JAMITA SIAN EVANGELIUM TU MINGGU REMINISCERE, TGL. 12 MARET 2017
PSALMEN 121:1-8
121:1 Ende hananangkok. Sai mangaranapi do matangku
dompak angka dolok: Sian dia do ulaning ro pangurupion tu ahu?
121:2 Sian Jahowa Sitompa langit dohot tano on sambing
ro pangurupion ianggo tu ahu.
121:3 Ndang tagamon loasonna tarsulandit patmu, ndang
tagamon nok mata ni Sijaga ho.
121:4 Ida ma, ndang olo nok mata, jala ndang olo modom
ianggo Sijaga Israel.
121:5 Jahowa do Sijaga ho, Jahowa do parlinggomanmu di
lambung ni tanganmu siamun.
121:6 Ndang tagamon doiton ni mata ni ari ho arian,
manang bulan pe bornginna i.
121:7 Sai jagaon ni Jahowa do ho sian nasa parmaraan,
sai jagaonna do tondim.
121:8 Sai jagaon ni Jahowa do ho laho ruar dohot laho
bongot, olat ni on ro di salelenglelengna.
TUNG TABO SITUTU DO NGOLU NI NA MARTUHAN TU JAHOWA (TUHAN) JESUS
KRISTUS
1.
Hamuna
nahinaholongan di bagasan holong agape na sian TUHAN Jesus Kristus! Ganup jolma
do mamorluhon pangurupion (pertolongan).
“Ndang tartuhuk ni sada jolma pandingdingan,” ninna halak Batak Toba. Ikkon
ramerame do manuhuk i, baru pe asa boi dipanaek tu ingananna di bagian ni ruma
Batak. Di akka perusahaan pe dijouhon do asa uang sok jagoan, main sendiri. “Masiurupan pasidung ulaon,”
ninna. Sian bakko ni jolma i “makhluk sosial”, pasti do ikkon masiurupan asa
boi denggan ngolu ni jolma i. Di panompaon ni jolma pe ditariashon do, ia borua
nadijadihon Jahowa sian rusuk ni baoa i, ditompa asa adong do bahen pangurupi
di si Adam. “Dung i ninna Debata Jahowa ma: ‘Ndang jadi punjung jolma i;
hubahen ma di ibana sada pangurupina bahen donganna’ (1 Musa 2:18). Napatuduhon
bakko hajolmaon do parpsalmen 121 on molo didok ibana: Sai mangaranapi do matangku dompak angka dolok: Sian dia do ulaning ro
pangurupion tu ahu? Tontu godang do naboi mangalusi sukkun-sukkun ni
parpsalmen on. Adong do naboi mandok: “Ba sian dia? Sian donganmu ma!” Na asing
boi mangalusi: “Sian ahu! Huurupi pe ho!” Nadebanari boi juo do mandok: “Tenang
ma ho! Ro sandiri do pangurupion tu ho!” Manang didok: “Lot mate ho! Ndang
rikkot urupan ho!” Marragam alus na boi
dohonon ni jolma. Apostel Paulus mandok: “Masiurupan ma hamu mamorsan akka na
dokdok i!” (Gal.6:2a).
2.
Molo dibangun
sada bangso paradatonna (budayana),
pasti do adong disi hagiot ni roha lao masiurupan. Misalna adat Batak Toba na
“mardalihan na tolu paopat sihalsihal”. Adat Batak Toba on dipatureture, ala
adong do disi poda na mansai denggan tu hajolmaon ni Batak Toba, i ma
masiurupan, masipasangapan, masihaholongan. Di Huria Kristen di tano Batak nunga mulai
dibangun adat “lima pinardalihan, ai balga hudon pangalompaan” (: Manat
mardongan tubu, elek marboru, somba marhulahula, denggan marsihalsihal, biár
mida Jahowa (TUHAN) Jesus Kristus). Ai “hudon Harajaon Banuaginjang” dipeakkon
di atas ni na lima pinardalihan i. Di adat ni Huria “lima pinardalihan” tung
takkas do dihangoluhon pangalaho/pambahenan: masiurupan, masihaholongan, dohot masipasangapsangapan.
