JAMITA SIAN EVANGELIUM TU MINGGU III DUNG TRINITAS TGL 2 JULI 2017

1.      Hamuna dongan sahaporseaon nahinaholongan di bagasan holong ni Jesus Kristus. Godang do didok jolma taringot tu mandok na masa di joloan ni ari. Di hata Batak Toba taboto do hata: “alatan[1]”, “tondung[2]”, “surirang[3]”. Di hata Indonesia tatanda do hata: “ramalan”, “dugaan”, “penglihatan”, “nubuatan”.  Alatan i ma panatapan na bagas di partondion dohot di panuluthonon di akka namasa di ingananna dohot di nahumaliangna, didok paralatan i ma aha na naeng masa di joloan ni ari tu sada halak manang tu sada luat manang tu sada bangso. Tondung i ma boaboa taringot tu na naeng masa tu sasahalak  marhite na mamakke ulaula tondung. Somalna tondung paboahon monang manang talu, mangomo manang rugi, horas manang sial do sasahalak na manukkun tu partondung taringot tu diri ni namanukkun di parjuanganna di joloan ni ari. Di halak Israel ditanda do on marhite Urim dohot Tummim.  Surirang i ma akka nanidok taringot tu nasintong (na toho/pasti) naeng masa; manang hata habisukon na paboahon na sintong (pasti) masa di joloan ni ari. Hata nanisuriranghon jotjot dihaporseai marharoroan sian (nadiukkaphon) Debata. Alatan dohot tondung ndang pola sai dihubunghon tu pangalehon ni Debata; alai surirang sai dikaithon do i tu aha na dilehon (diukkaphon) Debata tu panurirang i. Jadi molo manurirangi sahalak jolma, pasti do ikkon disukkun halak: Toho do songon i didok Debata? Manang hasil analisa ni rohana do nanidokna i? Molo hasil ni analisa ni haporseaon ni partondionna do dohot akka na masa di hutana dohot di nahumaliangna, ndang pola dohononna surirang nanidokna i, cukup ma didok: “hombar tu alatan na dapothu, songon on ma nanaeng masa tu luat on:’....’”

2.      Di halak Israel, parsoalan na balga do ulaon manurirangi. Di nasida adong do Sikola Panurirang (Sekolah Nabi). Alai sasintongna, maruba do sikola i gabe Sikola ni Paralatan. Alana, ndang sai tardok manang tarjamin, na diukkaphon Jahowa do tu nasida sude aha naikkon sihatahonon ni akka murid sikola i (nang dung tammat) tu tonga ni hatoropan. Godangan nasida na mamparsiajari hata ni TUHAN naung sian sundut tu sundut di tonahon tu nasida, dung i dipartondihon ma poda ni TUHAN i. Dung i diajari do nasida manganalisa situasi “dunia” na marhubungan tu akka na naeng mambahen masa na masa. Sian i dipasahat nasida hata poda taringot tu nanaeng masa. Boi do  akka nauli alai tong do boi  na roa, nanaeng masa na disuriranghon i. Alai nang pe songon i prosesna, sai tong do didok nasida dirina “panurirang”. Nanaeng mambuat roha ni raja dohot hatoropan, sai dihatahon ma napasonang roha ni raja dohot hatoropan. Digoari ma kelompok na songon on “panurirang sipaboa nauli” (nabi selamat). Akka na paboa hamagoan naeng tipa tu raja manang tu hatoropan digoari “panurirang hamamago” (nabi celaka). Di bangso Israel, ndang soal nauli manang hamagoan na dihatahon sada panurirang na gabe ukuran  tikkos manang ndang  sahalak na mandok dirina “panurirang”.  