JAMITA SIAN EVANGELIUM TU MINGGU INVOKAVIT TGL. 5 MARET 2017

1.      Hamuna  dongan sahaporseaon nahinaholongan di bagasan holong agape na sian TUHAN Jesus Kristus (‘ahabah Jahowa Jeshua Hammasiah). Nuaeng on nunga adong na digoari “pemutih’ (sibahen mulak bontar) abit nabontar na kotor. Molo adong abit na kotor ala ni miak jelantai misalna, dung i didaishon ma pemutih i tu bagian ni abit na kotor i, gabe mulak ma muse abit i bontar, songon tikki so hona jelantai. Alai adong do taboto tudosan na mandok: Saotik pe ragi (BT: naniasoman) hona tu sajual itak, gabe igar do sude itak na sajual i (ptds. Mat.16:6-12: jaga tu naniasoman ni halak Parise dohot Saduse). Itak na igar i tung maol do paulakon gabe itak mulak songon keadanna andorang so hona ragi. Molo itak na igar i ndang boi be digunahon tu hagunaan na asing, diambolonghon na ma itak naung hona ragi i. (Tuhan Jesus mangumpamahon Harajaon Banuaginjang: “Tudos do harajaon banua ginjang i tu itak naung niasoman, na binuat ni sahalak inaina, laho pasaorhon tu itak tolu ampang, paima asom saluhutna,” Mat.13:33. Sahali parsidohot disi, ndang hatanggalan be i, alai si paresoon na ma i, tu dia itak na hona ragi/asom i ujungna). Sian Bibel i dapot hita do poda na mandok, ia akka dosa teanteanan, dosa pambahenan boi do tarsesa ala ni hagogoon ni mudar ni Jesus Kristus nadurus di dolok Golgata. Jala dipodahon do tong, ia akka dosa tu Tondi Porbadia, tung so tarsesa be i, ala sai ditulak do hasesaan ni dosa na dibasabasahon Tuhan i. Ala ni i, namardosa tu Tondi Porbadia i ditempathon na ma di naroko. Di naroko i pe, ndang hatanggalan ni api naroko i dosa i sian jolma na mardosa tu Tondi Porbadia i, ujungna di naroko i ma ngingi ni pardosa i patungoripon (kertakan gigi)  jala ibana mangae hahansiton na so adong tudosanna. Api naroko i ndang api parpitapitaan maksudna songon naniajarhon ni gareja najolo, alai tung api paruhuman do.

2.      Apostel Paulus patoranghon, ia dosa ni si Adam/Hawa ala ndang mangoloi parenta ni Jahowa, mambahen gabe mardosa sude akka jolma pomparanna. I ma nanidokna dosa teanteanan (dosa warisan). Uhuman ala dosa ni si Adam/Hawa, i ma hamatean ala ni dosa i. Ala ni i gabe dohot do sude pomparan ni si Adam/Hawa hona uhuman hamatean ala dosa i. Dibahen i, songon na bongot dosa i tu portibi on marhite sian sada halak jala marhitehite dosa i ro hamatean, songon i sahat hamatean i tu saluhut jolma, ala sude nasida mardosa, ninna Apostel Paulus. Ndang dipaboa di Bibel i, atik na adong do hamatean (manang ujung ni ngolu) ni si Adam/Hawa  molo patuh nasida mangoloi parenta ni Jahowa, jala ndang mangallang parbue ni hau parbinotoan ni na denggan dohot naroa na di parsitongaan ni porlak na di Eden i. Alai boi antusan do sian isi ni Bibel i, na adong do ujung ni ngolu ni si Adam/Hawa, nang pe so dipangan nasida parbue ni hau i. Ai ndang  jolma na kekal (na mangolu salelenglelengna) si Adam/Hawa ditompa Jahowa. Dung mardosa si Adam/Hawa, dipasaut Jahowa do nadipatikkon (ditonahon) Jahowa: na ikkon mate si Adam/Hawa ala dosanasida i. Pandokan hamatean (Heber: maweth > maut (Ind.) gabe mandok “ujung ni ngolu ni jolma sian ngolu di portibi on”.  Ala so adong jolma na mate (marujung ngoluna) di porlak na di Eden i, jadi ndang adong hata na paboahon  boha mandok “ujung ni ngolu ni jolma di porlak na di Eden i”.  Dung ditobus mudar ni Jesus Kristus hajolmaon, disesa do dosa teanteanan i, jala ditumpakkon tu ganup jolma “asi ni roha teanteanan” (anugerah warisan) manang hasesaan ni dosa teanteanan siteanon ni saluhut hajolmaon.  