JAMITA SIAN EPISTEL TU MINGGU JUBILATE TGL 7 MEI 2017
JOHANNES 10: 1-10
10:1 Na tutu
situtu do na hudok on tu hamu: Manang ise na so bongot sian pintu, laho tu bara
ni birubiru, na manjangkit sian dalan na asing laho bongot, panangko do i jala
pamangus.
10:2 Alai na
bongot sian pintu i, i do siparmahan birubiru i.
10:3 Ungkapon ni
sijaga pintu i ma di ibana jala dibege angka birubiru i do soarana; jala dijou
do angka birubiruna di goarna be, laho manogihonsa tu balian.
10:4 Ia dung
diparuar sude na di ibana, sai di jolonasida ma ibana mardalan, gabe diihuthon
angka birubiru ma ibana, ai ditanda do soarana.
10:5 Alai ndang
olo nasida mangihuthon tu na asing; na maporus do nasida mida i, ai ndang
ditanda nasida soara ni na asing i.
10:6 Asa
dihatahon Jesus pe hata umpama ondeng tu nasida, ndang diboto nasida lapatan ni
na nidokna i tu nasida.
10:7 Dung i didok
Jesus ma muse tu nasida: Na tutu situtu na hudok on tu hamuna: Ahu do pintu na
tu birubiru i.
10:8 Saluhut
angka naung manjoloani Ahu, panangko do i jala pamangus; alai ndang ditangihon
angka birubiru i nasida.
10:9 Ahu do pintu
i. Paluaon do ganup na bongot sian Ahu; na laho bongot jala laho ruar ma ibana,
dapotan jampalan.
10:10 Anggo panangko, holan manangkoi,
maneati jala mangago do, umbahen na ro Alai anggo Ahu, asa adong hangoluan di
nasida, pola marlobilobi di nasida, umbahen na ro.
JESUS DO PINTU HARUAR-MASUK
NI JOLMA TU JAMPALAN
HANGOLUAN NA
SASINTONGNA
1. Hamuna
dongan sahaporseaon nahinaholongan di bagasan holong na sian TUHANta. Jampalan
hangoluan na sasintongna na songon dia na boi dapot ni jolma molo masuk sian
PINTU na nidok ni Jesus di turpuk on, asa boi jolma i marlas ni roha jala
mar-jubileum? Porlu do takkas botoon ni ganup jolma i, tarlumobi naporsea tu
Jesus, alana mansai godang do jampalan ni ngolu ni jolma di portibi on. Adong
do jampalan pinarade ni sibolis, komunis, sosialis, humanis, agama anti-Jesus
(akka agama na so Kristen), pancasila, partai politik, dohot lan na asing,
tarmasuk na pinatuduhon/niukkap ni “hau parbinotoan ni na denggan dohot na roa
na di parsitongaan ni porlak na di Eden” i. Somalna, adaran panjampalan ni
ngolu ni jolma sai masirainan do i tu: ideologi, politik, ekonomi, sosial,
budaya, agama, ilmu pengetahuan (bisuk-parbinotoan), teknologi, lingkungan,
dohot wawasan, karakter, ihot ni
pargaulan. Molo sian pintu “JESUS KRISTUS” haruar-masuk tu panjampalan ni ngolu
na adong i, dapot ni jolma i do parngoluon na luar biasa tabona, dengganna,
sonangna, dohot lelengna. Molo diantusi jolma do panjampalan na dapot molo masuk
sian pintu JESUS KRISTUS i, lam takkas ma botoon ni jolma na tung so sadihana
akka jampalan na pinatudu ni akka na asing nari i. Sian Bibel i, boi do dapot
botoon ni akka jolma (tarlumobi akka na porsea) gombaran ni jampalan i, na boi
lam patanakon ni jolma naung marnidasa. [Pamanat hamu ma godang ni akka buku
disurat di Amerika, na patoranghon Ngolu na manjampal di jampalan pinatudu ni
(nanimasukan sian pintu) JESUS KRISTUS,
na marisihon Panogunoguon Taringot tu Ngolu na Sasintongna (na luarbiasa sukses)
hombar tu poda na sian Bibel i, jala akka buku i gabe buku naullakku (best seller) di tigatigahon].
