JAMITA SIAN EVANGELIUM TU MINGGU ESTOMIHI TGL. 26 PEBRUARI 2017

1.      Hamu dongan sahaporseaon, nahinaholongan di bagasan holong ni TUHAN Jesus Kristus. Porlu situtu do paingoton, parrohaan manang bahenon marbisuk akka raja dohot akka panguhum na adong di tano on. Raja (i ma ganup kepala pemerintahan: raja, presiden, perdana menteri; gubernur jenderal) na Kristen manang na so Kristen; panguhum (hakim, jaksa, tentara, polisi, nabegu/parbarani, pamimpin agama, tokoh adat, parhapistaran; akka konglomerat dohot naasing na tarmasuk boi manontuhon na denggan masa di tonga ni masyarakat) na so Kristen manang naung Kristen; sude nasida rikkot parrohaan (bahenon malo, marbisuk, berhikmat); jala rikkot paingoton. Asa ganup raja boi denggan mamimpin negara napinasahat ni Jahowa pimpinonna be. Asa akka panguhum boi denggan mandalanhon turgas na niampehon ni masyarakat dohot negara tu nasida be. Lao mamparrohai dohot paingot nasida ikkon pakkeon ma akka jalurjalur naung diparade negara i. Misalna di Indonesia: marhite DPR/DPD manang MPR; marhite DPRD Propinsi manang DPRD Kabupaten/Kotamadya. Boi do tong marhite na paboahon tu nasida akka Undang-undang, Peraturan Pemerintah; Intruksi Presiden/Raja, Peraturan Daerah, Peraturan Desa;  Aturan Paradaton; Aturan ni Agama, dia na so haru diingot manang na dihalupahon nasida laho mangatur negara manang mangula ulaonna be. Tarlumobi ma, paingoton jala parrohaan nasida,  asa unang ogaoga nasida tu akka paragama; asa akka na marniula dipikkiri roha nasida jala akka na marparbuehon na denggan tu sude rakyat ma diulahon nasida.  Jala narumikkot, paingoton nasida jala parrohaan, asa unang sai ditahi nasida mangalo Jahowa dohot MesiasNa. Asa uang sirapui ihot hasadaon manang tali persatuan ni akka organisasi masyarakat manang organisasi keagamaan nasida, alai gabe akka na patoguhon ihot dohot tali hasadaon ni houm dohot bangso ma nasida sude. Alana, gabe akka jolma na magopo do nasida ganup, molo gabe pangogaoga do nasida, manang molo sai na so hasea dipikkiri nasida lao ulahononna; jala molo sai dialo nasida Jahowa dohot MesiasNa; jala molo sai gabe sisursari hasadaon dohot parsadaan (kesatuan dan persatuan) ni bangso do nasida. Molo denggan raja dohot akka panguhum di negara i mamarenta (ndang korupsi di segala hal), gabe bagian ni partanobatoan ni akka naporsea tu TUHAN Jesus Kristus do negara/pamarenta i, na pinajongjong ni Jahowa mangondihon huria Kristen.

2.      Parpsalmen on manariashon boasa tumagonan mansai denggan raja dohot akka panguhum mangula ulaonna. Alana molo pangogaoga, manang sai holan na korupsi, manang sai tahi mangalo Jahowa dohot Mesiasna do raja dohot panguhum,  jala dihara jolma mambahen songon i; jala molo na manursari rakyat do raja dohot panguhum di negara i, ba diparekelekkeli jala dielesi Jahowa do raja dohot akka panguhum na songon i. Dirajumi Jahowa nasida akka naloakon; akka na mangorui sangapna, na palea dirina, manang na manegai negarana sandiri, jala akka lakka manuju harorobur do akka pambahenan ni raja na songon i. Tamba ni i, songgakan ni Jahowa do raja dohot panguhum pangogaoga; jala ala ni songgak-songgak ni Jahowa i gabe martimpalan (gabe kehilangan jabatan) do raja dohot panguhum na songon i. Ai masa ma revolusi rakyat laho manumbanghon (mandabuhon/mangganti) ganup raja dohot panguhum na sedang diparekkelekkeli dohot dielesi  Jahowa. Songgak-songgak ni Jahowa mambahen mali tondi raja pangogaoga, sibahen na so marniula, sialo Jahowa/MesiasNa, raja/panguhum sisegai persatuan dohot kesatuan. Molo mali tondi, ba laos mate ma, songon si Herodes Nabolon i, na martahi naeng mambunu Jesus, raja na tubu di Betlehem. Natuani do mangolu si Paulus di tikki disonggak TUHAN Jesus Kristus ibana, jala laos dipakke ibana gabe ulaulaNa. Memang molo bertobat jolma i, dipakke Jahowa do lobi dumenggan muse.

