pasahat hata na ditangihon i. Ulaon marbarita nauli ndang cukup holan pasahat hata sitangihonon, alai ikkon sahat do patuduhon akka sibahenon, ulaon, pangalaho, rumang ni hajolmaon, sijakkonon ni natumangihon hata i. Ala ni pangantusion na songon i, mandok “ulaon marbarita nauli i” dison diantusi  “dohot mangula di ulaon misi ni Tuhan Jesus Kristus”.

2.      Dung dipillit Tuhan Jesus Kristus akka siseanNa, dilatik do nasida, asa ganup nasida boi mambahen songon nabinaen ni Tuhan Jesus Kristus. Dibohali jala dilehon do tu nasida sahala mangalo dompak akka tondi nahodar, laho pabalihonsa jala laho pamalum nasa sahit dohot tihas (kelemahan). Tugas manang misi nalao ulahonon nasida: Mamaritahon naung songgop harajaon banua ginjang. Pamalum sahit ni jolma namarsahit. Pangoluhon jolma na mate. Paias hulit ni nahuliton. Pabali akka sibolis sian jolma. Dipatorang Jesus do songon dia bohal nasida mangula ulaon i: Ndang porlu lobi sian na sukkup. Diajari Jesus do nasida laho mamulai ulaon i di sada huta: Ikkon luluan adong halak na olo gabe sorangan (inganan manumpang), paima borhat sian huta i tu huta na asing. Diajari Jesus do nasida sopansantun: Hata dame pasahaton nasida tu halak na jumpang nasida, songon tabi laho masisisean. (Šalom lakem = Dame ma di hamu). Dipodai do tong,  boha do sikap ni ganup sisean i molo ditulak halak nasida. Ditariashon Jesus do tu nasida, akka aha tantangan, hamaolon sihadapan nasida di arena mangulahon misi ni Tuhan Jesus i: didakwa jala dialuhon tu pamarenta asa diadili manang dihurunghon, sahat tu natarancam agoon ni halak hosa nasida; masijehean na sajabu; dilele nasida sian huta tu huta. Diajari Jesus do boha nasida asa boi “malua sian pangalelelon i. “Hosoman ni saluhut jolma do hamu ala ni GoarHu, ninna Jesus tu akka siseanNa i. Mardomu tusi, diondolhon Jesus asa unang mabiar siseanNa i tu akka i sude, na holan sanggup mambunu daging, alai ndang mampu mambunu tondi. Gumogo dope pangaramotion ni Jahowa Jesus Kristus tu nasida sian akka pangago i sude. Diondoshon Jesus do, na mamboan  parsirangan ni na mangihuthon Jesus dohot na so olo mangihuthon Jesus do haroroNa. Ala ni borat ni ulaon i, mansai takkas dipangido Jesus tekad na so olo mundur di akka siseanNa i (super-setia), laho mangulahon misi ni Jesus i. Diarop roha ni Jesus, ganup siseanNa i botulbotul takkas situtu jolma na olo sumeahon ngoluna ala ni TUHAN Jesus Kristus.

