JAMITA SIAN EPISTEL TU MINGGU HARORO NI TONDIPORBADIA TGL 4 JUNI 2017

Molo tour manang mardalan-dalan manang ise sian hita mangaliati negeri Republik Indonesia on, di darat, di laut, di harangan nang di kota, di desa, hira-hira tarsongon dia do ukkaphononna di guritgurit  i tanganna, ate? Tagamon do ra adong akka puisi na dumenggan  dope isina sian Psalmen 104 on. Ala  ni ulina hajolmaon, akka naadong i, alam, harangan, tao, laut, akka binatang, rodi akka duhutduhut, pidong na mansai marragam, dohot akka na asing na so hagoaran sude dison, sarupa do ra keinginan ni pardalan-dalan i dohot keinginan ni parpsalmen on mandok: Sai siap ma nian angka pardosa sian tano on, jala unang adong be angka parjahat!  Asa unang adong na manegai haulion ni tano Indonesia on na jotjot digoari “Paradis”.

2.      Hamuna dongan sahaporseaon nahinaholongan. Umbahen na adong di psalmen on ayat na mandok: “Molo ditongos Ho tondiM, tartompa ma nasida, jala dipaimbaru Ho do rupa ni tano on”, umbahen dipillit turpuk on laho renunghonon ni saluhut Huria Kristen marhite epistel di minggu pesta parningotan di Hasasaor ni Tondi Porbadia taon 2017 on.  Naeng jo partondihonon ni Huria Kristen lapatan ni Tondi Porbadia di haporseaonna, asa tung marposniroha ganup nasida mandalanhon ngoluna di portibi na mangilas on. Di akka barita taringot tu panompaon ni portibi (nasa na adong), tung dipataridahon akka parbarita do parsidohoton ni Tondi ni Jahowa, di panompaon i. Di 1 Musa 1:2 dipaboa: “Dung i tarulang ma tano i gabe halongonan jala holom di atas lung i, dung i mangareapreap ma Tondi ni Debata di atas ni angka aek.” Tondi (ruakh) na marrumang alogo i, mamungkinhon asa tano na tarulang i gabe tubuan suansuanan, jala aek na kosong i dope gabe boi marisi akka massam ni binatang laut sitompaon ni Jahowa. Di panompaon ni jolma, ndang Tondi ni Jahowa ditopik asa topiktopikna bahenon ni Jahowa gabe tondi ni jolma. Ditompa Jahowa do khusus “tondi” na dibahen gabe tondi ni jolma (Sak.12:1 “Songon on ma hata ni Jahowa, na paherbang langit jala na paojak tano on, jala na jumadihon tondi ni jolma di bagasan dirina.”) Diombushon Jahowa nismat hayah (LAI BT: hosa hangoluan) tu bungbung ni igung ni jolma naniganaNa i, dung i gabe nefes hayah (LAI BT: martondi na mangolu) jolma i. Dibalik ni panompaon ni jolma i tontu karejo do Jahowa marhite TondiNa, ia tung pe so bagian ni TondiNa i dilehon Jahowa tu jolma i. Mardongan hagogoon ni TondiNa i, Jahowa manompa jolma “tudos tu rupana” (tselem) (1 Musa 1:27) dohot “tudos tu pangalaho (demut)”-Na” (1 Musa 5:1). (LAI menterjemahhon tselem dohot demut di 1 Musa 1:27 dohot 1 Musa 5:1 marhite “rupa”; alai di 1 Musa 1:26 diterjemahhon: tselem = rupa; demut = pangalaho). Jadi ndang holan “rupa” ni portibi on dipaimbaru hagogoon ni Tondi ni Jahowa, dohot do nang rupa ni jolma. Sude gabe rupa na nihalomohon ni Jahowa. Sian akka pangantusion na songon i, boi do antusanta, ia dung disonggopi Tondi ni Jahowa si Saul, gabe “muba roha” (leb aher) ni si Saul, na tarida sian bohina dohot sian pambahenanna. Akka na luar biasa  boi diulahon si Saul. Didok panurirang Joel taringot tu nasinonggopan ni Tondi ni Jahowa: Joel 3:1: “Pangusehonongku ma  Tondingku tu nasa sibuk, gabe manurirangi ma angka anakmuna dohot borumuna, marnipi ma angka sintuamuna, jala maralatan angka dolidolimuna.”  Dung Tuhan Jesus digoki Tondi ni Jahowa, marpuasa do Ibana 40 ari 40 borngin, jala dung i monang do Ibana maralohon pangunjunan na ro sian Sibolis i. Diula Ibana ulaon sinuru ni AmaNa tolu taon lelengna, asa malua jolma sian rante ni Sibolis, mulak mangolu na mate, malum akka sahit, marsangap marmulia Jahowa, jala hagogoon ni Tondi ni Jahowa mambahen manahan Ibana di saluhut sitaonon na ditipahon Sintua ni Malim dohot pamarenta Rom na sampe mate tarsilang Ibana, alai mulak mangolu do Ibana di ari patoluhon dung ditanom Ibana. Mardomu ala mansai porlu akka sisean ni TUHAN Jesus Kristus gabe “natinompa naimbaru”, jala margogo laho mangadopi “tantangan” na mansai borat na ro sian portibi on, margogo laho marbarita nauli, ditongos Ibana do TondiNa, Tondi Porbadia, laho mandongani dohot mampargogoihon akka siseanNa i. Torus do sahat tu saonari on, toho nanidok ni parpslamen on di Pslm 104:30: “Molo ditongos Ho tondiM, tartompa ma nasida, jala dipaimbaru Ho do rupa ni tano on.” Nang tu pangihut ni Jesus sinuaeng on pe, boi do masa hagogoon ni Tondi i.

