EPISTEL MINGGU PENTAKOSTA I, TGL. 15 MEI 2016: PSALMEN 104:24-35
PSALMEN
104:24 Tung na lan situtu do angka jadijadianmu, ale Jahowa! Saluhutna i dipauli Ho marhitehite hapistaran, tung gok jadijadianmu do tano on.
104:25 Tole laut i na balga jala na lambas, disi do rumamang angka gulokgulok na so habilangan, binatang angka na metmet rap dohot angka na balga.
104:26 Disi do mardalani angka parau, tole buea, na jinadihonmu, asa marmeammeam disi.
104:27 Saluhut nasida mangaranap tu Ho, asa lehononmu sipanganonnasida di tingkina be.
104:28 Molo dilehon Ho di nasida, dijomputi nasida, molo dipatedek Ho tanganmu, butongan nasida di na denggan i.
104:29 Molo ditabunihon Ho bohim, holsoan ma nasida, ditait Ho ma hosanasida, monding ma nasida, jala mulak nasida tu orbuknasida hian.
104:30 Molo ditongos Ho tondim, tartompa ma nasida, jala dipaimbaru Ho do rupa ni tano on.
104:31 Sai ro di salelenglelengna ma hamuliaon ni Jahowa * marlas ni roha ma Jahowa mida angka jadijadianna i!
104:32 Molo Ibana mamereng tano on, jadi humuntal ma, dijama angka dolok, jadi martimus ma.
104:33 Endehononku ma Jahowa saleleng di ngolungku, umpalu parhinaloan ma ahu umpuji Debatangku, saleleng adong dope ahu.
104:34 Sai dihalomohon rohana ma nian pingkiranku, ianggo ahu, sai marlas ni roha do ahu mida Jahowa.
104:35 Sai siap ma nian angka pardosa sian tano on, jala unang adong be angka parjahat! Puji ma Jahowa, ale tondingku! Halleluya!
ENDEHON MA
TUHAN JAHOWA NA MANOMPA, MANGATUR DOHOT MANARIHON SALUHUT NAADONG, MANONGOS
TONDINA DOHOT PAIMBARUHON TANO ON
1.
Psalmen i ma na marrumang puisi naboi endehonon, nadisurat panurat
laho manariashon, mangukkaphon, manghatindanghon panandaon ni namanurat psalmen i taringot tu
TUHANna, jala boha panandaonna i dipahusorhosor, direnunghon, diauhon dohot dipargumulhon
di roha dohot haporseaonna, jala diaandar i tu hatoropan, asa dohot nian
naumbege (namanjahasa) dapotan panandaon na songon i huhut laos manghangoluhon
tua sian panandaon i. Sai adong do isi ni ganup psalmen i na marasing
pangondolhonna, jala laos i ma diparhitehite akka sitafsir Psalmen mambahen
ragam dohot rumang ni akka psalmen i. Ndang sai sarupa pandok ni sada panafsir
dohot panafsir naasing taringot tu ragam dohot rumang ni sada psalmen. Sipatamba
pangantusion ma akka pangantusion na marasingasing i. Psalmen 104 i ma sada
psalmen panindangion ni haporseaon, ndang “teori
ilmu pengetahuan”. Nanidok ni parpsalmen di Psalmen 104 i tung mansai
sintong-sintong do sude. Jala tantangan
ma i tu sude massam ni ilmu pengetahuan laho mambuktihon manang mamorso
hasintongan na nidok ni parpsalmen on. Sahat tu saonari, sude ilmu pengetahuan marhatoho panindangion
na adong di psalmen 104 on. Isi ni Psalmen 104 boi pakkeon ni akka naporsea
(Huria Kristen) sinuaeng on laho lam mangantusi barita panompaon ni langit
dohot tano dohot nasa isina (1 Musa 1:1-31). Jala tardok do ia barita ni 1 Musa
1:1-31 i dipahombang sian Psalmen 104 do.
2.
Molo
nisukkun parpsalmen 104, boha do panandaonna taringot tu Tuhan Debata? Pintor
alusanna do: Jahowa do TUHAN Debata, jala songon goarNa i (Jahowa ’Elohim),
Ibana do mambahen adong ( = manompa) nasa na adong. Jadijadianna do nasa na
adong (tarmasuk sibolis, setan, ragam ni tondi (tondi nahodar, tondi nadenggan), dohot
nanidok ni paragama politeis akka ‘debata’ (’elohim/’elohin),
dewa-dewi, ilah-ilah. Na adong i ndang holan barang (benda)-na, alai dohot do dalan, na
rikkot dohot sibahenon laho mangaramoti, mamelihara, patureturehon dohot
mangagohon akka na adong i. Di denggan ni panompaon, pangaturon, pangaramotion
dohot pameliharaon ni sude jadijadianNa i, tama do jolma mamuji Jahowa.
