JAMITA SIAN EVANGELIUM TU MINGGU TAHUN BARU, TGL. 1 JANUARI 2017, EVANGELIUM: JESAYA 63:7-9

JAMITA SIAN EVANGELIUM TU MINGGU TAHUN BARU, TGL. 1 JANUARI 2017, EVANGELIUM: JESAYA 63:7-9

04.56.00 0 Comments A+ a-

 JESAYA 63:7-9

63:7 Sai baritahononku do angka denggan basa ni Jahowa, angka pujipujian ni Jahowa, ai ido na tama marningot sude na binahen ni Jahowa tu hita, dohot ala ni godang ni denggan basana tu pinompar ni Israel, na binahenna tu nasida hombar tu angka asi ni rohana dohot tu godang ni denggan ni basana.
63:8 Ai ninna do: Tongon do, bangsongku do nasida, * anak angka na so olo paotootohon. Jadi dung songon i ibana ma sipalua nasida.
63:9 Di nasa hagogotannasida, dohot ibana targogot, jala * suruan ni bohina i paluahon nasida; sian holong ni rohana dohot sian pangolanina ibana paluahon nasida, jala dihindat nasida, jala * diompa ganup ari, sian na robi dope.

MAMASUKI TAON NAIMBARU ON SAI TABARITAHON MA AKKA DENGGAN BASA NI JAHOWA
1.        Hamuna amanami/inanami, hahaanggi pinaribot na hinaholongan ni TUHAN Jesus Kristus.  Tapasahat be ma jo tu akka donganta, tu hita sama hita, Selamat Taon Baru 1 Januari 2017, huhut mandok: Dipasupasu jala didongani TUHANta ma hita (Gok Pasupasu dohot asiniroha ni TUHANta ma hita). Mandok mauliate ma hita tu TUHAN i, ala boi hita masuk tu Taon Baru 2017, mardongan panghirimon, ia hita, ngolunta dohot negaranta lam tu denggan na ma di taon 2017 on.  Nabodari nunga tabege akka na diparukkilhon Huria Kristen saleleng ni taon 2016, dohot akka na diarop rohanta boi patupaonta di taon 2017, asa tung haru lam denggan ngolu ni parhuriaonta i. Di jabunta be pe, nunga masipasahat Selamat Taon Baru hita, jala nunga masisesaan dosa hita, asa tung haru bolong dosa na di taon 2016 i, jala asa anggiat tung sude hita boi mamulai pardalanan ni ngolunta di taon 2017 on so marlaok  dosa dohot hasalaan. Jala mulai sian ari on, semangatta naimbaru i marjembur lao masiurup-urupan, jala kerjasama,  asa dapotta ngolu sorgawi na tung mansai uli jala denggan di tano on. Taendehon ma tong “HKI dengan semangat Baru”.
2.        Di pardalanan ni ngolunta saleleng ni umurta naung tadalani i, pasti do mansai godang akka namasa tu ngolunta. Adong do na masa i namambahen sonang rohanta, alai laos adong do i na mambahen hita tariluilu, tumatangis, jala margondok ni roha. Ra godangan do ariari ni ngolunta i na tasalpuhon songon i sajo, so adong nataingot na masa disi. Molo ariari ni ngolunta sai di bagasan tolu partikkian do, i ma “nantoari”, “tikki/ari on” dohot tikki “marsogot”. Molo tikki nantoari (manang naung salpu marpulutaon i), gabe akka tikki siingoton na ma i, jala nunga gabe “sejarah” i di ngolunta be.  Tung mansai godang do siingotonta na masa di tikki nasalpu i, molo ringgas hita mancatat akka na masa tu ngolunta, jala boi jahaonta muse akka naung tahilala di ari, minggu, bulan, taon dohot saleleng ni tikki na salpu di ngolunta. Sian i boi ma analisaonta, atik na ganup naung masa tu hita i songon parbue ni na tabahen manang ala ni prestasinta, manang na ala na campur tangan do TUHAN di ngolunta, manang na “sorop ni sibolis i” do na mangimbotbot di ngolunta be. Manang aha pe naung masa jala tahilala di tikki nasalpu i, gabe modalta ma i (ndang gabe model di hita) laho mandalani ariari ni ngolunta siganup ari, di tikki on dohot di ingananta nuaeng.  Ari on, tikki on, i ma kesempatan di hita mamparjuanghon asa mangolu hita lam denggan. Di parjuangan i, ndang boi lemba nanggo sada sian hita, ndang boi marlehaleha, manang marlambat-lambat, manang asal-asalan mangula ulaon. Ikkon ulahononta do ganup ulaon i topet waktu, serius/marsitutu, unur jala atur, maksimal, mansai denggan, hasilna tahan uji, jala sude na i lao mangeahi sinta-sinta ni rohanta.  Tikkinta sinuaeng,  bagian ni rakke-rakke ni ngolunta na naeng ro do i, i ma ngolunta di ari “marsogot”. Alai taboto ma, ianggo ari “marsogot” i ndatung na hea tadalani i, andorang so ari “marsogot’ i muba gabe ari saonari, manang tikki nuaeng on. Manang aha pe natadok dapotta “marsogot”, torus do holan sinta-sinta i, na diarop roha. Molo naeng dapotta nataarop, unang ma didok: Marsogot pasti do dapotthu i jala daionhu!” Alai tadok jala taulahon ma: Saonari nunga dapot tikkina laho mangulahon asa dapot i, jala saonari ma dapot i. Molo songon i, takkasma akka tikki “marsogot” gabe tikki saonari ma i, jala sude tikki na nidalanan i, gabe bagian ni rakke laho manggohi akka natahirim ma i. 