3.      Di na mangarop hita tu pandonganion ni Tondi ni Jahowa Jesus Kristus, dohot leonon ni Jahowa di hita hagogoon extra  laho pature ngoluta dohot portibi na pinasahatna tu hita di tikkita si nuaeng on, taula ma jo songon na binaen ni parpsalmen on, asa taboto akka dia na ikkon radotanta be, lao mangoloi Jahowa Jesus Kristus.

(1)   Takagumi ma jo akka naadong sinuaeng on, jala taantusi saluhutna i di bagasan konteks ni haporseaonta.

Tabereng ma dirinta, hajolmaonta, na humaliang hita, negara Republik Indonesia, dohot sude portibi naung boi botoon marhite akka alat komunikasi na adong nuaeng on. Panurat sandiri mangaku sada jolma na tung mansai gale, na mansai metmet di tongatonga ni bangso Indonesia, naung lobi mar-250-juta halak. Hurianta pe mansai metmet dope martimbanghon akka kelompok paragama na asing. Indonesia na lobi 17.000 pulo (8.000 pulo diingani jolma), jala diingani jolma na mamakke 300 bahasa alai marbahasa nasional bahasa Indonesia. Pangihut ni nasa agama na adong di portibi on adong di Indonesia. Lautna ma naulluas naniramotan ni sada negara. Lautna marisi sude massam ni binatang na adong di laut ni portibi on. Pantaina ma nagumanjang. Haranganna ma naumporlu di portibi on, jala marisi sude massam ni binatang naung ditompa Jahowa. Di laut na i boi do mardalan kapal induk, akka kapal laut nabolon situtu. Sude ragam ni pidong (na habang; dohot na so boi habang) adong do di Indonesia. Di udarana i boi do habang akka kapal terbang na metmet nang naumbalga naung nipukka ni jolma. Songon i ma godang ni ragamna. Ai tagamon do holan usaha ni jolma sambing umbahen na boi tano dohot laut na songon i bolakna gabe sada negara na margoar Negara Kesatuan Republik Indonesia? Panurat porsea do, naung setuju do ganup debata na nisomba ni ganup paragama na adong di NKRI on, gabe sada negara natagoari NKRI, jala ditogutogu akka bangso na di Indonesia on boi mar-Pancasila, mar-Undang-Undang Dasar 1945, mar-bhinneka Tunggal Ika, dohot marrakyat Indonesia (na marbahasa hasadaon, bahasa Indonesia; na marsambulohon sada sambulo: Indonesia; na gabe sabangso: bangso Indonesia). Songon parpsalmen i, boi dohonon ni akka siihuthon Jesus: Tung na lan situtu do angka jadijadianmu, ale Jahowa! Saluhutna i dipauli Ho marhitehite hapistaran, tung gok jadijadianmu do tano on. Takagumi ma Indonesia i, asa dohot hita mangaramoti.