Sedangkan holan sada barang do boi ditompa/ditukkangi
sahalak jolma, nunga tung luar biasa pamujion ni donganna jolma tu ibana. Lam
tu Jahowa sitompa saluhut ma, nunga ikkon lobi luar biasa pamujion ni saluhut
jolma rap dohot saluhut jadijadian ni Jahowa.
3.
Ndang
apala sude jadijadian ni Jahowa dihatahon parpsalmen on. Olat ni natolapna
mamikkirhon dohot mamereng do. Alai dirajumi do i sude nunga “sukkup” lao
mambahen panjaha/naumbege psalmen on porsea tu Jahowa jala gabe parsidohot
mamuji Jahowa. Nang tu jolma sinuaeng pe, i do sakkap umbahen gabe sijahahonon
bagian ni psalmen on sadari on, manang dijamitahon di partangiangan.
Naditaringoti di Psalmen 104 i ma: hatiuron, langit, bilut ni langit, ombun,
alogo, api, tano (bumi) on, lintong
majoajo, aek, ronggur, dolok, rura.
Hajanghajang (namambolat aek tu aek asa unang dilonong dolok/tano), mual ni rura, binatang harangan, halode
harangan, pidong na martongatonga langit, hau na mardakkai, parbue ni
jadijadian ni Jahowa, duhutduhut, ikkau rata, jolma, anggur, roti, hau ni
Jahowa, hau Ares, siborutasik, tusam, bedu, antuasu, bulan, mataniari, haholomon, borngin,
singa, laut nabalga jala nalambas, gulokgulok ni laut, binatang nametmet dohot
nabalga, buea, tondi. Laplapnari godangna na so ditaringoti parpsalmen i di
psalmen on sian akka jadijadian ni
Jahowa. Ndang ditaringoti misalna: akka
binatang nadipearo jolma; akka surusuruan; akka bintang, akka gaja, arimo,
antilop, anjing laut, baruang, ihan paus, lumba-lumba, iu, dinosaurus, ragam ni
tondi, ragam ni na didok manang disomba
jolma ‘debata’/dewa/dewi, ilah-ilah, dohot akka na asing. Di parpsalmen
on ndang akka massam ni jadijadian ni Jahowa i naumporlu, alai pambahenan dohot
panggunahonon ni Jahowa do tu akka i ganup, songon contoh sibotoon ni jolma. Asa
mura pambahenan i pahonahonon ni panjaha psalmen on tu akka nasoditaringoti
ibana di psalmen on.
4. “Tung na lan situtu do akka
jadijadianmu, ale Jahowa!, ninna parpsalmen on. Molo didok lan marlapatan do i, tung na so hajojoran godangna dohot massamna.
Tutu, sahat tu sadari on ndang marhasil dope jolma mamboto dohot manggoari sude
nasa jadijadian ni Jahowa i, ala ni lan
na. Portibi (tano) on gok jadijadian ni Jahowa. Ai so adong na so jadijadian ni Jahowa na adong di tano (bumi) on. Sudena i dipauli Jahowa
marhitehite ‘hapistaran’ (ḥokmah).
Ndang dipaboa atik na ‘hapistaran’ ni ise na dimaksud dison. Jadi boi dohonon,
tung dipargunahon Jahowa do nasa na tardok ‘hapistaran’ laho manompa/paulihon
nasa na adong i. Parjolo ma i hapistaran ni Jahowa sandiri. Paduahon
‘hapistaran’ na dipaboa ni buku Poda (tarlumobi di Poda 8:22-31). Patoluhon i
ma hapistaran na nilehon ni Jahowa gabe hapistaran ni jolma. Napaopathon
‘hapistaran’ ni ganup natinompa ni Jahowa i sandiri, mambahen boi mar-regenerasi (marpinompar, mamultiplikasi). Dibahen ‘akka hapistaran’
na songon i do dipakke Jahowa paulihon jadijadianNa i, umbahen na masa
‘panompaon na marudut’ (creatio continua).
Hata Heber ‘asah diterjemahon LAI dison ‘paulihon’, jadi ndang holan manompa,
mambahen, manjadihon, dohot do mambahen uli saluhutna nasa na adong i. Jahowa
manjadihon ndang holan ‘asal-asalan’,
alai tung mansai uli do ganup
nadijadihonna i. Songon nadidok di 1 Musa 1:31 “dung i ditilik Debata ma sude
na tinompaNa i, jadi nunga denggan situtu”.