Pos do rohanta, paradaton huria na songon on, na ampit tu poda parhuriaon,
pasti do mambahen lolos bangso Batak mamolus godang ni tantangan na rongom tarlumobi nuaeng on, siala hagiot ni pamarenta
mambahen daerah Batak gabe destinasi
pariwisata (hasahatan ni akka pardalan-dalan na ro sian akka luat nadao),
dohot mampromosihon Tano Toba / Danau Toba gabe geopark dunia (porlak sipaberengberengon di portibi on). Sude halak Batak Toba nuaeng manghoihon: Sai mangaranapi do matangku dompak angka
dolok: Sian dia do ulaning ro pangurupion tu ahu? Mardomu tusi, adong ma
deba na lao manehenehe mangalului modal tu akka investor (parmodal).
Mudah-mudahan ma akka parmodal sian halak Batak dipatunggung jumolo tu ulaon i.
Pamarenta mangalehon konsesi-konsesi tu akka parmodal, alai deba sian konsesi i
gabe mangarugii rakyat akka napogos. Tung arop situtu do roha ni akka panduduk
di tano Batak, sude haputusan, kebijakan,
dohot program na binaen ni Pamarenta Republik
Indonesia di tano Toba, ikkon mangurupi parngoluon ni sude panduduk ni Toba. Boi
do nuaeng pamarenta Republik Indonesia on gabe tangan ni Jahowa (TUHAN) Jesus
Kristus mangurupi panduduk ni Toba i?
3.
Parpsalmen on
tung mansai tegas do manariashon, sian dia do ro pangurupion tu ibana. Sian Jahowa Sitompa langit dohot tano on
sambing ro pangurupion ianggo tu ahu, ninna ibana. Pandohan on patuduhon, na tung mansai bagas do panandaon ni
parpsalmen on tu Jahowa nahinaporseaanna. Naboi mangurupi ibana i goarNa didok JAHOWA. Marhite goar on naeng
tariashononna do, ia na nihaporseaanna i (Jahowa) tongtong do adong di lambungna,
mandongani ibana. “Ai ida ma, sai na dongananku do hamu ganup ari, rasirasa ro
ajal ni hasiangan on!” (Mat.28:20b),
ninna TUHAN Jesus Kristus. Ai Jahowa
= maha hadir. Alai ndang holan i. Jahowa = Ibana mambahen adong.
Jadi Jahowa dihaporseai naboi mambahen adong na so adong hian. Tung takkas do dihaporseai
ibana, Jahowa do Sitompa langit dohot tano. Jadi soal mangurupi parpsalmen on
(naporsea), sasintongna ndang pola ulaon na maol i di Jahowa. Haru langit dohot
tano boi dibahen gabe adong, lam pangurupion tu akka na porsea ma? Tung pos
situtu do roha ni parpsalmen on, na
tolap ni Jahowa do mangurupi ibana di nasa narikkot di ngoluna, jala
pangurupion i leononna langsung tu ibana. Alana tongtong do Jahowa mandongani
ibana. Di na mangaranapi mata ni parpsalmen on dompak akka dolok, dirimpu ibana
hian do adong ro pangurupion tu ibana sian dolok i. Ai adong do disi na dietong
boi mangurupi. Di tano Israel di tikki i, di bona manang di punsu ni dolok sai
adong do parsombaonan (bukit-bukit
pengorbanan), jala jolma na hurang pos rohana tu Jahowa, sai lao do manomba
akka sombaon na di akka dolok i, lao mangido pangurupion. Alai ianggo parpsalmen
on ndang olo songon akka sisomba sombaon
(manang sipelebegu) na adong di negerina i. Nakkok do ibana tu Jerusalem, jala
merende hananakkok, mangalului pangurupion sian Jahowa. Nang ruas ni Huria
Kristen sinuaeng on pe, porlu do tiruonna parpsalmen on, jala dohot marende
hananakkok, nakkok tu bagas joro ni Jahowa, marpos ni roha, na Jahowa sambing
do na boi mangurupi ngolu ni naporsea tu Jahowa (TUHAN) Jesus Kristus.
4.
