JAMITA SIAN EPISTEL TU MINGGU REMINISCERE TGL 12 MARET 2017

1.      Hamuna dongan sahaporseaon nahinaholongan di habagasan holong agape na sian Jesus Kristus. “Holong do mangalap holong,” ninna bangso Batak Toba.  “Alai ndang muruk mangalap muruk, manang ngingi ganti ni ngingi,” ninna nasida. “Molo adong na muruk, lambok do alusan. Molo diropang halak ngingim, pangido halak i mangido maaf, jala bahen ibana gabe alealem! Alai molo adong manghaholongi ho, balos ma dohot holong ni roham na so marpangansi!,” ninna muse. Songon i do tutu pangalaho ni  bangso Batak Toba na hot di ruhut ha-Batak-on. Asing ma, molo naung luntur do ha-Batak-on na, gabe ndang songon i pangalahona. Pangalaho i, dipataridahon bangso Batak dope sahat tu nuaeng nang di ngolu paragamaon. Ala takkas do diboto jala diauhon bangso Batak hata ni Barita Na Uli i na mandok: Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana, tung takkas do dipatuduhon bangso Batak holong ni rohanasida tu TUHAN i. Tarida do i di pambahenan nasida, na songon tanggurung ni ponu di akka ponu, dibahen nasida huria i. Manang tu dia ponu lao, sai diboan do tanggurungna, na gabe partahannanna dohot parlinggoman ni uluna. Songon i do bangso Batak, manang tu dia pe nasida mangaranto, sai diboan do huriana, na gabe ngolu ni tondina, parlinggomanna, jala na dietong siramoti hosana. Sandok, tekad ni bangso Batak mandok: “Hidup demi TUHAN, i do anggo au!” Anggiat ma songon i torus sahat ro di maranatha.

2.      Ro do sintua Nikodemus mandapothon Jesus tikki i borngin-borngin. Maksudna asa tung mansai tenang manghata-hatai dohot Jesus, ndang adong mangganggu. Ndang na pola asa songon na martabunitabuni ibana ro manopot Jesus asa unang diboto donganna Parise, umbahen na ro  ibana borngin-borngin. Ai laos beha pe dibahen manabunihon panopotonna i, tong do i habotoan. Domu muse, ndang porlu rahasia ibana ro manopot Jesus. Alana ndatung adong pola sihabiarhononna tu akka Parise, dohot Sanhedrin, ai tokoh ni Jahudi do ibana, jala diboto akka donganna do hasatiaonna tu korps nasida. Tugas ni pamimpin ni Parise do manakkasi denggan, langsung tu na bersangkutan, molo adong tokoh na menonjol muncul jala songon na asing podana sian poda ni korps Parise. I do tumagon alasan dohonon umbahen na ro Jesus borngin-borngin manopot Jesus.  Ndang gabe pangihut ni Jesus si Nikodemus dung panghataion i, alai sian nadao, dihaholongi ibana do Jesus. Alana si Nikodemus do mangurus bakke ni Jesus dung mate Jesus di hau parsilang i. Di hita, panghataion ni si Nikodemus tu Jesus, mambahen adong pambingkasi, asa dipatorang Jesus podana na gabe hangoluanta, tarlumobi ma i poda taringot tu holong ni Jahowa tu jolma.