5. Di laut na marragam i (laut na
balga (= laut); laut na lambas = lautan/ocean) diparrohahon parpsalmen on godang akka gulokgulok na so
habilangan. Boi ma dohonon i, nidokna akka plankton, ubur-ubur, udang, sotong,
ragam ni dekke na metmet, akka ulok nametmet, gea ni laut, dohot akka naasing.
Akka binatang na metmet na manggulmit di bagasan laut i. Asing ni i diboto
parpsalmen on do na godang akka binatang nabalga di bagasn laut/lautan i. Misalna:
ihan paus, iu, lumbalumba, lewiatan (ulok naga raksasa), dohot lan akka
naasing. Nang pe di tano Israel do parpsalmen on, jala topi ni Laut Tonga do
topi ni luatna, diboto ibana do adong akka binatang nabalga di laut/lautan i.
Sian buku ni si Jona tarboto do na adong ihan nabalga situtu, na boi mambondut
jolma mangolu.
6. Khusus do didok buea nabalga
marmeami di laut i. Pasti ma buea pantai laut nanimaksudna. Ai so adong di
Israel buea sunge. Di sunge Nil do adong buea-sunge nabalga situtu. Barita ni
buea sian Nil pasti sahat do tu tano Palestina/Israel. Ianggo parau (kapal
laut) pasti do diboto parpsalmen on. Nanipauli ni jolma marhite hapistaran ni
jolma nanilehon ni Jahowa do parau/kapal laut i. Alai laut i napinauli ni
Jahowa, boi dipargunahon jolma lao mangula akka haporluan ni jolma (mardekke,
mangangkut barang/jolma sian topi laut nasada tu topi laut na di saborang). Dilehon
Jahowa do hapistaran tu jolma, lao mamakke naung dipinarade ni Jahowa. Manang aha pe i. Mamakke do, ndang
manegai akka naung pinauli ni Jahowa i.
7.
Sian
ayat 27-28 i tarboto do pandapot ni
parpsalmen on taringot tu songon dia dibahen Jahowa mamelihara, mangaramoti
jala asa markelanjutan akka
natinompaNa i. Saluhut najinadihon ni Jahowa “mangaranap tu” (yisberun; menantikan) Jahowa, asa lehonon ni Jahowa tu ganup nasida
sipanganon nasida be. Memang ikkon songon i do sepantasna: Ganup mangido
haporluanna tu Jahowa sitompa nasa na adong i. Sipanganon i ma nasa
narikkot di ganup jadijadian ni Jahowa,
asa boi ganup jadijadian i lanjut
jala marpinompari. Ndang holan indahan sipanganon ni jolma, misalna. Alai dohot
do akka na rikkot di partondionnna be. Songon i do nang akka jadijadian
naasing. Ndang holan duhutduhut dohot do bange sipanganon ni lombu, horbo, dohot
akka sigagatduhut na asing. Hasonanganna be asa boi mangolu, tong do bagian ni
sipanganonnasida i. Ndang holan jagal sipanganon ni singa manang hyena, antuasu
dohot arimo. Alai dohot do habitat na
songon bagian ni sipanganon ni i haganupan ikkon denggan. Tuhan do paradehon sude akka
narikkot ni jadijadianNa i. Boha dibahen Tuhan paradehon? Tong do akka
natinompa ni Jahowa i diatur gabe sipanganon ni jadijadianna na rikkot mangan i
(Dibahen Jahowa do “siklus hangoluan” di akka jadijadianNa i. Songon
pangaturhonsa na dipaboa di 1 Musa 1: 29-30: “Dung i ninna Debata ma: Boti ma
i, nunga hulehon tu hamu nasa suansuanan na marparbuehon boni di sandok tano
on, ro di sude hau angka na marparbue sisuanon, bahen panganonmuna ma i. Alai
anggo tu sude angka binatang ni tano on dohot tu angka pidong na martongatonga
langit, ro di sude na manjirir di atas tano on, angka na marhosa di bagasan:
Bulung ni angka suansuanan (hulehon) bahen panganonna, gabe manjadi ma songon
i.” Di bumi (tano) rade do dibahen Jahowa Debata sude narikkot panganon ni
namangolu di tano on. Ndang songon nidok
ni akka atheis: “Ah, tano on do na paradehon
sasude sipanganon ni akka napporlu mangan di tano on!”, ninna. Ala dibereng akka atheis i, tung sian tano i
do disari akka namanggulmit i sipanganonna. Ndang diantusi, nadiparade Jahowa
do akka rusa, antilop, horbo, zebra dohot palanduk, asa adong allangon ni singa
na adong di Afrika. Diatur Jahowa do adong ‘lingkaran/siklus hangoluan’ di nasa
natinompana na rikkot mangan.
