EPSITEL MINGGU AKHIR TAHUN TGL. 20 NOPEMBER 2016: PSALMEN 46:1-12

PSALMEN

46:1   Hombar tu uluan ni parende. Sian angka anak ni si Kora. Logu: Alamot. Ende.

46:2   Debata (=’Elohim) do haporusanta (= parlinggomanta) dohot hagogoonta, (nunga takkas tarida i tung) pangurupion situtu di hagogotan, angka na mangonai tu hita.

46:3   Dibahen i ndang mabiar hita, nang pe balik (= muba) tano on, jala lalolalo angka dolok laho marongrong tu tongatonga ni laut.

46:4   Nang pe gasagasaon jala margumogumo angka aekna, pola humuntal angka dolok dibahen pasangnai (= umbaknai). Sela!

46:5   Sada batang aek, ro di sungena palas roha ni  huta ni Debata (= ’Elohim), inganan na badia ni Natumimbul.

46:6   Debata (= ’Elohim) do di tongatongana, ndang tagamon humordit, andostorang (= andorang so torang ari) dope, nunga diurupi Debata (= ’Elohim) ibana.

46:7   Guntur do angka parbegu, lonong (= gaor) angka harajaon, molo mangkuling Ibana, malala do tano on.

46:8   Jahowa Zebaot do donganta,  Debata (= ’Elohim) ni si Jakkob do partanobatoanta. Sela!

46:9   Sai ro ma hamu marnida halongangan (= ulaon) angka na binahen ni Jahowa, Ibana mambahen angka panonggoti (= tanda-tanda na naeng ro halekseon) di tano on.

46:10 Ibana do  pasohothon hamusuon ro di ujung ni tano on; Ibana do umponggolhon sior jala ditallihi hujur, dipuruni do angka hureta di bagasan api.

46:11 Pasohot (= So jo) hamu ma jala tanda hamu Ahu do Debata, sai timbul do Ahu sogot di tongatonga ni angka bangso, timbul di tano on.

46:12 Jahowa Zebaot do donganta, Debata (= ’Elohim) ni si Jakkob do partanobatoanta. Sela! 

Akka na surat miring i, maksudna holan lao pahantushon pangantusion tu terjemahan nabinaen ni LAI di hata Batak Toba do.

TARLINGGOM, MARGOGO JALA TARURUPI DI BAGASAN JAHOWA ’ELOHIM ZEBAOT 

1.      Sian najolo sahat tu nuaeng on, na dirajumi boi hatop manegai hangoluan ni hajolmaon i ma bencana alam (hasegaon ala ni portibi) di darat, di laut dohot di udara; asing ni i porang. Bencana alama di darat: lalo (gempa), mapultak dolok; manang erupsi dolok; marongrong dolok; banjir sunge; masa habahaba. Sude na on boi manegai, mangarusak huta ni jolma dohot pamatehon jolma so panagaman. Bencana alam di laut (sian laut) : tsunami; galumbang na mangalononghon kapal; habahaba na ro sian laut. Bencana di udara: Sillam dohot ronggur na manoro; madabu hopal habang (kapal terbang)  ala ni cuaca na roa (turbulensi) di langit manang ala sega kapal terbang i. Sude na on boi do tompu ro, so panagaman, gabe dileksehon jolma, disega ampuna ni jolma, jala mambahen korban mansai godang, so marpanukkun atik jolma na burju jolma i manang na jukkat. Di psalmen on digoari manang piga sian naboi mambahen bencana alam i : [balik (= muba) tano on; lalolalo angka dolok; marongrong tano tu tongatonga ni laut; margumogumo angka aek ni laut; humuntal angka dolok; guntur  angka parbegu; lonong (= gaor) angka harajaon], ala i dope na ditanda nasida. Molo hamusuon manang porang digoari  do i bencana kemanusiaan (hesegaon ala ni hajolmaon). Porang pe olo do ndang maradat mangaleksehon jolma, so mardiaimbar naburju dohot najukkat, pardosa dohot na so mardosa. Akka na porsea tu Jesus Kristus sai martangiangi do asa unang masa bencana alam dohot bencana kemanusiaan i. Alai nang pe songon i, tong do olo masa tompu akka bencana i. Mangantusi akka na masa na songon i, pangihut ni TUHAN Yesus Kristus porsea situtu do na boi do Jahowa ’Elohim Zebaot (TUHAN  Jesus Kristus) haporusan (parlinggoman), hagogoon dohot pangurupi mangadopi akka na masa na songon i. Alai sukkun-sukkun: Boha jala aha do bahenon ni jolma i asa boi pakkeon Jahowa i gabe parlinggoman, hagogoon dohot pangurupi? Ai tudos do i, molo naeng iba ndang hona udan, molo adong pe payung, ikkon tong do botoon mamakke payung i manangkis udan i asa unang tonu iba ala ni udan i.