(2)   Tabereng ma aha do diarop roha ni sude nasa na adong di Indonesia on.

Songon na tarsurat di Pembukaan ni UUD RI 1945, marsintasinta jala arop situtu do bangso Indonesia, asa bangso Indonesia bangso na adil makmur sejahtera (sonang), cerdas (gabe bangso na mansai malo), jala boi portibion tongtong di bagasan dame. Mardomu tusi do ia negara Indonesia ndang negara sekuler, jala ndang negara agama; alai negara na pandudukna mangolu di ganup paragamaonna be; jala mamakke sude nasa na adong di portibi ni Indonesia gabe patupa hamakmuron, hasejahteraon (hasonangan) na gok haadilon ni hajolmaon na adong di Indonesia. Jadi tung pe ganup panduduk ni Indonesia naung tolap mansari (karejo) mangalului pansarian (na rikkot tu ngolu siganup ari), ganup do nasida mandok tu debata nahinaporseaanna be: “Saluhut nasida mangaranap tu Ho, asa lehononmu sipanganonnasida di tingkina be. Molo dilehon Ho di nasida, dijomputi nasida, molo dipatedek Ho tanganmu, butongan nasida di na denggan i.” Tarlumobi ma akka Kristen, di ateate na be naumbagas torus do mandok na songon i. Saotikna manangianghon: “TUHAN, leon ma di hami godang pasupasu marhite akka ulaonnami nadenggan sadarion.” “Lehon ma di hami hangoluan siapari.” Sude mangokuhon: Holan mangasahon asi ni roha ni Jahowa Jesus Kristus do, hita na mangolu on! Otik manang godang na dapot ni ganup naporsea i tu siganup arina, tong do boi tardokna: “Otik sipir ni tondi, godang sibutongbutong!” Ganup naporsea i manghasabam-hon aha naboi dapotna disari siganup ari, jala torus maningkathon haboionna , asa anggiat lam boi gumodang dapotna sian pasupasu ni TUHAN. Sai dipangido naporsea i pandonganion dohot pangurupion ni Jahowa Jesus Kristus marhite TondiNa i, asa lam tu tauna nasida be mandapot pasupasu na sian Jahowa Jesus Kristus. Takkas do diboto ganup naporsea tu Jesus Kristus, na ikkon marguna ngolu nasida saleleng mangolu dope nasida di tano on. Ngoluna i marguna tu dirina, tu keluargana, tu pangisi ni luatna, tu bangsona, tu negarana, dohot tu harajaon ni Jahowa Jesus Kristus. Diboto ganup sian nasida do, na holan parsatokkinan do na mangolu di tano on. Jumempek do ngolu di tano on sian nasa ngolu di surgo i. Alai ngolu na jempek di tano on, tong do marlapatan i tu ngolu na di surgo i. Ala ni rikkot na marprestasi ganup naporsea i di tano on, sai diparsinta rohana do asa didompakkon Jahowa Jesus Kristus bohiNa tu sude naporsea i, jala dipatedek tanganNa mamasumasu nasida. Sai dialap nasida do padan ni Jahowa taringot tusi ganup minggu di parmingguan di gareja. Molo mamasumasu manang tedek tangan ni Jahowa Jesus Kristus, gogo manjomputi na ma ganup naporsea i, akka na rikkot tu ngoluna siganup ari (na rikkot tu agama, ekonomi, sosial budaya, ilmu, pengetahuan dohot nahumaliang/lingkunganna).  Diboto naporsea tu Jesus do, molo ditabunihon Jahowa Jesus Kristus bohiNa tu nasida ganup, tung mansai maol do nasida mandalanhon ngoluna. Holan holso na ma na haruar sian simakkudap nasida be. Alana hatiuron ni sinondang ni bohi ni Jahowa ndang be manondangi pardalanan ni ngolunasida be. Ala ni i do umbahen sai mangido ganup naporsea tu Jesus, asa disondanghon Jahowa Jesus Kristus bohiNa tu ganup naporsea i, asa tung haru tiur pangoluon ni partondion dohot pardangingon ni nasida. Sondang ni bohi ni Jahowa i do tong nanipadanhon ni Jahowa Jesus Kristus leononna tu ganup naporsea i, di na laho mulak nasida sian parmingguan tu akka bagas manang ulaonna be.