Nadiparade (= nadilehon) Jahowa
do sipanganon ni namangolu i. Holan tinggal mambuat, manjomputi na ma ganup na
mangharikkothon. Dilehon Jahowa do nang ilmu/parbinotoan laho manjomputi (mengambil satu satu). Ndang boi asal
mangarambas, manang pintor sipahabis. Ikkon boi do lestari ganup jadijadian ni Jahowa nang pe diaturhon na di sada on
boi mangallang na di sada an, jala na di sada an boi mangallang na di sada i. “Molo
dipatedek Jahowa tanganNa, butongan ma nasida di na denggan i”, ninna
parpsalmen on. Lapatanna, molo dibahen Jahowa tung mansai bahat naboi panganon
ni sadasada natinompa ni Jahowa (misalna: jolma), tontu butongan (kenyang sekenyangnya) ma natinompa i. Sada
contoh ni nadipatedek Jahowa tanganNa, i ma na ditongosna manna dohot lote di
parhorsikan Sinai, asa adong panganon ni halak Israel. Takkas butongan (sampe adong
namate butong ala ni hosukna) sude halak Israel di tikki i. Tuhan Jesus Kristus
na ma na mambahen songon i di tikki ditamuei Ibana sagodang ni 5000 dohot 4000
halak, so dietong dope akka dakdanak dohot tusi. Nunga lobi onom miliar jolma
di portibi on silehonon ni Jahowa mangan. Tuani ma dilehon Jahowa bisuk tu
jolma i, laho mambuat (manjomputi) sipanganonna sian na diparade Jahowa di tano
(bumi/portibi) on.
8.
Dihaporseai
halak Israel do, ia bohi ni Jahowa marsinondang do, jala molo didompakkon dohot
disondanghon Jahowa bohiNa tu jolma,
tung gok pasupasu ma jolma i. Sabalikna molo ditabunihon Jahowa bohiNa tu
jolma, gabe ndang adong be pasupasu ni Jahowa di jolma i. Jadi, toho do i, molo
ditabunihon manang ditundalhon Jahowa
bohiNa tu jolma, pasti do holsoan jolma i. Ise na so holsoan, molo na aturan ro
rezeki tu ibana, hape gabe sundat rezeki i sahat tu ibana. Lam akka hitir do
jolma molo gabe maningkat sian na ndang ro be rezeki tu ibana, gabe bura (harugian
bolon) na masa tu ibana. Rikkot situtu do jolma i tarpasupasu, i do umbahen diaturhon Jahowa
adong pasupasu hinatahon ni si Musa (4 Musa 6:24-26). Masalah na jotjot dibahen
jolma: Ndang olo jolma i tarpasupasu, sai holan asupasup do diadu, i ma marhite
na mangulahon ulaon na dihagigihon Jahowa. Haru jolma, molo patampak-tampak
hundul, pulikpulik pandohan, ndang be tarharaphon tarpasupasu napulik pandohan
i. Molo tampak hundul jolma dohot Jahowa, jala padoadop bohi be, songon na di
bagasjoro ni Jahowa, ikkon sahata saoloan ma jolma i dohot Jahowa. Unang pulik
pandohan ni jolma sian pandohan ni Jahowa. Molo dung songon i, takkas ma gabe
tarpasupasu jolma i.
Jahowa do mangalehon hosa ni
jolma, na dimulai marhite namangombushon hosa hangoluan tu bungbung ni igung ni
si Adam, asa gabe jolma namangolu si Adam i. (LAI: gabe martondi namangolu
jolma i, 1 Musa 2:7). Hosa hangoluan i jotjot disarupahon dohot tondi na adong
di bagasan diri ni jolma. Jahowa do namanompa/najumadihon tondi ni jolma, jala
dibahen Jahowa tondi natinompaNa i gabe bagian ni diri ni hajolmaon (jaha:
Sakaria 12:1). Ndang sabagian sian Tondi ni Jahowa ditopik laho jumadihon tondi ni jolma, alai tung
takkas do tondi ni jolma i na khusus
ditompa Jahowa. Gabe didok do i “tondiM” (tondi ni Jahowa) nang pe so bagian ni
Tondi ni Jahowa, alai tondi na ditompa Jahowa. Tondi na ditompa Jahowa i do
ditongos Jahowa tu badan ni jolma i (tu tano nanigana ni Jahowa gabe badan ni
si Adam, dung i tu parbue ni bortian ni ina dung mulai adong nanaeng gabe jolma
di bortian ni ina i). Molo tamba sada jolma di bortian ni ina, tardok do na
adong ma naimbaru di tano on.