2.      Debata (=’Elohim) do haporusanta (= parlinggomanta) dohot hagogoonta, (nunga takkas tarida i tung) pangurupion situtu di hagogotan, angka na mangonai tu hita. Haporusan i ma inganan tu dia iba ro marikkati jala marlinggom disi asa unang hona tu iba akka panegai ni hajolmaon manang panegai ni ngoluniba. Namarikkat mangadu inganan haporusan (parlinggoman) ndang na “melarikan diri” (maporus) sian parsoalan i. Alai na dilului ibana do inganan na boi manjaga asa unang mago hosana, asa sehat ibana, jala boi ibana sian inganan i pasidungkon akka parsoalan nadiadopan ni hajolmaon, tarmasuk naniadopanna. Asa boi mangeahi haporusan i, ikkon ditanda do takkas didia do haporusan i, di dia do pintuna, songon dia mangungkap pintuna i asa boi masuk; takkas diboto aha sibahenonna molo dung dapotna haporusan i. Molo Jahowa haporusan i, ikkon pahombar diri do tu Jahowa i akka na maporus tu Jahowa i. Unang diboan tusi “subang” ni Jahowa i; ditolak do annon molo adong lokkot di diri ni na ro tu haporusan i subang ni Jahowa. Hagogoon i ma haboion mangulahon ulaon mangatasi akka parsoalan naniadopan. Hagogoon i ndang holan tenaga (energi) dohot do bisuk, hapistaran, ip-tek, akkal na boi pakkeon laho mangatasi parsoalan na ro rongom. Asa dapot hagogoon i, ikkon do paradeon diri mandapot hagogoon i. Ndang madekdek sian langit ro hagogoon i tu pangihut ni TUHAN Jesus Kristus. Ikkon sehat do badan, tondi, roha, asa boi masuk energi (hagogoon) i. Ikkon adong do “dasar” (pengetahuan dasar) di diri ni naporsea i asa boi dipasahat Jahowa tu ibana bisuk, hapistaran, ip-tek., akkal dohot akka na asing nari. Molo dung dapot gogo, bisuk, hapistaran, iptek dohot akkal, ikkon malo do mamakke i, asa unang lam manegai dirina manang mangarusak jolma na asing. Adong do nadilehon hamaloon mambahen bom, ai ip-tek do i, alai tu aha i molo gabe dipakke do i lao mambahen bom bunuh-diri, bom mobil, mambom jolma na asing, manang mambom akka dekke di laut. Ndang songon i maksud ni Jahowa molo dilehon hagogoon tu akka pangihutNa. Hagogoon laho mangondihon hajolmaon do umbahen dilehon hagogoon i. Songon batere nadileheon energi do i: ndang laho mambahen asa tarbakkar radio/televisi manang mobil umbahen dileon energi tu baterena i, alai asa boi do mangolu denggan, jala mardalan denggan. Molo Jahowa gabe hagogoon, asa tung unang talu do haporseaon ni naporsea, ia tung boha pe posi ni parsoalan na tipa tu naporsea i. Pangurupion i ma akka naboi manolong manang mambantu iba laho mangatasi/pasidung parsoalan na masa asa tuntas. Asa boi dapot pangurupion, ikkon takkas do didia hagaleon na adong di diri ni pangihut ni TUHAN Jesus Kristus i. Dung i takkas tu ise pangidoon pangurupion i. Cara mangido pangurupion pe ikkon pas do. Sedangkan mangido pangurupion tu pamarenta ndang asal mangido, ikkon adong do proposal, adong pernyataan na so salah-gunahononna molo dung dapot pangurupion i, na so adong korupsi, dipaboa na martanggungjawab manjalo, mamakke dohot mangalaporhon pangurupion panggunahonon ni pangurupion i. Songon i do molo Jahowa gabe pangurupion tu ganup naporsea, siihuthon TUHAN Jesus Kristus. Dohot godang dope siparrohahonon dohot sibahenon asa dapot haporusan, hagogoon dohot pangurupion i.