Ganup jolma natubu sian ina naung manjalo anugerah warisan i, nunga dipastihon manean asi ni roha teanteanan, jala ias sian dosa teanteanan. [Ndang pola dohononta akka na tubu sian ina naung manean anugerah warisan (asiniroha siteonon) i akka jolma na tubui  songon harotas nabontar (kertas putih), songon nidok ni dongan na so siihuthon Jesus Kristus]. Ai bakko ni jolma na marisi giot ni roha mangalo patik/aturan/parenta ni TUHAN Jesus Kristus, sai tong do lokkot di jolma i; jala ukkontal sian na songon i di si Adam/Hawa andorang so madabu dope tu dosa mangallang parbue ni hau na di parsitongaan ni porlak na di Eden i. Molo sala pakke jolma i muse di bakko mangalo patik (tona) ni TUHAN i, madabu ma jolma i tu dosa ala pambahenan manang tu dosa maradophon Tondi Porbadia. Di hadirion na songon on ma jolma i didok simul iustus et peccator (naung dipabonar alai na sai marbakko mardosa). Mudar ni Jesus Kristus ma na paias dosa ni akka jolma na mangulahon dosa pambahenan, tu akka jolma na mangido hasesaan ni dosana.  

Molo marujung ngolu ni jolma namanjalo panobuson ala mudar ni Jesus Kristus, manang molo mate na so mananda Jesus Kristus, manang molo mate na mardosa tu Tondi Porbadia, tong do hata hamatean  dipakke laho paboahon ujung ni ngolu ni akka jolma na marragam hadirionna on.  Alai ndang hamatean ala ni dosa teanteanan na sian si Adam/Hawa be hamatean na masa tu jolma dung masa panobuson pinatupa ni TUHAN Jesus Kristus. Hata (istilah) hamatean gabe marlapatan ma “ujung ni ngolu ni jolma di portibi on” lao masuk mamulai ngolu na imbaru disakkapi songon natinujuna tikki mangolu dope ibana di portibi on. Naporsea tu Jesus jala manjakkon haluaon dohot asi ni roha naditumpakkon Jesus tu ibana, mamolus hamatean i asa lao bongot tu Paradaiso, hombar tu nanidok ni Jesus tu parjahat na mananda dosa dohot mangido ondihohon ni Jesus ibana: “Sadari on do ho rap dohot Ahu di Paradaiso.” Namanulak haluaon dohot asi ni roha na tinumpakkon ni Jahowa (TUHAN) Jesus Kristus i, manang jolma na mardosa tu Tondi Porbadia, mamolus hamatean i asa lao bongot tu naroko, asa disi ngingina patungoripon dohot mangae nahansit na so tarpatudos. Akka jolma na so tumanda Jesus saleleng ni ngoluna, ala so sahat tu ibana Barita na Uli, mamolus hamatean i asa masuk tu “portibi ni akka namate” (dunia kematian manang alam barzah). Disi be do nasida sahat tu hamamasa ni ari nahehehon nabalga i (maranatha). Di ari maranatha (haroro ni TUHAN Jesus (Isa al-Masih) laho manguhum jolma na mangolu dohot na mate), masa do ari haheheon ni saluhut jolma na mate. Hehe na di naroko, hehe na do paradaiso, hehe na di alam barzah, lao manjalo hatontuan na parpudi sian Jesus Kristus, taringot tu masa depan nasida be. Na hehe sian naroko, diuhum lam bagas di dabu tu naroko si salelenglelengna. (On ma nanidokna di Bibel i: “hamatean paduahon”).  Na hehe sian alam barzah, tontuhonon ni Jesus (Panguhum Bolon i) ma ise na tu Surgo Hasonangan salelenglelengna, jala ise na tu Naroko salelenglelengna. Na hehe sian Paradaiso, takkas ma borhat marolopolop masuk tu Surgo Hasonangan sisalelenglelengna. (On ma nanidokna di Bibel i: Hangoluan na paduahon). Tikki sian mulai mate di tano on sahat tu tikki haroro ni ari Hahehehon Nabolon (maranatha) i,  digoari do di Bibel i “Harajon Saribu Taon”, i ma harajaon na so tarukkur ni jolma lelengna, alai adong do batas ni i di tangan ni TUHAN Jesus Kristus. (Jahai ma akka on di Buku Pangungkapon).  