Di na masa pangusehonon ni Tondi
Porbadia di Jerusalem di ari Pentakosta, Tondi ni Jahowa di bagasan Jesus do na
ditongos Jahowa tu akka sisean dohot pangihut ni Tuhan Jesus Kristus. Pangontakna
tu nanisonggopan ni Tondi i, tarida gabe “natinompa naimbaru nasida”, i ma gabe
jolma na barani situtu manghatindanghon Tuhan Jesus Kristus di bagasan
parhataan ni jolma naumbegesa. Jolma na manjakkon Tondi Porbadia gabe jolma
naimbaru, natinompa naimbaru.
Molo ditait/ditarik Jahowa tondi
na adong di diri ni jolma i, mate ma jolma i (mate pamatangna, jala mate nang
tondina i). Mate pamatang marlapatan mulak pamatang i gabe orbuk (gabe tano) ai
sian tano do parmulaan ni i. Mate tondi i, lapatanna mulak tondi i tu Jahowa,
jala ndang be marfungsi ibana. Tondi i songon batere nadisimpan, dung mulak
tu Jahowa. Ndang marfungsi batere i, ai so di bagasan namanghaporluhonsa be
(radio, senter, kereta, mobil, handphone, dohot na asing).
Godang dope cara ni Jahowa
paimbaruhon rupa ni tano on. Ndang holan ala adong jolma naimbaru di bortian ni
ina. Dohot do ala mapultak dolok marapi (gunung
berapi) manang erupsi dolok i, gabe godang akka lahar diutahon gunung/dolok
i laho paimbaruhon rupa ni tano on. Dohot do ala martubuan aka suansuanan
naimbaru, gabe dipaimbaru rupa ni tano on. Songon i nang ala ni na martubuan
akka anak ni binatang-binatang na adong
di atas tano on, gabe imbaru do rupa ni tano on.
9.
Rodi
salelenglelengna do hamuliaon ni Jahowa. Ai bagian ni hadirion ni Jahowa naso
marmula na so marujung i do hamuliaonNa. Sude jadijadian ni Jahowa lao
patuduhon hamuliaon ni Jahowa do umbahen naditompa. Dihirim roha ni Jahowa do
asa ganup jadijadian ni Jahowa parsidohot di hamuliaon ni Jahowa, jala olo marfungsi patuduhon hamuliaon i. Martua do
ganup natinompa i molo lam takkas dipatuduhon ibana hamuliaon ni Jahowa, manang
ndang ditabunihon ibana fungsina
patuduhon hamuliaon ni Jahowa.
Las do roha ni Jahowa marnida
sude jadijadianNa, molo ganup jadijadianNa i mardalan jala mangolu hombar tu
ngolu dohot tujuan naung disakkapi Jahowa taringot tu jadijadian i. Alai molo
manimbil do, tarrimas do Jahowa jala mandabuhon uhuman na borat. Nunga
dibaritahon taringot tu na songon i, di tikki madabu si Hawa dohot si Adam tu
dosa, manang manimbil sian napinatikkon/naniaturhon ni Jahowa (jaha 1 Musa 3).
Songon i do nang uhuman aek na sumar na didabu Jahowa tu hajolmaon, ala
manimbil jolma i sian naniaturhon ni Jahowa. Nang halak Israel pe manghilala do
boha las ni roha ni Jahowa molo mangolu bangso napinillitNa i hombar tu patik
ni Jahowa. Alai dibuang do Israel tu Babel, ala sai mardosa raja ni Israel
dohot bangso Israel.
10. Ndang na tanggung hagogoon ni
Jahowa lao padalanhon rimasNa molo dibereng jadijadianNa i ndang be patuduhon
hamuliaon ni Jahowa, manang ndang be mandalanhon fungsina be hombar tu
nasinakkapan ni Jahowa tikki panompaonna. Parpsalmen on mandok: Molo Ibana
mamereng tano on, jadi humuntal ma, dijama akka dolok, jadi martimus ma (ay.32).
Dipakke Jahowa do lalo nabolon dohot erupsi ni akka dolok marapi (manang bencana alam) lao manguhum pangisi ni
tano on, manang saotikna lao paingothon hajolmaon, asa mulak muse jolma i dohot
akka jadijadian ni Jahowa tu dalan hasintongan. Dihaporseai parpsalmen on do na
Jahowa do ‘dibalik’ ni akka lalo (nabolon/namansai gogo dohot na nanget)
umbahen masa lalo i. Songon i nang umbahen masa “martimus dolok” manang erupsi. Marondolan tu haporseaon i do,
umbahen olo ro mangangguki bangso ni TUHAN tu Jahowa mangidohon asa dipaso lalo
dohot erupsi i. Ai tarpaso Jahowa do nang akka bencana alam i saluhutna.