Hamuna dongan
sahaporseaon. Di ayat 1 dohot 2, marhata ahu
do pandohan ni parpsalmen on. Alai mulai sian ayat 3 sahat tu ayat 8, sai
marhata ho do akka pandohan i. Ndang
parpsalmen i be mandok tu dirina, akka pangurupion dia na boi pasahaton ni
Jahowa tu ibana, alai donganna na rap nakkok jala rap marende hananakkok i do
mandok tu parpsalmen on, akka pangurupion ni Jahowa i. Jadi marende na marsitaripar parpsalmen on dohot akka donganna lao
paboahon uas ni roha taringot tu porluna pangurupion tu jolma, dohot paboahon
akka pangurupion dia leonon ni Jahowa (TUHAN) Jesus Kristus tu nasida. Pangurupion
parjolo didok: Ndang tagamon loasonna
tarsulandit patmu,... (ay. 3a). Tudos
tu na mardalan do jolma di portibi on mangalakkahon ngoluna. Dalan ni ngolu na
didalani i ndang mulus, alai adong do
i na marbuntulbuntul, na landit margambo; molo mulus pe dalan i songon dalan tol, tong do ikkon manat (hatihati) jolma i asa unang tarsulandit ibana di dalan tol i. Dipaboa do di
Bibel i aha dibahen Jahowa jala aha na porlu di jolma i, asa unang tarsulandit
ibana mardalan di ngoluna. "Hatami
do sulusulu ni pathu jala hatiuron di dalanku" (Psalm 119:105). Molo
dileon Jahowa HATA-Na tu jolma, marlapatan do i, mangurupi jolma i asa unang
tinggang di pardalanan ni ngoluna. Diparade Jahowa (TUHAN) Jesus Kristus do
dalan sidalananNa rap dohot akka naporsea, jala asa haru denggan pangihut ni
Ibana mardalan disi, diparentahon Ibana: “Ingkon gohan do nasa rura, jala
parejeton nasa dolok dohot buntulbuntul, jala gabe na hornop do na marnangkok
tuat, jala gabe rura tanggurung ni dolok” (Jes.40:4). Mardomu tusi, porlu adong
di Kristen i haporseaon saotikna nasa batu ni siarum manang batu ni sabi, asa tung
tarbahensa mangulahon parenta ni TUHAN on, ai didok Jesus: “Molo adong di hamu
haporseaon nasa batu ni siarum, tardok hamu do tu hau galagala an: Maborgat ma
ho suanhon ma ho tu laut!, gabe oloanna do hamu!” (Luk.17:6). “Ala ni otik ni
haporseaonmuna do! Ai situtu do na hudok on tu hamu: Nanggo nasa batu ni sabi
haporseaon-muna, dohononmuna ma tu dolok on: Munsat ma ho sian on tusan!, saut
do i munsat; gabe ndang adong na so tarpatupa hamu” (Mat.17:20). Dalan na landit, tarsulandit, boi do i paboahon na masa di parkarejoan dohot
pangalaho ni jolma. Molo mansai maol karejo ni jolma, jala godang akka panggoda
na olo mambahen madabu jolma i tu dosa, jotjot didok karejo i dalan nalandit.
Molo gabe tinggang jolma i di dalan ni ngoluna na mansai godang godaan i, didok
ma ibana tarsulandit, ala gabe madabu tu dosa. Di akka na songon i, tolap ni
Jahowa do mangurupi akka haposan ni
rohaNa.
5.
Pangurupion na
mangihut, na naeng leonon ni Jahowa (TUHAN) Jesus Kristus tu haposanNa, dipaboa songon on: ndang tagamon nok mata ni Sijaga ho. Ida ma, ndang olo nok mata, jala ndang olo
modom ianggo Sijaga Israel (ay.3b-4). Hea do sahali tarpodom renges TUHAN
Jesus Kristus di bagasan parau di tao Galilea tikki marparau Ibana rap dohot
siseanna tu saborang. Tikki na renges i TUHAN Jesus Kristus, pintor masa do
habahaba lao naeng mangharomhon parau nasida. Didungoi akka siseanNa TUHAN
Jesus, ujungna dimuruki Jesus habahaba i jala diparenta asa so manang sip.
