JAMITA SIAN EPISTEL TU MINGGU XII DUNG TRINITAS TGL 3 SEPTEMBER 2017
PSALMEN 26:1-8
|
26:1 Sian si Daud. Luluhon ahu, ale Jahowa,
ai marpangalaho di bagasan hadaulatonku do ahu, jala tu Jahowa do ahu
marhaposan, ndang meoleol ahu.
26:2 Uji ma
ahu, ale Jahowa, jala sulikkit rohakon, sai lala ma akka piaki dohot rohaki.
26:3 Ai sai
solpa do di mataku denggan basaM, jala
marparange ahu di bagasan hasintonganMi.
26:4 Ndang dung
sahundulan ahu dohot halak sineang roha, jala ndang huparakkupi akka
parsibuni.
26:5
Huhagigihon do luhutan ni akka panggetegete, jala ndang sahundulan ahu dohot
akka parjahat.
26:6 Sai hupaburiburi do tanganku di bagasan
halidangon, jala sai naeng halianganku
langgatanmi, ale Jahowa!
26:7 Laho
patubegehon soara pujipujian dohot pajojorhon sude halongangan, akka na
binahenMi.
26:8 Ale
Jahowa, huhaholongi do hajongjongan ni bagasMu dohot hasonggopan ni
hamuliaonMu.
|
26:1 Dari Daud.
Berilah keadilan kepadaku, ya TUHAN, sebab aku telah hidup dalam ketulusan;
kepada TUHAN aku percaya dengan tidak ragu-ragu.
26:2 Ujilah
aku, ya TUHAN, dan cobalah aku; selidikilah batinku dan hatiku.
26:3 Sebab
mataku tertuju pada kasih setia-Mu, dan aku hidup dalam kebenaran-Mu.
26:4 Aku tidak
duduk dengan penipu, dan dengan orang munafik aku tidak bergaul;
26:5 aku benci
kepada perkumpulan orang yang berbuat jahat, dan dengan orang fasik aku tidak
duduk.
26:6 Aku
membasuh tanganku tanda tak bersalah, lalu berjalan mengelilingi mezbah-Mu,
ya TUHAN,
26:7 sambil
memperdengarkan nyanyian syukur dengan nyaring, dan menceritakan segala
perbuatan-Mu yang ajaib.
26:8 TUHAN, aku
cinta pada rumah kediaman-Mu dan pada tempat kemuliaan-Mu bersemayam.
|
PANGALAHO NA TAKKAS MANGOLOI JAHOWA
1. Hamuna
dongan sahaporseaon na hinaholongan di bagasn holong ni TUHANta. Nang di zaman
nuaeng on, mansai porlu do lam godang jolma na barani manghajongjonghon jala
patuduhon takkas di tonga ni mangajana, songon dia do pangalahona, pambahenanna
di adopan ni donganna jolma lao mangoloi Jahowa Jesus Kristus haposan jala
nahinaporseaanna. Porlu lam godang jolma
na fanatik situtu mangulahon na
denggan, jala tahan uji, huhut marsihohot di haporseaon na sintong sahat ro
ajal ni ngoluna. Mansai rikkot akka pangihut Jesus na fanatik i mambahen akka
parsadaan/parpunguan na lintas denominasi huria, jala marhite parpunguan
nasida martekad nasida sude patuduhon
“rumang” ni pangalaho dohot pambahenan na denggan, lao mampengaruhi akka jolma
na humaliang nasida, asa tung marpangalaho na denggan situtu. Sude nasida
martekad: marpantang marisap, marnarkoba, marjuji, korupsi, manum minuman
keras, margabus, manakko, mambunu, manjahati, malas, masipasombuan,
masiparoaroaan, manegai borua, mamukkul dakdanak, mambahen hakorason tu ripe,
mamburai, margadombus, marhata rorang, margapgap, mangansi, munafik, dohot
mampantanghon akka ulaon manang pangalaho na roa na asing nari dope. Alai sude
nasida marsitutu: sopan, pantun, padao sigaret sian lingkunganna; mangalo akka
sijual dohot sipakke narkoba; masiurupan, masitukkoltukkolan, masipujian,
mangaramoti borua unang di ganggu halak; manghaholongi dakdanak, manyayang ripe, mangamoti arta ni donganna,
marroha pangoluhon, mambahen nadenggan, ringgas, marhata toho, marhata na
lambok, partamue, jujur, mamparhaseang tikki, tepat waktu, unduk tu
ponggomgomi, marpanarihon, gotongroyong, dohot mambahen akka ulaon/pangalaho na
denggan na asing nari dope. Ikkon dimulai sian akka punguan-punguan na songon
on na ma asa boi muba mental ni bangsoon naung sanga tung marosot jala hancur. Porlu
ditiru akka jolma dohot punguan na fanatik mambahen nadenggan on, mentalitas,
pangalaho dohot pambahenan ni parpsalmen on.
