JAMITA SIAN EPISTEL TU MINGGU I DUNG TRINITAS TGL 18 JUNI 2017
|
ROMA 5:1-8
5:1 Asa dung dipintori hita dalan
(= marhite) haporseaon, mardame ma hita dohot Debata marhitehite Tuhanta
Jesus Kristus.
5:2 Laos marhitehite Ibana do saut
masuk hita tu asi ni roha, hajongjonganta nuaeng dalan (= ala) haporseaon,
jala taparhatua do dirinta marningot hasangapon ni Debata na itahirim i i.
5:3 Alai lumobi sian i dope, ai
itahalashon do nang angka haporsuhon, ala taboto, dihorhon haporsuhon i do
habengeton ni roha.
5:4 Jala dihorhon habengeton ni
roha i do hatauon, jala hatauon i do manghorhon panghirimon.
5:5 Alai ndang na murak hita
bahenon ni panghirimon i, ala nunga diusehon tubagasan rohanta holong ni roha
ni Debata marhitehite Tondi Parbadia, naung nilehonna i tu hita.
5:6 Ai uju na parir dope hita, disi
ma tongon mate Kristus manghophop akka parjahat.
5:7 Ai maol mate halak manghophop
partigor; adong do deba na barani mate manghophop na ulibasa.
5:8 Alai ia Debata, dipapatar do
holong ni rohana i di hita, uju pardosa dope hita, ai disi do mate Kristus
manghophop hita.
|
5:1 Sebab
itu, kita yang dibenarkan karena iman, kita hidup dalam damai sejahtera
dengan Allah oleh karena Tuhan kita, Yesus Kristus.
5:2 Oleh Dia
kita juga beroleh jalan masuk oleh iman kepada kasih karunia ini. Di dalam
kasih karunia ini kita berdiri dan kita bermegah dalam pengharapan akan
menerima kemuliaan Allah.
5:3 Dan bukan
hanya itu saja. Kita malah bermegah juga dalam kesengsaraan kita, karena kita
tahu, bahwa kesengsaraan itu menimbulkan ketekunan,
5:4 dan
ketekunan menimbulkan tahan uji dan tahan uji menimbulkan pengharapan.
5:5 Dan
pengharapan tidak mengecewakan, karena kasih Allah telah dicurahkan di dalam
hati kita oleh Roh Kudus yang telah dikaruniakan kepada kita.
5:6 Karena
waktu kita masih lemah, Kristus telah mati untuk kita orang-orang durhaka
pada waktu yang ditentukan oleh Allah.
5:7 Sebab
tidak mudah seorang mau mati untuk orang yang benar --tetapi mungkin untuk
orang yang baik ada orang yang berani mati.
5:8 Akan
tetapi Allah menunjukkan kasih-Nya kepada kita, oleh karena Kristus telah
mati untuk kita, ketika kita masih berdosa.
|
Taringot tu terjemahan:
Di ayat 1: hata “dalan” tumagon
diganti dohot “marhite”.
Di ayat 2: hata “dalan” tumagon
diganti dohot “ala”.
DI akka ayat 6-8: hata “humongkop”
dipature tu panurathonna di hata Batak Toba na denggan gabe: “manghophop”
Di panuraton hata Batak Toba, ikkon
sai tarida do hata bona ni hata i: misalna sala do panuraton “mangkirim” na ro
sian hata “hirim”. Na sintong i ma: “manghirim”, dijaha “makhirim”, asa unang
sarupa dohot “makkirim” = manongos.
1. Hamuna
dongan sahaporseaon nahinaholongan di bagasan holong na sian TUHANta. Tung
mansai marlapatan do “haporseaon” di paragamaon ni halak Kristen. Nang TUHAN
Jesus pe didok do: Dipalua haporseaon mi do ho, inang! (Mrk.5:34). Haporseaonmi
do paluahon ho! (Luk.7:50; 17:19). Haporseaon mi do na pangoluhon ho! (Mt.9:22).