11. Sikap na pasti sipatuduhonon
dohot sibahenon ni parpsalemen on dung direnunghon sude taringot tu Jahowa
dohot jadijadianNa saluhutna, dipaboa di ayat 33: “Endehononku ma Jahowa
saleleng di ngoluku, umpalu parhinaloan ma au mamuji Debataku, saleleng adong
do ahu.” Mardomu tusi, karangon ni parpsalmen on ma akka ende siendehononna
tamba ni naung adong i. Latihonna ma dirina dohot donganna lao umpalu
uninguningan / parhinaloan (alat musik)
na serasi begeon mangiringi ende siendehonon ni parpsalmen i. Jala ndang holan
parsahalian ulaohonon ni parpsalemon on na songon i, tung saleleng ni ngoluna
do, saleleng adong dope ibana di tano on. Sada hasatiaon mamuji Jahowa do tekad
na songon i. Marende dohot mamalu parhinaloan (alat musik) tarmasuk do i tu bagian ni budaya. Jadi molo mamuji
Jahowa, ikkon pamajuon do budaya. Ndang sai margolgol be di prinsip: oppu raja
di jolo martukkot sialagundi, nabinahen ni naparjolo, ulakkonon ni naumpudi.
Alai dipature ma prinsip i: Oppu raja di jolo martukkot sialagundi, nabinahen
akka oppu naparjolo takkas dipamaju, dipature, dipauli akka naparpudi. Huria
Kristen pe unang hatinggalan lao pamajuhon budaya ni hajolmaon na masuk tu
horongna be. Ikkon dilumba budaya na populer sinuaeng on, jala dibahen budaya
populer i lao mamuji Jahowa, marhite pangalaho nang parendeon huhut mamakke
alat-alat musik moderen, jala lobi moderen dope.
12. Tutu sudena hamajuon dohot usaha
pamajuhon budaya lao mambahen budaya i dalan mamuji Jahowa, tong do ikkon
mangido restu tu Jahowa, songon nidok
ni parpsalmen on: “Sai dihalomohon rohaNa ma nian pikkiranku.” Sibolis pe
dipakke do budaya populer (akka hamajuon ni budaya) lao pahembangkon harajaon dohot pengaruhna di
portibi on. Unang diloas Huria Kristen gabe Sibolis i mangkuasai sude akka
hamajuon ni budaya (parendeon dohot parmusikon). Ikkon harajaon ni Jahowa di
bagasan Jesus Kristus do mangkuasai budaya i saluhutna (natradisional dohot napopuler).
Jala ikkon bahenon ni Huria Kristen budaya i saluhutna dalan lao mamuji Jahowa.
Diuji Huria Kristen ma ganup tahap ni hamajuon ni budaya i, jala dikendalihon
marhite hata dohot lomo ni roha ni Jahowa di bagasan Jesus Kristus. Porlu do
akka ketegasan-ketegasan lao manogunogu hamajuon ni budaya, unang
ketegasan-ketegasan lao mangambat
hamajuon ni budaya, songon na jotjot dope masa nuaeng on. Ngeri do molo sai
mulak-mulak kolot (mulak tu halateon) Huria Kristen tikki mangadopi hamajuon ni
budaya (parendeon dohot parmusikon). HChB nagabe HKI najolo gabe
pelopor-pelopor hamajuon ni budaya Batak Toba do. Semangat i ikkon di torushon
nang di tikki na lam moderen on Indonesia on. Visi ni HKI pe nunga manganjurhon
na songon i: HKI Huria na gogo haporseaonna (kuat iman), na manindangi
(menginjil/misiioner), na moderen (manguluhon gerakan hamajuon ni jaman) dohot
na boi mambahen nadenggan (na dedikatif) songon pangabdi tu Tuhan Jesus Kristus.
