JAMITA SIAN EVANGELIUM TU MINGGU IV DUNG TRINITAS TGL 9 JULI 2017

1.      Hamuna dongan sahaporseaon nahinaholongan marhite holong na sian TUHANta Jesus Kristus. Nunga lobi mardua taon naung didalani Jesus akka huta/kota na adong di luat Galilea laho paandarhon naung songgop Harajaon Banua Ginjang nabinoanNa i tu hajolmaon. Di Khorazin, Betsaida, Kapernaum, nunga dibaritahon Harajaon Banuaginjang i jala dipambahen godang akka tanda halongangan. Si Johannes Pandidi nunga dihurunghon. Gerakan perlawanan sian akka Sibotosurat, Parise dohot  Sintua ni Malim lao mangalo Jesus nunga lam koras. Alai Jesus lam terkenal do, jala ala ni pangajarionNa nunga lam gogo panghirimon ni bangso Juda taringot tu hamumulak  ni panurirang Elias nanibagabagahon ni panurirang Maleaki (Mal.4:5) limatarus taon na salpu sian tikki ni Jesus, lao patota paragamaon ni bangso Israel songon dalan manomunomu haroro ni Mesias. Si Johannnes Pandidi dohot Jesus sian Nazaret dua tokoh na tampil paimbaruhon paragamaon ni Jahudi tikki i. Godang do jolma na “pauba roha” ala ni parjamitaon ni tokoh na dua on. Ala ni i sukkun-sukkun do jolma, ise do sian nadua on hataridaan ni si Elia na ro i, jala ise Mesias nanaeng ro i. Takkas do ditanda si Johannes Pandidi ise dirina, na ndang dirina Mesias i. Lulululu rohana, atik na Jesus do nanidokna na ro sian pudina, Mesias i. Disuru do siseanna patakkashon i tu Jesus sandiri. Dialusi Jesus sisean ni si Johannes Pandidi i marhite na paboahon naung masa ala ni Jesus akka nanidok ni panurirang Jesaya najolo i. Si Johannes ma manimpulhon sandiri, mandok na Jesus do Mesias i. Hea do disukkun Jesus siseanNa, taringot tu ise Ibana didok halak. Sisean i paboahon na adong sian natorop i mandok Jesus si Elias, si Johannes Pandidi na mulak mangolu, manang sada sian panurirang. Sisean ni Jesus, na niwakilan ni si Petrus, mandok ise Jesus ditanda nasida: Jesus do Mesias (Kristus) ni Jahowa. Saonari di kesempatan (epistel) on, ditardashon Jesus ise do si Johannes Pandidi: (1) Si Johannes Pandidi do si Elia na naeng ro i. (2) si Johannes Pandidi ma panutup ni hapanurirangon; ndang adong be panurirang na ro sian pudina. (3) Si Johannes Pandidi ma panurirang naumbalga sian sude panurirang naung hea tampil; ai sumurung do ibana sian panurirang. (4) Si Johannes Pandidi ma patujolo manang sipature dalan di jolo ni Mesias.

Didok  Jesus, sahat tu haroro ni si Johannes pandidi, nunga “diserong”  (Batak Toba: sigogoan) Harajaon Banuaginjang. (Gorik : biazetai = digoki kekerasan; Heber: nitp^eśah b^eyad  ḥazaqah = dipohul tangan ni siula-hakorason;  BI TB: menderita kekerasan dan para pelaku kekerasan mencengkeramnya). Si Johannes Pandidi ro paulakkon Harajaon i tu dalan na tikkos, alai dihurungkon do ibana. Saonari Jesus ro lam mambahen takkas jala tota usaha hajojongjong  ni Harajaon Banuaginjang i. Ikkon tanggal Harajaon Banuaginjang i sian tangan ni akka “nagogo” siula hakorason. Mardomu tusi, mansai arop roha ni Jesu, lam tu toropna jolma mandongani Ibana mambahen Harajaon Banuaginjang i denggan jala merdeka sude jolma na di bagasanna. Alai heran do Jesus, boasa ndang “olo manortor akka jolma” nang pe naung dipalu Jesus gondang na mangajak nasida saluhutna manortor. Ala ni i hona hata (dikutuk) Jesus do pangisi ni luat Khorazin, Betsaida dohot Kapernaum. Alai didok Jesus, martua do na so targasip di Jesus i. Lapatanna, martua do jolma na mangihuthon Jesus di Harajaon Banuaginjang i. Ndang lomo roha ni Jesus mamakke hakorason (kekerasan) lao patota dohot pajongjong Harajaon banua ginjang i. I do umbahen dipakke ibana “kesenian” tudosan ni keadaan ni halak Jahudi menyikapi hajojongjong ni Harajaon Banuaginjang i. Naeng ma nian atas kesadaran  ni ganup jolma i sandiri, ro gabe warga Harajaon Banuaginjang i.