3.      Dibahen i ndang mabiar hita, nang pe balik (= muba) tano on, jala lalolalo angka dolok laho marongrong tu tongatonga ni laut. Nang pe gasagasaon jala margumogumo angka aekna, pola humuntal angka dolok dibahen pasangnai (= umbaknai). Sela! Dison dipaboa manang piga bencana alam na mangancam ngolu ni jolma: Lalolalo akka dolok; marongrong tano tu laut, masa tsunami (gasagasaon aek ni laut), humuntal dolok. Mangadopi akka on ndang mabiar akka pangihut ni TUHAN Jesus Kristus. Boi songon i, ala adong do haboion ni akka naporsea i, mangatasi manang manisi (menghindar sian) akka bencana na songon i. Ndang boi intopanna akka bencana alam na songon i, alai boi “dihindari” (dipadao diri sian) dampak/pangontakna asa unang gabe dohot dileksehon. Diboto do na olo do tompu masa lalo, humuntal dolok na manghutur tano on, mambahen sega jala marruppakan akka jabu jala ditipa jolma na dibagasanna. Ala ni i, dipauli naporsea i do jabuna na tahan gempa (tahan tu lalo), ndang sega tung ro pe lalo na sampe sampulu skala Richter. Tusi dipakke ma hagogoon na sian Jahowa i. (Si Noak tikki i mambangun Parau/bahtera, kapal laut na luar biasa balgana, asa unang dohot ibana nang akka na rap dohot ibana dileksehon aek nasumar/tsunami i). Asa unang dohot naporsea i manang jabuna marongrong tu laut, molo olo do marongrong dolok-dolok tu laut, jolo takkas do diteliti, atik na tano na olo marongrong do inganan na niingananna i. Molo naolo marongrong do, dipadao do dirina sian i. Ndang dipauli jabu manang pabrik manang pembangkit listrik di atas ni dolok/tano na olo marongrong i. Ala diboto, olo do tompu masa tsunami, dipauli do alarm (panggora) na laho masa tsunami sian laut, asa diboto akka na maringan di topi laut boi mansai hatop marippoti (lari puntang panting) mandao sian inganan na olo dilaplap tsunami i. Dibangun di topi laut i bangunan na so tarhutur ni aek tsunami, asa boi tusi lao jolma palua dirina sian tsunami i. Songon i do na mandapot inganan haporusan, hagogoon dohot pangurupion sian TUHAN Jesus Kristus.

4.      Sada batang aek, ro di sungena palas roha ni  huta ni Debata (= ’Elohim), inganan na badia ni Natumimbul. Debata (= ’Elohim) do di tongatongana, ndang tagamon humordit, andostorang (= andorang so torang ari) dope, nunga diurupi Debata (= ’Elohim) ibana. Di ponggol paduahon ni psalmen on (Catatan: ganup ponggol diujungi dohot hata Sela), lam dipatakkas parpsalmen on mansoarahon songon dia muse Jahowa Jeshua Hammasiah gabe haporusan, hagogoon dohot pangurupion. Dipaboa aha dipatupa Jahowa tu pangihutNa na ro tu ibana mangeaki haporusan, mandapot hagogoon dohot pangurupion. Huta ni Debata (= ’Elohim), innganan na badia ni Natumimbul, diparade Jahowa ’Elohim gabe inganan haporusan ni akka siihuthon Jahowa. Di huta i rade akka jabu/gedung na so hahuturan ni lalo, na so olo marongrong, na so tarrumpakkon ni tsunami. Huta i pe boi do dieaki/dilojongi sian sude penjuru, asa ganup jolma na giot selamat¸malua sian bencana alam i, boi sahat tusi denggan. Jadi ndang holan tu Roma adong marriburibu dalan, tu huta nabadia/huta ni Natumimbul i pe, lobi sian dalan tu Roma godangna dohot ulina. Adong do disi akka stasiun anggkutan, lapangan terbang, hasonggopan ni helikopter, molo tung adong naikkon mamakke akka peralatan na songon i lao mangeaki huta ni Natumimbul i. Ndang tagamon humordit huta haporusan i, i ma huta ni TUHAN Jesus Kristus, Natumimbul i. Ndang holan nampuna huta i Natumimbul, dohot do huta i natumimbul sian akka huta na timbul. Jadi tandi jala takkas tarida do huta i. Ndang boi sidalian ni jolma mandok: “Ai so tarida huta i tu hami, jala ndang maporus hami tusi,” ndang boi ninnaonna. Timbul do di Jerusalem, tarlumobi di Dolok Golgatha, tanda manang partanda ni harajaon/huta ni Natumimbul i.