3.      Mardomu tu ulaon, tantangan, hamaolon dohot harapan  naung pinaboa ni TUHAN Jesus  i do, diondolhon Jesus akka nanidokna di turpuk jamita epistel on, asa boi tulus sude patupaon ni ganup sisean i parsidohoton mangulahon misi ni TUHAN Jesus Kristus. Na manjakkon hamu, Ahu do nijakkonna: Jala na manjakkon Ahu, Na marsuru Ahu do nijakkonna disi. Nunga dilumbahon Jesus hian, na adong do kemungkinan ndang dijakkon huta/jolma natinopot ni sisean i nasida: “Jadi anggo so dijangkon nasida hamu manang so olo tumangihon hatamuna, tadingkon hamu ma bagas dohot hutanasida, laos pirpirhon hamu ma dompak nasida nang orbuk na lohot di patmuna!” (Mat. 10:14). Uhuman tu namanulak sisean ni Jesus pe dipaboa  do mansai koras. Ala ni i, ikkon do usahahonon ni sisean ni Jesus asa sampe boi nasida be dijakkon jolma/huta natinopot nasida. Ai molo sampe ditulak nasida, na mambahen hona uhum na koras do jolma/huta namanulak i. Ala songon birubiru tu tongatonga ni babiat do ganup sisean i disuru,  ikkon  do pakkeon ni ganup sisean i ilmu naung pinasahat ni Jesus tu nasida, i ma ilmu: “Pantas ma hamu marroha songon ulok, huhut lidang ma rohamuna songon darapati!” (BI: Hendaklah kamu cerdik seperti ular dan tulus seperti merpati; Heber: ‘^arûmîm kann^eḥasîm wut^emîmîm kayyonîm; Gorik: fronimoi hos hoi hofeis kai akeraioi hos hai peristerai; Latin: prudentes sicut serpentes et simplices sicut columbae).  ‘aram = marakkal situtu; fronimoi = akka na marpikkir cerdas; prudentes = akka na marroha manarihon ngoluna). Tamam = ndang marlaoklaok ulaonna; sempurna/sikkop pambahenanna. Akeraio = marhabonaran/marhasintongan. Simplices = simpelsimpel; ndang marbelitbelit. Jotjot do roha ni jolma sai manduga na roa molo dihatai ulok, ujung na maol ma diantusi boha do pantas marroha songon ulok. Ulok ndang hea manguloki; jolma do na olo manguloki. Artina sai margellokgellok roha, dohot hata ni jolma i. Ianggo ulok, molo manginsir ibana jala margellok badanna i, na lao maju tu jolo do, alai boi hatop mangalit tu pudi molo sukkot. Strategi mardalan tu jolo do panggellok ni badanna. Molo naeng marbalga ibana, mangilulu ma ibana, ganti ma sisikna, gabe marsisik na imbaru, manis berengon, alai tong do hot ulok na sarupa ibana. Ndang gabe ulok sendok hian, gabe ulok sawah. Ia ulok sendok, ulok sendok do tong nang pe naung mangilulu. Tung dihurung pe di karanjang ulok i, jala manang didia pe ibana tong ulok na so maruba do ibana. Laos diantuki halak pe ulok i ala sogo ni roha ni jolma tu ulok i, tong do ulok na hot ibana songon andorang so diantuki. Molo tarhapit ulok, sanggup do ibana “mendesis” (mamursik lao mambahen mabiar na manghapit ibana); jala molo porlu sanggup do ulok i manurbing, mambahen mate na manghapit ibana. Alai ndang hea sai anggar jago ulok mamakke bisana.  Sanggup do ulok gabe dongan ni jolma. Songon i do porlu pantas ni roha ni akka sisean ni Jesus. Ndang gabe jolma namubauba, ndang menggolenggol hadirion dohot haporseaon ni ganup nasida.  