2.      Hamuna dongan sahaporseaon nahinaholongan. Tudosan na mansai porlu bagas antusan dibuat Jesus taringot tu sikap ni bangso Jahudi tu si Johannes Pandidi dohot tu Jesus. Rombongan “pengamen” di onan dibahen gabe tudosan. Jolma akka na so margellok do rombongan on, alai adong do “keahlian” ni ganup parsidohot. Sabagian sipalu musik, sabagian panortor. Sama-sama ahli jala terampil do nasida. Ndang adong disi “kekerasan”, manang paksaan, alai musik na dipalu mambahen panortor manortor. Na palongang roha, nunga makkuling  musik alai ndang manortor panortor. Marganti pe sipalu musik dohot logu ni musikna, tong ndang olo panortor manortor. Bahkan panortor gabe mambeatbeati parmusik. Ise  na ma siparesoon, molo masa na songon on? Tontu rombongan/jolma na diarop roha ikkon manortor ma molo dipalu musik. Halakon na ma siparesoon. Atik na beres dope diri dohot rohana. Aut sugari adong sipalu gondang/musik na patoluhon, jala gondang/musik ni na patoluhon on ditortori rombongan ni panortor i, boi dope botoon atik na gondang/musik dia do na cocok tortoran ni panortor i. On ndang adong. Umbahen  na dipalu sipali gondang naparjolo dohot na paduahon gondang/musikna, ala nunga dapot tikkina ikkon manortor panortor, jala bergerak nasida patuduhon “hapiawaionna”(hamaloonna)  manortor.

Sipalu gondang/musik na ro parjolo i ma si Johannes Pandidi. Ro ibana di bagasan dame, ndang mangasa gogo, jala ndang mambahen hakorason (kekerasan). Ndang songon akka Zelot na mamborontak tu pamarenta, jala mangalo otoritas ni Sintua ni Malim. Poda ni ibana mangido asa mulak bangso Jahudi mangolu, marpangalaho hombar tu patik ni si Musa. Takkas do ibana marpangalaho songon “parbahudung” (partapa), songon akka “nazir” naung ditanda bangso Israel najolo. Tung so “parpapangan” do ibana. Lapatanna tung diramoti do dirina sian sipanganon asa unang ramun dirina. Ndang “parminum” ibana. Lapatanna tung dipadao do dirina sian akka minuman na mambahen mabuk, manang ramun. Godang do tutu jolma na ro tu halongonan mandapothon si Johannnes Pandidi, jala mangoloi hatana, padidihon dirina. Alai gumodang dope bangso Jahudi na paroaroa si Johannes Pandidi, jala ndang olo pauba rohana. Akka sintua ni malim, sibotosurat, parise dohot saduse mandok si Johannnes Pandidi na sibolison. “Sibolis do di ibana!, ninna akka na marsogo ni roha i taringot tu si Johannnes Pandidi. “Ndang pargondang nami si Johannes Pandidi i”, ninna akka malin, sibotosurat, parise, saduse dohot akka pangihutna. Tung pe mansai pas jala toho, tung mansai tabo, jala hombar tu lomo ni roha ni Jahowa, huhut mansai “tohom” situtu gondang napinalu ni si Johannes Pandidi i tu pinggol si malim, sibotosurat, parise, saduse dohot pangihutna, ndang olo nasida manortor. Jadi tung takkang ni roha do. “Ndang pargonsi nahujou hami i mamalu gondang di pestanami!”, ninna, jala on mambahen ndang olo bangso Juda dohot akka pamimpinna manortor.  Dung i ro ma Jesus Kristus mamalu gondang/musik na ummaju sian gondang/musik napinalu ni si Johannes Pandidi. Tu sude “lapisan masyarakat” do Jesus margaul, jala hombar tu “kebutuhan ni sude lapisan masyarakat” do gondang/musik napinalu ni Jesus i tung mansai toho, jala tabo. Dipalu do gondang/musik na cocok tu akka malim, sibotosurat, parise, saduse dohot pangihutna, jala dipalu do gondang/musik na cocok tu akka sijalobeo, napogos, namarsahit, akka jolma na dipinggirhon, gondang mangusir tondi nahodar. Gondang napinaluna i sude tung hombar do tu lomo ni roha ni Jahowa. Adong do i gondang hamalimon, adong gondang naposo, adong gondang na pahehe semangat (gondang riangriang), asa tung marlas ni roha sude panortor. Alai akka malim, sibotosurat, parise, saduse dohot pangihutna tong ndang olo manortor. Baliksa, diparoaroa nasida do Jesus, jala ditudu Ibana halak sipapangan mago, sisobur tuak anggur, aleale ni si jalobeo dohot pardosa. Akka tuduhan na so toho do sude tuduhan on. Muncul tuduhan i ala ndang tolap ni malim, sibotosurat, parise, saduse dohot pangihutna mangantusi “misi” ni Jesus ro tu tongatonga nasida, i ma paimbaruhon akka narikkot paimbaruon di bagasan paragamaon ni Jahudi.  Dipangan Jesus sipanganon na adong dibagasanna na di-haram-hon di buku Padan Na Robi, ala misi ni Jesus do “mang-halal-hon” akka sipanganon na di-haram-hon najolo di Padan Na Robi. Ndang na ala sipapanganmago Ibana. Ndang disuru Jesus asa padaoon ni akka siseanNa anggur sian akka ulaon nabinanen ni Jesus, asa boi do bahenon ni Jesus anggur i gabe ulaula manghobasi narikkot di paragamaon dohot di masyarakat, di bagasan akka ulaon dohot pangalaho na “raja” jala badia. Aek gabe anggur do parjolo dibahen Jesus di huta Kana, asa sonang tamue ni hasuhuton tikki i, alai ndang  asa adong tamue na hadir disi gabe sisobur tuak anggur. Diparbadiai Jesus do anggur i gabe Siinumon Nabadia di unjuk (perjamuan)-Na rap dohot akka pangihutna. Tuduhan na so toho do molo adong mandok Jesus i sisobur tuak anggur. Margaul do Jesus dohot akka sijalobeo, jala adong do siseanNa sian sijalobeo. Misi ni Jesus do mambahen gabe pangihutNa sude pegawai negeri ni pamarenta, ia tung pe i pegawai ni panjajah, apalagi pegawai ni pamarenta ni negaraNa na mardeka. Tarlumobi pegawai negeri na jonok situtu tu baba ni uang, ikkon bahenononna gabe siseanNa, sioloi dohot siulahon hata/podaNa. Misi on ma na so diantusi akka malim, sibotosurat, parise, saduse dohot pangihutna. Jala sada nari misi ni Jesus na so diantusi akka tukang tuduh on, i ma misi ni Jesus paluahon akka pardosa. Jesus patardasson jala patanakkon missiNa, jala  ninna mandok tu akka sibotosurat dohot naasing: “Apala na ringkot di angka na hisar pandaoni i, di angka na hansitan do! Ndang na ro Ahu manjou angka partigor, angka pardosa do!" (Markus 2:17). Ndang na lao mangimmaimmai pangalaho dosa ni akka pardosa umbahen na ro Jesus manopot akka pardosa, alai na laho paluahon pardosa i do sian hadosaon nasida. On do misi utama ni Jesus, na so diantusi akka malim, sibotosurat, parise, saduse dohot pangihutnasida, umbahen na muncul tuduhan na so toho mandok ia Jesus i aleale ni akka pardosa do. Molo didok aleale i ma na setuju tu pangalaho ni jolma na gabe aleale i, hape Jesus ndang setuju tu akka pangalaho ni akka pardosa. Molo dung disesa Jesus dosa ni pardosa, sai dipatiki/ditonai do asa unang diulakkon be mardosa. Ndang olo akka malim, sibotosurat, parise, saduse dohot pangihut nasida manortori gondang naung pinalu ni Jesus on, ala ni haotoon nasida, ala hajojopon ni roha nasida mamboto misi ni Jesus. Laos tamba do haotoon dohot hajojopon ni roha i, ala na sai didok nasida: “Ndang pargondang nijounami Jesus i; ndang tagamon ro siboan haimbaruon sian Nazaret!” Sahat tu saonari, akka pangalaho/ sikap na songon sikap ni malim, sibotosurat, parise, saduse dohot pangihutna on tong do sai jumpang ni Kristen di masyarakat/agama nang di tonga ni huria pe. Alai di na masa songon i, tong do ikkon songon Jesus akka pangihut ni Jesus si nuaeng on, i ma: maju terus mamboan haimbaruon ni paragamaon, asa mulak paragamaon i tu lomo ni roha ni Jahowa Jesus Kristus. Asa songon nidok ni Jesus: Gabe pintor do Hapistaran i dipintori angka pambahenanna i.