3.      Hamuna dongan sahaporseaon. Si Nikodemus manise Jesus “GURU”. Gurunami, huboto hami do Ho guru na ro sian Debata, ai ndang tarpatupa agia ise tanda songon na binahenmi, ia so Debata donganna. Diakkui si Nikodemus dkk. do Jesus na ro sian Jahowa, ala dibereng nasida akka tanda na binaen ni Jesus ndang mungkin bahenon ni manang ise pe molo so Jahowa mandongani.  Panandaon  na meningkat do i. Alana St Nikodemus mangakui sahalak lulusan na so sian sikola “Rabbi” na di Jerusalem, alai lulusan sian sikola “synagoge” Nazareth, sada guru (rabbi) na lebih unggul sian ibana dohot sian akka rabbi (guru) naadong di Jerusalem. Dipaboa tu hita panandaon on, lao paingot hita, na mungkin do adong peningkatan ni panandaonta tu Jesus Kristus, molo lam takkas tatanda ise jala aha do Jesus Kristus i. Jesus tatanda “Anak ni Debata (Anak Ni Jahowa Ama i, Anak ni Sun Timbul)” ala Ibana do Jahowa Elohim na gabe jolma; Ibana di bortian ni si Maria  nagabegabean sian Tondi Porbadia, jala Jahowa manggoari ibana Anak Haholonganna. HasadaonNa dohot Ama i, mamungkinhon hita manjou ibana Jahowa (TUHAN) Jesus Kristus (Yahowa Yeshua Hammasiah). GoarNa Jeshua (= Jahowa yasa)  (> Jesus > Isa) paboahon na Ibana do “Jahowa na paluahon” > Jesus =  Sipalua/Juruselamat. Rap dohot Jesus sarupa do i dohot rap dohot El (Allah/ Debata/Jahowa), mambahen digoari Ibana Immanuel (Rap dohot hita El/Allah/Debata/jahowa). Marnida Jesus = marnida Ama i. Ala tatanda, Jesus  do nampuna hita (huria < kyriake > ampuna ni Tuhan), i do umbahen tajou Ibana Kyrios (adonay)  (Tuhan/ Tuan). Ala dipabotohon Jahowa do tu si Petrus, na Jesus do nanimiakan ni Jahowa gabe Raja ni Jahudi, dihatindanghon si Petrus do ia Jesus i Kristus (Mesias/Masiah) do, jala si Latus mangalohothon di atas simanjujung ni Jesus di Silang i: INRI = Iesus Nazarenus Rex Iudaiorum (Jesus sian Nazareth Raja halak Jahudi). Ala tatanda Jesus i sian Bibel i, na paboahon, na Ibana do parmulaan dohot ujung ni hangoluan ni jolma, Ibana do Panguhum di ari parpudi (di maranatha), taihuthon do panindangionNa nang panindangion ni Pangungkapon ni si Johannes, mandok na Jesus i do Alpa dohot Omega (Bonana dohot Ujungna). Martua do ganup pangihut ni Jesus Kristus na tolapna mananda Jesus i songon na tapajojor di ginjang i. Marhite manang  dibagasan akka panandaon i, mangolu do partondion ni ganup siihuthon Jesus Kristus. Jala ikkon do lam gomos panandaonta na songon i tu Jesus Kristus, asa lam pos rohanta mardongan dohot Ibana, jala pos rohanta mangido sipangidoonta tu Ibana. Unang holan sahat tu holan GURU manang holan Mesias (al-Masih/Kristus) tatanda Jesus i. Ikkon sahat do panandaonta na Ibana do Jahowa na gabe jolma. Ndang na palobihu panandaonta na songon i.

4.      Alus ni Jesus tu kekaguman  ni St Nikodemus i, paboahon tu St Nikodemus, tarlumobi tu hita, rikkotna jolma mardongan Jahowa Elohim asa boi gabe guru na ro sian Jahowa Elohim (Jahowa Debata), manang gabe guru na tarlumobi.  