Alai adong do dua ukuran na masirainan: (1) nadisuru Jahowa do panurirang i manang ndang? (2) molo na disuru Jahowa panurirang i, pasti do masa nanisuriranghonna; alai molo holan alatan (surasura ni roha) ni panurirang i do napisasahat ni panurirang i, jala ndang masa nanisuriranghonna, ndang na disuru Jahowa  panurirang na songon i. Panurirang pargapgap do didok na manghatahon surasura ni rohana sambing. Molo pajumpang dua panurirang, na sama-sama mandok dirina panurirang ni Jahowa, maol situtu do botoon hata ni ise na tikkos (sintong), jala ise  sian nadua i na disuru Jahowa. Jolma na mambege hata nanisuriranghon ni panurirang nadua i, ikkon malo do manimbangi hasintongan ni akka nadisuriranghon i, hombar tu haporseaon na togu tu Jahowa. Jala ikkon sabar do paimahon, atik na nisuriranghon ni ise do na toho jala digonopi  manang masa. Ala ni i, andorang so masa na disuriranghon i, ikkon do sialamat (hasahatan)  ni hata nadisuriranghon i, mamareso dia sian na disuriranghon ni dua panurirrang i na paling mungkin masa. Manang nauli i do manang na hamagoan i, duansa ikkon takkas dipakke hasahatan ni hata surirang i laho mamareso aha na ikkon sibahenonna. Ndang boi hasahatan ni hata surirang i marlemba, ala adong sian panurirang i mangalumbahon na dengan-denggan do na naeng masa. Ndang jadi sogo roha mambege hata hamagoan nadisuriranghon panurirang i, alai pakkeonna ma i, laho mamareso boha parjadi ni nadisuriranghon i. Molo mangeak tusi do na masa, boi humatop dibahen akka tindakan, asa malua sian hamagoan na disuriranghon i. Hasusaan do tu sada bangso, manang tu sada punguan, molo marbadai bangso manang punguan i, ala adong dua hata surirang na mansai martongtangan. Duansa do pakkeon ni bangso/punguan i, asa gabe jaga (waspada) jala jamot nasida di pardalanan ni ngoluna di bagasan haporseaon na togu tu TUHANna.

3.      Dung ditaban tentara Nebukadnezar huta Jerusalem taon 597 asK jala sude namalo, akka paradongan, jala natarhona sian bangso Juda dibuang tu Babel (lobi 10.000 halak), jala si Zedekia ditontuhon raja Nebukadnezar mangarajai di Jerusalem, huhut sude ulaula na adong ni bagasjoro dirampas huhut diboan tu Babel, marpikkiri do raja dohot akka pegawaina rap dohot akka rakyat, boha do palua diri sian gomgoman ni raja Nebukadnezar (Babel). Dilului nasida pardonganon tu Mesir dohot tu akka harajaon hombar balok (tetangga)na lao marsatahi mangalo Babel. Di Jerusalem, masa pangaluluion tu boha do pandapot ni Jahowa taringot tu naniae ni bangsoNa, bangso Juda. Karejo ma akka panurirang tammatan ni “Sikola ni Panurirang”. Ianggo si Jeremia nunga sai disosoi asa olo si Zedekia dohot bangso Juda botulbotul tunduk tu Babel, asa unang masa naumposi sian naun g masa i. Sahalak (ni si Jeremia) lawan ni raja dohot sude aparatur negara dohot sude rakyat Juda. Torus do si Jeremia hot di hata nanisuriranghonna i. Bangso Juda tong do jojop (jogal rukkung)  ndang olo mambege si Jeremia, nang pe naung terbukti masa na disuriranghonna taon 597 ask. Memang biasana lam jogal do