(3)   Diboto ganup naporsea i do, di sada tikki taiton ni Jahowa Jesus Kristus do hosananasida be, jala monding ma natinaitna i hosana, diagendai, asa diramoti Jahowa Jesus Kristus orbuk ni bakkena, sahat tu ari haroro ni ari haheheon na balga i. Akka namonding di bagasan goar ni TUHAN i, masohot ma jo sian ulaonna di tano on, jala mangihut tu nasida ma akka nabinahen nasida. Dosa naung dipasesahon tu Jahowa Jesus Kristus, ndang dohot be i mangihut tu akka na monding i, na dipasahat tu tangan ni Jahowa Jesus Kristus. Ala ni hagogoon ni Tondi ni Jahowa, gabe natinompa naimbaru ma akka namonding di bagasan Kristus i, jala portibina pe portibi na imbaru ma. Jadi ndang holan tu namangolu di tano on mampanghorhon ulaon ni Tondi i, alai dohot do tu akka namonding di bagasan TUHAN i.

(4)   Mardomu tu na sadar do naporsea i taringot tu ari hamamatena, di ngoluna di tano on, songon parpsalmen on, marusaha asa: Sai ro di salelenglelengna ma hamuliaon ni Jahowa * marlas ni roha ma Jahowa mida angka jadijadianna i! Dohot ma ibana mambahen asa “lestari” (ro di saleleng ni lelengna) hamuliaon ni Jahowa tarida sian akka natinompa ni Jahowa i, asa tong ndang marpansohotan las ni roha ni Jahowa marnida akka na tinompaNa i sai tongtong denggan manang denggan situtu. Ikkon ma nian songon semangat ni parpsalmen on semangat ni ganup pangihut ni Jesus na adong di Indonesia on.  NKRI ikkon usahaonon ni ganup naporsea i “lestari”, unang gabe gurgar, ai hasangapon dohot hamuliaon ni Jahowa do na tarida, molo lestari NKRI napinajongjong ni Jahowa Jesus Kristus on. Mardomu tu mangalestarihon hamuliaon dohot las ni roha ni Jahowa do umbahen ikkon marsigogo siihuthon Jesus mangarahon sude bangso Indonesia manjaga mangaramoti Udara, Laut, Darat, Sunge, dohot akka binatang-binatang na adong di Indonesia on; mangaramoti Danau Toba, situs-situs budaya, akka budaya na adong di Indonesia, mangaramoti sude warisan dunia na adong di Indonesia, pangoluhon muse harangan na adong di Kalimantan na najolo gok Hau Bosi (Ulin), hape nunga tung maol dapot nuaeng; mangaramoti, mamelihara akka terumbukarang na adong di sude laut ni Indonesia; mangalestarihon “limut ni Danau Toba” na boi mambahen ubat, asa unang sanga habis so adong be tumburna. Danau Toba na lam koring on pe nunga ikkon hatop dipaulak tu keadaanna najolo, ias aekna, sejuk, mokmok ikanna, jala darat nahumalingna mansai sejuk, gok hau harangan na mangalehon ngolu tu jolma manisia. (Lulululu do roha, na so mardaya do nuaeng Huria Kristen na adong di sekitar Danau Toba i mangorai asa unang sai dikotori akka keramba ikan na adong di danau i be aek ni Danau Toba i, jala asa unang sai dibabati jolma be akka hau na adong di dolokdolok na humaliang danau Toba i. Ai sai songon na so diterge pamarenta do pangidoan i, jala ndang olo kerjasama akka perusahaan na adong i kerjasama dohot rakyat laho mambahen mansai uli muse Danau Toba/Tano Toba i. Jolo masa pe na so hea masa, asa sodar hita sasude?