Pintor menak ma alogo i, jala tenang tao i dibolus parau nasida i. Longang
situtu jolma na saparau i, laos didok nasida: “Halak dia do On? Guru dokna do
hape alogo nang tao i!” (Mat. 8:27). Lobi sian i masa akka pengalaman ni jolma, molo ndang nok mata
ni Jahowa (TUHAN) Jesus Kristus lao mangaramoti akka pangihutNa. Satpam ronda jala marjaga do seleleng arian
dohot borngin, mangaramoti na ditugashon jagaonna. Lobi sian Satpam do dibahen TUHAN
i diriNa laho mangaramoti akka na di Ibana i, asal ma olo ramotanNa. Sian ulaon
pangaramotion i, ndang hea Jahowa
“maradian” sian najolo sahat tu nuaeng. Tung na burju situtu do TUHAN i
molo didok ndang olo modom ianggo Sijaga Israel. Molo didok Israel, patuduhon bangso na pinillit ni
Jahowa do i. Jadi ndang holan marsasahalak na dijaga Jahowa alai tung hibul do
sabangso. Songon i do nang akka HURIA. Sude do i diramoti, ndang holan
marsada-sada huria. Ala ni i ikkon olo do huria i patuduhon hasadaonna songon
akka na rap diramoti Jahowa (TUHAN) Jesus Kristus. Indonesia on pe dibahen
Jahowa mar-Pancasila, mar-Bhinneka Tunggal Ika, mar-UUD 1945, dohot mar-kedaulatan rakyat, dalanNa laho
mangaramoti bangsoNa do di Indonesia on dohot di portibi on. Ikkon parjuanghonon ni Huria Kristen do asa akka alat ni
Jahowa mangaramoti HURIA-Na i torus denggan.
6.
Napatoluhon sibahenon
ni Jahowa mangurupi akka naporsea (songon parpsalmen on), i ma: Olo Ibana gabe
parlinggoman ni akka na disosak portibi on.
Jahowa do Sijaga ho, Jahowa do
parlinggomanmu di lambung ni tanganmu siamun. Jahowa do Penjaga ni akka naporsea tu Ibana. Lao
manjaga bangso ni Jahowa (TUHAN) Jesus Kristus, ndang akka namangancam ngolu ni
bangsoNa i disesa manang gabe so adong dibahen. Ndang diajari bangso/HuriaNa
mangido asa unang adong be parukkilon dohot pangunjunan masa tu bangso/HuriaNa
i. Alai diajari nasida mangido: “Unang hami togihon tu pangunjunan! Palua ma
hami sian pangago!” Bangso/Huria ni TUHAN Jesus ikkon barani do mangadopi sude
nasa pangunjunan jala pasidungkon denggan nasa parukkilon. Gogo do dilehon
Jahowa tu bangso/HuriaNa, lao manjaga bangso/HuriaNa i. I do umbahen sai
disosoi, asa sai dipangido bangso/HuriaNa sian Jahowa gogo naimbaru. Molo masa
panosakon na mansai posi, diparade Jahowa do diriNa gabe parlinggoman di
lambung tangan siamun ni bangso/huriaNa. Boha dibahen patupahon i? Dilehon Jahowa do
patik (tona)/parenta na mangaturhon manghargai harkat/martabat ni jolma.
Misalna, dilehon Jahowa do Hak-hak Azasi Manusia dohot Kewajiban-kewajiban
Azasi Manusia, gabe dalan ni Jahowa mangalinggomi bangso/HuriaNa. Diaturhon do
“kesetaraan gender”, diparentahon asa
badia perkawinan di tongatonga ni
bangso/HuriaNa jala ndang diloas Jahowa masa perkawinan sejenis di hajolmaon. Akka natarsurat di buku Kitab
Undang-Undang Hukum Pidana, na diuhal sian Patik ni Jahowa, tarmasuk do i dalan
ni Jahowa mambahen diriNa gabe parlinggoman ni bangso/HuriaNa, asa masa
haadilon. Haadilon do dituntut Jahowa (TUHAN) Jesus Kristus, asa diboto portibion
Jahowa gabe parlinggoman ni bangso/HuriaNa. Ditiop Jahowa do tangan siamun ni
naporsea i, asa unang humordit di na masa penegakan
keadilan.
7.
Molo marlinggom
sasahalak di toru ni hau nabolon, tung mansai lambok panghilalaanna. Ndang hona
be tu ibana (pandoit) pamilngas ni mataniari, dohot panorop ni bulan. Molo
dipilngas (didoit) mata ni ari, olo do mosok huling-huling, hansit ulu, jala
rungrang panghilalaan. Molo disorop sondang ni bulan, olo do anak bulanon. Tu akka pangaean na songon
i, ndang diloas Jahowa (TUHAN) Jesus Kristus akka namarhaposan tu Ibana. Gombaran ni hamajuon ni zaman do pandoit ni
mataniari dohot panorop ni bulan. Di zaman hamajuon on, tung mamilngas do
“hatiuron” manang cahaya sondang ni zaman, jala manorop akka cahaya ni ngolu ni
jolma borngin-borngin di akka kelab malam, di cafe-cafe, di akka pusat
perdagangan gelap narkoba dohot barang selundupan. Tung menggiurkan
do akka i sude tu akka jolma nuaeng
on, tarlumobi tu akka jolma na baru mullop.