2. Tegas
do parpsalmen i mandok tu Jahowa: marpangalaho
di bagasan hadaulatonku do ahu, jala tu Jahowa do ahu marhaposan, ndang meoleol
ahu. Hadaulaton manang ketulusan,
i ma ngolu na takkas digohi serep ni roha, pangoloion tu patik dohot parenta ni
Jahowa Jesus Kristus. Jadi tung takkas do diboto ruhut ni paragamaonna dohot
ruhut ni paradatonna, songon i nang ruhut ni parnegaraonna, jala dihangoluhon.
Sai tandi do dibahen ibana hadengganon ni pangalahona i, jala tarida
pambahenanna na denggan i. Ala ditanda ibana dirina paragama, dipatupa ma
dirina na talup dapotan pasupasu jala gabe pasupasu. Takkas dihangoluhon patik
ni Jahowa Jesus Kristus na mandok: Haholongi ma TUHAN Debatam sian nasa gogom,
sian nasa hosam, sian nasa ateatem, sian nasa roham. Haholongi ma donganmi
doshon diri. Haholongi ma musum jala tangianghon akka na mangalatei ho. Tarida
saluhutna i dibahen di ngoluna siganup ari. Ala diboto dirina jolma paradat,
tung mansai somba do ibana marhulahula, elek marboru, manat mardongan tubu,
hormat mardongan sahuta/maraleale, jala biar mar-TUHAN. Ala takkas do diboto
ibana dirina sada warga negara, tung takkas do ibana mamatuhi akka kewajiban ni
warga negara; pajak dibayar, rekening dilunasi, dijaga haiason dohot hasehaton
ni lingkungan, takkas parsaoran dohot warga naasing di bagasan dame dohot na
masihaholongan. Diula ulaonna mansai denggan hombar tu lapangan kerjana.
Tigatigana mangomo, ndang na ala margabus manang paotootohon, alai tung ala ni
hajujuron do. Tulus jala bulus do diulahon ibana saluhutna i. Jahowa Jesus Kristus
do haposan ni ibana na mangolu on. Mangolu manang mate pe au, di Jahowa Jesus
Kristus do au, ninna, jala konsisten do ibana disi. Ndang olo meoleol parhuriaonna,
ndang parmurtadmurtad paragamaonna. Pos do rohana di Jahowa Jesus Kristus,
TUHAN na boi mangalehon nasa narikkot di ngoluna, di tano on nang di banua
ginjang. Tung so ragu manang sangsi do rohana agia otik taringot tusi.
3. Asa
tung haru takkas diboto Jahowa Jesus Kristus, ise parpsalmen on, diajak ibana
Jahowa Jesus Kristus sandiri manguji dirina, manulikkit rohana. Ndang holan
ujian di hata, dipangido Jahowa bahenonna tu ibana, dohot do ujian batin, ujian
ateate, ujian pia dohot ujian roha. Sandok
rade do dirina ujionna songon panguji nisitopa mas manang perak na mambakar mas
manang perak i laho manguji haaslion ni mas dohot perak i. Molo sampe dilala
pia lao manguji, marlapatan do i, nunga ditakkasi apala naumbagas ni naumbagas
di hadirion ni jolma i. Memang akka na tahan uji do dihaporluhon Jahowa Jesus
Kristus nuaeng on (tahan uji di haporseaon, tahan uji di panghirimon, tahan uji
di haholongon, tahan uji di hahipason ni pamatang, tahan uji di hahipason ni
partondion, tahan uji di poda, tahan uji dohot di parsihohoton maniop
hasintongan), asa boi lam tu dengganna hajolmaon di portibi na lam buruk on. Ianggo
sijolangjoling do, ndang porlu adong i. Arung do denggan meoleol, alai ianggo
jolma ndang denggan meoleol. Ikkon “pir pokki bahul bahul pansalongan do. Pir
tondina asa martambatamba tu ibana pansamotan.