Alai ndang holan inganan haporusan Huta ni Natumimbul i. Badia do i, ai nabadia do nampunasa. Nadipasoding do huta i gabe inganan ni akka na ngoluna badia di portibi on. Habadiaon i do nagabe “karcis” boi masuk tu huta i, jala boi pakkeon laho mandapot akka narikkot niba di huta nabadia i. Misalna, molo rikkot diiba mual hangoluan pinarade ni Jahowa, pakkeon ma “karcis” habadiaon i laho mandapot i. Lobi moderen dope karcis on sian “kartu ATM”, alana molo kartu ATM holan hepeng do naboi diharuarhon i (molo topet PINna) sian poti panimpanan ni hepeng i. Ianggo karcis “BADIA” i, tu sude naporlu do boi marlakku i. Di Huta Nabadia i, ndang jadi mauas jolma naung masuk tusi. Diparade Jahowa sada batang aek (sunge) na marisi aek hangoluan, songon na pinaboana/nadipatakkas di buku Pangukkapon i. Sian aek i boi sude ndang hurangan aek hangoluan, asa tung lestari salelenglelengna hangoluan naung nidapot ni akka NABADIA i. Mangalir do torus-torusan aek hangoluan i, ndang hea marsik. Duapulu opat jom sadari adong do disi aek hangoluan. Malo, dohot gogo niba manahu do sian i, olat ni dihaporluhon ni ganup. Ala ni i do umbahen tardok ni parpsalmen on: andostorang (= andorang so torang ari) dope, nunga diurupi Debata (= ’Elohim) ibana, molo tung adong masa dope disi songon nanidokna di portibi on “borngin”. Di huta i sude mardalan hombar tu naniaturhon ni TUHAN Jesus Kristus (Jahowa Jeshua Hammasiah). Alana molo adong na so patu tu nadiaturhon i, rugi sandiri ma na so mangoloi i, jala olo do gabe pintor diharuarhon ibana sian i. Misalna adong ma na mambahen haramunon, mangaramuni inganan nabadia i, ba pintor sian sandirina do ibana ndang be parsidohot di akka nadenggan na adong di inganan ni Natumimbul i, nang pe ibana disi jongjong-jongjong. I ma nahumansit: molo di lambung niba adong na mambahen sai giot iba laho mandapot, alai ndang tolap ni hadirion  niba i boi mandapot. Ala sude do mardalan hombar tu pangaturon ni Jahowa, tung i do na gabe palashon roha ni Jahowa Jesus Kristus. Manang didia pe marlakku do na songon i. Las roha ni Jahowa Jesus Kristus i ma molo lomo ni rohaNa nadenggan i do masa di tonga-tonga ni hajolmaon. Molo las roha ni Jahowa Jesus Kristus, tung bane do roha ni Jahowa laho mangusehon pasupasuNa tu akka namangulahon lomo ni rohaNa i. Molo tarpasupasu naporsea i, i ma gok ni las ni rohana.