3.      Dung madabu si Adam/Hawa tu dosa, ala mangallang parbue ni hau na di parsitongaan ni porlak na di Eden i,  jala si Adam/Hawa diusir sian porlak na di Eden i, takkas ma dosa i maringan adong di portibi on. Mangalanggar patik (parenta) oraora mangallang parbue ni hau i do ukuran umbahen didok si Adam/Hawa mardosa. Alai di tano “paisolatan” ni si Adam/Hawa dung diusir sian porlak i, ndang adong be disi Hau Parbinotoan ni Nadenggan dohot Naroa. Na adong di jolma i, i ma bakko naung dipakke mangalo Jahowa nunga be lohot di diri ni jolma Adam/Hawa. Andorang so adong muse  patik (aturan) dipasahat Jahowa tu nasida, ndang diboto nasida be atik na mardosa nasida manang na sintong. Lumlam do ngolu ni jolma na so maraturan, jala molo aturan ni nasida i ma akka aturan “hagiot-hagiot ni roha” (nafsu hajolmaon/nafsu duniawi). Sejarah ni jolma sian si Adam/Hawa sahat tu zaman ni si Noak, gumodang ma dibaritahon keadaan ni jolma na songon i di Bibel i. Puncak ni halumlamon i manogu tu uhuman Aek na Sumar nadipamasa Jahowa. Dung malua si Noak, ripena, akka anak dohot akka parumaenna ro di sude na di parau-bolon i, dileon Jahowa do padan na gabe patik (aturan) sihangoluhonon ni hajolmaon.  Lam dipatakkas Jahowa ma patik hangoluan i tu tonga ni hajolmaon marhite patik ni si Musa. Lam takkas ma di jolma i, aha na gabe dosa, jala aha na sintong hombar tu lomo ni roha ni Jahowa (TUHAN) Jesus Kristus. “Ai nunga di portibi on hian do dosa, nang andorang so ro dope patik i; alai ndang dijujur dosa, ia so adong patik. Alai nunga manggomgomi hamatean i olat ni si Adam sahat ro di si Musa, nang so dos pardosaonnasida tu pangalaosion ni si Adam, sumansuman ni na naeng ro i” (ay.13-14).  Hamatean ala dosa ni si Adam/Hawa manggomgomi ngolu ni jolma i sian tikki diusir si Adam/Hawa sian porlak i sahat tu zaman ni si Musa. Lam ditambai dosa pambahenan ni jolma i ma borat ni hamatean na ditipahon tu jolma i. Hamatean on tong dope hamatean dalan tu inganan ni akka na mate (alam barzah).  “Ai binahen ni pangalaosi-on ni na sada, marmatean na torop i.” “Dihorhon uhum na sian na sahalak i do uhum hamago-an”. Ai ndang targotaphon ni patik i dosa teanteanan na tipa tu jolma i. Holan mudar ni Jesus Kristus do na boi/tolap manggotaphon dosa teanteanan i. Patik (tona/aturan) dilehon Jahowa (TUHAN) Jesus Kristus tu hajolmaon, asa botoon ni jolma i na unang dohot na so jadi, na ikkon dohot na patut, hombar tu lomo ni roha ni Jahowa (TUHAN) Jesus Kristus. Porlu ma tutu patik (aturan/parenta) si Jahowa di hajolmaon, asa boi denggan saluhut jolma i mangolu di portibi on. Alai molo holan mangolu denggan di portibi on do jolma i, hurang do tong “sattanggo” di ngolu ni jolma i, na mambahen ndang gok sabalanga, jala hurang saotik (na paling manontuhon) na mambahen sikkop (sempurna) ngolu ni jolma i. Si sattanggo i, i ma aha na ikkon di jolma i asa dapotna ngolu na sorgawi di tano on tarlumobi di banuaginjang, di inganan ni Jahowa (TUHAN) Jesus Kristus.