4. Na
solpa i ma na sonson di mata, jala gabe holan i na ma siidaon ni mata i. Molo
solpa akka denggan basa ni Jahowa Jesus Kristus di mata, marlapatan do i, na
holan denggan basa ni Jahowa Jesus Kristus na ma na ditanda jolma nampuna mata
i. Di sude panggulmit ni ngoluna dirajumi tung so adong be hasil ni prestasina,
holan asiasi dohot ala holong ni roha ni Jahowa Jesus Kristus na ma. Mangihut
tusi do prestasina. Ndang adong be natumabo ngolu sian ngolu na digoki
dengganbasa ni Jahowa Jesus Kristus. Dosa disesa, narikkot tu ngolu pardagingon
(siganup ari) dohot tu ngolu partondion rade lobi sian na sukkup, jala ngolu
niba i gabe pasupasu tu na humaliang. Songon dia ma alus tusi? Songon dia ma
parange ni halak na ngoluna digoki denggan basa ni Jahowa Jesus Kristus na sola
gratia? Di na disurat dongan di kaca pudi ni opeletna: “Basa do TUHAN i”, lam
tu ronggos na do ibana mangalului sewa asa haru gok opelet na i, jala tung
mansai godang dapot hepeng sadarina i. Diurus opeletna i mansai uli, masinna
beres, nang pe naung lima taon umur ni opeletna i, sai tong idaon rumang dohot
pardalanna sai songon mobil naimbaru. Songon
i do namananda denggan basa ni Jahowa Jesus Kristus na sola gratia. Lam burju
TUHAN i, lam burju ibana tu TUHAN i, niurus mansai denggan sude dalan ni
pasupasu ni TUHAN i. Songon dia do hasintongan (kebenaran) ni Jahowa Jesus Kristus na diparangehon parpsalmen on? On do: Tung holong roha ni Jahowa Jesus
Kristus tu naporsea/siihuthon Ibana. Dilehon tu naporsea i hasesaan ni dosa,
hatuaon dohot hatuaon, hangoluan na
sasintongna di tano on dohot di banua ginjang. Sude i dilehon marhite asi ni
rohaNa. Disambut naporsea i ma pambahenan ni Jahowa i marhite hapatuonna
mangoloi patik “holong” naniparentahon ni Jahowa Jesus Kristus. Dipatuduhon
dirina Siboan Dame, jala tongtong mauas male mida hatigoran.
5. Di
na diparangehon parpsalmen on hasintongan ni Jahowa Jesus Kristus,
dipatuduhon ibana ma pangalaho, na ndang dung sahundulan ibana dohot halak
sineang roha, jala ndang diparakkupi akka parsibuni. Dihagigihon ibana do luhutan ni akka panggetegete, jala
ndang sahundulan ibana dohot akka parjahat. Sahundulan marlapatan do i:
sabangku, sasarikat, sasiulaon, sapartai, sahuria, sapunguan, saparjambaran,
saparusahaan, sakoperasi, manang rap di
ulaon na gabe patuduhon hasadaon ni roha ni parpsalmen i dohot sineang roha (panipu) i. Martua do halak na songon
parpsalmen on. “Martua ma halak, na so
olo mangihuthon tahi ni angka parjahat,
jala na so olo jongjong tu dalan ni angka pardosa, jala na so olo sahundulan dohot angka pangarehei” (Pslm.1:1).
Ai ndang denggan “patampaktampak hundul, alai pulikpulik pandokan”. Sineang
roha, i ma akka na merasa gampang sude, ai dietong rohana boi do tipuonna akka
jolma i, asal ma marhasil ulaonna. Ndang sidonganan jolma sineang roha. Ikkon
akka jolma na marsitutu rohana do baenon sahundulan dohot iba. Molo adong
sineang roha dongan niba sahundulan, paksaon do i asa unang neangneang rohana.