3.      Hamu na nahinaholongan, hahaanggi, pinaribot, amanami dohot inanami. Sude akka namasa natahilala di tikki nasalpu i, gabe modalta ma i mandalanhon ngolunta di ari on, saonari di ingananta be; alai ndang gabe model i baenonta tu ngolunta saonari. Molo tadalanhon ngolunta mar­modelhon pangalaman naung salpu i, martada do i annon tu parjuanganta sisaonari on. Alai ngolunta saonari tabangun ma marmodalhon akka pangalaman naung salpu i. Jala molo songon i do, pasti do ngolunta on dinamis, relevan jala maju hombar tu akka siparjuanghonon di ngolu saonari, nuaeng di ingananta be. Pangalaman i marragam do. Adong do i namarisi jala mardongan denggan basa ni Jahowa, adong marisi jala mardongan pambahenan ni TUHAN sipujion dohot asiniroha (kebajikan) na sian TUHAN. Sudena i gabe modalta laho mangalakka dohot marjuang di tikki saonari. Akka namasa nantoari nunga salpu be i, jala pasti do ndang mangulakkon masa i. Molo tung adong pe namasa tarsongon namirip tu si nantoari, alai ianggo na masa saonari nang pe mirip i tu sinantoari, tong do naimbaru i. Unang sai taparsinta masa saonari songon namasa najolo i. Akka pambahenan denggan basa, pambahenan ni Jahowa na tung mansai sipujion, akka asiniroha ni Jahowa namasa nantoari (di tikki nasalpu), nunga be salpu i, jala gabe siingoton na ma i saonari. Mambaritahon sasudena i saonari, barita siingoton na ma i, jala bahenon ma i gabe modal asa lam pos rohanta, na tong do muse adong pambahenan dengganbasa naimbaru sian Jahowa, adong pambahenan ni Jahowa na tau sipujion jala leonon ni Jahowa asiniroha (kebajikan) naimbaru tu hita, jala marudutudut bahenonna akka naimbaru i.