Haporseaonmi do pamalum ho! (Luk.18:42). Molo siihuthon Jesus, ikkon jumolo do
porsea, i pe asa mamboto, ndang jolo diboto baru asa porsea. Alana molo dung
porsea, di haporseaon i nunga adong disi “parbinotoan na tontu”, “ilmu pasti”,
alai di parbinotoan boi dope ndang adong
haporseaon. Nasa na niboto, tongtong do i boi “ragu”-honon, asa masa
perkembangan ni ilmu. Alai nasa nanihaporseaan, ndang tolap (ndang denggan)
manga-ragu-hon i, asa hot ojakan ni ngolu dohot sihirimon, asa unang sursar
akka “sendi” ni parngoluon. Ala ni i do, ikkon na sintong, na toho jala na pasti
do sihaporseaan. Asing sian i, ndang rikkot haporseaan. Di Heber 11:1
didefinisihon panurat buku i do lapatan ni sihaporseaan. Marhite pangantusion
ni si Martin Luther taringot tu “haporseaon”
(iman = na di-amen-hon; “amen” = na tutu sit utu) sian surat ni apostel
Paulus tu Huria Rom, tarrumushon ibana do sada sian pusat ni teologina mandok:
SOLA FIDE (di hata Latin, na marlapatan: HOLAN MANGASAHON HAPORSEAON; sola =
holan; fide = haporseaon). Ala adong di halak Kristen “haporseaon”, i do
umbahen dipintori (dibenarkan) Jahowa
nasida di adopan ni Jahowa. Haporseaon songon dia? Ai ganup do jolma adong
haporseaonna. Songon dia ma na sintong, na toho, napasti, dipeop halak Kristen
huroha? Ganjang situtu do hatorangan lao mangalusi sukkunsukkun on. Alai garis-besarna,
songon na di Hata Haporseaon i ma (Na nirumushon ni akka Apostel, Nadirumushon
di Konsili Nicea, dohot nanirumushon ni si Athanasius). Sai na hurang sempurna
do akka rumusan-rumusan i, alana ndang sukkup “kalimat-kalimat” mangarumushon
taringot tu Jahowa dohot nabinahenNa. Ndang pola be sai marbadai huria (songon
najolo i), ala sai hadapotan hurang sempurna akka rumusan i. Haporseaon ni
Kristen mandok: Adong Jahowa, Sitompa langit dohot tano, Sasadasa do Debata,
alai lomoNa do atik songon dia rumang ni Ibana marparsaoran dohot mangula
manang marpambahenan di tongtonga ni hajolmaon. Di sejarah ni parsaoranna dohot
naporsea tu Ibana, hea Ibana marpangalaho AMA, marpangalaho ANAK (JESHUA =
JAHOWA PALUAHON) dohot marpangalaho TONDI PORBADIA (JAHOWA MANDONGANI DOHOT
MANJOU TU HANGOLUAN). Natolu rumang dohot panggoarion on dihaporseai Kristen
boi manghamham saluhutna hataridaan ni Jahowa dohot pangulaonNa, na ditariashon
di Bibel i. Dihalomohon Jahowa do jolma i unang madabu tu dosa. Dosa i ma
mangalaosi parenta ni Jahowa. Alai mardosa do jolma i. Ndang tarpalua ni jolma
dirina sian gomgoman ni dosa. Sude do tarpatupa Jahowa Jesus Kristus.
Narumikkot di roha ni Jahowa, i ma ikkon malua jolma i sian gomgoman manang
rante ni dosa i, ala ni i ro do Ibana songon ANAK na mangula hasesaan ni dosa
dohot haluaon i. Sai diapoi Jahowa do asa mangolu jolma i di ngolu naimbaru
naung pinatupa ni Jahowa Jesus Kristus, na olo sampe mate tarsilang holan
manghophop jolma pardosa. I do umbahen sai ro Ibana marhite TONDINa, TONDI
PORBADIA. Haporseaon na songon i tu Jahowa, mambahen siihuthon Jahowa Jesus
Kristus dipintori (dibenarkan) di
adopan ni Jahowa Jesus Kristus. Lapatanna, didok tu naporsea i: Sintong do haporseaonmi.
