EPISTEL MINGGU I SETELAH TRINITAS, TGL. 29 MEI 2016: LUKAS 7:1-10
LUKAS
7:1 Asa dung sun dihatahon Ibana sasude hatana
ondeng tu pinggol ni natorop, dibongoti ma huta Kapernaum.
7:2 Jadi hansitan ma naposo ni sada letnan, na
pinarhamaol ni tuanna, pola matemate ne.
7:3 Dung dibege ibana barita ni Jesus, disuru ma
angka sintua ni halak Jahudi manopot Ibana mangelehelek, asa ro pamalum
naposona i.
7:4 Sahat ma nasida tu Jesus jala gomos ma Ibana
diapoi, ninna ma: Patut do oloanmu ibana.
7:5 Ai holong do rohana di bangsonta; tung ibana do
pajongjong parguruanta.
7:6 Jadi rap laho ma Jesus dohot nasida. Alai ndang
apala dao be Ibana sian jabu i, nunga disuru letnan i angka donganna mandok tu
Ibana: Tuhan, unang loja Ho! Ai na hurang tama do ahu, tung bongotanmu
jabungku.
7:7 Laos ala ni i do ndang tau huetong diringku
manopot Ho. Alai dok ma hata sisandok, asa malum naposongki.
7:8 Ai halak, na ginomgoman ni na marhuaso do ahu,
na mangarajai soldadu; molo hudok tu na sada: Tusadui ma ho?, laho do ibana; ia
tu na sada: Tu on ma ho! -- Ro do ibana; jala ia tu naposongku: On ma bahen!,
jadi i do dibahen.
7:9 Umbege i, longang ma Jesus, laos humusor ma
Ibana mandok tu natorop na mangihuthon Ibana: Hudok ma tu hamu: Gari di halak
Israel, gari ndang jumpang Ahu haporseaon na songon i!
7:10 Jadi muli ma angka na sinuru i tu jabu, laos
malum do didapot nasida anak somang i.
PORLU
UMBALGA HAPORSEAON NI NAUNG PANGIHUT NI JESUS SIAN HAPORSEAON NI NA SO PANGIHUT NI JESUS LAHO
PASAUTHON SIBAHENON NI JESUS
1.
Dung
sidung Jesus marjamita di dolok (Mat.5-7//Luk.6:20-41 + Lukas 6: 27-36 + 37-38; ay.41-42; 6:47-49;
Luk.11:2-4; 11:9-13; 12:22-31),
dibongoti Jesus ma huta Kapernaum. Tardok di bagian utara ni huta
Kapernaum do dolok i (Lao mangingot inganan on inganan ni Jesus marjamita, dipajongjong
do disi sada bagasjoro ni Kristen, na tiangna di ganup sisi ualu, ala disi do
dihatahon Jesus Hata Parhatuaon na ualu i. Di samping bagas joro i ma dolok (bukit) i, miring sian mulai topi pante
sahat tu ginjang. Ndang pola timbo bukit i, landai
do. Molo manghatai jolma sian toru, takkas do habegean sahat tu ginjang, nang
pe so pola marmik. Jadi molo hundul jolma disi marribu halak, tong do boi
begeon na di pudi sahali soara ni parjamita na jongjong manghatahon hatana di
bona ni bukit i). Sian inganan on boi do dalanan tu huta Kapernaum na di topi
ni Tao Galilea. Diatur si Lukas do barita na masa di Kapernaum on songon sada contoh
boha mangulahon jamita ni Tuhan Jesus na di dolok i, na mandok: “On ma
tahe: Haholongi hamu ma musumuna bahen hamu ma na denggan jala pasali hamu ma,
di na so hirim rohamuna di balosna; balga ma upamuna, gabe angka anak ni
Natumimbul i ma hamu, ai basa do Ibana di na tois marroha jala di na jahat.
Gabe parasiroha ma hamu, songon Amamuna, Parasiroha i!” (Luk. 6:35-36).
2.