Molo mardongan dohot Jahowa Elohim, boi ma jolma i marnida  dohot bongot tu harajaon ni Jahowa Elohim (Debata). Marnida harajaon ni Jahowa Elohim dohot bongot  tu harajaon ni Jahowa Elohim (Debata) i ma dua hal  na berbeda (marasing). Molo holan marnida harajaon i dope iba, ndang na masuk (bongot) dope iba tusi. Jala molo dung bongot iba tu harajaon i, ikkon (pasti) do iba marnida harajaon i. Godang do jolma holan marnida  harajaon ni Jahowa i. St Nikodemus ndang dope marnida harajaon i sikkop (seutuhna), holan pinggir-pinggir ni harajaon i dope. Ai holan mandok guru na ro sian Debata do boi St Nikodemus, alai mangatusi aha lapatanna jala songon dia jolma molo tubu sian ginjang,  manang tubu sian aek dohot tondi, ndang tarantusina dope, nang pe guru ni Jahudi ibana. Di pikkiranna, molo jolma tubu, sai dibayanghon ibana dope  jolma i haruar sian bortian ni sada ina, songon na somal molo tubutubuan sada ina. Boha ma tutu boi mangulakkon tubu jolma naung magodang sian bortian (siubeon) ni inana muse? (Songon si Rizieg Sihap ma i nuaeng, tikki didok ibana: molo tubu Jesus Anak ni Debata i, ise ma bidanna?). Nang sahat tu nuaeng on, mansai godang do jolma na tolapna holan marnida harajaon ni Jahowa Elohim i, ndang sahat tu bongot tu harajaon i. Adong dua massam jolma na tolap holan marnida harajaon ni Jahowa Elohim (Debata): a) akka teolog na mambahas taringot tu harajaon i sadetail-detailna, sabagas-bagasna, saluas-luasna, jala pola manurat buku taringot tusi marpulupulu jilid na tobal-tobal, alai holan sekedar ilmu teologi do di ibana akka nasinurat/ nadibahasna i, ndang gabe bagian ni haporseaonna. Ndang pardulina i atik na dipakke jolma ilmu-teologina i laho patoguhon haporseaon ni jolma manang laho manursari haporseaon ni jolma tu Jesus.  b) akka anti Kristus, anti huria, anti harajaon ni Jahowa (TUHAN) Jesus Kristus, na mambahas mansai luar biasa taringot tu harajaon, tarlumobi hagaleon ni Harajaon ni Jahowa i, laos paroaroahon harajaon i,  asa marhite nadibahasna i akka jolma namanjahasa gabe tata rohana, jala gabe haruar sian harajaon ni Jahowa (TUHAN) Jesus Kristus. Jolma nadua massam on (akka na tardok akka na tubu sian tano on; manang na tubu sian daging ) boi do takkas  marnida Harajaon i, songon jolma na manonton filem, alai ndang hea gabe pemain filem i. Jotjot do ummalo halak on sian akka na bulus porsea, sian na mambahen haporseaonna marnida dohot bongot tu harajaon i.

5.      Hombar tu alus ni Jesus tu St Nikodemus, boi dohonon molo dung  marnida harajaon i, ikkon ihut ma tu mambongoti harajaon ni Jahowa (TUHAN) Jesus Kristus i. Asa boi   marnida harajaon i ala naung (ikkon) tubu sian ginjang do; jala asa ihut boi mambongoti harajaon i, ikkon tubu ibana sian aek dohot sian tondi. Arop roha, sukkun-sukkun ni St Nikodemus i (:Songon dia ma tarpajadi i?), ndang  be  gabe sukkun-sukkun ni hita akka pangihut ni Jesus Kristus sinuaeng. Akka naung mangantusi ma hita boha tarjadina tubu sian ginjang, manang tubu sian aek dohot tubu sian tondi. Di turpuk on, ndang haru takkas situtu dipatorang Jesus taringot tusi. Jala dirajumi rohaNa, St Nikodemus, songon rabbi (guru) ni Jahudi, nunga patut nian mangantusi i. Sian panihaion ni Jesus tu St Nikodemus, boi antoonta, na adong do di Padan Na Robi, buku nabadia ni Jahudi, naniajarhon ganup rabbi Jahudi,  taringot tu tubu sian ginjang dohot tubu sian aek dohot tubu sian tondi. Takkas taboto, Jesus ndang manghatai taringot tu mangulakkon tubu (lahir kembali manang  lahir lagi) sian siubeon (bortian) ni inana, na tubu sian ginjang, tubu sian aek dohot tubu sian tondi. Nunga didok panurirang Hesekiel taringot tu natubu sian ginjang[1], songon i nang panurirang Jeremia.