3.      Dipabakkit Jahowa do sada raja di Sion, dolok habadiaon ni Jahowa, asa adong tiruan tu ganup raja na adong di tano on. Najolo raja pinabakkitNa i, i ma si Daud. Dung salpu (ndang marsambung be) dinasti ni si Daud, dipabakkit ma muse Anak HaholonganNa, i ma Jesus Kristus, gabe raja na so holan manorushon harajaon ni si Daud, alai pajongjonghon harajaon banuaginjang di tano on. Tu si Latus didok Jesus: ‘Ndang sian portibi on harajaonku. Aut sian portibi on harajaonku, ndang tarbahen so mangalo angka naposoki, asa unang sahat Ahu tu akka Jahudi, alai ndang sisongon i harajaonki. Dung i ninna si Latus ma mandok Ibana: Asa raja do Ho? Jadi ninna Jesus ma mangalusi: Songon na nidokmi ma tutu. Raja do Ahu! Umbahen na tubu Ahu jala umbahen na ro Ahu tu portibi on, asa huhatindangkon hasintongan i. Ganup na sian hasintongan i tangihonon ni i do soarangku (Joh.18:26-37).”  Jesus ma raja na so mambahen habangsaNa di Sion/Jerusalem na di tano on, alai di banuaginjang (Sion/Jerusalem naimbaru).

4.      Di Psalmen on di paboa sabagian taringot tu Raja i, dohot sabagian taringot tu sibahenon ni raja pinabakkit ni Jahowa i. (1) Targoar do raja pinabakkit ni Jahowa on “Anak-Ku”, nam marlapatan: Anak ni Jahowa (Anak ni Natumimbul i/Anak Sasada ni Ama i; Anak Haholongan ni Jahowa). I  tarida sian pandohan ni Jahowa na mandok: “Anak-Ku do Ho. Sadari on do Ho Hutubuhon!”  Ndang holan di Padan Naimbaru panindangion taringot tu Anak ni Jahowa, dohot do di Padan Narobi on. Panggoarion “Anak-Ku”, ndang na mandok ia TUHAN i maranak songon jolma jala dipaanakkon (diperanakkan) songon na jotjot sala diantusi akka dongan Silom. Alai didok dison Anak-Ku, lao paboahon na Jahowa sandiri do ro tu portibi on gabe raja di Sion/Jerusalem pusat ni harajaon banuaginjang i. Molo didok “sadarion do ho Hutubuhon”, ndatung songon ina na manubuhon posoposo TUHAN Jahowa di ari sadari on, sampe adong na loakon manukkun: Molo manubuhon do Jahowa, ise ma bidanna?, ninna. Hata loak do hata/sukkunsukkun on. Molo didok sadarion do ho Hutubuhon na marlapatan do i, di ari on ma Jahowa mangulakkon patuduhon na Ibana do Raja tu sandok tano on, jala sude akka raja ikkon ma tunduk tu Ibana jala marguru tu Ibana. Pambahenan ni Jahowa on dipangido ikkon jamitahonon ni siihuthon TUHAN Jesus Kristus, ai Barita Nauli do i, tarlumobi dung dipasaut Jahowa sakkapNa i di bagasan Jesus Kristus. Patik Naimbaru do pambahenan ni Jahowa on, na gabe aturan taringot tu lao mananda, boha jala ise do sasintongna  Jahowa sitompa langit dohot tano dohot nasa isina i, jala Raja di atas ni akka raja.