Asa muba ibana. Molo ndang, tarpaksa do ikkon haruar ibana sian parhundulon i. Mamparakkupi
lapatanna olo manukkun aha sibahenon tu sasahalak; dibahen halak i gabe
donganna saulaon, sapartahian. Alai molo na munafik do tumagon do ndang akkupan
i. Ai asing do hata dohot gaya ni namunafik (parsibuni) tikki tumpol paadop
bohi dohot dung tundal. Mamuji do i tikki dompak, paroaroahon dung tundal. Jadi
ndang sipargaulan i. Ai holan hansit ni roha do bahenon ni i. Molo adong jolma
na munafik di punguan, dikursus ma ibana asa olo “sitikkos ni ari, sijujung ni
ninggor”, na sai tongtong mandok nasintong. Si Judas Iskariot ma sada contoh ni
jolma na munafik. Ai boi ibana senyum mangumma Jesus hape nunga digadehon ibana TUHAN Jesus Kristus. Manghagigihon lapatanna tung so ro ijur manang
selera mamereng. Luhutan ni akka
panggetegete, i ma parpunguan ni akka pamolamola, par-hoax, pamfitnah;
sipadugudugu jolma, provokator, situbui na so ada. Hagigihonon do na songon i.
Molo adong na songon i, ikkon sipaksaon do i bertobat. Ai molo sai pinasombu
akka jolma panggetegete merajalela, olo do gabe “matutung” bahenon ni i portibi
on.
6. Tanda
ni na ias sian dosa, sai marburi tangan do halak Israel lao masuk tu bagas
joro, tarlumobi lao mulak sian bagasjoro. Di pambahenan ni si Latus pe di tikki
manguhum Tuhan Jesus Kristus, tarida do tadingtading ni pambahenan on nang di
bangso na so Jahudi. Pamurion ni tangan
i songon pambahenan simbolis do i, alai ianggo na sasintongna tung lidang ni
roha i do na sasintongna ndang mardosa. Na lidang roha, i ma na so olo
mangakkalakkali halak na asing asa saut nanidokna. Parpsalmen on pe lidang do
rohana laho mamuji Jahowa Jesus Kristus di bagasjoro i. Ndang akka na nipogo
dipasahat ibana bahen pelean tu Jahowa Jesus Kristus, alai tung hasil ni
parpinahanonna dohot naniulana do. Akka pelean situtungon i diboan ibana tu
langgatan ni Jahowa sian tulus dohot bulus ni roha, jala tung ias situtu do
rohana mamelehon i, ia tung pe marratus ekor pinahan i. Di na pasahat pelean i ma parpsalmen on
manghaliangkon pelean i di langgatan ni Jahowa. Tanda ni gok dohot las ni
rohana pasahat pelean i tu Jahowa. Molo halak Batak Toba, gondang liatliat do
di tanda. Di Israel, na manghalianghon pelean tu Jahowa do ditanda. Di arop
rohana, mansai las ma roha ni Jahowa manjalo peleanna. Jala sude jolma di desa
naualu, dapotan pasupasu sian Jahowa, siulak ni pelean napinasahatna i.
7. Di
namarhaliang i sipasahat pelean i, merende do nasida mamujimuji Jahowa Jesus
Kristus huhut diiringi parhinaloan (musik na pinalu). Akka ende hamauliateon
siala denggan basa ni Jahowa Jesus Kristus diendehon tikki na marhaliang i. Nuaeng di huria, mandurung tu jolo na ma goar
ni i sambil marende mamuji mandok mauliate tu Jahowa Jesus Kristus. Akka namalo
manggubah lagu, pintor boi do digubah jala diendehon i ende di tikki na
marhaliang i, jala isi ni lagu/ende i pajojorhon akka asiniroha dohot denggan
ni basa ni Jahowa Jesus Kristus, na takkas tung halongangan do i di parpsalmen
on dohot di akka na mandok mauliate tu Jahowa Jesus Kristus. Halongangan ma i tutu, ai dapotan pasupasu
iba, nang pe naung patut hona uhum hian ala ni godang ni dosa naniula. Ajaib do
TUHAN Jahowa Jesus Kristus. Ndang adong TUHAN na songon i. I do umbahen sai
diendehon nang nuaeng on: Kami memuji kebesaranMu, Ajaib TUHAN, ajaib TUHAN.