Molo
gabe pejabat negara (tentara manang sipil) ikkon sude do parrohahononna jala
denggan bahenonna. Di Kapernaum (huta naumbalga di topi bagian utara ni Tao
Galilea) rame do di tikki i ala disi do akka partao (nelayan) mambongkar akka dekke nadapot nasida borngin, dung i
digadis tu jolma na ro maronan tu huta i. (Ianggo nuaeng huta on tung mansai
langa do, jala dihaporseai masa halangaon i, ala na dibura Tuhan Jesus do
hutaon di tikki disi Tuhan Jesus, ptds. Mat.11:23. Huta on digoari do “huta ni
Tuhan Jesus”, ala tung mansai godang nadiula ni Tuhan Jesus di huta on, alai
tong ndang manjakkon Tuhan Jesus, jadi gabe dibura Tuhan Jesus. Adong do disi
synagoge na jotjot dipakke Tuhan Jesus bahen ingananna marjamita, jala runtuhan-na boi do berengon nuaeng disi.
Ala ni i gabe digoari do i Sinagoge ni Jesus. I do na didok diturpuk on na
dibangun letnan on “parguruanta”. Di lambung ni runtuhan ni sinagoge i dibangun Kristen do sada bagasjoro, bahen kenangan na huta ni Tuhan Jesus do huta
Kapernaum i). Ala adong do di huta i kegiatan ekonomi, mardekke, martigatiga,
adong na disi dibahen pamarenta kantor sijalo balasting (sijalo beo). Jala ala
strategis do huta i gabe markas tentara laho manjaga sude luat na di topi tao
Galilea dohot tano nahumaliangna, ditempathon pamarenta Romawi do disi sada centurio manang ekatontarkhos (LAI, TB: Perwira; LAI, Batak-Toba: letnan), na
marpasukan saratus halak. Jadi letnan i sabotulna tumikkos didok “Komandan
Saratus”. Hata Junani ekaton(t) lapatanna saratus; arkhon lapatanna pamimpin,
uluan, komandan. (Gabe adong huruf t
di antara ni hata ekaton dohot arkhon, ala ni kontraksi di
panghatahonon do i). Naposo (doulos,
servus, hamba, PRT, babu) ni
Komandan Saratus Soldadu on do na marsahit, pola matematene, ndang sada sian soldaduna. Naposona,
namangurupi mangula akka ulaon di tonga ni bagas ni komandan i. Diparhamaol
Komandan i naposona i, pasti ala tung mansai burju do naposona i, jala tung
mansai manolong panghobasionna di bagas ni komandan i. Alai nunga sahalak na
denggan roha Komandan on, ala sanga dope ibana mamparrohahon hahipason ni
naposona. Molo so denggan rohana, cukup do holan inanta i manang kepala rumatanggana
dohononna mangurus i, manang na gadisonna tu halak manang na pasombuonna mate. Ndang
didok komandan i: “Molo so tolap na be mulaulaon, bolokkon i!” Manang: “Molo
mate annon ibana, tanomhon hamu tu suhasuha i!”, ndang ninna. Arga do jolma di
ibana, songon dia pe kalasna, dohot ulaonna/ jabatanna. Pejabat dia pe di negara on, ikkon boi do
songon i, manang na aha pe agamana.
Dilului Komandan i do boha asa malum naposona i
huhut mulak boi mangula ulaonna, jala malua sian hamatean naung mangancam. Laho mangalului hamalumon ni naposona i,
dipatuduhon ibana do hadenggganon ni parsaoranna dohot akka halak Jahudi. Ai
dipangido ibana asa akka sintua ni Jahudi lao manopot Jesus, asa diubati
naposona i. Sahalak na so halak Jahudi do Centurion on. Di na boi dipangido
bantuan ni akka sintua ni Jahudi i, tontu na tung mansai denggan do
parsaoranna, jala takkas do denggan di bahen ibana kerukunan antar etnis, kerukunan antar penganut agama, kerukunan pemerintah dohot
rakyat, kerukunan penjajah dohot yang dijajah. Diparrohahon komandan on
do nang akka na songon i. Nang akka komandan manang pamimpin di tingkat dia pe
di negara on, tong do ikkon parrohahononna jala ulahononna patupa akka kerukunan na songon i molo naeng
marhasil ibana di negara Pancasila on.
