JAMITA SIAN EVANGELIUM TU MINGGU OKULI TGL. 19 MARET 2017 JOHANNES 4:5-26

1.      Hamuna dongan sahaporseaon, nahinaholongan di bagasan holong agape ni TUHAN Jesus Kristus. Arop do roha, marhite na tumangihon barita nauli hita di minggu okuli  taon 2017 on, lam tandap jala lam takkas tandaonta TUHAN Jesus Kristus, jala lam marlas ni roha hita mangihuthon Ibana. Di nadipaboa ro Jesus tu sada huta na di Samaria na margoar Sikar, jonok ni tano warisan ni si Josep sian amana si Jakkop, botoonta do sian i, na mardalani do TUHAN Jesus mangalului akka jolma na rikkot dapotan haluaon dohot hangoluan na sian Ibana. Diboto Jesus do namaotaot do sibolis i songon babiat panoro, laho mamolgak jolma sisoroonna, songon na nihatindanghon ni Apostel Petrus: “Torang ma rohamuna, dungo ma hamu; na maotaot do alomuna, sibolis i, songon babiat na marauang, mangalului sibondutonna” (1Ptr. 5:8). Dungo do TUHAN Jesus. Diliati do saluhut portibi on, asa unang disoro sibolis i akka jolma i, manang asa tanggal jolma i sian baba ni sibolis naung mamolgak jolma i. Ro Jesus tu Samaria (Harajaon Israel Utara najolo), na targoar tanah air ni Jesus dope i, ai masuk tu Samaria do Nazareth. Rikkot situtu i, ai naeng selesaihonon-Na parsalisian ni Samaria dohot Jahudi di parsaoran, di paragamaon, di politik dohot di tradisi harajaon. Ro Jesus tu Samaria, asa boi mulak masihaholongan muse, akka naung marsalisi hian sian mulai ompuna najolo sahat tu akka pomparanna. Ro Jesus tu Samaria, asa tarjadi pemulihan hubungan, pemulihan ni hadameon  ni Samaria & Jahudi dohot penyembuhan ni akka luka batin, luka persatuan dan kesatuan bangsa.

2.      Lao mangeahi sakkap i, (1) dipillit Jesus do sada inganan pardomuan ni Samaria dohot Jahudi di sejarah dohot di ompu nasida si Jakkob, i ma sumur ni si Jakkob di Sikar. Diboto Jesus do, na pasti do ro halak Samaria mambuat mual sian sumur i asa adong inumon nasida. Parjumpaan di sumur i, dipakke Jesus pasaut sakkap ni rohaNa. (2) Di parjumpaan i, dihatai Jesus taringot tu naumporlu di halak Samaria dohot di halak Jahudi, asa boi nasida rap mangolu di harajaon ni Jahowa (TUHAN) Jesus Kristus: i ma taringot tu porluna mual di ngolu pardagingon, dohot porluna mual hangoluan di partondion ni Samaria dohot Jahudi. Nasida ikkon boi rap mandai mual na dibuat sian sumur ni si Jakkob, dohot rap mandai mual hangoluan na binoan ni Jesus Kristus.