rukkung ni pamaerenta dohot rakyat ni sada bangso, ndang olo mambege sipasingot ni panurirang na sintong, molo dung do bangso i ditogutogu laho mangeaki hamamagona. Pajumpang ma si Jeremia dohot akka jolma, tarmasuk panurirang Hanania, na mandok dirina panurirang ni Jahowa, di bagasjoro na di Jerusalem. Dihallunghallung si Jeremia auga hau tikki ro ibana tu bagasjoro i. Ala naung diorai ibana manurirangi, akka pambahenan na gabe tudosan jala silapatan na ma dibahen ibana, paboa tu natorop, aha nanaeng sidohononna. Auga hau natinuhukna i naeng paboahon, ia bangso Juda di tikki i sedang manuhuk auga hau, na niampehon ni raja Nebukadnezar sian Babel. Diantusi si Hanania do pambahenan ni si Jeremia i. Jala dipakke ibana ma kesempatan i laho paboahon aha nanaeng suriranghononna taringot tunanaeng masa tu bangso Juda. Dibuat ibana auga hau natinuhuk ni si Jeremia i, jala diponggolhon/diropukkon ibana, huhut didok: “Nunga huponggolhon auga pinampe ni raja sian Babel. Di bagasan dua taon on dope ahu mamboan mulak tu inganan on saluhut ulaula ni joro ni Jahowa, angka naung binuat ni si Nebukadnesar raja ni Babel sian inganan on, jala diboan tu Babel. Si Jekonya pe, anak ni si Joiakim, raja ni Juda, ro di saluhut na tarbuang sian Juda, angka na tarboan tu Babel, ingkon mulak boanonku tu inganan on ninna Jahowa; ai ponggolhononku ma auga pinampe ni raja sian Babel” (Jer.28:2b-4). Boi do mura antoon, boha do parboina si Hanania manuriranghon songon on. Di tikki i semangat-semangatna dope si Zedekia, raja na baru dipabangkit i, mambege akka penasehatna na pro Mesir. Jala halak on, tung yakin botul do, na boi taluhonon ni Mesir harajaon Babel di bagasan dua taon na ro on (595 asK). Hamonangan i ma mamungkinhon mamboan mulak sude halak Juda na tarbuang i mulak tu Jerusalem, songon i nang akka ulaula ni bagasjoro i. Ndang diboto halak on, na lam tu gogona do harajaon Babel, dung ditaluhon Nebukadnezar akka harajaon na humaliang tano Babel. Alai ianggo si Jeremia, tung yakin botul do, molo sai dialo Juda harajaon Babel, lam mangamuk do tentara ni Babel i ro tu Jerusalem lao mangaleksehon nasa najumpangna di kota i, jala manghapus harajaon Juda. Ise na so las rohana, mambege hata na nisurirangkon ni si Hanania i. Pasti tepuk tangan sude jolma na di bagas joro i, ala las rohana. Si Jeremia pe paula manolopi hata na disuriranghon ni si Hanania i do, ai dijaga ibana sotung diantuki ibana di inganan i, songon penghianat negara. Dung i ninna panurirang Jeremia ma: Amin! Denggan nian dibahen Jahowa songon i! Sai dipasintong Jahowa ma hatahatam, angka naung sinurirangkonmi taringot tu hamumulak sian Babel tu inganan on, akka ulaula ni joro ni Jahowa ro di saluhut  akka naung tarbuang i.Alai ndatung na i sasintongna pandapot ni si Jeremia na sabotulna. Jolo lao do ibana sian i, asa disuru siseanna pasahathon  songon dia do sasintongna hata ni Jahowa. Alai andorang so lao si Jeremia sian i, dipaingothon si Jeremia, songon dia do asa boi parhatohoon nanisuriranghon ni sada panurirang.