Di Taon Baru on, unang ma hita holan mambaritahon akka naung binahen ni Jahowa tu hita, alai  ikkon baritahononta manang paboaonta manang surathononta di raksa (rencana) ni ngolunta tarlumobi taringot tu akka dengganbasa, pambahenon sipujion dohot akka asiniroha ni Jahowa nanaeng pamasaon ni Jahowa Jesus Kristus di ngolunta di taon 2017 dohot taon namangihut. Dung i taparade ma dirinta asa parsidohot hita be di bagasan pambahenan denggan basa ni Jahowa, dohot di pambahenanna sipujion i, dohot di akka asiniroha sibahenon ni Jahowa i. Misalna: Di tangiangta manang di rencana ni keluarganta, di rencana ni Huria, tadokma: Sude Huria Kristen malua sian akka panggugai ni jolma radikalis saleleng ni taon 2017, jala i ma tanda ni na adong pambahenan denggan basa, pambahenan sipujion dohot asiniroha ni Jahowa tu sude Huria i. Dung direncanahon na songon i, diatur ganup Huria (jemaat) ma strategi, asa aman Huria i ganup jala ndang adong na diganggu manang disegai akka jolma radikalis. Mardomu tusi, diula Huria i ma: (1) Kompak tu akka dongan jolma na maragama na asing, na so Kristen. (2) Kompak Huria i tu akka pangula di negara (aparat pemerintah). (3) Diparsiaphon ma adong hagogoon na boi mangordap dohot mangalo akka jolma radikalis. Contoh na asing: tarencanahon ma ia di taon 2017 parhepengon ni rumatangga manang huria marlobilobi, lobi sian nacukup, ala ni denggan basa ni Jahowa dohot asi ni rohana, dohot pambahenanNa sipujion. Dung i disusun ma akka usaha/kegiatan  siulahonon asa boi parhepengon ni rumatangga manang huria i surplus, i ma akka usaha manamba pandapotan ni ganup rumatangga, usaha lao manamba pandapotan ni huria. Asa tung tarida akka denggan basa, pambahenan sipujion sian Jahowa dohot akka asiniroha ni Jahowa, ikkon ma ganup rumatangga, ganup huria (zetel dohot pagaran), ganup resort, ganup daerah, ganup Huria sadenominasi (sa-sinode) karejo marprogram, mambahen rencana strategis siulahonon di bagasan sataon, lima taon, manang di akka taon lao mangeahi umur ni huria marratus taon.
4.      Molo ganup keluarganta, Hurianta karejo marprogram jala marrencana strategis, i ma songon dalan mandok (mamaritahon) akka pambahenan denggan basa, sipujion dohot asi ni roha ni Jahowa, i ma tandana na akkas do keluarganta dohot hurianta bagian ni bangso ni Jahowa, jala akka anak ni TUHAN na so olo paotootohon (berlaku curang). Botulbotul ma hita keluarga dohot huria na so olo mangkorupsihon uang, mangkorupsihon poda/haporseaon, manang mangkorupsihon hasatiaon. Sude hita mangula dibagasan hasintongan, jala tikkos-tikkos mamakke rencana strategis, program, tikki, hepeng dohot akka parkarejo na the right man on the right place  (ganup tikkos be ulaonna hombar tu hamaloona be). Ganup parkarejo i satia di poda, haporseaon dohot parjuangan. Master Plan, Program, dohot Anggaran Sataon dibahen gabe “kendali” (res) ni keluarga manang huria  asa unang mangulahon korupsi dohot ulaon napaotootohon. Tapakke ma Katekismus dohot Pedoman Karakter Umat na adong di Master Plan i gabe “kendali” (res) ni hata dohot pambahenan manang pangalaho, asa unang masa korupsi poda/haporseaon dohot hasatiaon. Sian mulai taon baru on dohot di akka ari, minggu, bulan dohot taon na mangihut, sude ma hita mambahen dohot manjaga asa unang ala ni pangalahonta gabe pargabus TUHAN Jesus Kristus dirajumi halak di portibi on. Molo gabe jolma napaotootohon do hita, nunga tabahen TUHAN Jesus Kristus gabe pargabus. Alana IBANA do manjamin, na hita bangsoNa jala hita botul-botulk anak TUHAN na so mangulahon sipaotooto (na so berlaku curang). Jadi di bagasan taon on, taulahon ma akka ulaonta i sajujur-jujurna, sasintong ni sintongna jala satikkos ni tikkosna. Misalna: Molo tapapungu akka pelean hamauliateon, ganup ma hita mangalehon sajujur-jujurna, jala akka parhalado pe ikkon ma manyetorhon akka pelean i hombar tu posna be sajujur-jujurna. Unang be adong akka “pengalihan-pengalihan” ni akka pelean. Molo diaturhon do asa sude huria papungu pelean namarboho di sada parmingguon, misalna tu ulaon hatopan di pusat, disetorhon ma pelean i so jolo dipotong-potong manang dioruorui, ala didok porlu hepeng na dipotong i tu ulaon di jemaat i. Ai tu na songon on pe marlakku do hata ni TUHAN namangajari hita: “Dokkon sintong molo sintong, dokkon sala molo sala. Asing sian i, dosa do.” Ulaon paotootohon manang masipaotootoan, dosa manang kecurangan do i. Dosa masipaotootoan ikkon mago sian ganup keluarga dohot huria ni TUHANta. Godang dope akka contoh ni kecurangan songon nanidok ni Apostel Paulus do Galatia 5:19-21a: parmainanon, hahodaron, pargadombuson, hasipelebeguon, hadatuon, parmusumusuon, parbadabadaon, pangiburuon, rimasrimas, pargutugutuon, parsalisian, partahitahion, bunubunu, parmabuhon, haormuson jala angka na suman tusi. Alai akka pambahenan na sintong jala jujur  i ma songon nidok ni Apostel Paulus di Galatia 5: 22: Holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon. I ma nanidokna Parbue ni Tondi. Tatorushon ma pataridahon akka parbue ni Tondi on saleleng ni ngolunta dohot di ngolu ni Huria Kristen. Pangontak ni hajujuronta i mangula ulaon i tarida ma i di ngolunta dohot di ngolu ni huria i, na botul-botul do TUHAN Jesus Kristus Sipalua di hita dohot di huria, napaluaon hita sian nasa hagogotan. Manang ise pe na so mangulahon kecurangan (ulaon sipaotooto) ala na patu ibana tu poda ni TUHAN Jesus Kristus, pasti do malua sian hagogotan di bagasan sataon on, jala molo tung pe masa hagogotan tu ibana, sai na boi do atasanna i rap dohot TUHAN Jesus.