Haporseaonmi do paluahon ho. Haporseaonmi mambahen ho dapotan asi ni roha (kasih
karunia, grace, gratia). Dung dibereng Jahowa Jesus Kristus adong haporseaon na
songon i di diri ni siihuthon Ibana, mardame ma Jahowa Jesus Kristus dohot naporsea
i, ai nunga selaras nanihaporseaanna i dohot napinatuduhon ni Jahowa Jesus
Kristus saleleng parsaoranna tu hajolmaon. Dohonon ni Jahowa Jesus Kristus ma
tu naporsea i: I ma, baru sintong haporseaonmi. Nunga takkas ditanda ho Ahu!,
ninna. Molo so selaras do, pasti do sai adong partontangan ni Jahowa Jesus
Kristus tu jolma i. Sai dohonon ni Jahowa ma tu jolma na so songon i
haporseaonna: Ndang songon i hupodahon tu ho! Patikkos jo haporseaonmu!
Misalna: adong ma sada jolma na mandok dirina naporsea, ganup tokkin dijouhon
ibana Allah Mahabesar. Mambunu jolma pe sai tong i dijouhon, minum kopi pe tong
i dijouhon. Dibege Debata ma i, jala didok: “Ndang sukkup holan i; ikkon dohot
do dohononmu: Allah Mahakasih. Allah Mahabaik. Allah Mahapengampun. Allah Mahapenyayang.
Allah Maha-rahmani.” Ala sai holan Allah Mahabesar do dipanjoujouhon, gabe
marbada do Debata dohot nasida. “Sai holan Allah Mahabesar, Allah Mahabesar!
Gabe lomolomom patuduhon hamahabesaronKu!” “Saddikkit sian hadirionKu do i!”,
ninna. Jadi ndang mardame Debata tu naporsea na sai tarlumobi mandok “Allah
Mahabesar!”. Mardame do Debata dohot jolma na haporseaonna sintong, toho, pasti, jala haporseaonna i ndang
holan santipul sian hadebataon ni Jahowa.
2. Molo
sahalak jolma porsea tu Jahowa, Debata AMA, ANAK, TONDI PORBADIA, pasti do
pintor hilalaonna, na tung holan ASI NI ROHA ni Jahowa di umbahen adong ibana,
umbahen sesa dosana, umbahen mangolu ibana, umbahen marlapatan ngoluna, umbahen
boi patupaonna ngolu sorgawi di portibi on, umbahen pasti ibana tu surgo
hasonangan i. Adong di naporsea i: hosa, pikkiran, baju, sipanganon, hata,
arta, ulaon, dongan, pangapudian, sude i holan ASI NI ROHA ni TUHAN Jahowa
Jesus Kristus do. I ma panghorhon ni haporseaon na sintong, toho jala na pasti
i. Marhite na mangantusi taringot tu asi
ni roha sian surat ni Apostel Paulus tu Huria Rom, dirumushon Pdt. Dr.
Martin Luther do sada nari pangarimpunan ni teologiana, mandok: SOLA GRATIA
(Holan mangasahon Asi ni Roha). Sude dapot sian Jahowa (manang aha pe i) holan
ala asi ni roha ni Jahowa sambing do. Ndang adong disi agia otik lapatan ni
pambahenan na denggan. Haluaon, hasesaan ni dosa, hangoluan na sintong, adong
dapot ni naporsea holan ala ni asi ni roha ni Jahowa. Sanga do leleng pasual,
HURIA Reformasi dohot Huria Katolik taringot tu lapatan ni pambahenan na denggan dohot asi ni roha ni
Jahowa di parngoluon ni naporsea. Katolik mandok, marlaba do jolma marhite
pambahenanna na denggan, nang tu haluaonna dohot panobusion na tu ibana na sian
Jahowa. HURIA Reformasi mandok: ndang adong lapatan ni pambahenan na denggan
laho patupa haluaon dohot tu panobusion ni jolma. Sandok tung holan asi ni roha
ni Jahowa sambing do umbahen dapotan haluaon dohot hangoluan sahalak na porsea.