[2] Natubu sian ginjang i ma akka jolma  naung marroha naimbaru dohot martondi na imbaru; ndang be marroha batu, alai marroha sibuk; akka jolma na ateatena digoki patik ni Jahowa, rohana panuratan ni patik i Jahowa, jala Jahowa Debata nasida, jala nasida bangso ni Jahowa. On sude tanda ni jolma naung tubu sian ginjang. Di Padan Na Robi pe tong do dipaboa taringot tu natubu sian aek dohot natubu sian tondi, songon nanisuriranghon ni panurirang Hesekiel[3]. Panurirang Hesekiel manuriranghon taringot tu natubu sian tondi, tikki dipatorang  ibana nadipangolu Jahowa marhite tondi na sian Jahowa holiholi na marserakan di rura i jala disuru disurirangi asa martomu jala dilappisi dohot sibuk, dung i dilehon tondi (LAI TB: nafas hidup) tusi, dung i gabe jolma na mangolu ma nasida, jala gabe parangan ni Jahowa (jaha: Hes. 37:1-14).  Di buku ni Samuel pe dipaboa do, tikki disonggopi tondi na sian Jahowa si Saul, gabe “dipauba Debata ma rohana” (1 Sam.10:9). Gabe natubu sian tondi si Saul. Di buku ni Jesaya dipaboa do taringot tu na tubu sian aek jala na tubu sian Tondi, ai didok disi, nausehonon ni Jahowa  do aek tu akka jolma namauas, jala usehononNa Tondina tu pinompar n i Israel (Yes. 44:3). Aturanna nunga ikkon botoon ni St Nikodemus nian nanggo apala akka barita ni Padan Na Robi on. Molo di Padan Na Imbaru, dipaboa pangantusion ni akka Apostel i taringot tu natubu sian ginjang dohot natubu sian aek nang na tubu sian tondi. Didok Apostel Paulus do taringot tu hal on di Gal.6:15[4]; Ep.4:22-24[5].  Didok apostel Paulus muse tegas: “Asa molo di bagasan Kristus halak, na tinompa na imbaru ma i. Nunga salpu pangalaho na robi, gabe na imbaru” (2Kor.5:17). Taringot tu na tubu sian aek dohot sian Tondi didok Apostel Paulus di Titus 3:5.[6] Di pandohan na tinompa na imbaru dihakkam do  lapatan ni: tubu sian ginjang, tubu sian aek, dohot tubu sian tondi. Nang apostel Petrus dihatahon  do taringot tu naung ditubuhon do akka pangihut ni Jesus marhite haheheon ni Jesus Kristus, dohot marhite Hata ni Debata na mangolu jala na manongtong.[7] Apostel Jakobus mandok naung tubu do akka pangihut ni Kristus marhite hata hasintongan, jala gabe patumonaan ni akka natinompa ni Jahowa.[8] Haoloon ni Jahowa (TUHAN) Jesus Kristus mambahen akka pangihutna naporsea, naung marnida dohot mambongoti harajaon ni Jahowa Elohim (Debata), gabe jolma naung tubu sian ginjang, tubu sian aek, tubu sian tondi, tung ala holong ni roha dohot ala asi ni roha ni Jahowa (TUHAN) Jesus Kristus do.

6.      Jesus mandok tu si Nikodemus: “Ingkon tubu hamu sian ginjang!”, jala ikkon ganup ma tubu sian tondi. Lao mambantu St Nikodemus mangantusi hata ni Jesus, dileon Jesus do sipikkiran jala naporlu antusan ni St Nikodemus: Na mangullus do alogo dompak lomo ni rohana; dibege ho do parngongosna, alai ndang diboto ho haborhatanna manang hasahatanna....” Nang pe naung dileon Jesus hatorangan i, tong do ndang tolap masuk tu nalar (utokutok/pikiran) ni St Nikodemus. Ai boi do tutu pangullus ni alogo mangurupi hita mangantusi “tubu sian ginjang” dohot “tubu sian tondi”?  Alogo mangullus, ndang binoto sian dia borhat (dimulai) (bonana), jala ndang binoto lao tu dia ujungna. Molo sian hambirang ro, mangullus tu siamun. Molo sian jolo ro, mangullus tu pudi. Na pasti alogo namangullus marbona sian inganan natumimbo tekanan udarana (= sian ginjang) laho manopot inganan na tumoru tekanan udarana (= tu toru). Di namangullus i alogoi, boi hilalaon ni jolma nabinolusna pangullusna, manang begeon parngongosna.  