2. Molo
masuk sian pintu JESUS KRISTUS pintor tarida do panjampalan ni ngolu na marisi
ideologi: Leon tu Kaisar na sian Kaisar, jala leon tu Debata na sian Debata.
Haholongi TUHAN Debatam sian nasa gogom, sian nasa roham, sian nasa ateatem
dohot sian nasa hosam; haholongi donganmi doshon dirim; haholongi ma musum,
jala tangianghon akka na manghosomi ho. Di halak an ndang songon i, alana
dihalak i didokdo: na mangalehon tu kaisar na mangaleon tu debata do. Na agak
ampit tu ideologi ni Jesus Kristus on, boi ma dohonon ideologi Pancasila, na
botul-botul denggan didalanhon hombar tu tuntutan ni akka sila-silana i.
Molo masuk sian
pintu JESUS KRISTUS, pintor tarida jala
jumpang do panjampalan ni ngolu na marisi politik “mardeka, martanggungjawab,
ndang mardosa jala pasae dosa, marroha pangoluhon, mangondihon, jongjong di
hasintongan dohot holong agape. Bahen tu halak, aha dipangido roham naeng
bahenon ni halak i tu ho. Politik DAME, DENGGAN, DUNGO, DAULAT. I ma politik ni
jolma na masuk sian pintu JESUS KRISTUS. Mansai lambas pangabahan ni politik na
songon i, mangalobiani sian akka politik partisan, dohot politik bebas jala
aktif (karejo).
Molo masuk sian
pintu JESUS KRISTUS pintor jumpang do jampalan ekonomi na mangaturhon: Na
marduabaju dilehon ma tu na so adong bajuna, jala na umpeop sipanganon, songon
i ma dibahen! Unang ma susai, unang ma dobo hamu halak! Hasabamhon hamu ma
gajimuna! Unang ma buat hamu lobi sian na niaturhon tu hamu! Na sada hian bahen
gabe sampulu, so mangarugii halak. Unang tanom pokkot (modal) na dipasahat tu
ho. Molo dapot jampalan ekonomi na songon i, lobi sian keadilan sosial tu
saluhut rakyat hasilna.
Molo masuk sian
pintu JESUS KRISTUS jumpang do jampalan sosial na mansai uli situtu, na
marbudaya na mansai marmartabat jala manjungjung hajolmaon mansai timbo. Alana
di jampalan i masa ma mambahen na denggan tu saluhut halak, tarlumobi tu dongan
sahaporseaon. Sude ma disi marhahamaranggi di bagasan holong na sian TUHANta.
Undenggan sian solidaritas (kesetiakawanan)
naung hea ditanda jolma, di jampalan hangoluan sosial dohot budaya na nimasukan
sian pintu JESUS KRISTUS.
Molo masuk sian
pintu JESUS KRISTUS, jumpang ma jampalan agama na mansai denggan tu hajolmaon.
Di agama i tarida ma jolma “atur nang so diatur”, “kompak nang pe marmusu”,
sude marsiadu mambahen na denggan, ndang adong be pamunuon atas goar ni agama,
maragama marlapatan mardeka mangihuthon TUHAN, martanggungjawab mangoloi
dongan; torus tarjadi roha dohot pambahenan na masisesaan dosa jala masimaafan.
Ndang adong be jolma na diparhatoban agama. Agama patupa hasonangan ni jolma,
ndang laho manusai jolma. Agama na so mangalalaplalapi jolma, alai na pahobas
jolma mangaramoti hajolmaon sian akka panegai hangoluan ni jolma.