4.      Holan Jahowa (TUHAN) Jesus Kristus do na boi/tolap mangaleon ngolu sorgawi i tu jolma, ala ampunaNa do i. Ndang tarleon ni dewa/ilah, jala ndang tarleon ni sibolis ngolu sorgawi tu jolma i, ala ndang ampuna ni dewa/ilah, jala ndang ampuna ni  sibolis inon i.  Ganup do hita mamboto aha ngolu sorgawi. I ma, sude na denggan na boi daion ni jolma di tano on dohot di surgo; songon i nang parungkilon/pangaean na marguna tu hajolmaon dohot pangoloion tu TUHAN Jesus Kristus, i do ngolu sorgawi. Boi do rap dapot nadua massam on di ngolu ni sahalak jolma naung gabe pangihut ni Jesus Kristus. Boi do laos ndang dapotna i nanggo sada, molo so adong dibahen ingananna di ngoluna. Boi do gabe jolma na so tardidi di bagasan goar ni Ama, Anak, dohot Tondi Porbadia, dapotan ngolu sorgawi di tano on, hombar tu pangaleon ni TUHAN i sandiri. Alai manang ise pe na dapotan ngolu sorgawi, wajib do ngoluna i abdihononna (pelehonononna) tu hajolmaon, asa denggan sude hajolmaon. Molo lipe sian i, naung ditaluhon sibolis i ma jolma na dapotan ngolu sorgawi i. Aha imbar ni na Kristen dohot na so Kristen molo samasama dapotan ngolu sorgawi do? Sian pamerengan ni hajolmaon, ndang adong imbar ni i. Alai sian pamerengan ni TUHAN Jesus Kristus, akka Kristen na dapotan ngolu sorgawi, akka i ma na gabe dongan ni Jahowa (TUHAN) Jesus Kristus mangarajai di tano on dohot di banua ginjang. Ala ni i, ikkon monang do siihuthon Jesus di parjuangan pature hajolmaon di tano on.  Ianggo hamonanganna (tumpalna) di surgo, nunga dijamin i. Na so porsea tu Jesus, nang pe hebat ibana marngolu sorgawi di tano on, ndang dijamin dope i monang (martumpal) di surgo. (Bandingkon ma ngolu ni si Bill Gate (ampuna usaha Microsoft), sada pangihut ni Jesus; dohot si Zuckerberg (ampuna usaha Face Book), na so pangihut ni Jesus. Bandingkon ma Raja Abdullah sian Arab dohot si Donald Trump sian Amerika). Akka na dapotan akka nadenggan sian TUHAN i do sudena i.  Alai ise sian nasida sahat tu hasonangan (mandapot tumpal) di surgo, TUHAN Jesus Kristus do na manontuhon. Pangihut ni Jesus, pasti dapotan tumpal na di surgo i.

5.      Hamuna nahinaholongan. Akka sialo parenta ni Jahowa (TUHAN) Jesus Kristus sasintongna sirasiphonon ni Jahowa na ma i. Saotikna diusir sian portibi na tinompa ni Jahowa (TUHAN) Jesus Kristus. Na asi do roha ni Jahowa (TUHAN) Yesus Kristus umbahen ndang dirasip si Adam/Hawa, jala ndang diulakkon muse manompa jolma na asing. Asi ni roha i do alana umbahen holan hukuman ringan do ditipahon tu Adam/Hawa, tu ulok i dohot tu tano i. Mamuncak do muruk ni Jahowa mamereng perkembangan ni dosa ni hajolmaon, umbahen dirasip marhite Aek na Sumar  jala holan ualu halak dipateba.  Alai di zaman ni si Noak sahat tu zaman panjouon ni si Abraham dohot pamilliton ni Jahowa tu bangso Israel gabe bangsoNa, tong do ndang arga patik (parenta) ni Jahowa di jolma i. Reaksi ni Jahowa (TUHAN) Jesus Kristus tu pangalaho ni jolma i ndang be uhuman pangarasipon ditipahon Jahowa tu jolma i, alai tung akka asi ni roha dohot basabasa na ma disodorhon tu jolma i. Ndang olo be Jahowa (TUHAN) Jesus Kristus tarboan rimasNa.