4.      Alai tahe sai tangihon ma hata on, na huhatahon tu pinggolmu dohot tu pinggol ni saluhut bangso i: Panurirang akka na jumolo sian ahu dohot sian ho, sian na robi sahali, akka naung manurirangi dompak torop luat dohot dompak harajaon akka na balga taringot tu hamusuon, pardangolan dohot begu antuk. Ia adong panurirang na manurirangkon pardamean, di hasisintong ni hata panurirangonna i tartanda ma panurirang i, manang na tongon Jahowa marsuru ibana. Dibalik ni pandokan  on, molo masa do pardamean ni Harajaon Babel dohot harajaon Juda, asa gabe boi mulak akka na tarbuang i, jala akka ulaula ni bagasjoro boi diboan mulak tu bagasjoro di Jerusalem. Molo disuriranghon sada panurirang pardamean, sintong ma panurirang i nadisuru Jahowa, molo masa (tarjadi) do nanisuriranghonna i. (Di hata Indonesia  didok: Tetapi mengenai seorang nabi yang bernubuat tentang damai sejahtera, jika nubuat nabi itu digenapi, maka barulah ketahuan, bahwa nabi itu benar-benar diutus oleh TUHAN” (Jer.28:9). Hasisintong ni hata panurirangonna = jika nubuat nabi itu digenapi (molo nadisuriranghon ni panurirang i digonopi (masa/tarjadi). Si Hanania boi akkuan botul sada panurirang ni Jahowa, molo masa/tarjadi do nanisuriranghonna i: “Di bagasan dua taon on dope ponggolhononku ma songon i auga na pinampe ni si Nebukadnesar, raja di Babel, sian tangkuhuk ni saluhut bangso (Jer.28:11).”  Lao patuduhon na panurirang nanisuru ni Jahowa do si Jeremia, disuriranghon ibana dua  na pasti masa (tarjadi), situluthonon ni raja Zedekia dohot bangso Juda saluhutna. (1) Taringot tu si Hanania: “Ida ma, onjarhononku ma ho sian sisik ni tano on ingkon di bagasan taon on dope ho mate, ala dijamitahon ho  parbalion sian Jahowa” (Jer.28:16). (2) Taringot tu harajaon Juda: “Songon on do hata ni Jahowa: Nunga diponggolhon ho anggo auga angka na sian hau; alai ingkon paulionmu do auga angka na sian bosi bahen singkatna. Ai songon on do hata ni Jahowa Zebaot, Debata ni Israel:  Auga bosi do na huampehon tu tangkuhuk ni saluhut bangso on, asa  mangoloi patu tu si Nebukadnesar, raja sian Babel, ingkon oloannasida ibana, nang angka binatang di ladang nunga hupasahat tu ibana” (Jer.28:13-14). Sasintongna, adong do tujuanna boasa adong na naeng hatop masa, jala adong na lumeleng masa, na disuriranghon si Jeremia i. Molo toho do mate si Hanania di bagasan taon on, ikkon ma mamoto bangso Juda dohot raja Zedekia, na tong do pasti toho masa taringot tu auga bosi nanaeng ampe tu Juda bahenon ni raja Nebukadnezar, molo so olo Juda dohot raja Zedekia tunduk tu Babel. Jadi dileon Jahowa do tikki tu Juda dohot raja Zedekia manimbangi, dalan dia do na ikkon dalananna. Duansa do masa nanisuriranghon ni si Jeremia on. Ala so olo raja Zedekia pauba rohana, jala tong mangalo tu raja Nebukadnezar, di taon 587 asK ro do tentara Babel mangaleksehon Jerusalem ro di sude bangunan na di bagasanna (tarmasuk bagasjoro ni Jahowa). Dung masa na masa i, diakui ma si Jeremia sahalak panurirang ni Jahowa, na ikkon tangihonon ni bangso Juda do sasintongna akka nanisuriranghonna, asa unang lekse harajaon Juda, jala asa unang mintop harajaon ni si Daud. Sian barita nauli on dapot do parsiajaran: Hasintongan ni Jahowa ndang tartulak ni manang aha, jala asa diakui jolma na panurirang na toho  (sintong) do sasahalak, ikkon ma hatahononna akka na pasti masa (tarjadi). Molo dietong do ndang masa nanaeng sisuriranghononna i, denggan ma dipahohom. Alai molo pasti ikkon masa, jala mansai rikkot “cegah”-on jolma i asa unang madabu tu hamagoan na diondamhon TUHAN, ikkon do pasahaton jala suriranghonon. Tanggungjawab ni ganup siihuthon TUHAN Jahowa Jesus Kristus do mamparjuanghon asa dibege hajolmaon  hata hasintongan na sian Jahowa Jesus Kristus. Jala ikkon ma na toho jala na pasti masa hatahonon ni ganup siihuthon TUHAN Jahowa Jesus Kristus.