Molo masuk sian
pintu JESUS KRISTUS, jumpang do panjampalan ilmu-pengetahuan na mansai luar
biasa. Disi ma ganup jolma boi markreasi na luar biasa, manemuhon akka ilmu
dohot pengetahuan na imbaru, na so hea diboto jolma dope. Jala sude ilmu –pengetahuan
i dirajumi akka silehon-lehon ni Jahowa (TUHAN) Jesus Kristus. Sude ilmu
pengetahuan boi luluan, dapoton, jala ujicobaon. Naloakon do i molo gabe atheis
jolma na mandapot akka ilmu na imbaru na dietong rohana mangalobiani sia
parbinotan ni Jahowa (TUHAN) Jesus Kristus. Panggora ni roha ni akka
penemu-penemu ilmu pengetahuan na imbaru tong do mangakui na adong dope
najumago sian ibana, na boi mandapot ilmu pengetahuan na dumenggan sian
nadapotna i. Di jampalan ilmu pengetahuan na dapot marhite na masuk sian pintu
JESUS KRISTUS pasti do na boi pakkeon laho padenggan parngoluon ni jolma
manisia di liat portibi on. Dumenggan do ilmu pengetahuan di jampalan na
nimasukan marhite pintu JESUS KRISTUS, sian akka ilmu pengetahuan na dapot
digali jolma sian “hau parbinotan ni na denggan dohot na roa, na hea tubu di
porlak na di Eden.
Nang teknologi
pe di jampalan ni hangoluan ni jolma na jumpang ala masuk sian pintu JESUS
KRISTUS tung mansai luar biasa do. Nunga dipatuduhon Jesus akka teknik na boi
pamalum sahit misalna, na so marna boi diimbangi akka teknologi sinuaeng on.
Manang songon dia pe canggih ni teknologi na tarpikirhon ni jolma di portibi
on, boi do ciptahonon i di panjampalan teknologi na jumpang sian pintu JESUS
KRISTUS. Jala uncanggih sian akka i do pe.
Sude akka ilmu,
pengetahuan, teknologi na adong di panjampalan hangoluan ni jolma na dapot molo
masuk sian pintu JESUS KRISTUS diwajibhon do laho pature dohot padenggan
“lingkungan”, na humaliang ni ngolu ni jolma. Molo adong “lingkungan” na so
haru ture jala sehat, berarti na so diteraphon do disi poda na sian Bibel i, na
boi berengon molo masuk sian pintu JESUS KRISTUS. Molo dapot panjampalan di
hangoluan ni jolma songon na nigombarhon on, nunga patut ikkon marlas ni roha
jolma i, marjubileum, marhujingjang mamuji TUHAN na mangaloas jolma i masuk
sian pintu JESUS KRISTUS.
3. Didok
Jesus Kristus do, na so masuk sian pintu i panakko jala pamangus do. Namanjoloani Jesus Kristus pe tong do didok
panakko dohot pamangus. Anggo panangko, holan manangkoi, maneati jala mangago
do, umbahen na ro. Di sude organisasi do prinsip on marlakku. Manang ise na so
melalui prosedur, dianggap do i panakko dohot pamangus. Akka plagiator, na
mambahen karyana hape karya ni halak tong do didok pamangus manang panakko.
Namambahen rapot diluar ni na nisepakatan, jala dipillit pangurus ni organisasi
asing sian naung sah, tong do didok i pamangus, manang panakko. Ai na
manjoloani manang mangalakkai hata naung nisepakatan do i. Molo adong di
portibi on tampil panurirang mandok, ibana sanggup manesa dosa ni hajolmaon, na
manjoloani TUHAN Jesus Kristus do i.
Molo adong panurirang na mandok tarboanna do jolma masuk tu surgo
hasonangan pinarade ni Jesus, tong na manjoloani TUHAN Jesus Kristus i. Molo
adong na mandok adong dope ngolu na tumabo sian ngolu na pinarade ni TUHAN
Jesus Kristus, na manjoloani TUHAN Jesus Kristus do i. Dia ma jambar ni
panakko, pamangus dohot na manjoloani TUHAN Jesus Kristus? Dipaila ibana di tano
on dohot di banuaginjang. Asa unang
tarrajum tu panakko manang pamangus manang namanjolooani TUHAN Jesus iba, ba
niakkuan nabinaen i ala marguru tu TUHAN Jesus Kristus do. Nunga diboto portibi
on, ia poda ni Bibel i disimpulhon si Martin Luther di akka hata on: solus
Kristus, sola fide, sola gratia, sola scriptura dohot soli deo gloria. Adong ma
na sai naeng patorang-torang poda ni agamana mirip – mirip tusi, alai ndang
diakui naung diboto ibana ianggo poda na songon i nunga diajarhon si Martin
Luther, ujungna targoar do ibana panakko ilmu agama ni halak dohot pamangus
parbinotoan ni halak. Ujungna dipaila pangihutna do ibana. Jadi tung denggan do
jolma na olo patuh masuk sian pintu, nadidok Jesus pintu JESUS KRISTUS.