3.      Jesus, Anak ni Jahowa Ama i, loja sian pardalanan. Tutu do i, tung dihalojahon Jesus do ro tu portibi on, asa haru dapotan haluaon dohot hangoluan jolma manisia. Dipahundul Jesus di lambung ni sumur ni si Jakkob i, tar di hos ni ari. Barita i paboahon na tung diparmohop ni ari, na mambahen mauas situtu do tikki  Jesus di lambung ni sumur i. Ndang pintor ditimba Jesus mual sian sumur i inumonNa lao paulak halojaonNa, nang pe naung mauas situtu Ibana. Dipaima Jesus do sampe ro halak Samaria tu sumur i. Toho do i, dipaima Jesus do nang jolma na di tano on, asa ro tu sumur mata mual hangoluan i. Dipaima Jesus do ro jolma tu sumur mata mual aek namangolu (mual hangoluan) i, di tikki pamilngas ni ngolu na di portibi on. Ro do tutu sahalak ina mamboan panguhatanna tu sumur ni si Jakkob i, jala pajumpang dohot Jesus, na sahalakNa di lambung ni sumur i. Molo diparadaton Jahudi dohot Samaria, ikkon mandao do nian salah satu sian nasida na pajumpang i, ai pantang do rap sada baoa dohot sada borua di lambung ni sada sumur. Alai ndang songon i na masa. Tikki holan halak i nadua di lambung sumur i, takkas do dijamin nasida diri nasida na so mangalanggar tu paradaton ni manang bangso dia pe. Ai diboto nasida do, na Jahowa mamereng nasida di lambung sumur i. Biar mida Jahowa do mangkuasai hadirion  ni nasida na pajumpang i. Tarida do i nang sian panghataion nasida, taringot tu mual na sian sumur i dohot taringot tu aek na mangolu, na boi leonon ni TUHAN Jesus Kristus. TUHAN Jesus mangalehon contoh, boha molo pajumpang baoa dohot borua di inganan na langa, paduadua: Ikkon biar mida Jahowa mangkuasai na pajumpang i, jala ikkon kepentingan ni Jahowa (TUHAN) Jesus Kristus sihataan nasida.

4.      Lehon Ahu minum!, ninna Jesus tu boru Samaria i. On ma deba sian peristiwa, mangido minum Jesus sian jolma na asing. Dison ndang saut dileon boru Samaria i Jesus minum mual sian tanganna. Na parpudi Jesus mangido minum, tikki gantung Ibana di hau pinarsilang i, manjouhon: Mauas Aku! Dibuat sordadu do limut jala disornophon tu tuak na asom, dung i disurdukkon tu simakkudap ni Jesus. Na dua peristiwa on patuduhon, na so hea tikkos jolma mangalusi Jesus na mangharikkothon minum. Memang ikkon Jesus do mangalehon minum jolma na mauas. Tu boru Samaria on disodorhon Jesus asa jaloonna aek namangolu sian Jesus. Jala di silang i (nang diulaon nabadia), mudar ni Jesus do durus asa adong inumon ni akka jolma pardosa, bahen hasesaan ni dosa ni hajolmaon. Godang alasan ni boru Samaria i, umbahen ndang olo mangaleon mual inumon ni Jesus.  Alasan naumbalga i ma apartheid ni Samaria dohot Jahudi. Hata ni boru Samaria i patuduhon na mansai posi do apartheid manang pamulikon  antara ni Samaria dohot Jahudi. “Boasa mangido tapian Ho halak Jahudi, sian ahu boru Samaria? Ai ndang marparsaoran halak Jahudi dohot halak Samaria.”  Memang molo adong dingding pangolat na so halakkaan di pargaulan ni jolma, tung mansai maol do masa akka nadenggan di hajolmaon i. Tabereng ma tikki dibahen pamarenta ni Afrika Selatan politik apartheid, na manirang halak na birong dohot halak nabontar, maol do masa keadilan sosial tu sude panduduk ni negara Afrika Selatan. Di zaman reformasi (500 taon na salpu), tikki dipamasa politik euis regio, cuius religio (ise ampuna negeri, ido ampuna agama di negeri i) di akka harajaon di Eropa, tarjadi ma pembersihan ni sada daerah sian akka panganut ni protestan manang sian akka panganut ni katolik. Godang dirasip jolma na marasing aliran agamana sian raja na mamarenta. Ngeri! Nuaeng on sai lam digalakkon sada agama do politik daerah haram dohot