JAMITA SIAN EVANGELIUM TU MINGGU II DUNG TRINITAS TGL 25 JUNI 2017

1.      Hamuna dongan sahaporseaon, nahinaholongan di bagasan holong na sian TUHANta. Di Buku Nabadia i dipaboa do na hea Jesus ndang manguhum sada borua na targombang (nahadapotan mangulahon zinah/na so patut) na diboan akka sibotosurat dohot Parise tu jolo ni Jesus asa ditontuhon Jesus aha uhuman tu borua i. Atik na dangguran do songon nidok ni patik ni si Musa manang bohado sikap ni Jesus. Didok Jesus: Ise sian akka sibotosurat dohot Parise i na so mardosa, i ma parjolo mandanggurhon batu tu borua i. Alai lao sadasada do akka Sibotosurat dohot Parise i, ndang adong na mandangguri borua i. Dung i didok Jesus tu borua i: “Laho ma ho! Unang be ho mardosa tu joloan on!” (jaha Joh.8:1-11). Borua on ma sada contoh, naung aturan mate ala ni dosana, hape  dileon kesempatan mangolu, jala ngoluna na mangihut ndang be di rumang ni ngoluna najolo, ngolu na manogu ibana tu hamatean i, alai di rumang ni ngolu naimbaru, ngolu na manogu ibana tu hasonangan, na so marlaok zinah (na so targombang).

2.      Adong ma napatukkangkon hondana tu bengkel ala sega ndang boi mangolu nang pe sai diengkoli/distater, nang pe imbaru olina, adong miakna, jala imbaru nang busina, imbaru nang baterena. Dipareso tukkang bengkel i ma. Dapotna ma na sai tallus-tallus kabel busina ala naung mumut, jala nunga putus kawat kabel na dibagasanna. Dung i diganti tukang i ma tali busi i dohot naimbaru. Dung distater, pintor mangolu ma hondana i. Didok tukang i ma tu parhonda i. Unang tallus tali busina da molo naeng do mangolu honda muna i. “Olo!” ninna parhonda i. Sian mulai i, sai beres ma mangolu hondana i. Sarupa do nian tali busi naimbaru i dohot tali busi nalama nadigantina i. Bedana: na lama i ndang boi mabahen mangolu; alai naimbaru i boi mambahen mangolu. Ala nunga boi menyalurhon ngolu, manang mambahen mangolu masin ni honda i, tali busi naimbaru i na ma sipakkeon, ndang be tali busi naung mumut i. Ndang be diulakkon honda i (dibahen parhonda i) mamakke talibusi naung mumut (segasega) i. Sada contoh ni naung mate hian gabe boi dipangolu, jala ikkon mamakke onderdil naimbaru i tongtong asa boi mangolu, jala sai tongtong ma dipelihara asa akka onderdil nadipakke i tongtong marmutu naimbaru, nang pe naung martaontaon dipakke di honda i. Benda mate boi dipangolu. Lam benda na mangolu ma, molo tung mate pe, pasti boi dipangolu.

3.      Tu si Adam, jala dipasahat si Adam tu si Hawa, hata ni Jahowa: “Alai anggo sian hau parbinotoan ni na denggan dohot na roa, ndang jadi panganonmu; ai sadari dipangan ho sian i, sai na mate do ho!”, ninna. Dilanggar si Hawa/Adam do larangan on, jala uhuman tu nasida nadua: “sai na mate do ho!”, alai ndang mangombushon hosana parpudi  si Adam/Hawa dung dipangan parbue ni hau i. Dison, “mate” dohot “mangombushon hosa parpudi” (mate), ndang sarupa artina. “Mate” ala mangallang parbue ni hau i (= mangalanggar larangan/parenta ni Jahowa) lapatanna “mardosa” na manghorhon mandapot uhuman sian Jahowa (Si Adam dohot si Hawa dohot Ulok i dapotan uhuman do, 1 Musa 3). Mate ala mangombushon hosa parpudi, lapatanna na adong di diri ni jolma i: tondi, nasian Jahowa mulak tu Jahowa, jala daging, nasian tano i mulak tu tano. Dison masa nanidok ni Apostel Paulus: “Kristus do hangoluan di au, jala laba nang hamatean!” (Pil.1:21).  Di “mate” ni si Adam/Hawa, na marlapatan “mardosa na manghorhon hona uhuman”, luluan ma hasesaan ni dosa, dohot hangoluan na imbaru, i ma malua sian uhuman hamatean di bagasan dosa. Di “mate” na dua massam on, ndang siluluan “asa unang mangombushon hosa parpudi”, alana hatop manang leleng, pasti do ro i tu nasa na marhosa. Nahinataan ni Apostel Paulus di Suratna tu Huria Rom bindu 6 on, na marhahonaan do i tu tu soal mate na marlapatan mardosa jala dapotan uhuman, dohot tu soal mangolu ndang holan ala naung disesa dosana, alai botulbotul dipangolu. Honda na mumut tali busina i, ndang holan diganti talibusina (disesa nasega disi/dipamago dosana), alai dohot do dipangolu, jala gabe boi mardalan (mangulahon ulaonna na hombar tu panompaonna).