 5.      Nunga ro TUHAN Jahowa manopot hita hajolmaon di portibi on di bagasan/marhite TUHAN Jesus Kristus. Jesus ndang holan suruan ni bohi ni Jahowa, tung Jahowa sandiri do ro marrumang jolma. TujuanNa umbahen na ro, i ma lao patuduhon dohot mambahen udut ni akka pambahenan denggan-basaNa, dohot manguduti ulaonNa sipujion nang akka asinirohaNa; lao paluaon akka na olo paluaon. Evangelium ni si Johannes mandok: “Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana (Joh.3:16)..” Di tikki ni panurirang Jesaya, dipatuduhon Jahowa pambahenanNa paluahon harajaon Juda sian tangan ni harajaon Assyur. Di tikki i nunga marutang dosa halak Juda ala pambahen ni  raja Ahas namanimbil gabe manomba debata Baal ni halak Assyur. Dionjar holong ni rohaNa tu bangsoNa, dipalua Jahowa bangso Juda sian pangago ni raja Tiglath-Pileser dohot raja Samanasser, raja ni Assyur. Di na ro IBANA di bagasan TUHAN Jesus Kristus, ala paluaonna ma bangsoNa dohot hajolmaon on sian gomgoman ni hamatean, marhite na durus mudar ni Jesus Kristus di Dolok Golgatha, mate jala hehe Ibana manaluhon hamatean i. Utang mudar ni jolma i digarar. Tondi ni jolma diselamathon. Hamatean, na sai naeng mamolgak jolma, jala najorbut situtu, ditaluhon TUHANta.  Ndang dalan tu hamatean saleleleng ni lelengna be hamatean i, alai nunga dibahen gabe dalan tu hangoluan saleleng ni lelengna di surgo di lambung ni TUHAN Jesus Kristus.
Godang jolma mandok na so rikkot ibana paluaon manang tobuson marhite mudar ni Kristus. Ala dietong nasida agamana i do dalan na tigor jala nabonar (sintong). Agama Baal pe tong do mandok ibana agama na sintong. Alai agama on tong do manuntut mudar ni jolma pelehonon ni jolma manang usehonon ni jolma. Raja Ahas sandiri di bagasan haliluonna i mamelehon anakna tu Molok, songon hataridaan ni panombaonna tu Baal. Agama Jahowa pe tong do manuntut asa pelehonon mudar ni akka binatang (lombu, birubiru, hambing, anduhur) sipelehononon, songon sikkat ni mudar ni jolma. Alai dung ro TUHANta dibagasan diri ni TUHAN Jesus Kristus, Jahowa ndang be manuntut mudar pelehonon tu Ibana. Ndang lomo be roha ni Jahowa adong mudar na durus ala pasangaphon Ibana. Molo adong agama na mandok agama i agama natigor jala nasintong, hape sai mauas mandurushon mudar ni akka na so marpipot na so siihuthon agama i, tong dope dohot agama na songon i tobuson ni mudar ni Kristus Jesus na durus di dolok Golgatha. Tugas ni hita huria ni TUHANta ma di taon 2017 on mambahen sadar jolma, na margama dia pe taho i, na so porlu be mandurushon mudar ni akka jolma paragama na asing atas goar ni agama natigor i. Nunga ditobus marhite mudar ni Kristus Jesus sude akka jolma paragama, jala ala ni i na so jadi be adong namandurushon mudar ni na so marpipot atas goar ni agama, manang asa pasangaphon debata sinomba ni jolma hombar tu poda ni agama.