Laho mambangun kerukunan
(hademakon) i, takkas do disadari komandan on, na boi juo do 25 taon ibana gabe
centurio di Kapernaum (songon nadiaturhon ni pamarenta Romawi). Ala ni i
dibangun ibana do hubungan na denggan tu bangso Jahudi nang tu na so Jahudi di
Kapernaum. Diboto ibana do dia naumporlu di halak Jahudi, i ma bagas parguruan
(synagoge). Sian on ma dipamasuk ibana dirina lao mambangun hubungan na denggan
i. Takkas dileon Komandan on rohana lao mambangun Synagoge na adong di
Kapernaum i. Jala sidung do i dibahen mansai denggan. Gabe adong inganan ni
Jesus marjamitai, jala adong inganan ni halak Jahudi mangguruhon Hata ni Debata
(Patik ni si Musa). Marhite pambahenan on, rukun
komandan on tu halak Jahudi jala rukun do nang tu Jesus dohot siseanna,
nang pe nunga diboto ibana sai adong sogo ni roha ni sintua ni Jahudi tu Jesus.
Di parsuruonna pe tu sintua ni Jahudi asa nasida mangido Jesus ro pamalum naposo ni komandan i, tong
do asa lam rukun pangihut ni Jesus
dohot pangihut ni sintua ni Jahudi i. Dapotna do i, tarida sian hata ni sintua
ni Jahudi i na mandok tu Jesus tikki nasida mangelek Jesus asa dioloi pangidoan ni komandan i. Patut do oloanmu ibana. Ai holong rohana di
bangsonta; tung ibana do pajongjong parguruanta. Marhata “—ta” akka sintua
i tikki manosoi Jesus. Molo ndang rukun nasida, ndang marhata “—ta” akka sintua
i, alai ra marhata “—nami” (bangsonami, parguruannami) do. Jala rap lao do
Jesus dohot akka sintua ni Jahudi i tu bagas ni komandan i. Aut marsanding
nasida, ndang boi sadalanan nasida. Akka pamimpin dohot komandan na adong
sinuaeng on di negara Pancasila on, tong do ikkon usahahononna asa adong
pembangunan rumah ibadah na parukunhon akka jolma na marasing akka
agamana. Pambangunan Rumah Ibadah, pambangunan “parguruan” ma narumikkot di
akka houm na marasing-asing agamana di tonga ni bangso on. Jadi ikkon urupan ni
akka pejabat negara (militer dohot sipil) do pambangunan ni bangunan na songon
i, jala ndang loasonna adong na manggurgari pambangunan i. Haru molo sukkot
pambangunan rumah ibadah/parguruan na
dihaporluhon tu paragamaon, ikkon patuluson ni pejabat negara nang pe so haru
dipangido. Jala ndang porlu pilih kasih pejabat negara di bagasan ni
on.
3.
Haporseaon
ni sordadu markonteks hasordaduon. Porlu do haporseaon na kontekstual. Andorang
so sahat rombongan ni Jesus rap dohot akka sintua ni Jahudi i, hatop do disuru
komandan i suruanna mangido asa unang pola masuk Jesus tu jabu ni komandan i,
jala ndang pola pajumpang Jesus dohot naposona na marsahit i. Sikap ni komandan
on, mardomu do i tu panandaonna taringot tu Jesus. Nunga diboto komandan on na
boi do Jesus pamalum na marsahit nang pe so haru dijama na marsahit i. Diboto
ibana na tarmasuk tu sahalak na jumago dope Jesus sian dirina. Dirina dirajumi
do hurang tama pajumpang dohot Jesus, jala jabuna pe tong do hurang tama lao
bongotan ni Jesus. Ala ni i do umbahen ndang barani komandan i pajumpang bohi
dohot Jesus. (Ianggo di barita ni si Mateus, pajumpang do komandan on dohot
Jesus, ai ibana sandiri mangido asa dipamalum Jesus sahit ni naposona i). Disuru
mangalapi Jesus asa ro tu jabuna, dung naeng sahat disuru muse mangido asa
unang masuk Jesus tu jabuna. Berarti, saleleng ni proses panjouon i sahat tu
nanaeng sahat Jesus tu jabuna, adong panginongion (pangarimangrimangion) ni
roha ni komandan i, taringot tu dirina, jabuna, dohot taringot tu Jesus najinou
na i. Godang naboi suraon, akka aha hira-hira na masa di pikkiranna tikki sai manginongi rohana. Mungkin dijaga rohana,
sotung ma gabe partuktukan tu akka sintua ni Jahudi molo masuk Jesus tu jabuna.