Dung pe di akhir ni abad duapulu, adong hatorangan napinatupa ni naduapihak i
(Katolik dohot Reformasi/Lutheran) asa adong kompromi di akka pandapot na
fanatik i. Ianggo Islam, tung takkas do dipodahon, na tung marlapatan do amal,
zakat, infaq dohot sedekah laho manontuhon atik na dapot ni naporsea surgo i
haduan manang na ndang. Ianggo hurang do pambahenanna na denggan i, ndang
hatariparanna siratul mustaqim lao manaek sian alam barzah (portibi hamatean)
tu surgo. Alai mangihuthon kristen, ia tung pe boi manaek jolma sian portibi
hamatean tu surgo i, tong do holan Kristus na manontuhon na boi ibana mian di
surgo i manang ndang. Manang ise na so marpahean pesta hadapotan di pesta (luat/bagas)
ni Jahowa, tong do diusir sian parpestaan (luat/bagas) i. Jadi tung takkas do
dihaporseai halak Kristen, na holan mangasahon Kristus do boi dapot ni naporsea
parmianan di adopan ni Jahowa. Didok Pdt. Dr. Martin Luther: SOLA KRISTUS. Marhite
dohot mangasahon haporseaon, dohot asiniroha dohot Kristus, marpanghirimon do
ganup Kristen na parsidohot ibana di hasangapon ni Jahowa. Martua do diri ni
naporsea i, ala nunga parsidohot ibana patuduhon hasangapon ni TUHAN Jahowa
Jesus Kristus. Jala sude panggulmit ni ngoluna tung holan laho pasangaphon
TUHAN Jahowa Jesus Kristus na ma. I do nanidok ni pdt Dr. Martin Luther: SOLI
DEO GLORIA. Ngolu on holan pasangaphon TUHAN na ma. Molo parsidohot di
hasangapon ni Jahowa, i na ma ngolu natumabo ni natumabo. I do umbahen rikkot
pasangapon Jahowa Jesus Kritus di tano on, asa dohot do naporsea i marsangap
jala mandapot hasangapon ni Jahowa. Sude na i boi diparsiajari ganup naporsea i
sian isi ni buku nabadia i sambing. SOLA SCRIPTURA (Holan sian Buku Nabadia) i dapot ni jolma
haporseaon na sintong, na mamboan naporsea i tu asiniroha ni Jahowa, asa disi
ganup naporsea i gabe parsidohot di hasangapon ni Jahowa.
3. Hamuna
dongan sahaporseaon nahinaholongan. Tikki disurat apostel Paulus suratna na tu huria
Rom, di bagasan pangaleleon do sude Huria ni Kristen. Ala ni na gabe Kristen i
nasida, marporsuk nasida. Dibahen pamarenta Rom do boaboa, na bebas bunuon ni
manang ise akka halak Kristen i. Tung mansai porsuk tahe ngolu nasida. Ndang
boi nasida terangterangan patuduhon na Kristen nasida. Gabe marbahasa “sandi”
na ma nasida asa boi markomunikasi di adopan ni jolma na asing. Alai nang pe so
tarhatahon porsukna parniaean ni Kristen i di tikki i, ndang adong na murtad
sian hakristenon i. Baliksa tahe, lam tu kompakna akka Kristen i, jala
martangiangi di akka liangliang. Diburjuhon Kristen i manakkasi dohot
mangantusi lapatan ni akka barita nauli i. Lam marsemangat do nasida mangarahon
jolma gabe Kristen. Godang jolma na anti Kristen gabe pangihut ni Kristus na
barani mate. Haporsukon naniae ni Kristus manghophop pardosa, gabe tiruan di
nasida laho olo manaon naporsuk asa muba portibi najahat i gabe portibi sioloi
Kristus. Diboto nasida muse, nang apostel Paulus dohot akka donganna tung olo
do mangae naporsuk holan manghophop barita nauli dohot hangoluan na sian Jahowa
Jesus Kristus. Sian pengalaman ni Apostel i do umbahen na boi dipaingothon tu
huria i mandok: Alai lumobi sian i dope,
ai itahalashon do nang angka haporsuhon, ala taboto, dihorhon haporsuhon i do
habengeton ni roha. Jala dihorhon habengeton ni roha i do hatauon, jala hatauon
i do manghorhon panghirimon. Alai ndang na murak hita bahenon ni panghirimon i,