6.      Manang didia pe, pangalaosion manghorhon hasesega. Tikki laho manerbanghon pesawat angkasa luar Amerika tikki i, holan sadetik do sada aturan lao start dilaosi, mapultak do pesawat i, jala sude pangisi ni pesawat i mate. Di surgo na ma nasida mangolu. Tabayanghon ma pangalaosion ni si Hawa/Adam songon i tikki i, alana holan halak i nadua dope. Holan satokkin do na mangallang parbue ni hau i, akibatna sude nasida nadua (= sude jolma) mate. Na tuani  dope marsibasabasa Jahowa, diloas nasida mangolu di ruar ni porlak na di Eden i. Ala ni i do tardok ni Apostel Paulus: andul sumurung tu na torop i ma asi ni roha ni Debata dohot basabasa, na hinorhon ni parasirohaon ni na sada jolma Jesus Kristus. On ma basabasa ni Jahowa tu Adam/Hawa tikki i: Ida ma, nunga doshon Sada sian Hami si Adam, umboto na denggan dohot na roa. Alai di hal na asing ndang doshon Jahowa si Adam i, i ma di hal (taringot tu) ampuna hangoluan sisaleleng-lelengna.  Ikkon nadilehon jala dibasabasahon Jahowa (TUHAN) Jesus Kristus do ngolu hasonangan sisalelenglelengna i tu jolma asa boi dapot ni jolma inon i. Di hajolmaon pe dapot do tarida rumang na songon i. Molo dibasabasahon sada raja tu sada baoa hasangapon (pakkat) gabe “ningrat”, manang gabe “raja” songon na ditanda halak Batak, tung takkas do sude pomparan ni baoa i taretong “ningrat” manang raja, ndang be rakyat biasa manang hatoban. Dihorhon sibasabasa i do nadenggan tu baoa i dohot tu pomparanna sahat tu ujung ni sundutna. Hurang do nian tudosan on manggombarhon “pambasabasahonon” ni TUHAN Jesus Kristus ngolu naimbaru na marhatigoran tu jolma naporsea manang tu ise na olo manjakkon. Ai umbalga dope nanihakkam ni basabasa ni Jahowa na nilehonNa di bagasan Jesus Kristus. Lam manggomgomi huhut mangolu marhitehite Jesus Kristus na sada i ma antong nasida, angka naung manjalo asi ni roha na tarlobi angkup ni basabasa, i ma hatigoran i. Molo dirajumi TUHAN Jesus sahalak jolma i partigor, jala dibasabasahon TUHAN Jahowa tu ibana hatigoranNa,  ndang holan diri ni namanjalo hatigoran i be dirajumi gabe akka jolma partigor, alai dohot do akka pomparanna, manang pangihutna. TUHAN Jesus Kristus do parjolo dirajumi Jahowa partigor jala dipasahat tu Ibana hatigoranNa i. Ala hatigoran i nunga dipasahat tu Jesus Kristus, i do umbahen saluhut Kristen i dirajumi partigor jala ampuna hatigoran ni Jahowa. Marhite sian pangoloion ni na Sada i gabe torop dipintori. TUHAN Jesus patudoshon Harajaon Banuaginjang i songon itak na niasoman. Ala ni saotik asom (ragi), gabe sude itak i asom. Ala naung dipintori Jahowa do TUHAN Jesus, ala ni i sude pangihut ni Jesus dipintori. Dipintori ala gabe dirajumi nasida saluhutna partigor manang sijakkon hatigoran ni Jahowa. Mardomu tusi, gabe tanggungjawab ni akka naung mandapot hatigoran i do mampartahanhon dirina ikkon torus  akka jolma sijalo hatigoran manang naung dohot  didok partigor. Hatigoran ni Jahowa naung gabe ampuna ni sada jolma do mambahen boi lolos jolma naung marhatigoran i sian nasa uhuman ala dosa, manang uhuman dia pe nanaeng dabuon ni Jahowa (TUHAN) Jesus Kristus tu hajolmaon.