Molo tubu sian ginjang, berarti na adong do kekuatan nagumogo ro sian ginjang mambahen adong na masa di pamoluson ni hagogoon na ro sian ginjang i. Masuk do deba sian alogo na mangullus i tu jolma na mangosop hosa sian alogo i, jala molo diboto mamberdayahon alogo i, tung godang do pangontakna tu diri ni na mamberdyahon alogo i didirina. Songon i do molo dimasuki tondi (ruakh=tondi=angin/alogo), molo masuk tondi i tu jolma i, jala diberdayahon tondi na masuk i, gabe natubu sian tondi do jolma na nimasukan ni tondi i. Di bangso Jahudi nunga dipraktekkon pamakkeon ni aek laho paiashon haramunon sian diri ni jolma. Misalna marhite na mamakke “aek pangurason”, nabinaen sian aek ni sirabun ni abu kotoran ni pelean hasesaan ni dosa. Molo dung diuras, ias ma sahalak pardosa sian dosana, sian akka na mambahen ibana ramun.[9] Ritus agama on do dipaimbaru di ritus pandidion nabinaen ni si Johannes Pandidi, halak Essene, jala dipaimbaru Jesus Kristus na marsuru siseanNa mandidi di bagasan goar ni Ama, Anak dohot Tondi Porbadia (Mat.28:20). Natardidi jala porsea dapotan haluaon alai na so porsea (nang pe tardidi) hona uhum do (Mrk.15:16). On do nanidokna natubu sian aek. Aek na mardongan hata ni Jahowa (TUHAN) Jesus Kristus mansahaphon hasesaan ni dosa, dohot hadirion jolma naimbaru songon natinompa naimbaru. Akka on do nanidok ni Jesus tu St Nikodemus: Na tutu situtu do na hudok on di ho: Huhatahon hami do na huboto hami jala huhatindangkon hami do naung huida hami, gabe ndang dijangkon hamu na huhatindangkon hami.... Gari angka na di tano on huhatahon tu hamu, ndang porsea hamu; tung porsea ma hamu, molo huhatahon tu hamu angka na di banua ginjang i? Maol porsea St Nikodemus dkk., ala tikki i nunga gabe “agama na ro sian portibi on” agama nasida, marhite akka syariat-syariat dohot fatwa-fatwa ni tokoh-tokoh agama Jahudi, na gabe mangago wibawa ni Jahowa di bagasan paragamaon nasida.

7.      Diuji TUHAN Jesus Kristus do patandahon diriNa tu St Nikodemus, marhite hatana na di ayat 13-17: Ndang adong na manaek tu banua ginjang, ia so naung tuat i sian banua ginjang; i ma Anak ni jolma i, na di banua ginjang i hian. Jadi songon naung pinatimbo ni si Musa ulok i di halongonan, songon i naeng patimboon Anak ni jolma i, asa dapotan hangoluan na salelenglelengna ganup na porsea di Ibana. Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana. Ai ndang na disuru Debata Anakna i tu portibi on, asa uhumanna; naeng paluaonna portibi on tahe, umbahen na disuru. Dipakke Jesus do gelar “Anak ni jolma” (najotjot dipakke panurirang Hesekiel) lao patandahon diriNa. Alai mangalobii sian Anak ni jolma  na didok di buku Hesekiel do Jesus namandok dirina “Anak ni jolma”, ai Jesus na margelar Anak ni jolma, dibanua ginjang hian do; natuat do Ibana tu tano on sian banua ginjang. Dipakke Ibana gelar Anak ni jolma, asa ummura nian tandaon ni St Nikodemus, alai  tong dope maol ditanda ibana. Dikombinasi Jesus muse tu na diboto St Nikodemus sian natarsurat di Padan Na Robi, i ma na hea do suman-suman ni ulok na manurbingi bangso Israel, dibahen si Musa di ulu ni tukkotna, jala dipatimbo tu ginjang asa boi berengon ni akka na mauas malua sian hamatean. Manang ise sian natinurbing ni ulok na sumanna diulu ni tukkot ni si Musa ,  sempat mamereng