Sai dirimpu do pandoit ni zaman dohot panorop ni kehidupan malam i ngolu naunsonang. Alai ianggo akka na marhaposan
tu Jahowa (TUHAN) Jesus Kristus, tung so tardoit ni zaman dohot sorop ni kehidupan gelap do. Diboto ibana do
mamasang Jahowa dohot HATA ni Jahowa di ngoluna, lobi sian pamasang ni astronot
mamakke bajubaju angkasa luarna, asa unang mate ibana di angkasa luar i. Ala ni
malona dohot dasipna HATA ni Jahowa dibahen namarhaposan tu Jahowa gabe
bajubaju partahananna, ndang tolap ni pengaruh
negatif ni zaman dohot sorop ni kehidupan
gelap manaluhon ibana. Selamat do
bangso/Huria ni TUHAN Jesus Kristus mandalani zaman hamajuon na mandoit on dohot manaluhon kegerlapan dunia malam di zaman on, molo tung takkas HATA ni Jahowa
(TUHAN) Jesus Kristus dibahen gabe pakkean lengkapna (Epesus 6).[1]
8.
Hamu
nahinaholongan, dongan sahaporseaon. Gok parmaraan (LAI TB: kecelakaan) di portibi on. Mangancam do
mara di jabu, di balian, di dalan, di angkasa, di laut. Tuani ma adong ancaman
mara i, asa lam manat manang hatihati jolma (akka namarhaposan tu Jahowa). Godang
do massam ni parmaraan i. Adong do i mara ni daging, adong mara ni tondi ni
jolma, adong mara ni portibi. Ganup do
jolma marsintasinta asa unang cilaka
(marmara) ibana. Parsoalanna: Boha jala aha do sibahenonna asa unang cilaka
ibana, unang cilaka akka jolma nadebanari. Manat, oke! Hatihati, oke! Boi ma i
mangorui hamamasa ni cilaka (mara). Napasti songon nidok na di psalmen on: Sai jagaon ni Jahowa do ho sian nasa
parmaraan, sai jagaonna do tondim. Mardomu
tusi ma, umbahen ganup jolma (ndang mardiaimbar) ikkon mambahen pikkiranna, ilmuna,
ulaonna, hasil karyana, artana, ndang gabe sumber cilaka (mara) tu dirina dohot
tu jolma na asing. Asa unang marmara tondi ni jolma, ikkon ma ganup jolma na agamis, na atheis, namarfilsafat, na
humanis, nakomunis, na sosialis, na liberalis, na konsevatif, na pancasilais, dohot
na asing, mambahen utokutokna (rationa)
ndang gabe sumber cilaka ni tondina dohot tondi ni akka jolma na asing. Pangidoan
ni Jahowa do i bahenon ni jolma, hombar tu citra panompaon namasa tu jolma i
sandiri. Dalan ni Jahowa do i lao manjaga jolma asa unang marmara di daging
nang di tondi pe.
9.