ala nunga diusehon tubagasan rohanta holong ni roha ni Debata marhitehite Tondi
Parbadia, naung nilehonna i tu hita. Ganjil do i, boi marlas ni roha huria
i ala manaon naporsuk. Boasa? Ala dirajumi nasida, gabe parsidohot nasida
manaon haporsukon ni Kristus na binaen ni halak Jahudi dohot tentara Rom tu
Ibana. Dihangoluhon nasida do hata ni Jesus na mandok: “Martua ma hamu, molo
diinsahi halak hamu manang dipaburuburu manang dipatubutubu ragam ni hata na
roa, na so tutu, dompak hamu ala ni Ahu! Las ma rohamuna jala marolopolop, ai
godang do umpamuna di banua ginjang i, ai songon i do dipaburuburu angka
panurirang na jumolo sian hamu” (Mat.5:11-12). Songon nidok ni Apostel Petrus
tu Huria i: “Ai tusi do hamu tarjou, ai dohot do Kristus manaon na porsuk
humongkop hamu, tumadingkon tiruan di hamu, asa diihuthon hamu bogas ni patna”
(1 Ptr.2:21). “Alai molo tung tumaon na porsuk hamu, ala ni hatigoran, na
martua do hamu disi” (1 Ptr.3:14a). “Alai molo adong na manaon na porsuk, ala
halak Kristen ibana, unang ma hansit rohana; alai dipasangap ma Debata,
manjujung Goar i” (1 Ptr.4:16). Adong do laba na manaon na porsuk. Ai diajari
haoloon manaon naporsuk i do gabe marbenget ni roha. “Alai molo benget hamu
manaon na porsuk, balos ni ulaonmuna na denggan, i do asiasi di roha ni Debata”
(1 Ptr.2:20b). Halak na benget i ma na olo mananda lapatan ni haporsukon
natinaonna pasti marujung tu hadengganon do, ndang tu hamagoan. Habengeton =
ketekunan = experience = Erfahrung = hupomone = ‘amida benisayon. Ndang gabe
lari sian ngolu i ala porsuk ditaon, misalna ndang gabe manikkot ala porsuk
ditaon, alai dipuhuti do pengalaman ni ngoluna i, sampe monang ibana. I do
umbahen habengeton i sian sandirina do patubuhon hatauon (tahanuji; probatio;
dokime; tiqwah). Ndang adong habengeton ianggo holan sadari dua ari do ditaon
naporsuk i, alai molo sampe do marbulanbulan, martaontaon. Nang pe boha
porsukna, sai tong ditiop ibana gomos haporseaonna tu TUHAN Jahowa Jesus Kristus
i. Dibalbali, dilinsingi, diparsipal, sahat tu na diancam tembak mate, tong sai
ditiop haporseaon tu Jesus Kristus i. Ndang na benget molo holan diordap akka
anti Kristen i dope, nunga pintor lari martabuni akka naporsea i. Habengeton
manghorhon hatauon. Hatauon ndang holan tahan
uji lapatan ni i. Lobi dihamham hata Batak hatauon do lapatan ni hata
Gorik: dokime. Tau sasintongna ndang
holan tahan uji, dohot do marbisuk laho mangatasi haporsukon na sedang diae. Ala na adong do diroha ni naporsea i penyelesaian ni haporsukon i na denggan umbahen
olo ibana marporsuk, jala penyelesaian ni haporsukon i do na gabe panghirimon
di naporsea i. Penyelesaian i somalna mandok na so gabe parcuma olo ibana
manaon naporsuk i di bagasan habengeton. Kristen ikkon tau do, ndang boi oto. Aha
ma sihirimon molo satia Kristen i manaon naporsuk, benget nasida jala tau
nasida mangolu? Sihirimon i, i ma gabe adong ngolu na dumenggan di tonga ni
hajolmaon. Tabereng ma si Nelson Mandela, di na manaon na porsuk ibana, benget
jala tau ibana manaon naporsuk i, pola sampe 28 taon lelengna di penjara, diporsukporsuk
sipir penjara i ibana. Dihirim rohana takkas, boi do rap mangolu di bagasan
dame dohot na masihaholongan akka jolma na marhulinghuling nabirong dohot na
marhulinghuling nabontar di Afrika Selatan. Jala masa do nahinirim ni rohana i.