Kami memuji kebesaranMu, ajaib TUHAN, ajaib TUHAN. Pinuji balga ni pambaenanMi,
halongangan sudena i. Pinuji balga ni
pambaenanMi, halongangan, sudena i. Ndang holan panompaon ni portibi on dohot
nasa isina na gabe halongangan, alai tung dohot do sude pambahenan ni Jahowa di
bagasan Jesus Kristus maradophon Hajolmaon.
8. Biasana,
jolma na mananda akka dengganbasa dohot pasupasu ni Jahowa Jesus Kristus do na
sai manghaholongi hajongjongan ni bagas ni Jahowa dohot hasonggopan ni
hamuliaon ni Jahowa Jesus Kristus. Ianggo akka jolma na sai mangetong ngoluna,
hamoraonna, hagabeonna dohot hadumaonna holan ala ni prestasina sandiri, ndang tagamon
i manghaholongi hajongjongan ni bagas ni Jahowa dohot hasonggopan ni hamuliaon
ni Jahowa. Jolma na na so mangantusi aha naung dibahen TUHAN Jahowa marhite
ulaon, poda, dohot ngolu ni Jesus tu
jolma sinuaeng, ndatung olo i manghasiholi manang manghaholongi Jesus ro tu
bagasjoro nanggo sahali saminggu marminggu. Ala ni i do, unang marnaloja huria
i patorangtoranghon akka naung dipatupa Jahowa tu hajolmaon manang tu siihuthon
Jesus, marhite hatutubu, naniula, hamanate, haheheon ni Jesus dohot hananaek ni
Jesus tu banua ginjang. Ikkon gabe “mudar” na mengalir di pamatang ni ganup
Kristen pangantusion i, jala dipartondihon, asa tongtong gabe mangolu huria i
gok jolma na marsaor tu Jahowa Jesus Kristus di bagasjoro i. Sada hahurangan ni
jolma na maju nuaeng di Eropa, Rusia, Amerika, Tiongkok, Jepang, manang di dia
pe, i ma ndang diantusi jala maningkat tu ndang dihaporluhon be lapatan ni hatutubu, ngolu/naniula, hamamate, haheheon
ni Jesus dohot hananaekna tu banuaginjang. Sai pangalaho na “akristus” atheis,
alreligious, i ma na mampengaruhi ngolu ni jolma di Indonesia on. Ujungna
sursar ma paragamaon dohot haporseaon ni jolma di Indonesia on. Reaksi tusi
masa ma akka barisan radikal na mansai manghasogohon rumang ni parngoluon ala
ni pengaruh ni jolma na akristus, atheis dohot na areligious. Gabe masa ma akka
bom bunudiri, pambunuon atas nama agama, jala masapsap ma naso magulang. Porlu
disadarhon sude jolma, tarlumobi akka siihuthon Jesus, na tung ngolu na mansai denggan do molo jolma
(siihuthon Jesus) manghaholongi hajongjongan ni bagas ni Jahowa, dohot
hasonggopan ni hamuliaon ni Jahowa. Nasa jolma na songon i, dapotan hamuliaon
na luar biasa do jolma na
manghaholongi hamuliaon ni Jahowa. Jolma na apala martua di tano on dohot di
banua ginjang, i ma jolma na pajongjong bagas di Jahowa. Hamuliaon ni Jahowa
manggoki ngoluna di tano on dohot di banua ginjang. Ai na adil jala parlulu do Jahowa. TUHAN
Jahowa Jesus Kristus ma mangaluluhon (mangalehon haadilon tu) akka jolma na
mangulahon saluhutna nadenggan i. Amen.
Pematangsiantar, tgl. 16 Augustus
2017. Pdt. Langsung Maruli Basa Sitorus (Pdt. LaMBaS).