Hamuna dongan
sahaporseaon! Nunga sian kodrat ni jolma i, na so holan liatliat di portibi on
ngoluna. Ikkon bolusonna do ngolu di
portibi namangilas on. Bolusonna rura ni linggoman ni hamatean (dunia orang mati, alam barzah) jala molo leak adong kesempatan, bolusonna surgo (dunia kehidupan senang selamanya). Asing ni i, ikkonbolusonna
bortian ni inana, bolusonna ngolu siganup ari, bolusonna hamaolon-hamaolon,
bolusonna hasonangan hadengganon. Bolusonna dalan na lancar, bolusonna danan na
macet, bolusonna dalan na mulus, bolusonna dalan na landit, na marlubanglubang
gok partuktukan. Bolusonna pintu ni jabuna, bolusonna pintu ni kantorna,
bolusonna kode makan, bolusonna inganan marsantai. Lao mamolus akka na songon i
marudutudut, adong do tikki bongot/ruar
dohot tikki ruar/bongot. Mansai porlu do jaminan di jolma i, ibana
selamat mamolus akka i sude. Jaminan i ro sian Jahowa (TUHAN) Jesus Kristus: Sai jagaon ni Jahowa do ho laho ruar dohot
laho bongot, olat ni on ro di salelenglelengna. On ma nidokna: Aturhonon ni Jahowa, asa bahenon
ni jolma (naporsea) i denggan mamulai, denggan mangujungi, manang aha pe taho
na masa di bagasan ngoluna. Misalna: Diparsinta Jahowa, asa denggan jolma i
tubu, jala denggan nang mate. Manang “denggan mangomo, denggan rugi”. Manang
“denggan mangoli, denggan marsirang”. Denggan denggan sude. I do umbahen
pandokan on do diondolhon pandita i (na songon wakil ni Jahowa) di tikki ibana
mangagendai jolma na monding di udean. Asa denggan na monding i mate, jala
mamulai ngoluna di tangan ni Jahowa (TUHAN) Jesus Kristus sidalananna salelenglelengna.
Didok di Barita Nauli na di Bibel i: “Martua
ma angka na mate di bagasan Tuhan i, olat ni on! Tutu, didok Tondi i, mansohot
ma nasida sian parungkilonnasida, ai na mangihut ma tu nasida niulanasida i!” (Pangk.
14:13).
Mangasahon jaminan na nilehon ni Jahowa (TUHAN) Jesus
Kristus marhite hataNa on, sude Huria Kristen marpos ni roha ma mandalanhon
ngoluna dohot mangulahon ulaon marbaritanauli saleleng adong dope tikki dilehon
TUHAN i. Tung mansai tabo do ngolu ni ganup halak dohot Huria, na mar-TUHAN tu
Jahowa (TUHAN) Jesus Kristus. Ai di na loja mata-ta mangaranapi sian dia ro
pangurupion tu hita, pintor ro do alus na pasti: Jahowa do na bolas jala na olo
mangurupi. Jahowa mambahen boi naporsea (huria) i madalan tegak ndang tarsulandit, ndang tinggang. Tung pe hita naporsea
mardalan di sada tali na gistang di atas ni tano saratur meter timbona, tong
boi hita mardalan tegak, ndang madabu. Jahowa torus mendampingi hita di
pardalanan ni ngolunta. Jahowa gabe parlinggomanta, na boi mangalehon keteduhan, jala ndang tardoit ni
pamilngas ni hakejamon ni dunia pancaroba
on hita. Ndang diloas hita gabe akka na anak bulanon, alai gabe akka jolma
sipardame jala parholong huhut nalambok roha do hita dibahen. Diramoti TUHAN
Jahowa do daging nang tondinta, lobi sian pangaramotion nabinahen ni portibi on
tu hajolmaon. Nang di akka proses-proses ni ngolunta (ruar/bongot; bongot/ruar)
torus do didampingi Jahowa (TUHAN) Jesus Kristus hita, namarhaposan tu Ibana. Amen.
Pematangsiantar, tgl. 10 Pebrauri 2017. Pdt. Langsung
Maruli Sitorus (Pdt. LaMBaS).
[1] Dungkon ni i, gabe togu ma rohamuna di bagasan Tuhan i dohot di bagasan
hagogoonna na togu i! Solukkon hamu ma
pangkean sinjata na sian Debata, asa taralo hamu utiutian ni sibolis i. Ai ndada marungkil hita mangalo mudar dohot
sibuk, angka harajaon do, angka parhuaso, angka sigomgomi hasiangan haholomon
on, angka tondi hajahaton na di ginjang i. Dibahen i, jalo hamu ma pangkean
sinjata na sian Debata, asa tarbahen hamu mangalo di ari na jahat i, jala hot
jongjong, dung dipatunduk hamu sasude.
Antong, jongjong ma hamu, marhohoshon hasintongan di gontingmuna, angka
naung manolukkon bajubaju partahanan, i ma hatigoran i. Marsipatu ma patmuna, laho mangkaringgashon
barita na uli, pardamean i. Angkup ni
sudena i, jalo hamu ma lombulombu haporseaon i; haintopan hamu do marhite sian
i sude sumbia api ni parjahat i. Jangkon
hamu ma nang tahuluk haluaon dohot podang ni tondi, i ma hata ni Debata”
(Ep.6:10-17).