Gaya pardalan ni sisean i ikkon na laho maju do. Molo “tukar sisik” pe ibana tong do hot sisean ni Jesus ibana. Tung dihurung pe ibana, tong do hot ibana  sisean ni Jesus. Tung dipamate pe ibana tong do hot ibana  sisean ni Jesus. Molo porlu, boi do ibana pamate alona, alai dipatiki Jesus do asa ikkon Jesus martindak tu akka alo ni sisean i. Ikkon boi do gabe dongan “nadisegani” ganup sisean ni Jesus i. Songon i ma na pantas rohana. Akka na lidang rohana, i ma jolma na sai mambahen sidung-sidung ulaonna mansai denggan. Ndang olo i targanggu mangula ulaonna, jala ikkon tulus sude ulaonna i mansai denggan. Sudena ilmu on ikkon pasangon ni sisean ni Jesus, asa sampe boi nasida ganup dijakkon jolma/huta natinopot nasida. Alana molo marhasil akka sisean i mambahen dirina dohot hatana dijakkon jolma/huta i, na marhasil ma nasida mambahen na dijakkon jolma/huta i do TUHAN Jesus Kristus dohot Jahowa AMA i, na marsuru Tuhan Jesus Kristus. Hata “hamu” di hata ni Jesus on, mandok sude sisean ni Jesus i do i. Jadi ndang ulaon ni marsasahalak ulaon mambahen  asa dijakkon jolma/huta sisean ni Jesus i. Ikkon usaha bersama ni akka sisean i do i. Misalna, molo gagal sada sisean, diusahahon sisean na asing manopot huta i marhite metode na imbaru, asa boi sisean i dijakkon jolma/huta i. Molo boi rap dijakkon nasida sude, denggan do i. Alai didok Jesus ndang holan tu sada huta nasida lao, tu sude huta dohot luat do.  Dukkon dijakkon jolma/huta i sisean i, ikkon marusaha sisean i, asa dijakkon nasida nang Jesus Kristus, marhite usaha ni sisean i. Unang go dijakkon sisean i, hape Jesus ndang dijakkon. Misalna didok jolma/huta i tu sisean i: “Ho boi do tinggal di huta on rap dohot hami, alai ndang boi baritahononmu taringot tu Jesus Kristus!” Ala ni i gabe laos so adong usahana asa dijakkon jolma/huta i Jesus Kristus. Nunga adong pengalaman ni guru (Kristen) na diimpor sada negara mangajari di sada luat di negara i. Dipatiki ibana, na so boi ibana marcerita taringot tu Jesus di kesempatan dia pe tu muridna. Alai sai dibahen guru on ma akka na denggan tu akka muridna i, sampe longang akka murid i sude, boasa songon i burju ni guru nasida i. Di tikki perpisahan tu guru i ala naung habis kontrakna mangajar, disukkun akka muridna i ma boasa tung songon i burju ni guru nasida i. Dialusi jala dipaboa  guru i ma, ala na songon i do burju ni Guruna tu ibana, jala dipaboa guru i goar ni Guruna nanidokna i, i ma Jesus. Dung sidung perpisahan i, duapulu sian tolupulu halak murid ni guru i mandok: Mulai ari i gabe pangihut  ni Jesus Kristus nasida. Jala konsistent do akka murid i di hatana i. Ndang tardok ni kepala sikola i taringot tu haputusan ni akka murid-murid i, jala didok tu nasida: “Ba saguru di hamuma, ai nunga diboto hamu dia na denggan dohot na so denggan.” Mulai sian i, lam godang do na gabe pangihut ni Jesus na satia di luat i.

Manjakkon Jesus Kristus ikkon do manait tu panjakkonon tu Jahowa Ama i. Alana, gabe poda haliluon do molo gabe so sahat tu AMA i barita nauli nabinoan ni akka sisean ni Jesus Kristus. Adong do huria na lilu sahat tu nuaeng on, ala didok holan TUHAN Jesus Kristus do naporlu baritahonon, ianggo taringot tu AMA i na ditariashon di Padan Na Robi ndang rikkot be i botoon ni halak, ninna. Ujungna, buku Pada Na Robi i pe ndang dirajumi be bagian ni Buku Nabadia ni halak Kristen. Sala do ulaon ni sisean ni Jesus molo songon on. Ikkon lao patoranghon ise do Jahowa  AMA i, molo dung dijakkon jolma/huta i TUHAN Jesus Kristus. Nunga tarbukti i di ulaon parbaritanaulion, na so tarpatorang taringot tu Jesus Kristus, ianggo lepas do sian barita ni Padan Na Robi, manang lepas sian sakkap (bagabaga) ni Jahowa na dipaboa di Padan Na Robi, na digoki di bagasan Jesus Kristus. Jadi toho do nidok ni Jesus i: Na manjakkon sisean ni Jesus, na manjakkon Jesus do i, jala na manjakkon Jesus, na manjakkon Jahowa Ama i do i. Molo songon i do tandana na sisean na tikkos sisean i mangoloi parsuruon ni Jesus asa dohot ibana mangula di bagasan misi ni Jesus Kristus.