daerah halal. Maksudna, asa pulik-pulik be panduduk na marasing agamana maringanan dohot mangan. Nunga ditahi nuaeng lao bahenonna di tano Batak songon i. Asa haru tarsingkir akka Batak na so parsubang sian tanona sandiri. Hape na mardalan denggan nuaeng, boi do rap mangan akka parsubang dohot na so parsubang; jala sipanganon i sandiri na ma namanontuhon di dia boi mangan jala aha na boi allangon. Ndang porlu adong zona haram dohot zona halal. Apartheid atas nama agama nuaeng tung mangancam ngolu ni jolma di Indonesia dohot di portibi on. Haheranon do i, boasa pola ikkon adong pamulikmulikon. Hape jolma i sandiri do na mandok sipanganon haram manang halal, ndang Jahowa be mandok i. “Unang ramun (= haram) dok naung niiasan (= na halal) ni Debata!” (Ul.Ap. 10:15b; 11:9b: "Apa yang dinyatakan halal oleh Allah, tidak boleh engkau nyatakan haram."). Di poda ni Silom pe didok do: “Ndang adong sian natinompa ni Allah na haram. Na diharamhon jolma do na adong.” Jadi boasa ikkon adong haramhononhon ate? Ndang sundat tu surgo, molo diallang Kristen i, manang diallang manang ise pe, akka sipanganon na diorai di Bibel i allangon (ala didok ramun/haram), ai nunga diumpat Jahowa hatontuanNa soal haram/halal. Di poda ni Silom tarbarita do: Ia Isa al-Masih, i ma panurirang nadisuru Allah lao manghalalhon akka na diharamhon najolo di Padan Narobi. Martua ma akka pangihut ni Jesus, ai disuru Jesus ro tu portibi on, asa manguba hatontuan ni Jahowa sinajolo, na mandok adong sipanganon na haram dohot na halal. Jala sah do parubahan i di aturan ni agama dohot haporseaon. Maksudna, asa unang dilojai soal haram/halal jolma i di ngoluna dohot di pargaulanna. Sada na paheran roha do di zaman nuaeng on: Boasa gumogo nuaeng agama mangguga ngolu ni jolma dohot mambahen parbolatbolatan, sian akka ruhut ni hajolmaon na asing, ate? Parsekteon ni agama pe umposi sian parsekteon ni partai, mambahen jolma guga sampe masirasipan. Nunga porlu akka parbarita/pangajar ni agama na adong nuaeng on (di sude agama) bertobat, jala mulak tu hatontuan ni Jahowa (TUHAN) Jesus Kristus. Di napajumpang Jesus dohot boru Samaria di lambung ni sumur i, dohot panghataion nasida, nunga patuduhon contoh ni pertobatan siihuthonon ni akka tokoh agama.

6.      Umbalga do Jesus sian si Jakkob, ompu ni boru Samaria dohot halak Jahudi i. Ai sumur na di Sikar do boi diwarishon si Jakkob tu si Josep, anakna, jala dipakke akka pomparanna. Jesus mangwarishon mata mual ni aek na mangolu tu ganup na porsea tu Ibana, i ma Barita Nauli, nang panghophoponNa tu hajolmaon di dolok Golgatha, dohot haluaon nang hangoluan salelenglelengna.  Si Jakkob ndang mamboto songon dia akka pomparanna i, manang na mardame manang naung marbada, jala ndang diboto i songon dia rumatangga ni pomparanna songon boru Samaria on. Alai ianggo Jesus, diboto do, naung so marparsaoran Jahudi dohot Samaria, hinorhon ni akka politik, harajaon, parsekteon agama dohot sosial ekonomi.  Diboto Jesus do, songon dia rumatangga ni boru Samaria na manghatai dohot Ibana. Manang naung jolo diselidiki i, manang na so jolo diselidiki. Na penting, cara ni Jesus paboahon taringot tu parripeon ni boru Samaria i, manghorhon pangakuan ni boru Samaria i, na sahalak panurirang do Jesus na pajumpang jala manghatai dohot  ibana. Akka na nibahen ni Jesus (Isa al-Masih) sasintongna mambahen Silom mangakui, ia Jesus i sahalak panurirang (nabi)  do, jala Ibana do panurirang naumbalga sian saluhut panurirang na hea di tongos Jahowa (TUHAN) tu tonga ni hajolmaon. Jala ndang holan panurirang diakui Jesus i, adong do peningkatanna sian i otik.  