Manang dipikkiri rohana, gabe habotoan annon boha do pangisi dohot isi ni
jabuna, pamewahhu dibereng rakyat i annon. Olo do dipikkiri rohana, gabe
sihataon ni atasanna komandan i ala diloas-loas akka Jahudi tu Jabuna. Alai na
takkas didok komandan i tu Jesus, songon sinurat ni si Lukas i do: Hurang tama
diri ni komandan i rap hundul dohot Jesus, dohot hurang tama jabuna bongotan ni
komandan i. Ala na dirajumi dirina hurang tama, i do umbahen na sai marsuruan
ibana manopot Jesus. Ndang pola dohonon na patuduhon sikap na na so
marpardomuan pejabat negara dohot rakyatna, pambahenan ni komandan on, alai
tung nionjar ni pamikkirion na hurang tama do dirina rap dohot Jesus na
dirajumi mansai sangap. Sada sikap na patuduhon hatorukon dohot haserepon ni
roha do i. Diboto komandan i do na tung tarpamalum Jesus do naposona i, nang pe
holan hata sakkababa didok Jesus mandok malum naposona i. Dipatudos ibana
haporseaonna i tu statusna songon sada komandan, na manang aha pe diparentahon
tu pasukanna, pasti do ikkon tarjadi. Ala ni i do umbahen dipangido komandan i
tu Jesus: Tuhan (kyrie), unang loja
Ho! Dok ma hata sisandok, asa malum naposoki! Sian pandokan ni komandan i
manjou Jesus i kyrios (tuan/Tuhan),
nunga tarida na diakui komandan i na tung mansai dao dope tumimbo huaso ni
Jesus sian huaso ni komandan i tu akka pasukanna. Sedangkan au, ninna roha ni
komandan i, molo hudok tu prajurithu tusan, tusan do lao, hudok tuson, tuson do
ro, on baen, i do dibaen, ba lam Jesus i ma na lobi marhuaso dope sian au, ninna
rohana. Di konteks i, dihaporseai komandan on do, ia Jesus i boi do mamarenta
akka sahit haruar sian pamatang ni namarsahit, nang pe parenta i didok sian
nadao, jala ala ni parentana i gabe malum namarsahit i, jala hamatean na
mangondam i pe gabe mago. On ma haporseaon na mananda Jesus marhite konteks ni
ngolu/ulaon, jala sian na mananda ngoluna/ulaonna i manang haboionna,
tarhaporseai ibana lobi sian i dope boi patupaon ni Jesus tu dirina manang tu
diri ni halak. Molo adong na jenius boi mancipta sada barang, porsea ibana na
lobi sian i dope boi ciptaon ni Tuhan Jesus. Molo adong sahalak pangubati naboi
pamalum sahit jantung, lobi sian na pamalum sahit jantung dope boi patupaon ni
Jesus. Molo adong na boi mangudut hosa ni jolma, porsea ibana na lobi sian na
mangudut hosa ni jolma boi patupaon ni Jesus. Molo adong sahalak na boi parohon
udan, lobi sian na boi parohon udan boi do patupaon ni Jesus. Godang dope akka
contoh na asing. Di buku nabadia i dibaritahon do akka ulaon na mangalobii sian
naboi patupaon ni jolma dipatupa Jesus. Ala ni i, patut do ikkon gumogo haporseaon ni
akka siihuthon Jesus, sian akka haporseaon ni halak na so haru gabe pangihut ni
Jesus dope.
4.