(5)   Hamuna dongan sahaporseaon na hinaholongan. Naung naburju do nian TUHAN i mamereng jolma na adong di Sumatera Utara, na di sekitar Danau Toba i. Ai masa do songon nanidok ni parpslamen on nuaeng on di luat on, i ma na sai erupsi i Dolok Sinabung. Songon nidok ni parpsalmen on: Molo Ibana (Jahowa Jesus Kristus) mamereng tano on, jadi humuntal ma, dijama angka dolok, jadi martimus ma. Tuani ma holan erupsi jala marlalo na nanget masa di Dolok Sinabung i. Molo mapultak do Dolok Sinabung i songon parpultak ni Dolok Toba (750.000 taon na salpu), ra nunga matolbak Danau Toba, jala tinggal gabe holan rura (lombang). Holan burju ni Jahowa Jesus Kristus do ma mambahen holan humuntal do dolok i, jala holan martimus (erupsi) do dolok Sinabung i. Sai hira nadiantan do hagogoon ni lalo dohot erupsi i, asa unang humasusa sude jolma na adong di Indonesia tarlumobi na adong di luat Sumatera Utara on. Alai molo lam mardosai do jolma di Toba manang di Sumatera Utara on, olo do bahenon ni Jahowa parpultak ni dolok Sinabung i laho manguhum bangso na lam mardosa i. Jadi dipauba akka pardosa ma rohana, mulak ma tu dalan na denggan.

(6)   Sada naporlu sitiruon ni akka naporsea tu Jesus di tikki parasinirohaon ni Jahowa Jesus Kristus najinalona nuaeng on, i ma songon parpsalmen on: Endehononku ma Jahowa saleleng di ngolungku, umpalu parhinaloan ma ahu umpuji Debatangku, saleleng adong dope ahu. Dikarang manang digubah be ma ende pujipujian tu Jahowa, ala parasi roha jala pardenggan basa do Jahowa Jesus Kristus. Diusahahon Huria Kristen ma asa gok ende pujipujian, ende hamauliateaon, simakkudap ni sude jolma na adong di Indonesia on. Dibahen ma nang akka jabu, adaran, harangan, dalan, akka kendaraan, sunge, dolok-dolok i mangendehon Jahowa. Unang ma holan kaset, CD, VCD manang radio mamuji, mangendehon Jahowa, alai ikkon ma dohot partondion dohot pardagingon ni ganup jolma i di Toba, Sumatera Utara, Indonesia. Tausahahon ma asa boi pangendehonon di Jahowa i salaleng ni ngolunta sahat tu akka pomparan  ni pomparanta marsundutsundut, sahat tu ajal ni hasiangan on.

(7)   Sian najolo do sai dihalomohon Jahowa pakkeon akka parhinaloan tikki mamuji Jahowa.  Ikkon lam maju do akka parhilahoan dohot pamaluon ni parhinaloan i laho mamuji Jahowa Jesus Kristus. Sude nasa alat musik naung tinanda ni hajolmaon diusahahon ma asa dipakke lao mamuji Jahowa Jesus Kristus. Nasa na mamakke parhinaloan i, rap dohot parpsalmen on mandok:  Puji ma Jahowa, ale tondiku! Haleluya!

(8)   Na denggan do molo boi siihuthon Jesus marpikkir, jala memang ikkon do marpikkir. Alai songon parpsalmen on, ikkon ma ganup naporsea i mangusahahon, asa “dihalomohon roha ni Jahowa  ma akka pikkiran/napinikkiranna i”. Indonesia mamikkiri GBHNna, Nawacita, hamajuon dohot hadengganonna tu sude pandudukna, asa unang adong na gabe merasa tartinggal, asa sude merasa memiliki, asa sude manghaholongi Pancasila, UUD RI 1945, asa sude mangula patuduhon ha-bhinneka-tunggal-ika-on ni bangso Indonesia, asa NKRI lestari saleleng lelengna. Akka naporsea tu Jesus Kristus, ikkon ma parsidohot di akka pikkiran na songon i. Ai akka pikkiran na nihalomohon ni roha ni Jahowa do i. Sada na tung mansai rikkot pikkirhonon, jala lomo ni roha ni Jahowa do i, molo dipikkirhon jala diula mambahen denggan parsaoran ni akka paragama di Indonesia on, unang adong na masikafirkafiran, unang adong na masibunuan ala ni agama. Molo boi sonang mangolu akka paragama na marragam i di Indonesia on, tung i na ma las ni roha na tarlumobi di Jahowa dohot di hajolmaon.