3.      Hamuna dongan sahaporseaon nahinaholongan. Aha do maksud ni Jesus dinadidokna: Gabe pintor do Hapistaran i dipintori angka pambahenanna i. (BI: Tetapi hikmat Allah dibenarkan oleh perbuatannya. Hata Gorik: kai edikaiothe he sofia apo ton ergon autes = jadi habisukon dibonarhon marhite akka karyana;  Heber: w^eniṣd^eqah haḥokmah b^ebanēha = jadi hikmat dibonarhon marhite akka anakna; Latin: et iustifikata est sapientia a filiis suis = jadi habisukon dibonarhon marhite akka anakna; Inggris: But wisdom is justified of her children= marhite anak-anakna; Jerman: Und die Weisheit muss sich rechtfertigen lassen von ihren Kindern =marhite anak-anakna). Nadimaksud “anak” di terjemahan Heber, Latin, Inggris, Jerman, i ma akka na marroan manang na martubuan  sian habisukon i ; ido umbahen na boi diantusi akka terjemahan on hata Gorik ton ergon  dohot “anak”.  “Ton ergon” = akka nanikarejohon/akka na niulahon. Narikkot botoon dison: Ia hata sofia (hokmah; habisukon/hapistaran; Weishiet, sapientia) napinakke ni Jesus dison manudu tu pamakkeon ni hata sofia (hokmah) di Poda 8 do. Di Poda 8 dipatorang do akka karya (pambahenan) ni habisukon/hapistaran/hokmah/hikmat i. (Jaha ma Poda 8 nasabindu i).  Dison nadimaksud dohot Hokmah (Hapistaran/habisukon/hikmat) i, i ma Jesus sandiri. Akka pambahenan ni Jesus do mamintori (pabonarhon) aha do misi ni Jesus ro tu hajolmaon. Jala porlu diboto jolma aha nanidokna di Poda 8:32-36[1] i, asa dipature ganup jolma  sikapna be tu TUHAN Jesus Kristus. I do sosososo  ni Jesus molo didok Ibana: Gabe pintor do Hapistaran i dipintori angka pambahenanna i. Ala ditulak akka malim, sibotosurat, parise, saduse dohot pangihutna Jesus, Hapistaran na ro tu nasida, nanidokna di Poda 8:36 i ma na niadu nasida: Alai manang ise na mardosa dompak Ahu, mangago tondina sandiri do; nasa na mangkagigihon Ahu mangkaholongi hamatean. On do alasan ni Jesus umbahen na dihatahon Ibana akka jea (kutuk) tu huta Khorazin, Betsaida, Kapernaum (Mat.11:20-24), ai dihaholongi nasida “hamatean”.