8.      Agama dia pe ndang adong na boi menyangkal hasintongan ni poda ni Jesus na mandok: Tondi do anggo Debata; asa angka na martangiang tu Ibana, patut martangiang di bagasan Tondi dohot hasintongan. Holan Bibel i do na paboahon, na hea Jahowa botul-botul gabe jolma. Ianggo na agama na asing, paling paboahon hea debatana tarida hira jolma alai pintor mangalinu do muse. Akka filem Cina i paboahon na songon i debata nasida. Begu do di halak Batak na songon i: tarida hira jolma, dung i mangalinu muse. Ianggo Jesus (diri ni Jahowa i) botulbotul do jolma, saotikna 33 taon lelengna. Tikki i, manghatai paadopadop bohi do jolma i mangido sian Jahowa (TUHAN) Jesus Kristus.  Dung manaek TUHAN Jesus Kristus, mulak do jolma i ikkon martangiang di bagasan Tondi molo martangiang tu Jahowa (TUHAN) Jesus Kristus. Nunga dapot tikkina jala nunga ro i nang nuaeng,  gabe di bagasan Tondi dohot hasintongan martangiang angka partangiang na tutu tu Ama i; ai angka partangiang na songon i dipangido Ama i. Molo masihol pangihut ni Jesus dioloi Jahowa (TUHAN) Jesus Kristus tangiangna, diulahon ma nanidok ni Jesus on tikki martangiang. Asing ni martangiang di bagasan goar ni Jesus Kristus, ikkon martangiang pangihut ni Jesus di bagasan Tondi dohot hasintongan. Boha do parjadi ni i? Nunga pas be molo sai didok namartangiang: “Oloi ma tangiangnami na hami pasahat tu Ho di bagasan goar ni AnakMu TUHAN Jesus Kristus, Tuhannami. Amen!”, ninna. Alai di tikki martangiang i, ikkon takkas do masa/tarjadi: pikkiran dohot pamangan manghatahon tangiang i, jala tondi ni na martangiang i pasahathon tangiang i tu Tondi ni Jahowa. Jadi ikkon manghatai do tondi ni na martangiang i tu Tondi ni Jahowa (TUHAN) Jesus Kristus. Molo holan daging ni na martangiang i do manghatai, gersang huhut hasang do tangiang na songon i, jala ndang sahat nanggo tu langit-langit ni jabu tangiang i, apalagi tu langit inganan ni Jahowa manang tu sipareon ni Jahowa. Dia do hasintongan sihatahonon di bagasan tangiang?  Molo akka naboi ulahonon dohot hasilhonon ni namartangiang, unang pola be dipangido na songon i tu Jahowa (TUHAN) Jesus Kristus. Sihamauliatehonon na ma i di tangiang i. Molo akka na so tolap ni namartangiang i manjakkon, molo dilehon Jahowa, ndang sipangidoon na songon i di tangiang, ai gabe hamamago do i annon molo dipangido jala dileon Jahowa. Misalna: dipangido: Bahen ma TUHAN anak dohot parumaenhon, maranak sampulu pitu, marboru sampulu onom. Boi do i leonon ni Jahowa, alai gabe hamamago do i, molo so tolap ni anak/parumaenna i mananggungjawabi akka natinubuhonna i. Na sirsir i ma dipangido: “Leon anak dohot boru di anak dohot parummaenhon,” ninna misalna. Hasintongan do i molo dipangido di tangiang akka na so tolap ni namartangiang i patupahonsa, alai ikkon Jahowa (TUHAN) Jesus Kristus do na boi patupahon na pinangido i. Misalna: mangalehon anakkon, baoa dohot borua, songon nanidok na di ginjang i; mangalehon hatuaon; mangalehon haluaon, mangalehon gogo ni daging dohot tondi; mangalehon hasesaan ni dosa; mangalehon asiniroha dohot basabasa; dohot do nang mangalehon udan manang pasohon manang pabiding udan. Lan dope na asing nari. Molo asa jadi nasinakkapan ni roha, ndang sintong molo pinangido: ho sandiri ma TUHAN pasaut sakkap nami i. Alai sintong ma tangiang molo pinangido: pargogoi ma hami TUHAN pasauthon nasinakkapan ni rohanami on, asa tung haru denggan hami mangihuthon dohot mangoloi hataM. Jadi sude pangihut ni TUHAN Jesus Kristus, mulai tikkion, ikkon ma mangkoreksi partangiangonna, atik na di bagasan Tondi dohot hasintongan, nang pe naung dipasahat tangiangna i di bagasan goar ni TUHAN Jesus Kristus. Asa saut-saut sude tangiang ni ganup pangihut ni Jesus. Akkup ni i taparrohahon aha dipodahon Jesus, natarsurat di Mateus 6:5-8[1] dohot di Mat.  18:19.[2]