4.      Boi juo do marrragam  panjakkonon ni jolma/huta tu sisean ni Jesus Kristus. Boi juo do sisean i dijakkon songon “panurirang”, ala targoar ibana “panurirang”; adong na dijakkon songon “partigor” ala targoar “partigor”, alai adong do i na dijakkon ala mangulahon ulaon “diakoni” kecilkecilan, songon nidok ni Jesus dison: “namangalehon aek tabar santahu tu akka na metmet”, ala targoar ibana sisean ni Jesus. Ndang pola parsoalhonon ni ganup sisean i atik songon aha ganup sisean i dijakkon jolma/huta natinopot nasida.  Molo pangalaho “panurirang” do tutu dipatuduhon sisean i di jolo ni jolma/huta, tikkos do i molo dijakkon ibana songon “panurirang”. Upa ni na manjakkon i dohot upa sisean nanijakkonna i, ba upa ni panurirang ma. Songon i nadijakkon songon partigor, tong do dapotan upa ni partigor ma namanjakkon dohot sisean nanijakkon.  Na mardiakoni sosial, na manahu aek santahu painumhon akka na metmet, tong do adong upana, hombar tu pambahenanna i. Tu ganup namambahen nadenggan tu akka nametmet, dijanjihon Jesus du upa manean harajaon, napinature di nasida sian haojak ni tano on (ptds. Mat.25:34). Ai songon nidok raja i, songon i do hata ni Jesus tu na paduli tu akka nametmet: “Situtu do na hudok on tu hamu; Nasa na binahenmuna tu sada sian anggingku angka na metmet on, na tu Ahu do i dibahen hamu!” (Mat. 25:40). Naporlu antusan ni akka sisean ni Jesus di namangoloi parsuruon ni Jesus nasida, ikkon takkas songon dia do hadirionna dipatuduhon nasida be, di na ro nasida paboahon naung songgop harajaon banua ginjang tu tongtonga ni hajolmaon (tu jolma/tu sada huta). Molo gabe panurirang do targoar sisean i, ikkon ma konsisten ibana patuduhon dirina panurirang, molo partigor do, ikkon ma konsisten ibana patuduhon dirina partigor; molo holan siula saotik ulaon diakoni do, ba konsisten ibana patuduhon dirina na songon i.

Panurirang (nabi’ < nabu’) i ma “penyambung lidah TUHAN” (sipasahat hata ni Jahowa); natarjou manjalo hata ni Jahowa jala na disuru Jahowa pasahathon hata ni Jahowa najinalona i tu hajolmaon hasahatan ni HATA i. Panurirang na sintong ndang pasahathon aha pandapot ni rohana sambing manang paihuthon tondinasida sandiri (rekayasa hatinya manang bisikan hatinya sendiri (Hes.13:3). Molo sintong do diulahon hapanurirangon i, pasti do boi sada metode i laho asa sisean i dijakkon akka jolma/huta natinopot nasida. Ulaon panurirang mansai denggan do gabe sada methode patandaphon barita nauli na sian Jesus, Anak ni Jahowa AMA i, jala mambahen boi hatop  jolma/huta manjakkon  Jesus Kristus na marsuru sisean i, dohot manjakkon Jahowa AMA i na marsuru Jesus Kristus ro tu portibi on. Molo boi do songon i, pasti upa ni sisean i dohot upa ni na manjakkon Jesus i nang AMA i, upa ni panurirang ma, ima hasonangan sisaleleng ni lelengna jala dohot mangarajai rap dohot TUHAN Jesus Kristus. Alai molo hapanurirangon ni sisean i gabe mangalo dohot menyangkal (mamorso) Jesus dohot AMA i do, songon na jotjot masa dipudian ni ari (di Indonesia dohot di tano Arab dohot di luat naasing), panurirang na manipu do panurirang na songon i, jala upana nabernit salelenglelengna do (ptds.Mat 25:46). 

Ise jolma na tardok “partigor” boi do botoon sian jolma na diumpamahon TUHAN Jesus songon “birubiru boruboru, na dipajongjong di siamunNa” (Mat 25: 31-40). Partigor (Mat.25”40) na didok di Mat 25:31-40 i ma: na mangalehon Jesus mangan tikki Jesus male; namangalehon Jesus minum tikki Jesus mauas; na manjakkon Jesus tikki Jesus buro; namamparulosi Jesus tikki Jesus marsakkotbulung; na manikkir Jesus tikki Jesus hansitan; naro mandulo Jesus tikki Jesus tarhurung (ptds. Mat.25:35-36). Upa ni akka partigor on: tardok nasida natarpasupasu ni AMA i; manean harajaon na dipature TUHAN sian haoojak ni tano on; jala manjalo hangoluan sisaleleng lelengna na marhasonangan (Mat.25:34.40b). Jadi napainum aek tabar santahu tu sahalak sian akka nametmet, ala targoar ibana sisean ni TUHAN Jesus Kristus, tarmasuk tu akka partigor i do ibana sasintongna.  Alai ala holan saotik do sian akka nabinahen ni partigor i naboi diulahon namangalehon santahu  aek tabar, umbahen pulik didok taringot tu ibana. Maksudna, nang pe tung otik ulaon diakoni-sosial (ulaon mampardulihon hajolmaon) na boi diulahon sisean on, tong do ndang mago upana.  Nang pe songon na martingkat digoari dison cara ni sisean i patandahon dirina asa dijakkon akka jolma/pangisi ni huta natinopot nasida (adong panurirang, partigor, sileon aek tabar santahu), tong do dapotan upa na jagar nasida be. Upa na hombar tu akka naniulahon nasida be dibagasan parsitutuon.  Di haroro ni Jesus Kristus tu tongatonga nasida pe sude disempurnahon (dipasikkop) akka pangupaon i. Alai di Jesus, sarupa do upa ni na ro pukul onom manogot, na ro pukul sia, na ro tonga ari, na ro dung bot ari, laho mangula di ulaon misi ni TUHAN Jesus Kristus.