6.      Akka pambahenan ni TUHAN na masyhur manang na gabe sipujion ala ni asinirohaNa, i ma haoloonNa manghindat  dohot mangompa bangsoNa di pardalanan ni ngolu ni bangsoNa naung tinobus jala pinaluaNa i. Tema ni Sidang Raya (Rapot Bolon) ni PGI na baru salpu mandok: TUHAN mangenet hita tu ginjang sian akka lung ni tano on (Pslamen 71:20). Halak Kristen di Indonesia on torus dope mamparukkilhon akka pambahenan ni TUHAN lao paluahon dohot mangurupi halak Kristen haruar sian tonga-tonga ni parhalisung ni lung (samudera raya) politik, hapogoson, radikalisme, dohot hasesega ni portibi nahumaliang (lingkungan) na sai torus naeng mangharomhon parau oikumene manang parau ni Huria Kristen na mardalan di aek ni lung NKRI nuaeng on. Dihalomohon TUHANta do mangompa bangsoNa jala mameakkon bangsoNa/Huria Kristen  i di portibi na gok dame, sonang, jala dapot haadilon tu sude rakyat Indonesia. Nunga marjanji TUHANta mandok: “Jala pabangkiton ni Jahowa ma ho gabe ulu (ihutan), unang gabe ihur (pangihutihut); ingkon tongtong do ho di ginjang, ndang jadi ho di toru, molo tung ditangihon roham angka patik ni Jahowa, Debatam, angka na hutonahon i tu ho sadarion ringkotanmu jala ulahononmu. Molo tung so manimbil ho tu siamun manang tu hambirang sian saluhut hata, angka na hutonahon i tu hamu sadarion, unang tung ihuthononmu angka debata sileban laho marsomba tusi. (5Musa 28:13-14).”
Molo gabe lumpu pe Huria i ala ni pamokkik ni portibi on, unang hita mabiar. TUHANta ro do mangompa hita. Didok si Jesaya do nang dibukuna i: “Sahat ro di hatutuamu sai tongtong do ahu, jala ro di * na ubanon sai ahu do mangusung hamu. Ahu do mambahensa na sai laon, ahu do mangompa, ahu do mangabing jala ahu paluahon nuaeng (Yesaya 46:4).” Ibarat ni jolma nametmet (posoposo) naniompa hita, asa tung aman ndang diganggu halak, dibahen hita tu inganan na mansai sonang situtu. Di naung tang hita di haporseaon, tong do hita diompa, asa unang lilu hita dililuhon Sibolis i, jala asa unang gabe hapusokan hita ala ni pangondam-ondam ni akka anti Kristen i.
Marhasil do pangompaon nabinahen ni Jahowa tu hita molo olo hita diompa. Diompa marlapatan do i olo mansai solhot manang lokkot tu tanggurung manang tu andora ni TUHANta na mangompa hita. Jadi molo diompa TUHAN i hita, ikkon olo do hita lokkot manang lohot tu TUHANta, jala hita ndang be gabe jolma na mangariari na so tontu lakka-lakkana. Molo diompa hita, hilalaonta ma boha tabona dohot lambokna di ompaan dohot di pandidengon ni TUHANta. Alai tujuan ni TUHANta, ndang na lao pamanja-manjahon hita, alai TUHAN i  paradehon hita,  asa boi hita gopas jala koras karejo mangulahon lomo ni roha ni TUHAN di portibi on, jala laos manogihon akka jolma na asing asa songon hita nasida siulahon HATA i. Taon 2017 i ma sada partikkian di hita laho mambahen tarida hasasaut ni lomo ni roha ni Jahowa di tonga-tonga ni bangsonta Indonesia, i ma : haadilon sosial tu sude panduduk ni Indonesia so mardiaimbar; manjaga jala mangaramoti hadameon di huria, di masyarakat dohot di negara Indonesia dohot di portibi on. Sai didongani jala dipasupasu TUHAN i ma hita sude mandalani taon 2017 jala mandapot lam tu godangna hasukseson  di akka ulaonta be. Amen.
Pematangsiantar, 11 Desember 2017. Pdt. Langsung Maruli Basa Sitorus (Pdt. LaMBaS).
HKI DAERAH VIII

Langganan: Posting Komentar (Atom)