Ianggo parpsalmen on ditariashon
do boha rohana, dung lam diantusi ise Jahowa jala aha dibahen tu jadijadianNa;
“Ianggo ahu, sai marlas ni roha do ahu mida Jahowa” (ay.34b). Las do roha ni
parpsalmen on ala diida ibana tung di Jahowa do nang masa depanna, parngoluonna dohot aha akka nadenggan nadapot dohot
na naeng dapotna. Diboto ibana, sian Jahowa do ngolu na dumenggan boi daionna. Ala
ni i do umbahen sai didatdati ibana ganup ari ganup tikki mamuji Jahowa marhite
ulaonna dohot marhite endena nang alat musikna. Nuaeng on pe ndang adong na so denggan pangoluon ni akka
parende partondion (par-lagu rohani)
dohot parmusik na mahir mamainhon musik rohani, tarlumobi na sanggup
mangendehon ende partondion na tradisional dohot na pop. Di liat portibi on do
na songon i, ndang holan di tonga-tonga ni bangso Batak Toba. Molo las roha
mida Jahowa (tarlumobi di bagasan Jesus Kristus), lam marsemangat do mangolu
dohot marpambahenan na denggan (menghasilkan
karya-karya yang luar biasa). Ikkon dohot ma Huria Kristen sinuaeng marlas
ni roha mida Jahowa, ai i do dipodahon Tuhan Jesus Kristus.
13. Sian najolo sahat tu saonari on
sai diparsinta Jahowa do unang sai mardosa be jolma i, ai dosa i do urat ni
nasa hajahaton. Molo ndang adong be namardosa, ndang adong be parjahat di tano
on. Najolo dirasiphon Jahowa do akka parjahat i, ala so dioloi joujou ni Jahowa
namandok: Ndang lomo roha ni Jahowa marnida hamatean ni akka parjahat, alai
hamumulak ni parjahat i do tumadikkon dalanna na jahat i. Asa tanggal dosa i
sian akka jolma pardosa, nunga pola disuru Jahowa AnakNa nasasada i tu
portibion, asa unang mago ganup naporsea tu Jahowa di bagasan Jesus kristus,
alai asa hangoluan na saleleng ni lelengna di ibana (ptds. Joh. 3:16). Tuhan
Jesus Kristus disuru lao patupa hasesaan ni dosa ni hajolmaon. Asa sundat
pangidoan ni parpsalmen on na mandok: “Sai siap ma nian akka pardosa sian tano
on, jala unang adong be akka parjahat”, ikkon
olo ma parjahat i manadikkon dalanna najahat i, jala dijalo ma hasesaan ni dosa
naung pinatupa ni Tuhan Jesus Kristus jala dimulai ma mangolu di dalan naung
nibangun ni Tuhan Jesus Kristus hombar tu parsuruon ni Jahowa, Ama ni Tuhan
Jesus. Ai didok Jesus, jala sintong do i: Au do dalan i, hasintongan dohot
hangoluan. Molo sai ditulak jolma (parjahat) i manjakkon haluaon pinatupa ni
Jahowa di bagasan Jesus Kristus nang pe sai disosoi Tondi Porbadia i ibana,
gabe dosa na so hasesaan be dosana. Jala ujung ni lakkana, hona uhum jala
didabu tu narokko, asa disi ibana mangangguki jala aeonna na patungoripon. Binsan
bukka dope dalan hangoluan i tu akka parjahat, dilakkahon ma lakkana tu dalan
Jesus Kristus, Sipalua i. Asa dohot ibana mandok: Puji ma Jahowa ale tondiku.
Haleluya.
14. Renungan. Sahat tu saonari sai torus
dope Jahowa manompa marhite na dipakke na nasa hapistaran (ḥokmah), tarmasuk marhite hapistaran nanilehonNa tu ganup jolma i,
tarlumobi nanilehonNa tu akka na genius
di tonga-tonga ni hajolmaon. Ditorushon jolma i ma manciptahon akka nadenggan tu hangoluan ni jolma di portibi on.
Manang na bahenon ni jolma i akka sipanganon, ubat na boi mambahen mangolu
jolma i saratus duapulu taon nang holan
120 pel do diallang/dipangan (sada pel tu haporluan sataon), dipauli jolma i
ma, asa unang adong jolma on na anturaparon, mate so mangan, alai sude
butongan. Unang sai holan sinjata, bom
bunuh diri, bom mobil, ditukkangi, ala malo ibana. Ai hamagoan do ujung ni na
sai manukkangi na boi mansegai hajolmaon manang pamate donganna jolma. Dipakke
jolma i ma hapistaran ni dilehon Jahowa tu ibana lao pahehehon muse akka
suansuanan manang binatang naung musnah marhite napaulihon naung musnah i sian gen ni akka i saluhutna, na mungkin
adong dope tanom di tano i. Unang be holan na manegai, pamatehon akka
suansuanan dohot akka binantang jolma i. Tanggungjawab ni jolma i na ma mamukka
muse akka suansuanan dohot binatang naung musnah binaen ni jolma i.