9.      Nunga ro Mesias na margoar Kristus, i ma Jesus na sian Nazaret, tunas ni si Daud, na magodang di huta TUNAS (Nezer). Diboto boru Samaria i do, na Kristus (Mesias) i do na mambaritahon akka partangiangon na songon i, asa unang sai adong be pargulutan taringot tu inganan martangiang na toho. Martua do boru Samaria on, ala boi langsung pajumpang dohot na nihirim ni rohana di haporseaonna. Gabe parbarita nauli do muse boru Samaria on di pudian ni parjumpaan na on dohot Jesus Kristus. Takkas maningkat panandaonna taringot tu Jesus: parjolo Jesus ditanda halak Jahudi, na so boi saor tu halak Samaria. Paduahon Jesus ditanda  sada panurirang, na paboahon  hata hasintongan sian Jahowa Elohim. Ai boi diboto Ibana rahasia na buni taringot tu ngolu ni jolma. Patoluhon Jesus ditanda Mesias (Kristus) na ro patupa haimbaruon ni paragamaon, asa haru boi mardame akka paragama na marbada, na so boi saor, asa gabe mardame jala boi marsaor, rap mangolu di bagasan dame dohot na masihaholongan, akka paragama na marasing sekte dohot podana. Maningkat do muse panandaon ni boru Samaria on taringot tu Jesus, jala marhasil ibana mambahen dongan saluatna mananda mansai topet  ise do Jesus i. Tarida do i sian panindangion nasida: “Dung i toropan do nasida na gabe porsea ala ni hata ni Jesus. Gabe didok nasida ma tu boruboru i: Ndang be ala ni pandokmi, umbahen na porsea hami; ai nunga hubege jala hutanda hami sandiri, Ibana do tutu Sipalua portibi on” (Joh.4:41-42). Tingkat partimbo panandaon nasida, i ma: Jesus Kristus do Sipalua portibi on. On ma halobian ni boru Samaria nang pangisi ni luat ni boru Samaria i sian sude Silom na adong di portibi on. Ianggo boru Samaria dohot pangisi ni luat ni boru Samaria i tolapna do sahat tu panandaon: SIPALUA PORTIBI ON (JURUSELAMAT DUNIA) do Jesus Kristus i. Alai Silom i ndang tolapna sahat tusi. Boasa ndang tolapna? Ala adong penyangkalan ni nasida, ndang ala na so adong panindangion na songon i di buku nabadia nasida. Hape molo tolap ni Silom i do mangakui Jesus Kristus (Isa al-Masih) SIPALUA PORTIBI ON, tung lam marsangap do panurirang nasida, nabi Muhammad s.a.w. Alai ala holan Isa al-Masih do diakui nasida Jesus Kristus, tontu moru ma jambar nasida di surgo hasonangan i. Olat ni alam barzah ma jo nasida dung salpu sian portibi on, ndang dope malua tu surgo hasonangan i. Alai tong ma tatangianghon, asa olo nasida botul-botul manghormati Jesus Kristus songon Mesias (al-Masih). Alana pasti do ikkon mangalakka sian pangakuan al-Masih (Nanimiahan) tu pangakuan SIPALUA PORTIBI on. Ai molo holan Mesias do diakui jolma Jesus Kristus i, tanggung do i di paragamaon. Al-Masih (Mesias) lapatanna “Nanimiahan” (Yang diurapi). Jadi sukkunon dope muse: Dimiahi tu dia? Tu raja do? Gabe malim do? Alus na mansai tepat: Dimiahi tu jabatan SIPALUA PORTIBI ON. Ai didok di buku nabadia i: “Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana” (Joh. 3:16). Martua do manang ise na lam meningkat panandaonna taringot tu Jesus Kristus i. Ai dapotan haluaon ibana sian Jahowa (TUHAN) Jesus Kristus. Nang huria Kristen pe, lam maningkat ma panandaonna tu Jesus Kristus i. Ibana do silehon aek hangoluan tu ganup naporsea tu Ibana. Dapot ni hurianta ma i. Amen.