4.      Hamuna dongan sahaporseaon nahinaholongan. Apostel Paulus mamodahon di suratna tu huria Rom: Ala asiniroha ni Jahowa mida akka jolma pardosa, disesa Jahowa sude hamatean ni jolma, tarlumobi hamatean ala “mardosa na manghorhon uhuman na songon i”, i ma mardosa ala mangalanggar parenta/larangan na ro sian TUHAN Jahowa Jesus Kristus. Tutu arga do jolma i ditobus, ai pola mudar ni Jesus Kristus, Anak Haholongan ni AmaNa i, durus di dolok Golgatha laho mameteraihon hasesaan ni dosa ni jolma pinangido ni Jesus: “Ale amang marpamuati ma rohaM mida nasida, ai ndang diantusi nasida nabinahen nasida i!” GRATIS do dilehon hasesaan ni dosa i tu nasa jolma na olo manjakkon. Sola gratia, holan ala asiniroha ni Jahowa tu jolma pardosa, SESA dosa ni jolma i. Apostel Paulus mangondolhon: Ndang ala gratis hasesaan ni dosa i, gabe datdatan mardosa. Tu borua na targumbang i didok Jesus: Unang be ho mardosa tu joloan on! Ikkon songon i do. Misalna: Ala patik Holong ni roha do patik dilehon TUHAN Jahowa Jesus Kristus, hape patik i dilanggar, dung i disesa TUHAN Jahowa  Jesus Kristus dosana i, ba ikkon ma ibana manghaholongi donganna tu joloan ni ngoluna. Sedangkan molo manjalo jatah “rastra” (beras sejahtera) na dibagibagihon gratis, ndang boi parulakulakhonon, sama tokkin i, manjalo. Nuaeng on ala mandapot KTP nuaeng nunga gratis, ndang boi parulakulakhonon mandapot KTP. Molo mago KTP naung dibagi gratis i, ganjang urusan, adong uhuman jala ndang be gratis. Ikkon jamot jala ramot do ganup jolma tu akka naung nijalona gratis. Ala gratis dileon TUHAN alogo tu jolma, ikkon ramot do jolma asa unang tercemar alogo i, manang unang hona polusi alogo i. Ala so jamot jala ramot jolma tu aek ni Danau Toba nadilehon TUHAN i gratis, nunga gabe hamama-go nuaeng aek i tu akka na manginum, ala aek i nunga tercemar/kotor situtu. Ndang habilangan be nuaeng biaya lao mambahen ias muse aek ni Danau Toba naung tercemar i, jala ndang be gratis. Jadi , taurus, taramoti denggan akka na gratis i.

5.      Hamuna dongan sahaporseaon nahinaholongan. Pandidion ni si Johannes Pandidi, i ma pandidion hasesaan ni dosa. Songon honda naung niganti kabelbusina gabe kabelbusi naimbaru ma i. Onderdilna na asing sude do baru. Holan talibusi i do na mumut, porlu diganti. Ngajamin mangolu molo distater manang diengkol, alai ndang binoto atik tu dia tujuan ni honda i dipangolu. Atik na holan asa mangolu do, manang laho pakkeon mangarampok do, manang pakkeon laho mangulahon parenta ni TUHAN do. Onderdil ni jolma “Jahudi” siulahon patik,  holan sada do na mumut: i ma “sok maragama”. Mardosa nasida sude ala ni i. Ro panurirang Johannes Pandidi, direparasi na sega na sasada i, asa mulak marfungsi muse paragamaon nasida di bagasan toruk ni roha. Pandidion ni si Johannes i ma pandidion panesaon ni dosa.