Pamujion
ni Jesus tu haporseaon ni “komandan saratus” on (ayat 9), mangondolhon asa adong
di ganup pangihut ni Jesus (songon Israel naimbaru) haporseaon na mangalobii
sian haporseaon na kontekstual na dipataridahon komandan on. Hudok ma tu hamu: Gari di halak Israel, gari
ndang jumpang Ahu haporseaon na songon i. Di buku ni Mateus dipaboa boha reaksi ni Jesus mambege
haporseaon ni komandan on: “Laho ma ho,
jumpang ho ma hombar tu haporseaonmi! Jadi hipas ma naposona i di nasangombas i” (Mat.8:13). Si
Lukas ndang pola paboahon hata ni Jesus i. Cukup dipaboa: “Jadi muli ma akka na
sinuru i tu jabu, laos malum do didapot nasida anak somang i” (ayat. 10). Marpanghorhon
haporseaon nasintong i (i ma haporseaon ni komandan i) tu ngolu ni jolma na
asing (tu ngolu ni naposo ni komandan i). Marlaba do hape hajolmaon na
marsahit, ala boi gabe malum sahitna, jala ndang saut diago hamatean hajolmaon
i, molo adong dope jolma (pangihut ni Jesus) na takkas mangolu haporseaonna.
5.
Sian
barita Lukas 7:1-10 on takkas do boi dapot jamita namangolu tu ganup ruas ni
Huria Kristen nuaeng on.
(1)
Tung
narikkot situtu do napatuduhon holong agave nang di tonga-tonga ni hajolmaon na
marragam etnis, suku, marga, houm, agama dohot budaya, nang di tonga-tongan ni
hajolmaon na marragam status – sosialna [pejabat negara (militer manang sipil),
PRT, rakyat, pangula ni huria, manang hatoropan). Marhite holong agave na
mardalan jala diulahon, boi gabe tubu jala togu akka ragam ni kerukunan (hademakon) di tonga ni
hajolmaon na majemuk/plural/marragam. Sada joujou (turgas) do tu ganup pejabat do
asa torus marusaha mambahen masa akka kerukunan
(hademakon) i. Marhite akka pergaulanna,
parsidohotonna patulus pembangunan bagasjoro (rumah ibadah), manarihon akka namarsahit, napogos, nalea, dohot
marhite panandaonna na tikkos taringot tu Tuhan ni parugama na asing agamana
sian Tuhan niajarhon ni agama nanianutna.
Ibana ndang magigi mandongani jolma na so saagama dohot ibana nang pe naung gabe pejabat ibana.
(2)
Tung
narikkot situtu do adong jolma jala lam tu godangna jolma na marhaporseaon na markonteks
tu ngoluna jala sian i gabe mangakui naboi patupaon ni Tuhan i dope lobi sian
na boi dipatupa naporsea i. Adong do dua panghorhon ni haporseaon na songon i:
(a) Lam marsitutu naporsea i mangalului Tuhan i jala pasahathon tu Tuhan i
taringot tu akka nanaeng “siatasan” di tonga ni hajolmaon, tarmasuk mangatasi
akka haporluan ni jolma na so adong pangondianna hian be. (b) Marpanghorhon do
haporseaon kontekstual na songon i tu hahipason ni partondion nang pardagingon
ni jolma na humaliang halak naporsea i, jala marpanghorhon do i tu hahipason ni
masyarakat, asa malua masyarakat i sian akka hamamago naung
mangancam ngolu ni masyarakat i. Molo
naeng manghapus hajahaton ala ni narkoba, juji, pelacuran, korupsi, dohot sahit
ni masyarakat na asing nari dope,
ikkon ma lam godang jolma na marhaporseaon na kontekstual i jala na
marpanghorhon i, nang pe sian na marasing-asing agamana dohot budayana,
tarlumobi nian jolma naporsea na gabe pangihut ni Kristus Jesus.
6.
“Martua
ma akka naporsea, atik pe so diida!” (Joh.20:29b), ninna Tuhan Jesus Kristus.
Jala didok Tuhan i do: “Sai jumolo ma lului hamu harajaon ni Debata dohot
hatigoranna, dung i tambahononna do sude angka ondeng tu hamuna!” (Mateus 6:33).
Pematangsiantar, 26 April 2016.
Pdt. Langsung Maruli Basa Sitorus (Pdt. LaMBaS).