4. Alai
na bongot sian pintu i, i do siparmahan
birubiru i. Ungkapon ni sijaga pintu
i ma di ibana jala dibege angka birubiru i do soarana; jala dijou do angka
birubiruna di goarna be, laho manogihonsa tu balian. Ia dung diparuar sude na di ibana, sai di jolonasida ma ibana mardalan,
gabe diihuthon angka birubiru ma ibana, ai ditanda do soarana. Pintu i, sijagapintu
i, siparmahan birubiru i, sarupa do halak ni i, i ma Jesus Kristus sandiri. Birubiru
i i ma akka naolo mangihuthon Jesus Kristus. Ala sada do nimaksud ni natolu i,
gabe ndang be ummaol urusan ni akka na naeng masuk sian pintu i, jala tung
marpos ni roha do ibana masuk tu jampalan ni hangoluanna, ai diparmahan do
ibana disi. Siulaon ni akka naung sahat di jampalan i, i ma “manjampal” denggan
dohot mananda soara ni parmahanna. Na rikkot hian do mananda soar ni parmahan
on tikki manjampal laho mambahen ngolu i sejahtera jala sonang. Alana tung
mansai godang do akka soara-soara na mangelaela akka birubiru (siihuthon Jesus)
asa manadingkon panjampalan na denggan i. Ala ni i do ikkon tung takkas do
latihan jala tammat akka siihuthon Jesus mananda soara ni Jesus, ia tung pe
mansai nanget soara ni Jesus i. Apalagi tung mansai godang do nuaeng on akka
soara-soara na mirip tu soara ni TUHAN Jesus Kristus. Sadanari siparrohahonon
ni akka siihuthon Jesus. Ia goarna disurathon do di buku hangoluan i, di tikki
dung tardidi ibana di bagasan goar ni Jahowa Ama i, dohotgoar ni Tuhan Jesus
Kristus dohot goar ni Tondi Porbadia. Ala ni i tung ikkon siramotan ni ganup
pangihut ni Jesus do asa unang ganti goar ni ibana saleleng mangolu dope ibana
di tano on, tarlumobi tikki manjampal ibana di jampalan na lomak na
nipatuduhon ni Jesus tu ibana. Molo
sampe do ganti goar ni pangihut ni Jesus i (na sian si Maruli gabe si Maup),
sai dijoui Jesus pe goar aslina i, dang be tangihononna. Ujungna gabe laos maup
ma ibana songon goarna i. Ramot hita. Nuaeng on, nunga adong punguan na olo
mambayar sahalak pangihut ni Jesus marpuluh juta rupiah, asal ma olo ibana
ganti goar. Alai tu aha ma olo pangihut ni Jesus i bayaronna, ianggo tong do
laho mago tondina? Tumagon do
marolopolop tondi niba di jampalan ni hangoluan napinatudu ni Jesus, ia tung pe
so songon tabo ni na di surgo i disi, jala godang siparjuanghonon. Jala martua
ma akka nadohot marjuang, asa tung gok situtu jampalan hangoluan na pinatudu ni
Jesus i, jala tung lam tu toropna masuk sian pintu i. Mansai lambok do sijaga
pintu i manjakkon na ro, jala tung marlas ni roha do parmahan i laho
manogihonsa tu jampalan na lomak i. Gok pasupasu nasida disi. Amen.
Pematangsiantar, 22 April 2017. Pdt. Langsung
Maruli Basa Sitorus (Pdt. LaMBaS).