5.      Hamuna akka dongan sahaporseaon. Disosoi Jahowa do Anak HaholonganNa i mangido tu Amana, asa dilehon Jahowa tu Ibana sude akka jolma parbegu (sude akka bangso) bahen jambarNa. Ai molo jambar ni Jesus Kristus ganup bangso i, gabe mangolu jala marhasonangan ma bangso i. Ai dapotan hasesaan ni dosa dohot haluaon nasida saluhutna. Jadi tung ulaon na hombar tu sakkap dohot tahi ni Jahowa do molo sai disosoi akka Kristen i bangso parbegu asa gabe pangihut ni Jesus Kristus. Sahat tu saonari, torus dope ulaon zending, ulaon mamboan jolma tu Jesus, ulahonon ni ganup Kristen. Molo gabe Kristen jolma i, na mambuat dalan na sintong do jolma i disi. Molo so olo tardidi jolma i, ikkon usahahonon ni Kristen asa lomo ni roha ni TUHAN Jesus Kristus masa di parngoluon ni ganup bangso i. Ndang na laho mangago sada bangso maksud ni Kristen i, molo diusahahon Kristen i lomo ni roha ni Jesus Kristus hangoluhonon ni jolma di ganup negara, tarmasuk di Indonesia. Asa tung takkas do bangso na di negara i merdeka, makmur, sejahtera, marhasonangan, diulahon Hak-hak dohot Kewajiban Manusia, mangolu di bagasan dame dohot na masihaholongan, ndang adong be korupsi, ndang adong porang atas nama agama, ndang adong pembunuhan atas nama dendam kesumat, ndang be agoon ni narkoba akka rakyat i, jala sahit ni hajolmaon boi mago sude. Di Indonesia, asa tung Pancasila dohot Bhinneka Tunggal Ika i do na gabe pedoman ni bangso Indonesia na marnegara, marmasyarakat dohot marbudaya. Ala ni i do umbahen sai ikkon marukkil Kristen i, asa lomo ni roha ni TUHAN Jesus Kristus masa jala hangoluhonon ni ganup jolma di ganup negara, tarlumobi di negara Indonesia on. Tung mansai denggan do molo gok di TUHAN Jesus akka ujung ni tano on. Lapatanna, penentu terakhir di parngoluon ni jolma na adong di negara on manang di tano on, hata hangoluan na sian TUHAN Jesus Kristus ma. Songon i do nang di surgo i. Didok TUHAN Jesus Kristus: “Nunga sahat tu Ahu nasa huaso na di banuaginjang dohot na di tano on (Mat.28:18).”

6.      Molo nunga sahat tu tangan ni TUHAN Jesus Kristus huaso na adong di tano on, tontu boi ma lomolomoNa bahenonNa tu akka raja dohot panguhum na adong di tano on, asa marhamubaon ni roha nasida. Alai ndang dibahen TUHAN i songon i. Joujou tu hamubaon ni roha (pertobatan) do ditariashon. Ai nang tu nasida pe marlakku do hata ni Jahowa na mandok: "Songon sintongna mangolu ahu, ninna Tuhan Jahowa, tung  na so lomo do rohangku mida hamatean ni halak parjahat i, so ingkon mida hamumulak ni parjahat i tumadingkon dalanna i nian, asa mangolu ibana. Antong sai  mulak ma hamu tumadingkon dalanmuna angka na jahat i! Boasa tung tagonan mate hamu, ....? (Yehezkiel 33:11)."  Dilehon Jahowa Ama i do sasintongna huaso mangaropuki dohot manapori akka raja dohot panguhum na sai mangalo Jahowa, songon na manapor hudon bahenonna, songon na mangaropuk batu marhite batahi (antukantuk) bosi. Alai dosa ni akka raja dohot panguhum i do na diropuki dohot dilala (ditapor) asa tanggal sian diri ni raja dohot panguhum sialo Jahowa dohot MesiasNa i. Ianggo raja dohot panguhum na olo dipaias sian dosa i, diloas do mangolu, jala dilehon kesempatan mandalanhon turgasna di bagasan hadirion hajolmaon namimbaru (i ma hadirion naung disesa dosana).  Alai molo sai so olo do tanggal raja dohot panguhum i sian dosa i, jala sai tong dialo panjou ni Tondi Porbadia ni TUHAN Jesus asa bertobat nian nasida, ba ndatung adong sisolsolan (penyesalan), ala laos dohot na ma hadirion ni raja dohot panguhum sialo Jahowa i dilala, diago jala dibahen sampe so adong di portibi on, jala diganti dohot na asing. Hansit do uhuman tu akka pangalo Jahowa, tarlumobi molo sai dialo manang ditulak asi ni roha dohot denggan basa ni Jahowa, na paluahon ibana sian gomgoman ni dosa.