5.      Ganup Kristen do sisean ni TUHAN Jesus Kristus. Ndang diparsoalhon atik na di Huria/Gareja dia Kristen i margabung (marpungu). Ganup Kristen i do disuru TUHAN Jesus Kristus laho dohot mangulahon ulaon misi ni TUHAN Jesus Kristus. Ganup do Kristen i dibohali Jesus, di parbinotoan, haboion, hatauon, dohot di akka na dihaporluhon asa boi ganup Kristen i manindangi dohot marpambahenan na patuduhon na parsidohot ibana di ulaon misi ni TUHAN Jesus Kristus. Misi ni TUHAN Jesus Kristus, i ma mambahen ganup jolma gabe ruas ni, jala mangolu di Harajaon banua ginjang naung dibahen Jesus Kristus songgop tu hajolmaon. Ala pambohalion i do umbahen na adong Kristen gabe presiden, perdana menteri, akka menteri, jenderal, tentara (darat, laut, udara), polisi, jaksa, hakim, gubernur, bupati, walikota, DPR/DPRD, Camat, Kepala Desa, partani, partigatiga, tokke, pandita, guru huria, sintua, bibelvrouw, parjamita, evangelis, diakonos/-es, ama, ina, naposobulung, dakdanak, dohot lan akka naasing. Ganup do jolma, rumang ni hajolmaon dohot ulaon ni jolma on, diparsinta Jesus Kristus gabe sisean ni Tuhan Jesus na parsidohot masukseshon dohot mangula ulaon misi ni TUHAN Jesus Kristus. Ganup nasida ikkon dohot marusaha asa dijakkon bangso on, nasida songon sisean ni TUHAN Jesus, jala marhite panjakkonon tu ganup nasida, gabe dijakkon  bangso on TUHAN Jesus Kristus nang Jahowa Ama i. Boi do namanjabat presiden manang gubernur manang bupati manang walikota dohot naasing nari sekaligus tong sisean ni TUHAN Jesus na disuru patulus dohot mamparbahenan asa sukses misi ni TUHAN Jesus. Jadi ndang holan pandita, guru huria, sintua, bibelvrouw, evangelis, parjamita d.n.a. na gabe sisean ni TUHAN Jesus Kristus, nadisuru mangula di misi mi TUHAN Jesus Kristus. Tu akka jolma on, na tadok sisean ni Jesus, marlakku do hata ni Jesus: Na manjakkon presiden, ala targoar presiden, dapotan upa ni presiden do; na manjakkon gubernur, ala targoar gubernur, dapotan upa ni gubernur; na manjakkon bupati, ala targoar bupati, dapotan upa ni bupati, dohot satorusna; na manjakkon pandita, ala targoar pandita, dapotan upa ni pandita, songon i satorusna tu akka jolma na asing na tong mananda jala patandahon dirina sasintongna. Molo adong sian Kristen i na boi holan mambahen saotik “partisipasi” pature hajolmaon (mangalehon santahu aek tabar), tong do godang upa ni i. Ala ni i tahaburjuhon be ma mangulaho ulaon na dipatuhukkon Jahowa Jesus Kristus tu ganup Kristen i (dituhuk be ma silang na tu ibana), jala takkas ma dihangoluhon na tarjou jala tarpillit do ibana pasukseshon, mambahen tulus jala sidung misi ni TUHAN Jahowa Jesus Kristus di portibi on. Dipargogoi TUHANta na hita ganup disi. Amen!

Pematangsiantar 22 Juni 2017, Pdt. Langsung Maruli Basa Sitorus (Pdt. LaMBaS).