Ala tung mansai rikkot do di
Jahowa mangaramoti, mamelihara dohot mambalanjoi akka jadijadianNa i, diotapi
jolma i ma dirina laho mangalo usaha ni Jahowa i, alai lam dilehon ma dirina be
gabe ulaula ni Jahowa pasauthon pangaramotion, pameliharaon dohot pambalanjoion
ni nasa jadijadian ni Jahowa i. Di lam sega portibi iklim ni portibi on ala
nungga habis hutan/harangan, lam ponjot portibi on digoki akka gas sisegai
ozon, ala ni godang ni kulkas na mamakke poreon namarisi gas sisegai ozon,
dipakke jolma i ma hapistaran nilehon ni Jahowa tu ibana be laho mandapot zat
na boi mangganti akka sisegai ozon i, naboi mambahen ngali kulkas nang pe so
gas sisegai ozon dipakke. Andorang so tarlambat dope, lam dipadoras jolma i ma
usahana laho mangatur siklus ni
parngoluon ni nasa jadijadian ni Jahowa i
masirainan jala masitungkolan, masitopangan
laho mangolu denggan. Nang sala na manaba hau, alai unang sampe musnah/mintop
hau i, asa adong muse parsaulihonon ni jolma i. Denggan do namakkuasai
dolokdolok dohot harangan, alai unang sampe gundul dolok manang harangan i.
Sada hau ditaba, ba ikkon suanon ni namanaba i hau na songon i sampulu gantina.
Asa unang pagodanghu hau naditabai holan mambahen sagala massam karotas, ba
diorui jolma i ma dirina mamakke haporluan na marrumang harotas. Misalna, unang
pola sai harotas dibahen tissu manang lap tangan, manang piring/bukkus ni
indahan. Bulung ni hau i dibahen gantina. Molo lam sega do jadijadian ni Jahowa
ala ni godang ni plastik na so olo busuk marratus taon, manang molo diallangi
iu, lumbalumba, ihan paus akka palastik i gabe marmatean, unang be dipabrik
palastik, jala uang be adong nanggo sada na mamakke bukkus palastik. Hatop ma
diganti jolma i palastik laho padenggan ngolu ni hajolmaon. Molo tung pe ikkon
pabrikon barang na marrumang palastik, ba akka barang na so pola bolokkonon ma
barang plastik i dipabrik/dihasilhon.
Molo sai hurang dope listrik di
haporluan ni jolma, tarlumobi di Indonesia on, unang ma akka Pembangkit Listrik
Tenaga Nuklir dipajongjong jolma i. Lam dipatajom jolma i ma hapistaranna laho
mandapot akka sumber listrik na boi mambahen marlobilobi listrik pakkeon ni
jolma i. Nunga boi mambahen listrik marhite PLTSurya, PLTPanasbumi, PLTAir,
PLTAngin. Molo di akka puncak ni dolok na adong di Indonesia on dipajongjong
PLTAngin (Kincir Angin na mamutar turbin dinamo listrik) tung mansai hatop do
marlobilobi daya listrik na rikkot pakkeon ni saluhut jolma. Molo sukkup daya
listrik pakkeon ni jolma i, boi ma jolma i creatif, mamukka dohot paulihon akka barang/benda na so heaadong dope, gabe
adong pakkeon ni jolma i.
Di ari sadari on dipestahon Huria
Kristen do Haroro ni Tondi Parbadia. Dijakkon jolma i ma Tondi Porbadia i asa
lam tamba semangat ni jolma manorushon panompaon naung binahen ni Jahowa, jala
asa lam semangat marsitutu jolma i mangaramoti, mamelihara dohot mambalanjoi
sude jadijadian ni Jahowa i, manorushon sakkap ni Jahowa mambahen lam
martamba-tamba akka naditompa i, unang lam godang na musnah; mambahen takkas lestari akka jadijadian ni Jahowa. Ai
pangomoan jala hauntungan ni jolma do molo lestari
akka jadijadian ni Jahowa.
Nabinahen, karya (kreasi) dohot
hasil ni naniula do tanda ni namangoloi Jahowa. Siparrohahonon ni Huria
Kristen, asa unang gabe ummalo akka na atheis manang na anti-Kristus i mambahen
manang manghasilhon karya na patuduhon pangoloion tu Jahowa di bagasan Kristus.
Ikkon ummalo jala umpistar Kristen i sian akka na anti-Kristen mambahen kreasi
(jadijadian) na mambahen tung mansai denggan hangoluan ni jolma di portibi on. Marhite
na songon i, tarpuji ma Jahowa, jala tarpuji ma nang pangihut ni Jesus Kristus.
Jala i ma pujipujian na manongtong tu Jahowa di bagasan Jesus Kristus. Amen.
Pematangsiantar, tgl. 3 Mei 2016.
Pdt. Langsung Maruli Basa Sitorus (Pdt. LaMBaS).