4.      Hamuna dongan sahaporseaon nahinaholongan. Antong ise na ma na mananda Jesus Kristus jala manjakkon Ibana?  Ai Jesus i tamonding  do sian akka na pistar dohot na marroha. Didok Jesus, dipapatar TUHAN i do Jesus tu akka siondihononhon  (Gorik: nepiois = sibulusbulus; Heber: ‘ȏlalîm (akka na danak dope); Latin: parvulis = sibulusbulus; Inggris: babes = bayi-bayi/posoposo; Jerman: Unmündigen = sibulusbulus; na so haru diboto godang hata). Hata Gorik nepios adong lapatanna: dakdanak, posoposo; na so tang dope; na danak dope; sibulusbulus (bayi, yang belum dewasa; lugu (PBIK II, h.535); Kitab Injil: orang kecil; bayi-bayi; yang belum dewasa; kanak-kanak; belum akil balik; anak-anak). Terjemahan siondihononhon dipakke dison asa haru takkas songon nidok ni umpasa Batak Toba: “Ijuk di parapara, hotang di parlabian,  nabisuk nampuna hata, na so haru tang dapotan pangondian.” Akka sibulusbulus do siondihononhon. Akka na danak, i ma akka na songon dakdanak manjakkon Harajaon Banuaginjang i. Akka i do siondihononhon. Tu akka na songon dakdanak manjakkon hata ni natorasna, panjakkononna tu harajaon Banuaginjang i, tu si do dipapatar Jahowa Harajaon Banuaginjang i, dohot Jesus na mamboan Harajaon i. Dison ndang didok patar Harajaon Banuginjang dohot Jesus i tu akka namora, napogos, namalo, naoto, na sangap, na lea, namarpakkat, na so marpakkat, paragama, na ateis, na burju, na takkang, alai tu akka nepiois (siondihononhon) sian tongatonga ni akka nasida sude do.  Ai di ganup horong ni jolma na ginoaran i, dohot na so ginoaran dison dope, pasti do adong nepios (siondihononhon).

5.      Hamuna dongan sahaporseaon nahinaholongan. Didok Jesus: Saluhutna i, nunga dipasahat Damang tu Ahu. Naung dipasahat Ama i tu Jesus, i ma: Harajaon Banuaginjang i; jolma na so olo dohot na olo manortor dung dipalu Jesus gondang asa manortor nasida; ulaon paimbaruhon agama Jahudi; akka siondihononhon; huaso mangalehon tua; huaso manguhum (mangkutuk) jolma; dohot lan dope akka na asing; saluhutna i nunga dipasahat AMA i tu Jesus Kristus, ANAK Haholongan ni rohaNa. Ditanda manang so ditanda nasida Jesus, tong do nunga sahat tu tangan ni Jesus nasida sude. Namananda Jesus Kristus (ANAK i) holan AMA i do dohot na pinodaan ni ANAK i, manginguthon lomo ni rohaNa. Namananda AMA i pe tong do holan ANAK i dohot napinodaan ni ANAK i, mangihuthon lomo ni rohaNa. AMA i dohot ANAK i, na masitandaan, sada do i sian salelengnilelengna sahat ro di salelengnilelengna (dari kekal hingga kekal). Napinodaan ni ANAK i, mangihuthon lomo ni rohaNa i ma akka nepios (siondihononhon). Ala naung saluhut do dipasahat AMA i tu ANAK i, Ibana ma na boi manjou jolma tu hasonangan.

6.      Hamuna dongan sahaporseaon nahinaholongan. Joujou ni Jesus tu akka siondihonon i: Ro ma hamu tu Ahu, hamu angka na loja jala na sorat, asa hupasonang hamu! Jangkon hamu ma augangku, marguru ma hamu tu Ahu, ai na lambok do Ahu jala na serep marroha, asa dapotan hasonangan tondimuna. Ai lambok do augangku jala neang do dohot na hupaporsanhon. Akka siondihonon i, i ma akka na loja jala nasorat di bahen akka auga na di portibi on. Sude akka na sorat, i ma na sorat ala ni auga agama, sorat ala ni auga ekonomi, sorat ala ni auga politik, sorat ala ni auga sosial masyarakat, sorat ala ni auga haotoon, sorat ala ni auga hapandeon, sorat ala ni auga hamoraon, sorat ala ni auga hapogoson, sorat ala ni auga hagabeon, sorat ala ni auga halapungon/hapunuon, sorat ala ni auga hasangapon, sorat ala ni auga haleaon, sorat ala ni  akka auga na asing, dijou Jesus asa dipasonang. Hupasonang lapatanna boi hubaen