5.      Di parmulaan ni Huria di portibi on, dung Haroro ni Tondi Porbadia, adong dope na mandok dirina “panurirang”. Apostel Paulus pasingothon, asa molo panurirang, tikkos ma manurirangi. Molo “pangajari”, denggan ma mangajari. Lam tu tikkion, nunga hampir so adong be pangula ni Huria na mandok dirina “panurirang”, hampir so adong be nang “paralatan”. Na sai martahan adong di masyarakat, alai nunga dietong ndang bagian ni hakristenon be, i ma akka “sijujur ari”, “pangarunding”, “datu pangulpuk”, “sijaha surat ni tangan”. Akka jolma (ndang mardiaimbar pangihut ni agama dia pe) na sai mangharikkothon mamboto aha nanaeng masa di ngoluna, sai lao ma tung akka na marbotoboto na songon i. Adong do namansubosubo, mangkombinasi hakristenon dohot akka ulaon ni sijujur ari, pangarunding, pangulpukon dohot pajahaion di surat ni tangan. Alai akka jolma namura paotootoon do ro manukkun “nasib”na  tu jolma na songon i. Naberkembang nuaeng, di zaman na super modern on, i ma manghaporseai  sadasada binatnang na boi mangaramalhon aha nanaeng masa, misalna kesebelasan ni ise na naeng monang marbola di final pertandingan. Nabaru pe muse baruang namargoar Nika, dihaporseai boi mangaramal kesebelasan ni ise na monang di pertandingan final sepakbola di Eropa nuaeng on. Najolo adong na manghaporseai “sotong” boi mangaramal na songon i.

6.      Tarsongon dia do leak ni akka parjamita na adong di tonga ni huria si nuaeng on? Ndang digoari be nasida tammatan ni Sikola ni Panurirang manang Sikola ni Paralatan, tammatan ni Sikola Pandita do nasida. Tugas nasida ndang be manurirangi, manang maralatan, manang mangarunding jala sama sekali ndang mangulpuk. Tugas nasida i ma mangantusi HATA ni TUHAN na adong di Buku Nabadia i, jala mampartondihonsa. Marhite pangantusion i, ikkon ma patorangon na tu hajolmaon (tu ruas ni huria) boha do mambangun ngolu na dumenggan di ganup jolma manang ngolu ni punguan/Huria, ngolu ni masyarakat. Pambangunan i manghamham saluhut panggulmit dohot lokkitlokkit ni ngolu i. Jadi ndang holan mangapil hata ni TUHAN siajarhonon ni ganup parjamita, alai ajaranna asa terampil  jolma i manteraphon hata ni TUHAN naniantusanna i di ngolu siganup ari, pamajuhon ulaonna, dohot padenggan pansarianna, huhut manarihon pangapudianna; asa unang muramura porsea tu akka pangulpukon na dihatahon manang ise pe. Targantung tu parjamita i do methode ni ibana mangajari jolma i. Molo marjamita ibana di podium di parmingguan, boi do pakkeonna na methode na mambahen mekkel/margakargak naumbege pangajarionna, alai boi do pakkeonna metode “na tohom jala hohom”. Tujuan na ikkon sieakanna, i ma asa masuk tu roha ni namambege jamitana jala diantusi nasida naniajarhonna.  Jala ala ni pangajarion i, martekad akka na mambege i pature ngoluna, pature pansarianna, jala lam takkas manarihon pangapudianna. Alai songon dia pe methode nanipakke ni parjamita, sada na ikkon ramotanna, i ma ikkon mandok natoho/nasintong ibana, unang namangkarangkarang, jala ikkon dao sian nasa na tardok gabus, dohot na “omong-kosong”. Sai dipargogoi TUHAN Jahowa Jesus Kristus ma ganup parjamita, manorushon semangat panurirangion na diulahon si Jeremia, jala boi mansesuaihon i tu perkembangan zaman sinuaeng on. Target, ikkon lam godang jolma na olo gabe sioloi Jahowa Jesus Kristus. Amen.

Pematangsiantar tgl 21 Juni 2017. Pdt. Langsung Maruli Sitorus (Pdt. LaMBaS).