Sihirimon ni Kristen ndang holan ngolu hasonangan na di surgo i, dohot do rumang
ni ngolu na denggan situtu di tonga ni hajolmaon di portibi on. Sabar jala
benget do nuaeng on akka Kristen di Timur Tengah manaon naporsuk nabinaen ni
akka anti Kristen na mansai kejam situtu, ala adong panghirimon di nasida, na
muba do roha ni akka na manghasogo-hon nasida i, gabe jolma na manghaholongi
donganna jolma, nang pe marbeda agama dohot ras nang asalna be. Pasti do
marhasil jala masa akka nahinirim ni akka Kristen na burju maragama dohot
mangihuthon Jesus Kristus. Martangiangi do halak Kristen di liat portibi on,
asa akka jolma na ateis nuaeng di Eropa, naung gabe gumodang sian jumlah ni
Kristen, olo mulak muse tu hangoluan naung binoan ni Jesus Kristus tu
hajolmaon. Asa sadar nasida muse, hakristenon do mamboan nasida tu hangoluan na
sintong, ia tung pe hea nasida dililuhon akka uluan ni Huria na manimbil sian
poda ni Barita Nauli i. Jala olo nasida muse mangaramoti budaya hakristenon na
gabe sitiruon ni saluhut jolma di portibi on. Sasintongna, on na ma zaman (abad
21 on), kesempatan di akka bangso na di Eropa, patuduhon na akka jolma na manghangoluhon poda ni Jesus
Kristus nasida, jala na mansai ampit tu ngolu sekuler na marpartondion. I ma
nuaeng sihirimon ni akka huria di Eropa, di namulai nasida manaon naporsuk.
Sada haporsukon na diae nasida, i ma ndang diakui be nasida manghatai di
tongtonga ni hajolmaon nasida. I nama ngolu naumporsuk. Dohot ma hita
manangianghon nasida, laos pature hakristenonta di Indonesia on, asa marbenget
ni roha hita manaon haporsukon naung rongom nuaeng di jolonta. Ikkon monang
TUHAN Jahowa Jesus Kristus: i ma masihaholongan akka jolma na marasing be
agamana, rasna, budayana, asal-usulna, dohot hajolmaonna. Jadi holong na sian
Kristus i ikkon gabe bagian ni ngolu ni saluhut jolma (manang dia pe agamana;
songon dia pe hulinghulingna, dohot budayana, nang hajolmaonna) di Indonesia
on. Tondi Porbadia i sedang mangula do nuaeng patupahon i saluhutna, jala olo
mahita parsidohot di ulaonNa i. Ndang na murak hita bahenon ni i.
4. Adong
do alasanta umbahen ikkon torus Kristen i maju, mambahen saluhut jolma gabe
parholong. Molo gabe parholong sahalak jolma (ndang holan manghaholongi kelompokna,
alai dohot akka jolma na asing), nunga tarrajumi i pangihut ni Kristus, nang pe
so haru tardidi dope. Alasan utama i ma maniru Kristus, naung olo mate humophop
parjahat, tarmasuk humophop akka jolma napasipal dohot na mamparsilanghon
Ibana. Masa i saluhutna uju parir dope hajolmaon i, i ma na sai digomgomi rasa
benci, hosom elat teal late dope jolma i. Saonari sedang belajar do hajolmaon
di Indonesia mambolonghon rasa iri, benci, hosom, teal, elat dohot late tu
jolma na asing, mambolonghon hata hoax, hata namasiparoaroaan, ucapan kebencian.
Sude na songon i ikkon ndang adong do media sosial. Molo marhasil do tanggal akka i sian ganup
hadirion ni jolma na adong di Indonesia on, berarti selamat do Indonesia
marratus taon nari. Tahophop ma akka parjahat tu mamboan nasida tu hamubaon ni
roha. Ianggo akka partigor ndang pola sihophopon i. Hatigoranna na mardomu tu
hatigoran ni Jesus Kristus i ma manghohop nasida. Alai ikkon barani mate do
Kristen i manghophop akka nauli basa, i ma akka naung mampraktekkon ngolu na
masihangolongan tu akka donganna jolma, so mardiaimbar. Namaniru pambahenan ni
Jahowa Jesus Kristus do hita molo olo hita mambahen na songon i. Tikki pardosa
dope hita nunga dihophop Ibana hita, jala pola sampe olo Ibana mate tarsilang
holan lao manghophop hita. Misi panghophopon naung nimulaan ni Jesus Kristus
ikkon torushonon ni sude Kristen na adong di zaman sinuaeng on. Sai dipargogoi
TUHANta ma hita disi. Amen.
Pematangsiantar, tgl. 12
Juni 2017. Pdt. Langsung Maruli Sitorus (Pdt. LaMBaS).