ndang gabe boban be di ho na mambahen ho sorat, alai gabe las ni roha, na boi pakkeonmu lao mamuji Jahowa Jesus Kristus. Alai asa boi songon i, ikkon olo do sipasonangon i  manjakkon auga na diampehon Jesus Kristus, jala olo marguru tu Jesus. Umbahen na sorat jolma, na holan auga ni portibi manang auga nabinahenna sandiri do dituhuk, jala sai marguru tu dirina sandiri jolma i lao mamorsanna. Di tikki na asing, Jesus mandok asa ganup pangihutna manuhuk silang na tu ibana. Alai ndang asal silang situhukon i. Ikkon silang na manogu tu hangoluan na sasintongna (tu Padaiso) rap dohot Jesus do (songon silang na tinuhuk ni parjahat na diparsilanghon di siamun ni Jesus di dolok Golgatha). Molo dison Jesus mangajak akka siondihononNa asa manuhuk auga nadiampehon  Jesus tu nasida, alai  ndang  asal auga auga i, ikkon auga na boi pakkeon laho mangula manang manarik boban na mansai mambahen hauntungan tu situhuk auga i do (mambahen marhasonangan tondi). (Patudos: auga ni horbo paninggala; dohot auga ni horbo na manogu padati).  Ala ni i, ikkon olo do situhuk auga (siondihonon on) marguru tu Jesus, boha carana manuhuk auga i, songon dia mamakke auga i dohot akka na asing siguruhonon. Kuci ni siguruhonon disi, i ma: “manghaholongi”. Adong do hasurungan ni auga na nipaporsanhon Jesus, molo nibanding tu akka auga nadipatuhukkon akka na sian portibi on. “Lambok do augaku, jala neang do nahupaporsanhon”, ninna Jesus. Ndang mamokkik auga nadipaporsanhon Jesus, alai mambahen bangga do jolma na mamorsan auga i. Laos disi do neang ni auga nadipaporsanhon i. Ala mansai las do roha ni siporsan auga i mamorsan. Jadi gabe mansai ringan auga i diporsan. Lam ringan do auga i dituhuk, ala Jesus na paporsanhon auga i mansai lambok do jala serep  roha na. Jesus ndang marsikap “bos na marbohi na angker” di adopan ni akka naniondihonNa i. Jesus pe ndang “sombong” manang “pongah” mangaradophon akka namanuhuk auga nadipaporsanhonna i. (Somalna akka auga/boban ni parkarejo gabe tamba borat do molo mandurna pabos-boshon manang mansai sombong). Ala ni sikap dohot hadirion ni Jesus na lambok i, molo diantusi akka siondihononna i non i, gabe tung so tarhilala na do auga i gabe boban nadokdok.  Bahkan didok na so auga i ala ni ringanna.

7.      Joujou ni Jesus asa olo ganup jolma mamorsan auga na sian TUHAN Jesus Kristus, porlu situtu oloan ni jolma sinuaeng on. Molo adong sapadati (lima ton boras) boban sitarikon, manang dua hektar hauma na mahiang silukku on, unang be sai auga na sian  portibi on dipakke laho manarik manang maninggala i, alai diganti ma dohot auga na sian Jesus, asa pintor ringan saluhutna.  Molo adong boban ekonomi na ikkon usungon (misalna sedang tumpur parusahaan), diganti ma auga na sian portibi on marhite auga na sian Jesus laho manselesaihon i. Pasti do patuduhonon ni Jesus dalam haruar na mansai mambahen lambok perasaan, sonang partondion, jala denggan di ujungna. Molo nipakke auga na sian Jesus i, gabe sonang ma namanuhuk i margama (ai gok haholongon paragamaonna), sonang marekonomi (ai tung mansai torang saluhutna jala sai boi pasiding harugian), sonang marpolitik (ai ndang manjahati be politik i alai mambahen ture saluhutna), soang marsosial (ai na mambangun hajolmaon hubungan sosial nanibangunna), sonang  marlingkungan (ai mansai atur jala sehat saluhutna ala ni kesadaran na mansai mapan di akka jolma na humaliang). Lan dope akka hasonangan na asing. Sonang dohot manortor, ala naung dipalu Jesus gondang hangoluan tu hajolmaon. TUHANta mamasumasu saluhutna.

Pematangsiantar, 24 Juni 2017, Pdt. Langsung Maruli Basa Sitorus (Pdt. LaMBaS).