5.      Guntur do angka parbegu, lonong (= gaor) angka harajaon, molo mangkuling Ibana, malala do tano on. Dihatahon parpsalmen on tamba ni akka bencana na olo masa tu hajolmaon. Tanda-tanda ni hasipelebeguon dohot tanda ni naung gabe bangso parbegu do sada bangso, i ma molo sai marhagiot guntur jala molo sai guntur bangso i. Sai gaor akka harajaonnasida, jala ala ni i laos lonong manang mintop botima harajaon nasida i. Pamanat ma, umbahen na guntur portibi on dibahen si Hitler, Kaisar ni Jepang, dohot Presiden ni Italia jala dipukka Porang Dunia na Paduahon, ala namulak do ganup nasida tu hasipelebeguon; ditinggalhon si Hitler, ditundali presiden/perdana menteri ni Italia poda/ajaran ni TUHAN Jesus Kristus nang pe Katolik ibana didok; ditinggalhon Kaisar ni Jepang hasintongan/holong pinodahon ni agama Shinto. Marsakongkol ma natolu on mangalo sude negara na di portibi on. Gaor ma sude. Gabe mintop ma si Hitler dohot Nazi; mintop pamarenta Italia, jala dijajah Amerika ma Jepang. Nauntung do ngernger parmintopna i, jala marroha holong Amerika i umbahen so disesa botul Republik Federasi Jerman, negara Italia dohot negara Jepang. Nuaeng guntur akka harajaon di Timur Tengah, ala mulak tu hasipelebeguon, gabe bangso parbegu ISIS, Al-Qaeda, Boko Haram, Partai ni si Mursi. Dia ma sakkap ni Jahowa disi? Maol alusan. Alai sai masa do pambonsiri sian tonga-tonga ni akka naung gabe parbegu, asa adong dalan laho mangalononghon (pamagohon) nasida sian tano on. Jolma sandiri do manghancurhon jolma sahancur-hancurna. I ma jahat ni jolma sapala manombo sibolis i di dirina, jala sibolis i sanga mar-jemaah jala hajahaton i gabe hajahaton marjemaah. Gabe sai atas nama ni Debata nasida mambahen hajahaton tu donganna jolma. Ngeri ma pangontak na antong. Naunsusa, molo sampe do Jahowa pasombuhon bangso/harajaon i gabe “sibolison” nang pe sai mandok dirina “bangso ni Debata”, jala sai manjoujouhon: “Debata Nasuntimbul” di parhataan nasida be (di hata Arab, hata Latin, Hata Indonesia, dohot parhataan na asing). Jadi ganup paragama, ikkon pamanat dirina be do atik na hot dope di poda namangajari nasida be asa gabe “pasupasu tu hajolmaon”. Mangihuthon haporseaon ni parpsalmen on, na boi jo Jahowa sandiri mangalala tano on. Ai holan makkuling Jahowa, malala do tano on. Ala ni i do, asa uang sai “main-main” hajolmaon on di adopan ni Jahowa. Dioloi ma Jahowa ia tung pe sian dalan nadiajarhon agamana be. Tarlumobi Jahudi, Kristen, ikkon takkas jala tumakkas ma mangoloi Jahowa Jesus Kristus. Ai ndang olo Jahowa leaan, pasangapon do olo Ibana. Molo Jahowa do mangalala tano on, lam takkas ma boi Ibana haporusan, hagogoon dohot matamual ni pangurupion, matamual ni aek hangoluaon. Ai tung so olo lekse manang malala do na marpangondian tu Jahowa. Sai songon pidong rajawali do nasida, tung mansai gogo habang, jala boi mangatasi akka badai namasa di hajanghajang i, paima songgop muse tu asarna.

6.      Jahowa Zebaot do donganta,  Debata (= ’Elohim) ni si Jakkob do partanobatoanta. Sela! Jahowa lapatanna: Ibana do mambahen adong = Ibana do manjadihon. Zebaot lapatanna parangan pardisurgo (LAI: alam semesta). Jahowa Zabaot i ma Debata na “Ibana manjadihon akka parangan pardisurgo nang sandok portibi on (alam semesta)”. Molo tung adong pe disi na digoari ’elohim, Ibana do manjadihon i. Sude akka najinadihon ni Jahowa, ndang jadi sombaon manang gabe sioloan. Holan Jahowa do sisombaon manang sioloan. Ibana do Sipanompa, jala sasadasa do ’Elohim na sasintongna. Jahowa do ’Elohim ni si Jakob, ndang adong be ’elohim na asing dioloi si Jakob asing ni Ibana, ia tung pe mansai godang didok akka jolma i akka ’elohim di tano on. Ala ni i do umbahen tutu do boi Jahowa ’Elohim gabe partanobatoan (kota benteng). Manjaga inganan partanobatoan i dibahen Jahowa i ma sude akka paranganNa, sude akka natinompaNa, akka pardisurgo, jala tarmasuk akka digoari ’elohim, molo tung adong ’elohim na asing, asing ni Jahowa sandiri. Holan Sibolis dohot akka begu manang surusuruan ni Sibolis i do na so diloas dohot manjaga Partanobatoan (kota benteng) i. Boasa? Ala sai holan na menghianat tu Jahowa do ditahi dohot diulahon Sibolis dohot akka suruanna i. Jadi akka natolhas masuk tu kota benteng  (partanobatoan) i, pasti aman, sentosa, jala marhasonangan.