Pandidion pinatupa ni TUHAN Jesus Kristus, ndang holan pandidion hasesaan ni dosa. Ndang holan paulihon sada onderdil na sega di bagasan diri ni jolma, alai mambahen jolma naung sega i mulak imbaru tus songon “honda” na baru haruar sian pabrik. I do umbahen didok apostel Paulus: Manang ise na di bagasan Kristus, natinompa naimbaru do i. Naung bolongbolong do sama sekali honda naung sega i, ai nunga sega sude, ndang holan talibusina be nasega, nunga sude sega, bautbautna pe nunga sega, setna pe nunga sega. Alai dipamasuk do i tu bengkel “Sibahen mulak imbaru tus songon nabaru haruar sian pabrik”. Ala naung hea Jesus “mate” jala bolongbolong di bahen portibi on, tung ahli do Ibana mambahen pintor boi mulak imbaru situtu akka naung bolongbolong jala naung targoar “mate”. Dibahen Jesus jolma naung mate/bolongbolong i gabe jolma naimbaru tus. Tong do “honda” goar ni naung dibahen gabe imbaru tus i. Tong do “jolma” , ndang gabe “malaikat” manang “surusuruan” goar ni Jolma naung “mate”, naung bolongbolong i na dibahen gabe jolma na tinompa naimbaru. Alai dung gabe natinompa naimbaru jolma i, ndatung be ibana mulak gabe jolma na “mate”, nabolongbolong. Ndang holan asal imbaru ibana jala gabe barang pajangan. Ndang asa adong muse mangalo Jahowa jala martakkang, umbahen ditompa jolma i gabe imbaru tus. Alai asa tung takkas do siulahon hangoluan nasian Jahowa jolma na imbaru tus i. Tugas ni jolma naung gabe natinompa naimbaru do torus mangurus dirina parbagasan dohot parduru, asa tongtong  marmutu “natinompa naimbaru”. Digoari do mutu ni jolma naung gabe natinompa naimbaru i, songon Jesus naung mulak mangolu sian namate. Di diri ni Jesus adong daging (pamatang) na “mulia”/sangap, jala adong “tondi” sioloi Jahowa (AmaNa). Di diri ni jolma naung gabe “natinompa naimbaru” pe ikkon ma adong na songon i. Dipandokan ni si Paulus didok: “sakkambona hita dohot Jesus”. Ai anggo nunga sakkambona hita dohot Ibana, di na rap mate hita dohot Ibana i, suang songon i ma hita nang taringot tu haheheon ( = rap mangolu). Molo didok sakkambona, na sada do boni ni i, jala boni i mate ma di tikki laho tubu boni i gabe sada suansuanan na imbaru, jala di suansuanan natubu i ma jumpang panompa dohot natinompa naimbaru. Apostel Paulus mandok: naung rap mate (rap tartanom) do hita di hamamate manang di na tartanom  Kristus i, alai na rap mangolu do hita (rap gabe natinompa naimbaru tus) di bagasan haheheon ni Kristus i. Di kalimat ni si Paulus didok: Nunga tarsilang hadirionta na buruk raphon Ibana, asa pinasohot daging pardosaon, asa unang be hita mangadop di dosa.  Molo dung tubu boni  jala gabe suansuanan, suansuanan i ndang  be sai manghalungunhon  asa sai hot ibana di bagian ni boni naung busuk i. Ikkon tubu nama ibana, jala mangerbang, asa sampe marpabue nagodang. Akka naung mate jala busuk i, tinggal ma di tanoman i jala dihabusukon i, tarmasuk ma dosa i tinggal di tanoman manang di habusukon i. Alana dosa i sandiri do antong habusukon i, jala ndang rikkot be i mangihut tu suansuanan na imbaru, manang tu jolma natinompa na imbaru i. Ianggo jolma natinompa naimbaru, torus na ma mangolu sintong, ai ngolu ni Kristus dibahen ngoluna, tanda ni nasakkambona ibana dohot Kristus.

6.      Hadirion ni Jesus  naung hehe sian na mate, jala takkas mangolu marhite hasangapon ni Amana, ndang be mandai hamatean manang andigan be. Manang ise na porsea tu Ibana, gabe di bagasan Ibana, na so tupa be ibana mandai hamatean ala dosa i, alai tongtong mandai hangoluan ala ni Kristus na mangolu i.  Molo tahapoprseai i jala tajakkon ngolu ala haheheon ni Kristus i, porsea do hita na boi rajumanta dirinta na mangolu nuaeng takkas songon i. I ma pargogo di hita ganup, na margumul jala marukkil mangihuthon Kristus di bagasan zaman sinuaeng. Ndang datdatanta be mardosa, alai tadatdati ma patuduhon Jesus mangolu di bagasan dirinta. Amen.

Pematangsiantar tgl. 15 Juni 2017. Pdt. Langsung Maruli Sitorus (Pdt. LaMBaS).