7.      Hamuna nahinaholongan, dongan sahaporseaon. Nagodangan nuaeng on agama na manganjurhon akka pangihutna mangalului hatigoran, asa dapotan pasupasu nasida saluhutna. Mardomu tusi, dipambaheni nasida do akka ritus paragamaon na luar biasa, jala marmengomengo, laho mambujuk (mangelek) debatana be asa mamasumasu tu nasida. Alai manang dia pe dipambaheni disi, asa dapotna hatigoran dohot pasupasu sian debatana be, tong do sapandapot nasida saluhutna mandok: “Tong do molo mangasi debata i, i pe asa dapotan hatigoran dohot pasupasu namanomba ibana.” Hasimpulan ni sude agama do napinatuduhon ni Jahowa (TUHAN) Jesus Kristus: “Holan asi ni roha ni Jahowa (TUHAN) Jesus Kristus do sipangasahononhon na mangolu on.” Nionjar ni kesadaran naung mandapot asi ni roha ni Jahowa do sude nasa ulaon na denggan dipatupa akka pangihut ni Jahowa (TUHAN) Jesus Kristus. Molo di agama na asing, siluluan dope asi ni roha ni dabata nasida. Alai hombar tu poda ni Bibel i, diusehon Jahowa (TUHAN) Jesus Kristus do asi ni rohaNa, jala jolma holan tinggal manarehon dirina be asa hona tu ibana asi ni roha i, jala mambahen inganan ni asi ni roha i di ngoluna asa adong di ibana dohot di saluhut pomparanna asi ni roha i salelengna. Di bagasan TUHAN Jesus Kristus do tardok masa Harajaon Asi ni Roha dohot Tikki Parasian manang Na Gok Basabasa na so marnamontok. Molo dibangun hajolmaon on dirina marojahan tu Asi Ni Roha dohot Basabasa ni Jahowa (TUHAN) Jesus Kristus, pasti tung mansai denggan do parngoluon ni sude bangso, sude jolma boi mangolu di bagasan dame jala masitukkoltukkolan laho mambahen nadumenggan tu hajolmaon. Alana, di Tikki Parasian on, tung takkas do jolma i ndang olo rajaan ni dosa, jala mabiar mardosa tu donganna jolma tarlumobi tu debatana be. Molo sude Kristen mangolu di Asi Ni Roha dohot Basabasa ni Jahowa, tung mansai denggan situtu ma na marhuria i, jala sude Kristen na marribu sekte i boi diihot holong agape  naung nipodahon ni Jesus Kristus tu nasida. Akka sekte ndang be horong na mambahen hasusaan/hagaleon tu hakristenon, alai gabe panumpaki tu ulaon di Harajaon Asi Ni Roha dohot Basabasa napinajongjong ni Jahowa (TUHAN) Jesus Kristus. Akka horong (sekte) na adong i gabe dalan patoguhon Harajaon Asi Ni Roha napinajongjong ni Kristus ma. Di ngolu siganup ari tung kompak ma idaon sude Kristen i, nang pe asingasing be sektena/horongna. Jala mamparjuangkon haporluan ni hakristenon pe gabe tung mansai kompak, jala satahi saoloan. Mangalului pansarian pe tung takkas boi masitolongan. Ai i do teladan (sitiruon) dibahen TUHAN Jesus Kristus tu sude pangihutNa. Ndang loja be jolma mangalului surgo, alai loja pature hajolmaon na ma na porlu ulaon ni ganup Kristen saleleng ni ngoluna. Dipargogoi TUHANta ma sude Kristen i mangolu di Harajaon Asi Ni Roha dohot Basabasa naung dipajongjong Kristus di tano on. Amen.

Pematangsiantar, tgl. 9 Pebruari 2017. Pdt. Langsung Maruli Sitorus (Pdt. LAMBaS).