7.      Sai ro ma hamu marnida halongangan (= ulaon) angka na binahen ni Jahowa, Ibana mambahen angka panonggoti (= tanda-tanda na naeng ro halekseon) di tano on. Ibana do  pasohothon hamusuon ro di ujung ni tano on; Ibana do umponggolhon sior jala ditallihi hujur, dipuruni do angka hureta di bagasan api. Di ponggol patoluhon ni psalmen on, disosoi parpsalmen on do asa ro hajolmaon, tarlumobi akka naporsea/pangihut ni Jahowa Jeshua Hammasiah asa ro marnida akka halongangan nabinahen ni Jahowa. Halongangan do aka ulaon ni Jahowa i di hajolmaon, ala godang disi na so masuk akkal ni jolma.  Alai hangoluan do i di akka jolma na mangantusi, di jolma na tolap marnida ulaon ni Jahowa i. Ikkon malo do tong marnida namasa, na dikategorihon ulaon nabinahen ni Jahowa. Ndang boi asal dohonon, namasa i ulaon ni Jahowa, jala tong do ndang boi asal sangkalon. Alai na jelas, laho mambuktihon naniida i ulaon ni Jahowa, ikkon pakkeon do nasa ilmu pengetahuan dohot teknologi, bisuk, hapistaran dohot haporseaon. Martua dope jolma molo holan panonggoti ((= tanda-tanda na naeng ro halekseon) dope namasa (natarjadi) i. Dibahen na songon i, ssa adong tikki di hajolmaon laho parade dirinabe laho mangadopi bencana naumposi. Nunga godang na masa akka lalo, dolok mapultak, tsunami na mangaleksehon godang jolma dohot akka arta ni jolma i, alai ndang i dope haroro ni ajal ni hasiangan on. Holan panonggoti dope i.

Hamusuon manang porang takkas do marrumang panegai hajolmaon nabinahen ni jolma (bencana buatan manusia). Najolo adong do didok porang nanihalomohon ni Jahowa, alai dung ro TUHAN Jesus Kristus, ndang adong be porang nadianjurhon (disosoi) TUHAN asa patupaon ni jolma. Molo adong sapunguan jolma na sai mangasa porang jala pola diporangi bangso na asing (songon Nazi najolo manang ISIS dohot antek-antekna nuaeng on), ro do  Jahowa pasohothon hamusuon i ro di ujung ni tano on; Ibana do umponggolhon sior jala ditallihi hujur, dipuruni do angka hureta di bagasan api. Carana ro, dipabangkit do bangso nagogo laho mangintopi porang i, jala mangalo na sai mambahen porang i. (Misalna: tentara sekutu mangintopi porang binaen ni Nazi – Hitler; jala tentara sekutu mangintopi porang nabinaen ni ISIS/antek-antekna). Tumagon do ndang adong masa porang dohot hamusuon. Jala ikkon ma sude bangso marcita-cita patupahon dame di sude portibi on (songon semangat ni Negara Republik Indonesia). Hombar tu lomo ni roha ni TUHAN Jesus Kristus do dame adong di tonga-tonga ni akka bangso. Alana, tung mansai godang hasusaan ni rakyat molo masa porang dohot hamusuon. Namangahut hasusaan ni hajolmaon do molo masa akka hamusuon dohot porang. Laho mangintopi hamusuon dohot porang, boi do bahenon ni Jahowa songon namasa (tarjadi) tu raja Parao dohot tentarana di laut Rara di tikki diuluhon si Musa bangso Israel taripar sian Mesir tu bariba ni Laut Rara lao mangeaki Dolok Sinai (Horeb). Alai tong do boi bahenon ni Jahowa songon di tikki ni harajaon Persia napatalu harajaon Babel. Dipabakkit Jahowa raja Kores sian Persia laho patunduk raja ni Babel, jala patupa hadameon di sude luat naung tunduk tu harajaonna. Nuaeng on dipabakkit Jahowa do akka bangso laho mangaropuki sior dohot hujur (manang akka panser, peluru kendali) ni ISIS di Timur Tengah. Ditutung tentara sekutu akka kendaraan senjata berat (najolo didok hureta) ni ISIS i. Jadi ikkon adong do bangso na marsihohot di sinta-sintana laho mangalinggomi (mangaramoti) akka bangso na sai diporang bangso naasing, jala mamaksa akka bangso na sai tagi marporang asa ikkon mardame tu bangso nanimusuanna. Di roha ni akka  naporsea, na campur tangan do Jahowa di akka namasa si songon i.