7.      Asa boi lestari harajaon ni akka raja dohot jabatan ni akka panguhum, hatop ma dioloi sosososo ni Jahowa na nidok ni parpsalmen on: On pe, hamu ale akka raja, sai olo ma hamu parrohaan, jala hamu ale angka panguhum ni tano on, sai olo ma hamu paingoton. Oloi hamu ma Jahowa dohot biar ni roha, jala marolopolop ma hamu, huhut akka hitir. Umma hamu ma Anak i, asa unang ro rimasna, jadi mago hamu maon di tongadalan, ai tibu do marpiarpiar  rimasna, alai  martua ma sude akka na marhaposan tu Ibana. Raja na marroha (namarbisuk; nabijaksana) ima na mangulahon turgasna songon napinatorang ni Apostel Paulus di Rom 13, ima gabe pamarenta (raja/panggomgomi) na padutuhon dirina sada raja/panggomgomi na marharoroan sian Jahowa Debata; manggomgomi hombar tu pangaturhon ni Debata; takkas patuduhon dirina, na suruan ni Jahowa Debata do raja i laho manumpak (mambahen sejahtera, jala dame) akka rakyatna so mardiaimbar; suruan ni Debata raja i laho manghonahon uhum tu siulahon hajahaton; jala tung takkas patuduhon dirina na parhobas ni Debata do raja (pangomgomi) i. Manang na sistem harajaon, manang republik demokratis, manang hasultanon naniparenta ni raja/panggomgomi i, ikkon do raja/pangomgomi i marroha, marbisuk jala adil. Sude ma Kristen manangianghon raja (panggomgomi) na songon i, jala mangalehon akka masukan asa tung gabe raja (panggomgomi) na marroha (nabisuk, nabijaksana, na pistar, na holong) raja (panggomgomi) i. Raja (panggomgomi) i pe antong ikkon olo ma manjalo akka masukan sian rakyatna na mansai marragam i. Hombar tu Undang-undang ma raja (panggomgomi) mandalanhon ulaonna. Panguhum pe ikkon olo do paingoton ni rakyat, asa unang manimbil sian akka aturan ni negara, aturan ni adat, aturan ni agama, molo mandalanhon turgasna. Raja (panggomgomi) dohot akka panguhum mansai rikkot do gabe sioloi Jahowa, lapatanna: olo beribadah tu Jahowa, olo mar-‘abodah manang  olo gabe parhobas ni Jahowa. Mangoloi Jahowa ikkon mardongan biar (= bertaqwa) i ma sikap patuh, taat jala pasangaphon. Mangoloi Jahowa ikkon “marolopolop”, ala godang sihalashonon di bagasan pangoloion i. Mangoloi Jahowa ikkon “akka hitir”, ala sai tagam rohana songgakon ni Jahowa ibana ala  pambahenanna  na so pasti dope di ibana atik na dihalomohon Jahowa.

Disosoi do akka raja dohot panguhum i olo mangumma Anak Haholongan ni Jahowa i. Mangumma marlapatan do i mandompakkon, ndang manundali Anak i, dungi manghaol Anak i, jala patuduhon holong ni roha marhite na masidaisan pardompakan ni raja/panguhum i dohot pardompakan ni Anak i. Si Paulus mandok, umma nabadia do umma sibahenon, unang umma na hodar/ramun manang umma ni si Judas Iskariot. Mangumma Anak i marlapatan do i patuduhon na tung lomo situtu do roha ni raja/panguhum i tu Anak i, jala na so jadi hianatan (jehehononna) manang musuan ni raja/panguhum i Anak i di tikki mamarenta manang mangula akka turgasna be nasida. Molo so umma holong manang so umma nabadia do umma ni raja dohot panguhum i, olo do tarrimas Jahowa (TUHAN Jesus Kristus), jala rimas i olo mambahen raja/panguhum i mago di tongadalan. Peut di na so tikkina. Unang ma nian masa akka kudeta tu raja manang panggomgomi. Sai sahat-sahat ma nian tu ujung ni periodena be akka raja/panggomgomi nang panguhum i, asa denggan sude marganti akka panggomgomi i molo di negara demokrasi, jala denggan raja pasahat harajaon (tahta)na tu pangeran na marhak mangganti ibana. Asa boi songon i, ikkon marusaha ma raja/panggomgomi manang panguhum i, gabe na nicintaan ni rakyat. Jala asa dicintai rakyat do umbahen disosoi, olo raja/panguhum i mangumma Anak i marhite umma nabadia. Martua do ganup raja/panggomgomi manang panguhum na marhaposan tu Jahowa (TUHAN Jesus Kristus). Dia ma na gabe hatuaonna? On do: Lestari panggomgomionna; makmur rakyatna; dihormati akka panggomgomi na asing ibana; pomparanna pe denggandenggan sude di pudianna, ndang dilele halak. Godang dope tahe nadenggan sijaloon ni akka namanghaposi Jahowa (TUHAN Jesus Kristus). Ala ni i, hamu akka raja dohot panguhum na adong di tano on, olo ma hamu parrohaan dohot paingoton, asa tung gabe jolma na martua hamu. Jala hita huria ni TUHANta, malo ma hita mamparrohai dohot paingothon rajanta (panggomgominta) dohot akka panguhumta, asa tung gabe pasupasu hita tu nasida saluhutna. Amen.