sumansuman ni ulok i, gabe malum sian bisa ni ulok  na manurbing i. Boasa ikkon i bahenon ni Jesus gabe tudosan taringot tu diriNa? Naeng sadarhonon ni Jesus  nian St Nikodemus, taringot tu situasi hajolmaon ni bangso Jahudi, i ma situasi na sedang diturbingi ulok na marbisa. Jala ulok i sasintongna,  i do hataridaan ni akka guru Jahudi na tubu sian tano on, naung gabe ulok jala pamasuk bisana laho pamatehon akka “anak ni jolma” (saluhut bangso Jahudi). Jesus na mambuat rumang/rupa jolma, Anak ni jolma, na tuat sian banua ginjang, na gabe sada sian akka rabbi (guru) di tonga ni bangso Jahudi, alai guru na nidonganan ni Jahowa, naeng patimboonna ma songon suman ni ulok na pinatimbo ni si Musa di halongonan. Jala manang ise na sempat mamereng tu Rabbi/Anak ni jolma na dipatimbo (diparsilanghon) on, pasti do mago sude sumbia ni sibolis sian dirina, sesa sude dosana, jala dapotna hangoluan na salelenglelengna dohot haluaon tinumpakkon ni Jahowa (TUHAN) Jesus Kristus.  Jadi molo didok: Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana, na paboahon na ro (tuat) do sian banuaginjang Anak ni jolma tu tonga ni bangso Jahudi, jala disarupahon rumang ni dirina tu akka guru (rabbi) na adong di tonga  ni Jahudi, alai ndang sarupa di pangalahona. Rabbi ni Jahudi nunga gabe ulok na manurbingi bangso ni Jahowa, jala ala ni i godang sian nasida na mate di partondionna; alai rabbi na nidonganan ni Jahowa (Jesus)  gabe rabbi na diparsilanghon, asa adong berengon ni akka nagiot malua jala dapotan hangoluan salelenglelengna.  I do na nidokna: pola do Anakna na sasada i dilehon. Holong ni Jahowa tu ganup na porsea: (1) Diloas dipasilanghon Anak Sasada ni Jahowa, asa adong boi berengon ni akka pardosa (naung disorop bisa ni sibolis), asa tanggal (manang mate) bisa ni dosa i sian diri ni jolma na mamereng na diparsilanghon i. (2) Ditubuhon do sian ginjang akka naporsea i, ditubuhon sian aek jala ditubuhon sian tondi. (3) Di parade hangoluan salelenglelengna dohot haluaon di akka na mamereng tu Silang i. (4) Sude naung mamereng Anak ni Debata na diparsilanghon i, tung so uhumonNa do, baliksa tahe tung takkas do tumpakkononNa tu ibana haluaon.

8.      Balga situtu holong ni Jahowa (TUHAN) Jesus Kristus tu portibi on, tarlumobi tu namanjakkon Ibana, akka naung ditubuhon sian ginjang, sian aek dohot sian Tondi. Tama situtu ganup pangihut ni Jesus Kristus, mambalos holong ni Jahowa (TUHAN) Jesus Kristus i  marhite holong na satulustulusna jala na so marpangansi. Patuduhononta ma holong i marhite akka ulaonta mangula di negara on (songon rakyat, pejabat negara, pangihut ni agama, pedagang, swastawan) na torus manjungjung tinggi ideologi pancasila, politik pancasila, demokrasi pancasila, ekonomi pancasila, sosialisme pancasila, budaya pancasila, agama na boi mangisi pancasila, mamakke ilmu pengetahuan  dohot teknologi laho mambangun negara pancasila, manjaga dohot mangaramoti lingkungan hidup songon pinangido ni pancasila, mambangun parsaoran ni hajolmaon na bhinneka tunggal ika, mambangun negara dibagasan supremasi hukum, jala manjungjungtinggi hak-hak azasi manusia. Godang nari dalan nadengggan na boi dalananta asa haru takkas patuduhononta holong ni rohanta tu Jahowa (TUHAN) Jesus Kristus. Dipargogoi TUHANta na hita sude. Amen.

Pematangsiantar tgl 15 Pebruari 2017. Pdt. Langsung Maruli Sitorus (Pdt. LaMBaS).