8.      Pasohot (= So jo) hamu ma jala tanda hamu Ahu do Debata, sai timbul do Ahu sogot di tongatonga ni angka bangso, timbul di tano on. Ianggo akka naporsea sai diparrohahon do songon dia Jahowa campur tangan di akka namasa (natarjadi) di portibi on. Sai olo do akka naporsea i so satokkin laho mangarenunghon (pahusorhon di bagasan rohana) taringot tu namasa (natarjadi), jala olo masikukkunan tu donganna, taringot tu songon dia do lomo ni roha ni Jahowa Jesus Kristus taringot tu na masa i. Rikkot do nang akka jolma na di portibi on, so satokkin laho mananda na Jahowa do Debata, na rikkot patimbulonnasida di tonga-tonga ni bangso nasida, asa timbul Jahowa di saluhut bangso na adong di tano on. Boasa rikkot i? Asa timbul bangso i. Asing ni i, asa tubu giot ni roha ni ganup bangso patupahon dohot mangaramoti dame dohot hasintongan. Boha do parboina timbul Jahowa di tonga ni akka bangso, timbul di tano on? Ai lam tu godangna do bangso na anti-Jahowa manang anti-TUHAN Jesus Kristus? Lam anti sada bangso tu Jahowa Jesus Kristus, lam timbul do Jahowa Jesus Kristus di tonga ni bangso i. Alai najumotjot dalan laho mambahen timbul Jahowa, ala poda ni Jahowa Jesus Kristus, akka poda na manarihon hadengganon ni ngolu ni hajolmaon di tano on do dohot di banua ginjang, na ikkon ulahonon ni ganup bangso i molo giot roha ni bangso i denggan. Sude do hajolmaon masihol mandapot jala mangolu di poda ni Jahowa i, ia tung pe maila bangso i mandok naung gabe pangihut ni Jahowa do nasida. Nunga masa na songon i nang nuaeng on. Siulaon ni akka naporsea/pangihut ni Jahowa Jesus Kristus nuaeng on, i ma torus patoranghon poda ni Jahowa Jesus Kristus i, marhite na mamakke nasa peralatan siar naung boi dipakke jolma. Ulaon marbaritanauli do goar ni i somalna didok.

9.      Jahowa Zebaot do donganta, Debata (= ’Elohim) ni si Jakkob do partanobatoanta. Sela! Godang do mangambat ulaon marbaritanauli nuaeng on, tarlumobi di Indonesia. Alai ndang porlu akka pangihut ni Jesus Kristus hatahuton ala ni godang ni pangambati i. Siulaon ni pangihut ni Jesus Kristus, lam martoruk ni roha jala lam marsitutu mambangun bangso Indonesia dohot hadengganon ni akka parsaoran ni jolma na marragam agamana. Laho mangula i sude, Jahowa Zebaot do dongan ni naporsea i, Debata ni si Jakob do partanobatoanna. Molo tung pe ikkon mate pangihut ni Kristus di portibi on ala manghophop Barita Nauli na sian TUHAN Jesus Kristus, donganna do Jahowa, jala di parade do kota benteng (partanobatoan) bahen inganan ni akka namate di bagasan TUHAN Jesus Kristus. Tusi  do dipasahat ganup namate di bagasan TUHAN Jesus Kristus di tikki dipasupasu jala diagendai laho pamasukkon na mate i tu udean (tanomanna). Molo Jahowa dongan, adong ma partanobatoan (kota beteng) di tano on dohot di banua ginjang, adong huta nabadia, huta ni Natumimbul i na gabe haporusan ni ganup naporsea, pangalapan gogo dohot pangurupion di tano on. Martua ma naparade dirina asa gabe boi masuk tu Huta Nabadia i, Huta ni Natumimbul i. Amen.

Pematangsiantar, tgl. 7 Nopember 2016. Pdt. Langsung Maruli Basa Sitorus (Pdt. LaMBaS)